پی ٹی آئی میں اختلافات سنگین ہوگئے، اسد قیصر اور وزیراعلی گنڈاپور آمنے سامنے
اشاعت کی تاریخ: 4th, April 2025 GMT
پی ٹی آئی میں اختلافات سنگین ہوگئے، اسد قیصر اور وزیراعلی گنڈاپور آمنے سامنے WhatsAppFacebookTwitter 0 4 April, 2025 سب نیوز
اسلام آباد (آئی پی ایس )خیبرپختونخوا میں پاکستان تحریک انصاف (پی ٹی آئی) کے اندر اختلافات سنگین صورت حال اختیار کرگئے ہیں اور سابق اسپیکر قومی اسمبلی اور رکن پارلیمنٹ اسد قیصر نے مرکزی قیادت سے وزیراعلی علی امین گنڈاپور کے بیان کی مکمل تحقیقات کا مطالبہ کردیا۔سماجی رابطے کی ویب سائٹ پر جاری بیان میں پی ٹی آئی کے سینئر رہنما اسد قیصر نے کہا کہ میں پارٹی کی مرکزی قیادت سے مطالبہ کرتا ہوں کہ وزیر اعلی خیبر پختونخوا کے حالیہ بیان کی مکمل تحقیقات کی جائیں۔
انہوں نے کہا کہ اس حوالے سے چیئرمین عمران خان کا مقف قوم کے سامنے لایا جائے، ہم وزیرِ اعلی کے بیان کا جواب دینے کا حق محفوظ رکھتے ہیں تاہم موجودہ حالات میں ایسی باتوں سے گریز کرنا، ملک اور بانی چیئرمین پی ٹی آئی عمران خان کے لیے ضروری سمجھتے ہیں۔
اسد قیصر نے کہا کہ اس وقت ہماری ساری توجہ عمران خان اور دیگر بے گناہ قیدیوں کی رہائی پر مرکوز ہونی چاہیے، غیر ضروری بیانات کے ذریعے پارٹی کے اندرونی معاملات کو ہوا دے کر عمران خان کی رہائی کی جدوجہد کو کمزور نہیں کرنا چاہیے۔ ان کا کہنا تھا کہ وزیر اعلی کو چاہیے کہ وہ اپنی تمام تر توانائیاں صوبے میں بہتر گورننس، امن و امان کی بحالی اور عمران خان اور دیگر بے گناہ اسیران کی رہائی کی جدوجہد پر مرکوز رکھیں۔
.ذریعہ: Daily Sub News
کلیدی لفظ: پی ٹی آئی
پڑھیں:
صوبے کے اختیارات کسی کو نہیں دیے جارہے، پروپیگنڈا کرنے والے عمران خان کے خیر خواہ نہیں، علی امین گنڈاپور
وزیراعلیٰ خیبرپختونخوا علی امین گنڈاپور نے کہا ہے کہ ہم صوبے کے اختیارات کسی کو نہیں دے رہے، ایسا پروپیگنڈا کرنے والے خیبرپختونخوا کے عوام اور عمران خان کے خیر خواہ نہیں۔
مائینز اینڈ منرل ایکٹ میں مجوزہ ترمیم سے متعلق ایک بیان میں وزیراعلیٰ نے کہاکہ اس سے متعلق غلط فہمی پھیلائی جارہی ہے، واضح کرنا چاہتا ہوں کہ اس ترمیم میں صوبائی حکومت کا کوئی بھی اختیار کسی کو نہیں دیا جارہا۔
یہ بھی پڑھیں پاکستان میں صرف معدنی مٹی کی قیمت 6 کھرب ڈالر ہے، مصدق ملک
انہوں نے کہاکہ صوبے کا اختیار نہ کوئی کسی کو دے سکتا ہے اور نہ کوئی ہم سے لے سکتا ہے، اس طرح کی افواہیں بے بنیاد اور من گھڑت ہیں جو شاید میرے بغض میں پھیلائی جا رہی ہیں، ہم معدنیات کے شعبے میں اصلاحات کررہے ہیں اور افسوس کی بات ہے کہ اصلاحات کو غلط رنگ دینے کی کوشش کی جارہی ہے۔
علی امین گنڈاپور نے کہاکہ لگتا ہے کہ کوئی مافیا ہے جو اپنے ذاتی مفادات کے لیے اصلاحات کی مخالفت کررہا ہے، ہم نے معدنیات کے شعبے میں بہتر پالیسی اور اصلاحات کے ذریعے صوبے کی آمدن میں اضافہ کیا ہے، بعض عناصر ہمارے اچھے اقدامات کی راہ میں رکاوٹ ڈالنے کے لیے پروپیگنڈا کررہے ہیں۔
وزیراعلیٰ نے کہاکہ پچھلے 76 سالوں سے صوبے میں پلیسر گولڈ کی چار سائٹس میں غیر قانونی مائننگ ہورہی تھی، ماضی میں کسی بھی حکومت نے اس غیر قانونی مائننگ کو روکنے کی کوشش نہیں کی، ہم نے حکومت سنبھالتے ہی ایک صاف اور شفاف طریقے سے پلیسر گولڈ کی ان چار سائیٹس کی نیلامی کردی۔
علی امین گنڈاپور نے کہاکہ ان چار سائٹس کی نیلامی کے ذریعے صوبائی حکومت کو 5 ارب روپے کی آمدن حاصل ہوئی، جبکہ ماضی میں محکمہ معدنیات کی کل سالانہ آمدن اتنی تھی جتنی ہم نے صرف چار سائیٹس سے حاصل کی۔
انہوں نے کہاکہ اسی طرح ہم نے دیگر اقدامات کے ذریعے بھی صوبے کی آمدن میں خاطرخواہ اضافہ کیا، صوبے کی مالی خود کفالت کے لیے معدنیات کے شعبے میں مزید اصلاحات کی ضرورت ہے، اس سلسلے میں ہم غیر قانونی مائننگ کی روک تھام کے لیے قوانین کو سخت کررہے ہیں، نئے قانون میں غیر قانونی مائننگ کرنے والوں کی مشینری کو بحق سرکار ضبط کیا جائے گا۔
وزیراعلیٰ نے کہاکہ ہم صوبے کی قیمتی معدنیات کی ویلیو ایڈیشن پر خصوصی توجہ دے رہے ہیں، خام معدنیات بھیجنے سے نہ صوبے میں صنعتیں لگ رہی ہیں، نہ لوگوں کو روزگار مل رہا ہے اور نہ ہی صوبے کی آمدن میں اضافہ ہورہا ہے۔
انہوں نے کہاکہ جو سرمایہ کار صوبے میں بڑے پیمانے پر سرمایہ کاری کریں گے اور یہیں پر ویلیو ایڈیشن کریں گے ان کی لیز مدت کو بڑھا رہے ہیں، اسی طرح لیز حاصل کرنے کے بعد سائیٹ پر مائننگ شروع کرنے کے لیے مدت کو کم کیا جا رہا ہے۔
انہوں نے کہاکہ اس اقدام سے ایسے لیز ہولڈرز کی حوصلہ شکنی ہوگی جو لیز لینے کے بعد لمبے عرصے تک مائننگ کا کام شروع نہیں کرتے، لیز حاصل کرکے لمبے عرصے تک مائننگ شروع نہ کرنے سے صوبے کو نقصان ہورہا ہے۔
وزیراعلیٰ نے کہاکہ اس سے پہلے معدنیات کی لیز سے متعلق بہت سارے فیصلوں کا اختیار فرد واحد یعنی ڈائریکٹر جنرل کے پاس ہوتا تھا، اب ہم شفافیت لانے کے لیے ایک کثیر رکنی کمیٹی بنا رہے ہیں جس میں صرف صوبائی حکومت کے سارے متعلقہ محکموں کے افسران شامل ہیں، نئی ترامیم میں اس طرح کے اصلاحاتی اقدامات تجویز کیے گئے ہیں جن سے معدنیات کا شعبہ اوپر اٹھے گا۔
انہوں نے کہاکہ صوبے کی معدنیات کسی اور کے حوالے کرنے کی باتیں محض پراپیگنڈا ہیں، ہمیں صوبے کے لوگوں نے مینڈیٹ دیا ہے، اور ہم صوبے کے حقوق کی جنگ لڑ رہے ہیں۔
انہوں نے کہاکہ ہم شروع دن سے این ایف سی، پن بجلی کے منافع، ضم اضلاع کے فنڈز، ٹوبیکو سیس سمیت صوبے کے دیگر آئینی و قانونی حقوق کے لیے لڑ رہے ہیں۔
وزیراعلیٰ نے کہاکہ یہ ہماری مٹی ہے، ہم اس کے مفادات پر کوئی سمجھوتہ نہیں کریں گے نہ ہی کسی کو اپنے اختیارات میں مداخلت کرنے دیں گے، چند دنوں سے چیزوں کو دیکھے اور سمجھے بغیر ایک غلط فہمی پھیلائی جا رہی ہے اور لوگوں کو گمراہ کیا جا رہا ہے۔
انہوں نے کہاکہ اگر میں سازشی لوگوں کو پسند نہیں تو وہ میری ذات پر باتیں کریں لیکن اس طرح کا پروپیگنڈا نہ کریں، اگر کسی نے اس معاملے پر بات کرنی ہے تو وہ آئے اور متعلقہ ریکارڈ کو سامنے رکھ کر بات کرے۔
علی امین گنڈاپور نے کہاکہ یہ مجوزہ ترامیم ابھی اسمبلی میں پیش ہوئی ہیں جہاں منظوری سے پہلے ان پر حکومت اور حزب اختلاف دونوں کی طرف سے بحث ہونی ہے، اگر اس میں مزید بہتری کے لیے کوئی تجاویز سامنے آئیں تو وہ بھی ان ترامیم کا حصہ بنیں گی۔
یہ بھی پڑھیں منرلز انویسٹمنٹ فورم 2025: معدنی وسائل میں سرمایہ کاری کے لیے پاکستان نیا تجارتی و معاشی مرکز قرار
انہوں نے کہاکہ اختیارات کسی اور کے حوالے کرنے کا جو پروپیگنڈا کیا جا رہا ہے میں اس کو یکسر مسترد کرتا ہوں، اور عوام سے اپیل کرتا ہوں کہ وہ اس طرح کے پروپیگنڈے کا حصہ نہ بنیں۔ جو لوگ اس طرح کا پروپیگنڈا کررہے ہیں وہ عوام، صوبے اور عمران خان کے خیر خواہ نہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews اختیارات پروپیگنڈا خیبرپختونخوا اسمبلی علی امین گنڈاپور عمران خان مائننگ لیز مجوزہ ترامیم وزیراعلیٰ خیبرپختونخوا وی نیوز
زلزلے کے جھٹکے، یا اللہ خیر