زباں فہمی نمبر243 ؛اچّھے سے……
اشاعت کی تاریخ: 7th, April 2025 GMT
دیکھیے! اگلا کالم اچّھے سے لکھیے گا
سنیے گا .....اچّھے سے کام کریں تو ہم سبھی خوش ہو ں گے۔
بچّوں سے کہیے کہ جو اچّھے سے کام کرے گا ، ہم اُسے انعام دیں گے۔
یقیناًآپ نے بھی ایسے جملے سُنے پڑھے ہوں گے، ٹی وی ڈراموں میں بھی سنے ہوں گے۔ کیا کبھی آپ نے غور کیا کہ یہ ’’اچّھے سے‘‘ کیا ہوتا ہے؟ سامنے کی بات ہے کہ اس کی جگہ کہنا چاہیے ’اچھی طرح‘۔ یہ ’’اچّھے سے‘‘ کہاں سے آیا؟ اس بابت ذر ا ٹھہرکر بتاتا ہوں۔ ابھی تو آپ کچھ اور نکات سے لطف اندوز ہوں۔
ا)۔ ایک ویب سائٹ کی اطلاع کے مطابق، اپریل2023ء میں ہندوستان کے معروف مُوسِیقار جناب اے آر رحمان کے متعلق ایک دل چسپ خبر سامنے آئی کہ انھوں نے اپنی بیگم کو عوام کے سامنے بجائے ہندی (یعنی اردو) یا انگریزی کے، اپنی زبان تَمِل میں گفتگو کرنے کو کہا اور جواب میں خاتون نے کہا کہ میں تَمِل، اچّھے سے نہیں بول سکتی۔
ب)۔ پچھلے ایک سال سے ایک کلام سوشل میڈیا کی زینت بنا ہوا ہے اور جا بجا اُسے گنگنایا جارہا ہے۔ ملاحظہ فرمائیں:
تم عید منانا اَچھے سے
کوئی بھی کسر نہ چھوڑو تم
ہم لوگ منائیں گے کیسے
اب فکر ہماری چھوڑو تم
تم لوگ دعا ہی کرنا بس
وہ مسجد اقصیٰ ڈھا دیں گے
سوتے ہی رہو تم غفلت میں
وہ موت کی نیند سلا دیں گے
تم عید منانا اچھے سے
المیہ فلسطین کے موضوع پر یہ اچھی کاوش ہے۔ مجھے تلاشِِ بسیار کے باوجود اِس کلام کے شاعر کا نام نہیں ملا۔ آگے چلیں۔
ج)۔ عامر اعظمی (ساکنِ اَلعین، متحدہ عرب امارات) نامی شاعر کی ایک غزل آنلائن دیکھی جس میں یہ شعر توجہ طلب ہے:
خوب واقف ہیں اُس کی رگ رگ سے
اُس کو اچھے سے جانتے ہیں ہم
چونکہ اعظم گڑھ (نیز غازی پور، گورکھ پور وغیرہ) کے لوگ عموماً اپنی ثقافت بشمول زبان (بولی ٹھولی) میں اہل بِہار سے قریب اور مماثل نظر آتے ہیں، لہٰذا یہ شاعر بھی خالص بِہاری بولی کا استعمال بخوبی کرگئے۔ (نجی مشاہدے کی با ت کروں تو معروف شاعر، ادیب ونقاد ڈاکٹر فہیم اعظمی، ممتاز شاعر سہیل غازی پوری اور معلوماتی کتب کے مؤلف وناشر محمد ظفر اقبال غازی پوری اس کی روشن مثال تھے)۔ فیس بُک پر بھی ایک عامر اعظمی شاعر موجود ہیں، مگر اُن کے کوائف سے یہ معلوم نہ ہوسکا کہ یہ وہی شاعر ہیں یا اُن کے ہم نام۔ ریختہ ڈاٹ آرگ میں ایک ناول ’خونِ تمنّا‘ (سن اشاعت: 1974ء)محفوظ ہے جس کے مصنف کا نام عامر برقی اعظمی ہے، لیکن یہ ہرگز میرے کرم فرما، زود گو فارسی واُردو شاعر ڈاکٹر اَحمد علی برقیؔ اعظمی مرحوم کے فرزند نہیں، جنھوں نے خاکسار کے کلام اور کتب کو (بلا فرمائش ودرخواست) متعدد بار منظوم خراج ِ تحسین پیش کیا تھا۔ (ڈاکٹر برقی اعظمی مرحوم کے لب ولہجے میں وہ ’بِہاری‘ عنصر کبھی محسوس نہ ہوا جس کی اوپر مثال دے چکا ہوں)۔
ضمنی مگر اہم بات یہ ہے کہ اس ناول کا انتساب عظیم فن کا ر یوسف خان عُرف دلیپ کُمار (مرحو م) کے نام کیا گیا تھا۔
اب آتے ہیں اصل بات کی طرف۔ یہ ’’اچّھے سے‘‘ خالص بِہاری بولی ٹھولی ہے۔ آپ مستندومعتبر لغات ازقسمے فرہنگ آصفیہ ونوراللغات میں تلاش کریں تو اِس کا اندراج نہیں ملے گا۔ محفوظ ’بِہار اُردولغت‘ (دو جلد) میںبھی یہ ترکیب شامل نہیں۔ (یاد رکھیں کہ خاکسار نے اس لغت کے مندرجات پر مبنی ایک تحقیقی تحریر، سلسلہ زباں فہمی میں پیش کی تھی جو آنلائن موجود ہے۔ زباں فہمی نمبر 155مطبوعہ روزنامہ ایکسپریس، سنڈے میگزین، مؤرخہ 11ستمبر 2022ء)۔ لگے ہاتھوں اپنے ا س یادگار مضمون سے ایک اقتباس بھی نقل کرتا چلوں کہ بہت سے قارئین کے لیے نیا ہوگا:
’بہار اردو لغت‘ کے مرتبین وناشرین اس نکتے کے پرچار ک نظر آتے ہیں کہ دیگر علاقوں میں رائج معیاری اردو کے برعکس، بِہار میں زبان کی تشکیل زیادہ منطقی ہے ۔’’ایک پہلو یہ ہے کہ اردو کا وہ رُوپ جو بِہار میں تشکیل پایا، اس میں جابجا الفاظ کی تشکیل میں دہلی، لکھنؤ، رام پور سے زیادہ منطقیت پائی جاتی ہے۔ اس کی ایک مثال گنتی میں استعمال ہونے والے الفاظ سے دی جاسکتی ہے۔ دس(10) کے بعد ایک تا آٹھ مزید گنتی (11,12,13,14,15,16,17,18)اور اسی طرح ہر دَہائی کے بعد کی گنتی کے لیے (20,22-28),(30,31-38) ، یکساں طریقہ کار ہے‘‘۔ اُن کے خیال میں چالیس (40)سے پہلے کا عدد، اُنتالیس (39)کی بجائے بِہار کے قاعدے سے اُنچالیس کہلائے تو بہتر ہے، اسے ہی لغت کا حصہ بنانا چاہیے۔ بات یہیں تک موقوف نہیں، بلکہ اُن کے بیان کے مطابق، پنڈِت دتاتریہ کیفیؔ کی تحریک کے زیرِاثر، اسم سے فاعل بنانے کا جوطریقہ شروع ہوا (مثلاً برق سے برقیانا، قوم سے قومیانا)، بِہار میں مدتوں سے رائج تھا، مثلاً پانی سے پَنیانا(کسی کھانے میں پتلا کرنے کے لیے پانی ڈالنا)، بات سے بَتیانا (بات کرنی یا باتیں بنانا)۔ اب یہاں رک کر سوچیں کہ آیا ہم اہل زبان، معیاری زبان میں، ایسی کسی اصلاح یا ترمیم یا اضافے کو اَزخود ، بلا چُوں چرا قبول کرلیں گے؟
بِہار کی اُردو میں واحد سے جمع بنانے کا ایک قاعدہ یہ ہے کہ مذکرومؤنث دونوں کے لیے ایک ہی لفظ برتا جائے جیسے لڑکا اور لڑکی دونوں کی جمع لڑکن۔ ویسے خاکسار نے ان گناہگار کانوں سے متعدد بار’’لڑکا‘‘ کی جمع ’’لڑکا لوگ‘‘ بھی سنی ہے۔ بِہاری اردو میں کسی بھی لفظ یا اسم کے آگے ’وا‘ لگاکر اس کی ہیئت تبدیل کرنا عام بات ہے، خواہ ایسا اظہارِالفت میں ہو یا تحقیر میں، جیسے من کو مَنوا، بابو کو بَبوا، مشتاق کو مُستاکوا۔ ایک مثال موٌنث کی ذہن میں آئی جو بِہار اُردولغت کے پیش لفظ میں درج نہیں: مُنّی کو مُنیا۔ (یہ معاملہ پُوربی میں بھی ہے، بیل سے بَیَلوا، سجن سے سجنوا، سجنی سے سجنیا وغیرہ۔ خاکسار نے ایک گزشتہ کالم میں پُوربی کے ضمن میں گلوکار رَنگیلا کے مقبول گانے ’’گا مورے منوا، گاتا جارے، جانا ہے ہم کا، دور، ٹھُمک ٹھُمک نہیں چل رے بَیَلوا، اپنی نگریا ہے دور‘‘ کا ذکر نہیں کیا تھا، مگر ہے بہت عمدہ مثال)۔ بِہار میں ہندوستان کے کسی بھی علاقے کی نسبت کہیں زیادہ ایسے انگریزی الفاظ بولنے کا چلن عام ہے جن کا مترادف یا متبادل اردو میں موجود ہے جیسے سڑک کی بجائے Roadا ور اسے بنایا ، روڈوا۔ لوجی! ہم تو اپنے یہاں سڑکوں کی بجائے روڈوں کہنے پر اعتراض کرتے ہیں، اب کیا کہیں؟
بِہاری اردو میں امالہ کا اصول بالکل رائج نہیں (اور شاید اہل پنجاب نے بھی، یہ طرز اُنھی سے سیکھا ہے)، جس کی بے شمار مثالیں تحریر اور بول چال میں موجود ہیں، فی الحال زیرِبحث لغت ہی میں منقولہ عبارتیں ملاحظہ فرمائیں:
ا)۔ اسلام میں بیٹا (بیٹے ) کے مقابلہ (مقابلے) پر بیٹی کا نصف حصہ ہے۔
ب)۔ سونا (سونے) کی نیلامی ہوئی۔
ج)۔ کُتّا (کُتّے) کی چوکیداری مشہور ہے۔
اسی لغت (’بہار اردو لغت‘) سے ہمیں یہ بھی معلوم ہوا کہ بِہار میں بعض الفاظ وتراکیب کے معانی بھی مختلف مراد لیے جاتے ہیں، جیسے ’’تڑپنا‘‘ سے مراد ہے ، (کسی جگہ پانی میں) کُود کر پار ہوجانا۔ اب آئیے ہم لغت کی مدد سے ایسے چُنیدہ الفاظ کی فہرست پیش کرتے ہیں جو مرتبین ِبہار اُردو لغت کے بیان کے مطابق، خاص بِہاری اردو ہی میں مروج ہیں۔ الفاظ کے معانی قوسین میں درج ہیں، جبکہ وضاحت اس راقم کی ہے:
اذاں پڑنا (اذان ہونا)، اکثر ہا (اکثر اوقات، بسا اوقات)، اِگیارہ (گیارہ)، آبھ (پَرتَو)، آدرمان (قدرومنزلت)، آسامی (جیل کی اصطلاح میں قیدی)، آسمان تارہ (ایک قسم کی آتش بازی)، آنھِٹی (تاڑ کا پھل)، آنب (آم)، بھائی جہ (بھتیجہ )، بہن جہ (بھانجہ)، بہن وَئی (بہنوئی);ویسے یہ لفظ اس تلفظ کے ساتھ بعض دیگر برادریوں میں بھی سننے کو ملا ہے، بھوجائی (بھاوج)، بھُتانا (بھول جانا)، بھنٹا (بیگن)، بدھنا =بَدھ +نا (تانبے یا المونیئم کا بنا ہوا لوٹا) (یہ لفظ بھی خالص بِہاری نہیں)، بوڑانا (بَولانا) (شاید لفظ بَوڑَم بمعنی بے وقوف سے تعلق ہے)، پھُلیا (سوزنی)، پھیپھسا (پھیپھڑا)، چونٹی یعنی چیونٹی کاٹنا (دِق /ضیق کرنا ، نوچنا)، تیرنا (کھینچنا، پھیلانا)، ٹھونگا (کاغذ کی تھیلی جس میں نیچے موٹے کاغذ کی تہہ ہو)، ٹھیونا (گھُٹنا)، چُکڑ (آب خورہ یعنی جدید زبان میںپانی پینے کا گلاس)، چیں را/چیرا (کینچوا)، دائی (گھریلو خادمہ);آج کل کی اُردو میں ماسی، حالانکہ دائی سے مراد قابلہ یعنی وہ عورت ہے جو زچگی کے عمل میں مدد فراہم کرتی ہے)، ڈیڑھ سَس (بڑی سالی)، رام تُرَئی (بھنڈی)، روپنا (بونا)، ساٹنا/سانٹنا (چپکانا)، سنگھاڑا/سینگھاڑا (سموسہ)، قلفی (چائے کی پیالی)، کرائی (کلرک)، کسیلی (چھالیہ);حالانکہ کسیلا تو بذاتہ ایک ذائقے کا نام ہے، کونہڑا (گول کدّو)، کھُدیڑنا (رگیدنا);یہ غیربہِاری طبقے میں بھی مستعمل ہے، کھوکھی (کھانسی)، کیولا (سنترہ )، کتّنی (دیورانی)، گارنا (نچوڑنا)، گوئٹھا (اُپلا)، گولکی (کالی مرچ)،گھاگھرا (چکوترہ)، گھیلا (پانی کا گھڑا)، لخیرا/لاخیرا (غنڈہ)، لَسّا (چینپ ، پِیپ وغیرہ کا)، لُکنا (چھُپنا); یہ پنجابی میں بھی مستعمل ہے، لَند پھند (چکربازآدمی)، لنگا (ننگا)، لوکنا (ہوا میں پکڑلینا، کیچ کرلینا)، مُلّا زادہ (خادم، نوکر)، مَیلنا (مَلنا،میل صاف کرنا)، ناتی (نواسہ);یہ دیگر مقامات پر بھی رائج ہے، نَتنی (نواسی)، ننواں (تُرئی/توری)، نیہر (میکا /میکہ);یہ بھی دیگر برادریوں میں سننے کو ملتا ہے، خصوصاً شادی بیاہ کے گیتوں میں جیسے ’’میرے نیہر سے آج مجھے آیا، یہ پیلا جوڑا، یہ ہَری ہَری چوڑیاں‘‘۔
قارئین کرام! یہاں دونِکات پر بطورِخاص توجہ مبذول کرانا چاہتا ہوں:
ا)۔ ’اچھی طرح‘ کی بجائے ’’اچّھے سے‘‘ کہنے کا روزاَفزوں رِواج پاکستان میں آباد بِہاری برادری کے طفیل نہیں، بلکہ اس کا سہرا ہندوستانی ٹیلیوژن چینلز دیکھ کر زبان سیکھنے والے اور ڈرامے لکھنے والے افراد کے سر ہے جنھوں نے یہ ترکیب عام کی۔
ب)۔ سوال یہ ہے کہ کیا بِہاری بولی ٹھولی یا مخصوص لہجے کی کوئی ایسی ترکیب تمام اہل زبان کے لیے قابل قبول ہوسکتی ہے؟
راقم کی رائے میں، دوسرے نکتے کا جواب نفی میں ملے گا، کیونکہ (صحیح یا غلط کی بحث سے قطع نظر) یوپی، خصوصاً دِلّی اور لکھنؤ کی زبان کو معیار اور سند مانا جاتا ہے۔ یہ اور بات کہ ایک بزرگ بِہاری معاصر کے بیان کے مطابق، عظیم آباد (پٹنہ، بِہار) کا خدمتِ اردو میں لکھنؤ سے زیادہ حصہ ہے ۔ ہمیں یاد رکھنا چاہیے کہ ایسی کوئی بھی ترکیب، اصطلاح، فقرہ، جملہ یا محض اسماء تمام اہل زبان کے لیے قابل قبول معیاری زبان کا حصہ نہیں بن پاتے، البتہ انھیں عوامی بول چال میں اپنایا جاتا ہے جسے انگریزی میں Slang کہتے ہیں۔ لطف کی بات ہے کہ ڈاکٹر رَؤف پاریکھ صاحب کی مرتبہ سلینگ لغت میں (بے شمار دیگر اسماء و اصطلاحات کی طرح) اس کا بھی اندراج نہیں!
مزید تحقیق کی جائے تو یہ نکتہ اظہر من الشمس معلوم ہوتا ہے کہ اردو کی عوامی بولی ٹھولی میں ایک حصہ بہرحال معیاری زبان (ادبی، رسمی، کتابی ودفتری) میں شامل ہوچکا ہے، لیکن ایسا ہونے میں ایک مدت لگتی ہے۔
.ذریعہ: Express News
کلیدی لفظ: ب ہار میں کی بجائے کے مطابق یہ ہے کہ میں بھی ب ہاری کے لیے
پڑھیں:
کرکٹ اور کوڑا کرکٹ
’’صد افسوس دل پر جبر کرکے آج میں نے پھر پاکستان اور نیوزی لینڈ کے درمیان دوسرا ون ڈے میچ دیکھا، دل بہت دکھا کہ یہ ناقص کارکردگی آخر پاکستان میں کرکٹ کو بھی کھا گئی۔‘‘
یہ تاثرات تھے ہمارے ایک سینئر ساتھی کے جو ایک اینکر پرسن بھی ہیں اور اپنا چینل بھی زور شور سے چلا رہے ہیں،گروپ میں ان کا یہ درد بھرا واٹس ایپ پیغام پڑھ کر ہی پتا چلا کہ پاکستان اور نیوزی لینڈ کے درمیان کوئی میچ بھی کھیلا جا رہا ہے۔
’’بھئی! ہمیں کیا ہم تو کرکٹ دیکھتے ہی نہیں۔‘‘
عید کے تیسرے دن ایک انداز بے اعتنائی سے کرکٹ کے ایک سابقہ شیدائی نے شانے اچکاتے اپنے خیالات کا اظہار کیا۔آخر ایسا بھی کیا کہ لوگ اتنے بددل ہو گئے۔
’’نیوزی لینڈ کے پانچ کھلاڑی آؤٹ ہوئے تو اسکور 132 تھا لیکن پھر بغیر ٹیلنٹ اور بغیرکپتان کی ٹیم نے خوب رنز بنوائے حتیٰ کہ ٹارگٹ 293 کا ہو گیا۔ بولرز اور وکٹ کیپر مل کر ہر میچ میں ایکسٹرا رنز کا ریکارڈ بناتے ہیں، پہلے میچ میں ایکسٹرا 43 تھے تو آج 32، وائیڈ بالز بولنگ میں اور ڈاٹ بالز بیٹنگ میں، اس ٹیم کا طرہ امتیاز ہے، اب مسئلہ یہ تھا کہ 293 رنز کیسے بنیں گے؟ نیوزی لینڈ کے بالرز کیا 293 وائیڈ بالز پھینکیں گے یا ان کا وکٹ کیپر جو 99 رنز ناٹ آؤٹ بنا کر اور خوب چھکے مار کر گیا ہے، وہ گیندیں چھوڑ چھوڑ کر اتنے ایکسٹرا رنز بنوا دے گا کہ پاکستان جیت سکے؟ یقینا نہیں۔
تیسرے میچ میں امید تھی کہ شاید پاکستانی ٹیم یہ میچ جیت کر قوم کے دل خوش کر دے ۔لگتا ہے کہ انھوںنے واقعی پوری قوم کے دل خوش کر دیے مگر کیسے تیسرا میچ بھی ہار کر ۔اس طرح نیوزی لینڈ نے تینو ں میچوں کی سیریز میں پاکستان کو وائٹ واش کر دیا۔
دراصل اس ٹیم میں اتنی صلاحیت ہے ہی نہیں کہ جیتنے کے لیے کرکٹ کھیل سکے، رنز بنانا تو درکنار، نیوزی لینڈرز انھیں بچوں کی طرح کھلاتے رہے اور ہنستے رہے، کچھ لاج رکھی تو فہیم اشرف اور ٹیم سے نکالے ہوئے نسیم شاہ ورنہ دیگر کھلاڑیوں پر مشتمل ٹاپ آرڈر کو کھیلنا ہی نہیں آیا جو حسب معمول 32 رنز پر آؤٹ ہو کر چلے گئے اور ان میں سے کوئی بھی ڈبل فیگر میں نہیں پہنچا ۔‘‘
تبصرہ طویل تھا پر انتہائی دردناک اور حیران کن تھا، ایک کے بعد ایک شکست اور ناقص کارکردگی آخر کیا بتانا چاہتی ہے۔
حضرت ابو ہریرہ رضی اللہ عنہ سے روایت ہے، انھوں نے کہا کہ رسول اللہ صلی اللہ علیہ وآلہ وسلم نے فرمایا:
’’جب امانت ضایع کی جائے تو قیامت کے منتظر رہو۔‘‘
پوچھا: ’’اللہ کے رسول امانت کس طرح ضایع کی جائے گی؟‘‘
آپ صلی اللہ علیہ وآلہ وسلم نے فرمایا:
’’جب معاملات نالائق اور نااہل لوگوں کے سپرد کر دیے جائیں تو قیامت کا انتظار کرو۔‘‘(صحیح بخاری)
ابھی زیادہ وقت نہیں گزرا جب کرکٹ کی چیمپئنز ٹرافی کی صدائیں، شور، نغمے اور ترانے، گانوں کو جیسے پھاڑے دے رہے تھے۔ ایک افراتفری تھی سڑکوں پر ٹریفک جام تھا کہ شہر میں کرکٹ کا میچ جو جاری تھا۔ سب کچھ برداشت تھا پر نالائقی اور نااہلی کی بھی حد ہوتی ہے۔ انڈیا نے تو جو سوچا وہ کر دکھایا، ان کی اپنی مرضی کے گراؤنڈ، کلب اور پچز بھی اور پھر ہوا بھی وہی جو انھوں نے چاہا اور ہم نے ان کی تحفے میں عطا کی جانے والی جیت بھی دیکھی۔ یہ جیت تھی یا ایک تیار اسکرپٹ جسے دیکھنے میں نہ کھیل میں مزہ نہ جوش و ولولہ کہ سب فراڈ اور مصنوعی ہی لگا۔
جس طرح ہم مصنوعی ہارتے ہیں یا فراڈ میں لوز کرتے ہیں یا یہ بھی تو ہو سکتا ہے کہ ہیں ہی نااہل۔ اب ان میں سب سے زیادہ جو بہتر لگے اس کو تصور کرکے اپنا آپ ہلکا کریں کہ یقین جانیے کرکٹ ہمارے پیارے ملک کا قومی کھیل نہیں ہے یہ تو انگریزوں کا تخلیق کردہ کھیل ہے انتہائی بور، طویل اور تھکا دینے والا۔ اگر آپ کرکٹ کے بخار میں مبتلا ہیں تو یقین جانیے کہ چنے چباتے، چیونگم چباتے زور زور سے اسی طرح کے جملے بولتے جائیے آپ کا ڈپریشن، ٹینشن کسی حد تک ضرور کم ہوگا۔ایک زمانہ تھا کہ ہمارے ملک میں کرکٹ کلب ہوا کرتے تھے ہر گلی محلے میں یہ کلب اپنے میچز کھیلا کرتے تھے، گلی محلے کے بچے، جوان پیسے جمع کرکے ٹیپ بال بنایا کرتے تھے، خاص طور میچ کی بال پر ٹیپ لپیٹ دیا جاتا تھا، ویسے آج تک ہمیں بھی اس ٹیپ اور بال کے سوئمنگ کی سمجھ نہ آئی پر ہمارے بچپن میں یہ عام تھا۔
کرکٹ کے بڑے بڑے گرو ہمارے علاقے میں ہی ادھر اُدھر رہا کرتے تھے پھر وہ زمانہ بھی اس قدر کرپشن سے رنگا نہ تھا، کچھ تو شرم تھی کھلاڑیوں کو، بڑے بڑے کھلاڑی علاقے میں بڑے گراؤنڈ میں جو آج بھی کرکٹ کے کھلاڑیوں کے لیے پرکشش ہے آیا کرتے تھے۔ ایک تفریح کا ماحول ہوتا تھا اس زمانے کی اسی قسم کی باتیں آج بھی سنتے ہیں تو عجیب سا لگتا ہے، کیا کبھی ہماری ٹیم کرکٹ ٹیم اچھا بھی کھیلتی تھی۔ کیا جاوید میاں داد اور توصیف احمد جیسے کھلاڑی ون ڈے میچ جتا کر سنہرے حرفوں سے اپنا نام تاریخ میں رقم کر چکے ہیں، کیا واقعی۔۔۔۔ پر اب تو کرکٹ اور کوڑا کرکٹ ۔
ہم بار بار ایک ہی جیسی غلطیاں دہراتے ہیں لوگ ہماری ہار پر ہنسی اڑا رہے ہیں، ہم مگرمچھ کی کھال میں ملبوس ہیں، ہم آہستہ آہستہ رینگتے ہوئے کائی زدہ پانیوں کی جانب بڑھ رہے ہیں، کبھی اونگھنے لگتے ہیں اور زیادہ دیر تو سونے میں ہی گزرتی ہے گویا وقت گزار رہے ہیں۔ یہ وقت جو گزرے نہیں گزرتا پر گزارنا تو ہے، تھکے ہارے مضمحل جنھیں قسمت نے نہیں بلکہ خود ہم نے اپنے لیے چنا ہے۔
یہ ہارے، تھکے ایونٹس جو دراصل دوسروں کو بھی جیت پر عزم، جوش اور ولولے کے ساتھ نہیں بلکہ ٹرے میں رکھ کر پیش کرتے ہیں کہ ہم دونوں طرح ناظرین و حاضرین اور تماشائیوں کو تیار شدہ کھیل دکھا کر بور کر رہے ہیں، مایوس کر رہے ہیں،کھیل کو صحت مندانہ انداز میں کھیل کر اسے عوام الناس کے لیے تفریح کا سامان ہی رہنے دیں کہ اب بات ملک و قوم کی عزت پر آ رہی ہے۔ آخر یہ بکواس چیپٹر کا اختتام کب ہوگا۔ میرٹ کو ہر سطح پر لانا ہی ہوگا کہ اب بس ہو گئی ہے۔ لوگوں کی بیٹیاں شور مچا رہی ہیں کہ فلاپ فلم آخرکب تک چلے گی۔
عوام کی معاشی کمر ٹوٹ جانے کا نتیجہ، رواں سال عید خریداری کا حجم کم ترین سطح پر آ گیا