بھارت ہمیشہ میلی آنکھ سے دیکھتا، ناپاک عزائم ناکام بنائیں گے: صدر زرداری
اشاعت کی تاریخ: 24th, March 2025 GMT
اسلام آباد (خبر نگار خصوصی) صدر مملکت آصف علی زرداری نے کہا ہے کہ آزادی بے پناہ قربانیوں کے بعد ملی ہے اور اس آزادی کا تحفظ ایک بہت بڑی ذمہ داری ہے جس کے لیے پوری قوم اور مسلح افواج ہر قسم کی قربانی دینے کے لیے تیار ہیں۔ یوم پاکستان کے موقع پرپریڈ سے خطاب کرتے ہوئے صدر مملکت نے کہا کہ اتحاد، ایمان اور نظم و ضبط بانی پاکستان قائداعظم محمد علی جناح کا دیا ہوا نصب العین ہے جس سے ماضی میں ہر آزمائش پر پورا اترے ہیں اور ہم نے تمام بیرونی اور اندرونی دہشت گردی کا منہ توڑ جواب دیا۔ صدر مملکت نے تاریخی دن پر قوم کو مبارکباد دیتے ہوئے کہا کہ 23 مارچ قوم کے لیے ایک اہم دن ہے کیونکہ آج کے دن ہم نے قائداعظم کی قیادت میں آزادی حاصل کی اور علامہ اقبال کے خواب کی تعبیر ممکن ہوئی۔ انہوں نے کہا کہ آزادی کیلئے لاکھوں مسلمانوں نے قربانی دی اور خواب کو حقیقت میں بدل دیا، آج کے دن ہم اپنے شہدا کو خراج عقیدت پیش کرتے ہیں۔ صدر مملکت نے کہا کہ پاکستان کی تخلیق کا مقصد مساوات، انصاف اور قانون کی حکمرانی کے اصولوں پر مبنی جدید فلاحی ریاست کا قیام تھا اور ہم ان مقاصد کو حاصل کرنے کا عہد کرتے ہیں اور اسی جذبے کے ساتھ آج کا دن منایا جا رہا ہے۔ بھارت پاکستان کو ہمیشہ میلی آنکھ سے دیکھتا ہے، فتنہ الخوارج اور دیگر دہشت گرد تنظیمیں اپنے ناپاک عزائم کے حصول کیلئے کوشاں ہیں، تاہم صدر مملکت نے واضح کیا کہ پاکستان کے عوام اور مسلح افواج متحد ہیں اور دشمن کے ناپاک عزائم کو ناکام بنائیں گے۔ تقریب میں وزیراعظم محمد شہباز شریف، سپیکر قومی اسمبلی سردار ایاز صادق، چیئرمین سینٹ سید یوسف رضا گیلانی، تینوں مسلح افواج کے سربراہان، اعلیٰ فوجی افسران، وفاقی وزراء، ارکان پارلیمنٹ اور سفارتکاروں نے بھی شرکت کی۔ صدر مملکت آصف علی زرداری نے مزید کہا کہ اپنی نوجوان نسل میں نفرت اور مایوسی پھیلانے کی کوششوں کا مقابلہ کرنا ہو گا۔ انہوں نے کہا کہ ففتھ جنریشن وار فیئر ایک چیلنج کی صورت اختیار کر چکا ہے۔ ہم مشکلات پر قابو پانے کی صلاحیت رکھتے ہیں، ہم ایک باحوصلہ قوم ہیں اور چیلنجز سے نہیں جھکیں گے۔ ہمیں قو م کی توانائی اور صلاحیتوں پر اعتماد ہے اور ہم مشکلات سے کبھی نہیں گھبراتے۔ انہوں نے اس عزم کا اظہار کیا کہ تمام اندرونی اور بیرونی سازشوں کے باوجود پاکستان کی تعمیر و ترقی کا عمل جاری رہے گا۔ انہوں نے کہا کہ پاکستان کو جغرافیائی اور سیاسی مسائل کا سامنا ہے جبکہ ہماری بہادر مسلح افواج عوام کے شانہ بشانہ بے شمار قربانیاں دے رہی ہیں۔ صدر مملکت نے دفاع کو مزید مستحکم بنانے، زراعت سمیت اقتصادی شعبوں کو فروغ دینے اور نوجوانوں کے لیے روزگار کے مواقع پیدا کرنے کی ضرورت پر زور دیا۔ انہوں نے کہا کہ ہم اپنی سرحدوں کی حفاظت یقینی بنائیں گے۔ معیشت، زراعت مستحکم کریں گے اور توانائی کا تحفظ بھی کریں گے۔ صدر مملکت نے قوم کے نوجوانوں کو ’قوم کا اثاثہ‘ قرار دیتے ہوئے انہیں تحقیق پر مبنی تعلیم اور جدید ترین تکنیکی تربیت سے آراستہ کرنے پر بھی زور دیتے ہوئے کہا کہ ہم اپنی نوجوان نسل کیلئے روزگار پیدا کریں گے کیونکہ نوجوان ہمارے ملک کا قیمتی سرمایہ ہیں۔ صدر نے کہا کہ پاکستان کی خارجہ پالیسی استحکام اور امن کو یقینی بنانے پر مبنی ہے اور ہم اپنے پڑوسیوں اور عالمی برادری کے ساتھ باہمی احترام اور خوشحالی کے مشترکہ اہداف پر مبنی مضبوط تعلقات چاہتے ہیں۔ آصف علی زرداری نے بے مثال قربانیاں دینے پر مسلح افواج اور قانون نافذ کرنے والے اداروں کو بھی خراج تحسین پیش کرتے ہوئے ان کے عزم اور بہادری کو سلام بھی پیش کیا۔ صدر مملکت نے کہا کہ آج کے دن بھی ہم اپنے کشمیری بھائیوں اور بہنوں کو بھی نہیں بھولے جو طویل عرصے سے بھارت کی ریاستی دہشتگردی کا شکار ہیں۔ صدر مملکت نے ان سے مکمل یکجہتی کا اظہار کرتے ہوئے ان کی بے مثال قربانیوں کو سلام پیش کیا۔ صدر مملکت نے اس عزم کا اعادہ کیا کہ پاکستان کشمیریوں کے حق خودارادیت کے لیے تمام عالمی فورمز پر آواز بلند کرتا رہے گا اور عالمی برادری سے مطالبہ کیا کہ وہ اقوام متحدہ کی قراردادوں پر عملدرآمد کو یقینی بنائے تاکہ کشمیری اپنے مستقبل کا فیصلہ خود کرسکیں۔صدر مملکت نے فلسطینیوں کے ساتھ پاکستان کی جانب سے یکجہتی اور ان کے حق ارادریت کیلئے پاکستان کے مضبوط عزم کا اظہار بھی کیا اور عالمی برادری پر زور دیا کہ وہ نسل کشی کو روکنے کے لیے فوری فیصلہ کن اقدامات کرے صدر مملکت نے دعا کی کہ اللہ تعالیٰ ہمیں عزت و عظمت اور سربلندی کے راستے پر چلنے کی توفیق عطا فرمائے۔ انہوں نے شاندار تقریب کے انعقاد پر پریڈ کمانڈر کو بھی سراہتے ہوئے کہا کہ یوم پاکستان کی تقریب ایک مستحکم پاکستان ، قومی یکجہتی اوروقار کا منظر پیش کر رہی ہے۔تقریب کے دوران پاک فضائیہ کی جانب سے شاندار فلائی پاسٹ کا مظاہرہ کیا گیا۔شیردل، میراج، ایف 16، جے ایف 17 تھنڈر اور جے 10 سی کی مختلف فارمیشنز نے شاندار رفتار کے ساتھ آسمان کو چیرتے ہوئے حیرت انگیز فضائی مظاہرے کئے۔ قبل ازیں صدر مملکت نے پریڈ میں حصہ لینے والے مسلح افواج کے چاق و چوبند دستوں کا معائنہ کیا۔انہیں صدارتی سلامی دی گئی جبکہ قومی ترانہ بھی بجایا گیا۔صدرمملکت روایتی صدارتی بگھی میں گھوڑوں پر سوار اپنے محافظوں کے ساتھ پنڈال پہنچے تھے۔اس موقع پر فوجی بینڈ نے قومی ترانوں پر مبنی موسیقی کی شاندار دھنیں بھی پیش کیں۔
.ذریعہ: Nawaiwaqt
کلیدی لفظ: انہوں نے کہا کہ صدر مملکت نے پاکستان کی کہ پاکستان مسلح افواج ہیں اور کے ساتھ اور ہم کیا کہ کے لیے
پڑھیں:
یوم پاکستان کے موقع پر ایوان صدر میں پریڈ،صدر زرداری کا خطاب
اسلام آباد (ڈیلی پاکستان آن لائن )یوم پاکستان کے موقع پر ایوان صدر میں ہونے والی پریڈ سے مہمان خصوصی صدر آصف علی زرداری نے خطاب کیا۔ایوان صدر میں ہونے والی پریڈ میں غیرملکی سفیر، اعلیٰ سول اور فوجی حکام بھی شریک ہیں۔
روز نامہ جنگ کے مطابق اس موقع پر تقریب سے خطاب کرتے ہوئے صدر مملکت آصف زرداری نے کہا کہ23 مارچ کا دن پاکستانی قوم کے لئے بہت اہم ہے، بہت قربانیاں دے کر آزادی حاصل کی ہے، آج کے دن لاکھوں مسلمانوں کی قربانیوں کی یاد تازہ کرتے ہیں، ان قربانیوں کے نتیجے میں پاکستان کا خواب حقیقت میں بدلا۔
صدر مملکت نے کہا کہ پاکستان کے عوام اور مسلح افواج ساتھ ساتھ کھڑے ہیں، شہداءکی قربانیوں کو خراج تحسین پیش کرتے ہیں، ہم میں مشکلات پر قابو پانے کی صلاحیت موجود ہے، ہم مشکلات سے نہیں گھبراتے، پاکستان کو بہت سارے جیو پولیٹیکل مسائل کا سامنا ہے، نوجوان ہمارے ملک کا سرمایہ ہیں جنہیں تعلیم ، تحقیق اور جدید ٹیکنالوجی سے آشنا کرنا ہے۔
انہوں نے کہا کہ ہماری خارجہ پالیسی امن اور استحکام پر مبنی ہے، ہم اپنے ہمسائے ملک اور عالمی برادری کے ساتھ مضبوط تعلق رکھنے کے خواہش مند ہیں، آج کے دن ہم کشمیری بھائیوں کو بھی نہیں بھولے جو طویل عرصے سے بھارتی مظالم کا شکار ہیں، دنیا کے ہر فورم پر کشمیریوں کے لئے آواز اٹھائیں گے۔
صدر مملکت نے کہا کہ فلسطین کے ساتھ اظہارِ یکجہتی کرتے ہیں، عالمی برادری فلسطین میں نسل کشی روکنے کے لئے فوری اقدامات کرے، غزہ کے نہتے مسلمانوں پر مظالم قابل مذمت ہیں۔
انہوں نے کہا کہ پاکستان کا مقصد مضبوط، جدید اسلامی فلاحی مملکت ہے، لاکھوں قربانیاں دے کر حاصل کی گئی آزادی کی حفاظت کرنی ہے، مادر وطن کے تحفظ اور آزادی کی حفاطت کے لئے کسی قربانی سے پیچھے نہیں ہٹیں گے، آئیے اختلاف سے بالاتر ہو کر ایک خوشحال اور پ±رامن پاکستان کے لئے کام کریں، ہمیں ایک ایسا پاکستان بنانا ہے جو طاقت اور ترقی یافتہ ہو۔
صدر مملکت نے کہا کہ فتنہ الخوارج اور دہشت تنظیموں کے ناپاک عزائم کو ناکام بنائیں گے، دہشت گردی کے ناسور کے خاتمے کے لئے قوم مسلح افواج کے شانہ بشانہ ہے، ففتھ جنریشن وار فیئر ایک اہم چیلنج ہے، ہم باحوصلہ قوم ہیں، چیلنجز پر قابو پانے کی صلاحیت رکھتے ہیں، مادر وطن کے تحفظ کیلئے کسی قربانی سے دریغ نہیں کریں گے۔
آصف زرداری نے کہا کہ ہم نے بیرونی اور اندرونی دہشت گردی کا منہ توڑ مقابلہ کیا، بھارت ہمیشہ پاکستان کو میلی آنکھ سے دیکھتا ہے، ہمارے سامنے سفر آسان نہیں لیکن ناممکن بھی نہیں۔صدر آصف علی زرداری اور وزیراعظم شہباز شریف نے قوم کو یوم پاکستان کی مبارک باد بھی دی ہے۔
رمضان المبارک کی وجہ سے مسلح افواج کی پریڈ کو محدود کیا گیا ہے، بعد میں یوم پاکستان کے موقع پر اعلیٰ سول اعزازات کی تقریب آج 2 بجے ہوگی، صدر آصف علی زرداری مختلف اہم قومی شخصیات کو اعلیٰ سول قومی اعزازات سے نوازیں گے۔
یہ تقریب ایوان صدر کے استقبالیہ ہال میں ہوگی، آئینی اداروں کے سربراہ تقریب میں موجود ہوں گے۔
امریکی دھمکی کا جواب ،ایران نے خلیجی جزائر پر نئے میزائل سسٹم نصب کردیے
مزید :
بدقسمتی سے پاکستان میں کال سینٹر انڈسٹری کے حوالے سے تربیت کا قفدان ہے