ڈیجیٹل ترقی کیلئے سازگار ریگیولیٹری ماحول فراہم کرنے کیلئے پرعزم ہیں، چیئرمین پی ٹی اے
اشاعت کی تاریخ: 5th, March 2025 GMT
اسلام آباد:
چیئرمین پاکستان ٹیلی کمیونیکیشن اتھارٹی (پی ٹی اے) میجر جنرل (ر) حفیظ الرحمٰان نے کہا ہے کہ پاکستان میں ترقی پسند اور سازگار ریگولیٹری ماحول فراہم کرنے کے لیے پرعزم ہیں تاکہ ملک میں ڈیجیٹل ترقی کو فروغ دیا جا سکے۔
پی ٹی اے کی جانب سے جاری اعلامیے کے مطابق اسپین کے شہر بارسلونا میں جاری موبائل ورلڈ کانگریس 2025 کے دوران چیئرمین پی ٹی اے میجر جنرل (ر) حفیظ الرحمان نے مختلف کمپنیوں کے نمائندوں سے ملاقات کی اور پاکستان میں بین الاقوامی ٹیلی کام ایونٹ کے انعقاد کے مواقع کا جائزہ لینے کے لیے بین الاقوامی ٹیلی کمیونیکیشن یونین (آئی ٹی یو) کی سیکریٹری جنرل ڈورین بوگڈن مارٹن کو پاکستان کے دورے کی دعوت دے دی۔
اعلامیہ کے مطابق ملاقات میں ٹیلی کمیونیکیشن کے شعبے میں عالمی تعاون اور جدت کے منصوبوں پر بات چیت کی گئی، اس دوران پی ٹی اے کے جاری اور مستقبل کے اقدامات، ریگولیٹری پیش رفت اور پاکستان کی ڈیجیٹل تبدیلی کے اقدامات پر تبادلہ خیال ہوا۔
چیئرمین پی ٹی اے نے ٹیکنالوجی کے فروغ، کنیکٹیویٹی میں بہتری اور ایک مضبوط ٹیلی کام ایکو سسٹم کے قیام میں معاون ثابت ہونے والے بنیادی ریگولیٹری اقدامات پر روشنی ڈالی۔
اس موقع پر انہوں نے پاکستان کو آئی ٹی وی کی جانب سے فائیو جی ریگولیٹر کا درجہ ملنے پر اظہار تشکر کیا، جو پاکستان کی ریگولیٹری صلاحیتوں اور ڈیجیٹل ترقی کے عزم کا اعتراف ہے۔
چیئرمین پی ٹی اے نے آئی ٹی یو کی سیکریٹری جنرل کو پاکستان کے دورے کی دعوت دی تاکہ مشترکہ اقدامات اور پاکستان میں بین الاقوامی ٹیلی کام ایونٹ کے انعقاد کے مواقع کا جائزہ لیا جا سکے۔
انہوں نے اس بات پر بھی زور دیا کہ پی ٹی اے کے افسران آئی ٹی یوکے ورکنگ گروپس میں فعال کردار ادا کرنے کے خواہاں ہیں، جن میں سے ایک افسر اس وقت آئی ٹی یو کونسل کے چائلڈ آن لائن پروٹیکشن ورکنگ گروپ میں شرکت کر رہے ہیں۔
اعلامیہ کے مطابق گفتگو کا اختتام پائیدار اور جامع ڈیجیٹل ترقی کے لیے تعاون کو مزید مستحکم کرنے کے باہمی عزم کے ساتھ ہوا، جس سے پاکستان کو ایک اہم ٹیلی کام ملک کی حیثیت سے اپنی شناخت مزید مضبوط بنانے کا موقع ملا۔
چیئرمین پی ٹی اے حفیظ الرحمان نے اس موقع پر ٹیلی نار ایشیا کی قیادت سے ملاقات میں مختلف پہلوؤں پر تبادلہ خیال کیا، ملاقات میں پاکستان میں ڈیجیٹل تعاون کے فروغ، نیٹ ورک کے معیار اور ڈیجیٹل خدمات کی بہتری سے متعلق امور پر تبادلہ خیال کیا گیا۔
چیئرمین پی ٹی اے نے اس بات پر زور دیا کہ پاکستان میں ایک ترقی پسند اور سازگار ریگولیٹری ماحول فراہم کرنے کے لیے پی ٹی اے پرعزم ہے تاکہ ملک میں ڈیجیٹل ترقی کو فروغ دیا جا سکے۔
اعلامیے کے مطابق ٹیلی نار ایشیا کی قیادت نے پاکستان میں ٹیلی کمیونیکیشن نیٹ ورک کے معیار کو مزید بہتر بنانے اور ڈیجیٹل خدمات کو وسعت دینے میں اپنی دلچسپی کا اظہار کیا۔
خیال رہے کہ موبائل ورلڈ کانگریس 2025 دنیا کی سب سے بڑی ٹیلی کمیونیکیشن اور ٹیکنالوجی نمائش ہے جس میں مختلف ممالک کے وفود، کمپنیز اور ماہرین شرکت کر رہے ہیں اور مستقبل کے ڈیجیٹل رجحانات پر تبادلہ خیال کیا جا ئے گا۔
.ذریعہ: Express News
کلیدی لفظ: چیئرمین پی ٹی اے ٹیلی کمیونیکیشن پر تبادلہ خیال پاکستان میں ڈیجیٹل ترقی کے مطابق ٹیلی کام کرنے کے کے لیے آئی ٹی
پڑھیں:
کیا رواں برس پاکستان میں فائیو۔جی کی نیلامی ممکن ہوپائے گی؟
ملک کے صارفین کو فائیو۔جی استعمال کرنے کے حوالے سے ممکنہ طور پر ابھی کچھ اور عرصہ انتظار کرنا ہوگا۔ کیوں کہ پاکستان ٹیلی کمیونیکیشن اتھارٹی (پی ٹی اے) کے مطابق فائیو۔جی اسپیکٹرم کی نیلامی کے سلسلے میں چند مشکلات کا سامنا ہے۔
واضح رہے پاکستان ٹیلی کمیونیکیشن اتھارٹی (پی ٹی اے) نے فائیو جی سپیکٹرم کی نیلامی کے لیے مشاورت کا عمل مکمل کر لیا ہے۔
پی ٹی اے کی جانب سے فائیو۔جی نیلامی میں مشکلات بیان کے بعد مختلف خبریں گردش کر رہی ہیں۔ کچھ لوگوں کا یہ کہنا ہے کہ اس سال 5 جی نیلامی ہونا ناممکن ہے۔ دوسری جانب کچھ افراد کا یہ کہنا ہے کہ رواں برس فائیو۔جی نیلامی ہو جائے گی۔ اس صورتحال کی وجہ سے بہت سے شک و شبہات پیدا ہو چکے ہیں۔
ان شک و شبہات کو دور کرنے کے لیے وی نیوز نے جاننے کی کوشش کی کہ کیا رواں برس فائیو۔جی نیلامی ممکن ہو پائے گی؟
اس حوالے سے بات کرتے ہوئے پی ٹی اے ذرائع نے وی نیوز کو بتایا کہ رواں برس کی فائیو۔جی نیلامی ہو جائے گی جس کی تیاریاں تقریباً آخری مراحل میں ہیں۔ ذرائع کا کہنا تھا کہ ہم اپنے شیڈول کے مطابق چل رہے ہیں اور جون 2025 کے وسط تک فائیو۔جی کی نیلامی مکمل ہو جائے گی۔ نیلامی ہمارے شیڈول کے مطابق مئی کے وسط تک ہوجائے گی لیکن اس کے بعد ایک مہینے کا وقت دیا جاتا ہے جس میں لائسنسنگ اور جو بینڈ وڈتھ انہوں نے سائن کی ہوتی ہے، اس کا سامان امپورٹ ہوتا ہے۔
انہوں نے مزید بتایا کہ رواں برس کے آخر اور 2026 کے شروع میں کمرشل سروسز بھی شروع ہو جائیں گی۔
کہا جا رہا ہے کہ ٹیلی کام کمپنیوں کے درمیان انضمام کے معاہدے کی عدم تکمیل اور قانونی پیچیدگیاں فائیو جی کے آغاز میں تاخیر کا باعث بن رہی ہیں، لیکن اس حوالے سے ان کا کہنا تھا کہ وہ حکومت سے صرف یہ کہہ رہے ہیں کہ وہ انہیں کوئی واضح اشارے دے دیں تاکہ وہ آکشن کے رولز طے کر لیں اور انہیں علم ہو کہ کتنے آکشن پلئیرز ہونگے۔ باقی پی ٹی اے ان مسائل کو حل کرنے کے لیے پرعزم ہے اور گورنمنٹ بھی تعاون کر رہی ہے۔ پی ٹی اے کی تیاریاں حتمی مراحل میں ہیں۔
واضح رہے کہ پی ٹی اے نے ٹیلی کام مارکیٹ اسسمنٹ مکمل کرلی ہے اور ٹیلی کام ریفارمز پر اسٹیک ہولڈرز کے ساتھ مشاورت جاری ہے۔ نیلامی کا عمل اسپیکٹرم کی قیمت اور نیلامی کے ڈیزائن کی اسٹیج تک پہنچ گیا ہے۔ ایڈوائزری کمیٹی ایک ماہ میں پالیسی سفارشات حکومت کو بھیجے گی، جس کے بعد حکومت پالیسی ڈائریکٹیو جاری کرے گی۔
پی ٹی اے کی جانب سے فائیو۔جی نیلامی کے حوالے سے جاری کردہ دستاویزات کے مطابق، 2600 میگا ہرٹس، 2100 میگا ہرٹس اور 1800 میگا ہرٹس کے کیسز عدالتوں میں زیر التواء ہیں، جنہیں جلد حل کرنے کی کوشش کی جا رہی ہے۔ فائیو جی انفراسٹرکچر ڈویلپمنٹ کی لاگت اور فائیو جی ڈیوائسز کی دستیابی بھی چیلنجز ہیں۔
ان تمام چیلنجز کے باوجود، پی ٹی اے پرامید ہے کہ فائیو جی پاکستان میں ترقی کے ایک نئے دور کا آغاز کرے گا۔
ماہرین کا کہنا ہے کہ فائیو جی کے آنے سے ملک میں تیز رفتار انٹرنیٹ اور بہتر سروس کی بہتر کوالٹی میسر ہوگی۔ یہ نہ صرف آئی ٹی سروسز کی فراہمی کی بنیاد رکھے گا بلکہ براہ راست بیرونی سرمایہ کاری اور جی ڈی پی میں اضافے کا باعث بھی بنے گا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
5g internet
ہم کسی صورت حکومت کی دھمکیوں سے نہیں گھبرائیں گے،اپوزیشن اتحاد