عمران خان جب تک سیاستدانوں سے گفتگو نہیں کرینگے مسئلہ حل نہیں ہوگا، رانا ثناء اللہ
اشاعت کی تاریخ: 9th, April 2025 GMT
لاہور(اردوپوائنٹ اخبار تازہ ترین۔09اپریل 2025) پاکستان مسلم لیگ ن کے سینئر رہنماء راناثناء اللہ کا کہنا ہے کہ بانی پی ٹی آئی عمران خان جب تک سیاستدانوں سے گفتگو نہیں کرینگے مسئلہ حل نہیں ہوگا، وزیراعظم کے مشیر برائے سیاسی امور نے ایک بار پھر بانی پی ٹی آئی کو سیاسی جماعتوں سے مذاکرات کا مشورہ دیدیا، لاہور میں جاتی امراء کے باہر میڈیا سے گفتگو کرتے ہوئے رہنماء ن لیگ نے کہا کہ سٹیبلشمنٹ سے بات کرنے سے مسئلہ حل نہیں ہوگا۔
سیاسی مسائل سیاستدان ہی گفتگو کے ذریعے حل کر سکتے ہیں۔ انہوں نے کہا کہ بانی پی ٹی آئی عمران خان پہلے بھی سٹیبلشمنٹ سے بات کرنے کو تیار تھے لیکن اگروہ سیاسی جماعتوں سے بات کرنے کو تیار ہوں تو معاملہ حل ہو سکتا ہے۔ سیاسی جماعتوں کو مل بیٹھ کر گفت و شنید سے معاملات حل کرنے چاہئیں لیکن سب کو علم ہے کہ کون مل کر بات کرنے کو تیار نہیں۔(جاری ہے)
بلوچستان کے معاملے پر اگر پیش رفت ہوئی تو نواز شریف بلوچستان کا دورہ کرینگے۔ بلوچستان میں پی ٹی آئی سٹیک ہولڈر نہیں ہے۔بلوچستان کے معاملے پر تمام سیاسی جماعتیں بیٹھ کر مسائل حل کریں گی۔ایک سوال کے جواب میں رانا ثناء اللہ نے کہا کہ امریکی ڈاکٹروں نے عمران خان کی رہائی سے متعلق کوئی بات نہیں کی۔ وہ شاید صرف حال چال پوچھنے ہی آئے تھے۔ان کا کہنا تھا کہ سوشل میڈیا پر ہر کسی کو اپنی بات کہنے کا حق ہے لیکن اس پلیٹ فارم پر پی ٹی آئی کی بریگیڈ سے ہر کسی کو مسئلہ ہے۔ایک اور سوال کے جواب میں وزیراعظم کے مشیر برائے سیاسی امور رانا ثناءاللہ کا کہنا تھا کہ وزیر اعلیٰ خیبرپختونخواہ علی امین گنڈاپور کو کل پاکستان منرل انویسٹمنٹ فورم 2025 میں شرکت کرنی چاہیے تھے۔ اگر وہ اپنے صوبے کی نمائندگی نہیں کرتے، تو وہ عہدےسے کوتاہی کر رہے ہیں۔میڈیا سے گفتگو کرتے ہوئے راناء ثناء اللہ نے مزید کہا کہ پنجاب سندھ کا ایک قطرہ پانی بھی چوری نہیں کرے گا۔ کچھ نام نہاد قوم پرست جماعتیں غلط گیم کر رہی ہیں۔ سندھ کے نام نہاد قوم پرست جماعتوں نے ایسا ماحول بنا دیا ہے کہ اس معاملے پر پیپلز پارٹی کے پاس احتجاج کے علاوہ کوئی دوسرا راستہ نہیں بچا ہے آخرپاکستان پیپلز پارٹی نے بھی اپنی جگہ بنانی ہے۔نہری پانی پر معاملہ اتفاق رائے سے حل ہو جائے گا۔ہم نے پیپلزپارٹی کے چیئرمین بلاول بھٹو کو یقین دلایا ہے کہ پانی کی تقسیم کا معاملہ افہام وتفہیم کے ساتھ حل ہوگا۔ پنجاب سندھ کا ایک قطرہ پانی بھی چوری نہیں کر رہا ہے اور نہ ہی ایسا ارادہ ہے۔ رانا ثناء اللہ نے مزید کہا کہ پارٹی کو منظم کرنے کیلئے ہم نے عوامی رابطہ مہم شروع کرنے کا فیصلہ کیا ہے۔ ابھی صرف پنجاب کی حد تک عوامی رابطہ مہم شروع کر رہے ہیں۔ نواز شریف دوسرے صوبوں کا دورہ کرینگے تو وہاں جلسے کرینگے۔اس موقع پر گفتگو کرتے ہوئے پاکستان مسلم لیگ ن کے سینئر رہنماءخواجہ سعد رفیق نے کہا کہ بلوچستان نیشنل پارٹی کے رہنماء ڈاکٹر عبدالمالک بلوچ نے نواز شریف سے درخواست کی کہ وہ سینئر سیاستدان کے طور پر بلوچستان کے مسائل میں اپنا کردار ادا کریں۔ نواز شریف نے انہیں یقین دہانی کرائی کہ وہ بلوچستان میں امن کیلئے اپنا سیاسی اور جمہوری کردار ادا کریں گے۔ نواز شریف نے ڈاکٹر عبدالمالک کواپنے مکمل تعاون کی یقین دہانی کرواتے ہوئے کہا ہے کہ وہ ذاتی طور پر اس مسئلے میں دلچسپی لے کر اس کا حل نکالیں گے۔ سعد رفیق کا یہ بھی کہنا تھا کہ جب نواز شریف وزیر اعظم تھے اور ڈاکٹر عبدالمالک بلوچ وزیر اعلی تھے۔ تب بلوچستان میں ترقی ہوئی تھی۔ بدقسمتی سے جمہوریت میں تعطل آیا جس کی وجہ سے صورتحال یہاں تک پہنچی۔.ذریعہ: UrduPoint
کلیدی لفظ: تلاش کیجئے ثناء اللہ نواز شریف رانا ثناء پی ٹی آئی نے کہا کہ سے گفتگو بات کرنے نہیں کر
پڑھیں:
نوازشریف سے ملاقات: صدر مسلم لیگ ن بلوچستان پر کردار ادا کرنے کیلئے آمادہ، عبدالمالک
سندر، لاہور (نامہ نگار+ تنویر سیال+نوائے وقت رپورٹ) سابق وزیر اعلیٰ بلوچستان ڈاکٹر عبدالمالک بلوچ نے وفد کے ہمراہ جاتی امراء میں میاں نواز شریف سے تفصیلی ملاقات کی اور مسلم لیگ ن کی حکومت میں مہنگائی اور بجلی کی قیمتوں میں کمی پر میاں نواز شریف کو مبارک باد دی۔ ملاقات کے بعد انہوں نے جاتی امراء کے باہر میڈیا سے گفتگو کرتے ہوئے کہا کہ مسلم لیگ (ن) کے قائد میاں نواز شریف بلوچستان کے مسائل کے حل کے لیے اپنا کردار ادا کرنے پر آمادہ ہیں اور جلد صوبے کا دورہ کریں گے۔ ڈاکٹر عبدالمالک بلوچ نے بتایا کہ انہوں نے بلوچستان کی مجموعی سیاسی صورتحال، جاری دھرنوں اور قیدیوں کی رہائی سے متعلق تفصیلی بات چیت کی۔ انہوں نے کہا کہ بلوچستان کا مسئلہ سیاسی نوعیت کا ہے اور اس کا حل بھی سیاسی طریقے سے نکالا جانا چاہیے۔ ڈاکٹر عبدالمالک بلوچ کے مطابق نواز شریف نے یقین دہانی کرائی کہ وہ بلوچستان کے مسائل کے حل کے لیے اپنا بھرپور کردار ادا کریں گے اور جلد صوبے کا دورہ کر کے عوام، سیاسی قیادت اور دیگر سٹیک ہولڈرز سے ملاقات کریں گے۔ اس موقع پر نواز شریف نے اس بات پر زور دیا کہ بلوچستان کے مسائل کو سنجیدگی سے لیا جائے اور ان کے حل کے لیے تمام ممکنہ اقدامات کیے جائیں۔ جاتی امراء میں ہونے والی اس ملاقات کے دوران مسلم لیگ (ن) کے سینئر رہنما احسن اقبال، خواجہ سعد رفیق، خواجہ آصف، سردار ایاز صادق، رانا ثناء اللہ سمیت دیگر اہم رہنما بھی موجود تھے۔ ملاقات کے بعد ڈاکٹر عبدالمالک بلوچ اور ان کے وفد نے نواز شریف کی جانب سے دئیے گئے ظہرانے میں بھی شرکت کی۔ دوسری جانب لاہور آمد پر مسلم لیگ پنجاب کے صدر رانا ثناء اللہ نے پارٹی رہنمائوں کے ہمراہ ان کا استقبال بھی کیا۔ علاوہ ا زیں نواز شریف نے وفاقی وزیر توانائی سردار اویس خان لغاری سے ملاقات کی اور بجلی کی قیمتوں میں کمی پر مبارک دی، کہا کہ عوام کی آسانی میرے دل کا سکون ہے۔ وزیراعظم شہباز شریف اور ان کی ٹیم کو شاباش دیتا ہوں۔ آئی ایم ایف پروگرام میں ہوتے ہوئے بجلی کی قیمتوں میں کمی آسان کام نہیں تھا، اللہ تعالیٰ کا شکر ہے کہ عوام سے کئے وعدے پورے ہو رہے ہیں۔ مسلم لیگ (ن) نے عوام کے ریلیف اور ملک کی خدمت کو ہمیشہ مقدم رکھا ہے، یہی ہماری روایت ہے یہی ہماری سیاست ہے۔ اس موقع پر سردار اویس لغاری نے کہا کہ آپ کی راہنمائی نے وزیراعظم شہباز شریف اور ان کی ٹیم کو کامیاب کیا۔ وفاقی وزیر نے پارٹی قائد کو توانائی کے شعبے میں اصلاحات، اوپن مارکیٹ کے قیام سے بجلی مزید سستی کرنے، بجلی چوری اور گردشی قرض سے مستقل نجات پر اقدامات سے آگاہ کیا۔
حسینہ گھر کی نہ گھاٹ کی