UrduPoint:

شہباز شریف کا بجلی کی قیمتوں میں کمی کا اعلان

اشاعت کی تاریخ: 3rd, April 2025 GMT

اسلام آباد (اُردو پوائنٹ ۔ DW اردو۔ 03 اپریل 2025ء) پاکستانی وزیر اعظم شہباز شریف نے آج بروز جمعرات ملکی دارالحکومت اسلام آباد میں ایک تقریب سے خطاب کے دوران گھریلو صارفین کے لیے بجلی کی قیمتوں میں 7.41 روپے فی یونٹ اور صنعتی صارفین کے لیے 7.59 روپے فی یونٹ کمی کا اعلان کیا۔

اپنے خطاب کے آغاز میں شہباز شریف نے کہا، ''آج میں عید کے موقع کی مناسبت سے، پاکستان کی معاشی ترقی اور استحکام کے حوالے سے آپ کو ایک ادنیٰ سے خوشخبری سنانے آیا ہوں۔

‘‘

انہوں نے کہا کہ ملک کی ترقی میں بجلی کی قیمت ایک ''رکاوٹ‘‘ ہے اور جب تک ان قیمتوں میں کمی نہیں ہو گی، مختلف شعبہ جات میں ترقی نہیں کی جا سکتی۔

شہباز شریف نے مزید کہا کہ عالمی مالیاتی فنڈ کو، جس کے ساتھ ایک معاہدے کے تحت پاکستان کو قرضے کا ایک پیکج ملا ہوا ہے، بجلی کی قیمتوں میں کمی کے لیے قائل کرنا آسان نہیں تھا۔

(جاری ہے)

پاکستان کے سرکاری نشریاتی ادارے ریڈیو پاکستان کے مطابق اس تقریب میں بجلی کی قیمتوں میں کمی کا اعلان کرتے ہوئے شہباز شریف نے اس اقدام کو قوم کے لیے عید کا تحفہ قرار دیا۔

انہوں نے بجلی چوری کے مسئلے کو ختم کرنے کے عزم کا بھی اظہار کیا اور کہا کہ سالانہ 600 ارب روپے کی بجلی چوری کی جاتی ہے۔

ریڈیو پاکستان کے مطابق شہباز شریف کا یہ بھی کہنا تھا اس وقت ملک میں بجلی کے شعبے کا گردشی قرضہ 2393 ارب روپے ہے، جس کا ایک ''مستقل حل تلاش کر لیا گیا ہے اور آئندہ پانچ سالوں میں گردشی قرضہ بتدریج ختم ہو جائے گا۔

‘‘

شہباز شریف کے آج کے بیان سے ایک دن قبل بدھ کو پاکستانی حکومت کی جانب سے ایکس پر ایک پوسٹ میں کہا گیا تھا، '' بس ایک دن کی دوری پر۔ ایک بڑی خوشخبری پوری قوم کیلئے۔‘‘ اس کے بعد مقامی میڈیا کی متعدد رپورٹوں میں کہا گیا تھا کہ آج وزیراعظم کی جانب سے بجلی کے نرخوں میں کمی کا اعلان متوقع ہے۔

مریم احمد، مقامی میڈیا کے ساتھ

ادارت: امتیاز احمد

.

ذریعہ: UrduPoint

کلیدی لفظ: تلاش کیجئے بجلی کی قیمتوں میں قیمتوں میں کمی شہباز شریف نے کمی کا اعلان کے لیے

پڑھیں:

بجلی کی قیمتوں میں کمی، حافظ نعیم الرحمان نے وزیراعظم شہباز شریف سے بڑا مطالبہ کردیا

امیر جماعت اسلامی پاکستان حافظ نعیم الرحمان نے کہا ہے کہ بجلی کی قیمتوں میں حالیہ کمی آغاز ہے اختتام نہیں، پاکستانی قوم کا خون آئی پی پیز نے نچوڑا اور 1994 سے اب تک حکومتوں نے ان کو سپورٹ دی۔ اس لیے فرانزک آڈٹ ہونا چاہیے، جن لوگوں نے بھی پاکستانی قوم کے ساتھ کھلواڑ کیا ہے، ان سب کو قوم کے سامنے لانا پڑے گا۔

انہوں نے کہا کہ دھرنا کے بعد ہم نے اپنی تحریک کو جاری رکھا۔ گزشتہ برس 28 اگست کو پاکستان کی تاریخ کی سب سے کامیاب ہڑتال ہوئی تھی جس میں پوری قوم اور تاجر برادری نے متفقہ طور پر شرکت کی۔ اس طرح حکومت پر دباؤ بڑھتا چلا گیا۔  اس دوران حکومت لیت و لعل سے کام لیتی رہی لیکن ہم نے اس کا تعاقب جاری رکھا۔اور بالآخر وزیر اعظم نے گزشتہ روز بجلی کی قیمتوں میں کمی کا اعلان کیا۔ ہم اسے پہلا مرحلہ سمجھتے ہیں۔

حافظ نعیم الرحمان نے کہا کہ ہم یہ بات واضح کردینا چاہتے ہیں کہ 7 روپے 41 پیسے فی یونٹ کا جو ریلیف ہے، یہ ریلیف اس سے کہیں زیادہ ہونا چاہیے۔ پاکستان میں بجلی کی مجموعی پیداوار ، اس کی کیپیسٹی تقریباً 45 ہزار میگاواٹ سے زیادہ ہے۔ جبکہ ہماری کھپت 26 سے 30 ہزار میگاواٹ سے زیادہ نہیں جاتی۔  بقیہ بجلی کی صلاحیت کی ہم ادائیگی کرتے ہیں ان آئی پی پیز کو، لیکن یہ بجلی بنتی ہی نہیں ہے۔ ہمارے پاس ہائیڈل پاور موجود ہے، جو سستی بجلی ہے۔ نیوکلیئر پاور پر جب ہماری سرمایہ کاری ہوچکی ہے، اس سے بھی سستی بجلی بنتی ہے۔  اسی طرح قوم کو ریلیف دینے کے سولر پاور میں بہت زیادہ امکانات موجود ہیں۔ اسی طرح ونڈ انرجی بھی ہے۔

یہ بھی پڑھیے اداروں کی کرپشن ختم ہوتو عوام کو ریلیف مل سکتا ہے، حافظ نعیم الرحمان

 جماعت اسلامی کے امیر نے کہا کہ ہمارا اپنا کوئلہ ہے۔ ہم کیوں درآمدی کوئلے پر یہ پلانٹ چلائیں۔ ہم کیوں گیس پر یہ پلانٹس چلائیں، ہم کیوں آئل پر یہ پلانٹ چلائیں کہ جس کو ہم خریدنے کی استطاعت ہی نہیں رکھتے۔  پچھلے کچھ عرصہ سے یہ سب کچھ ہوتا رہا اور بدقسمتی سے ہر حکومت اس میں شامل رہی۔  انیس سو چورانوے سے یہ سلسلہ شروع ہوا۔ اس وقت پیپلز پارٹی کی حکومت تھی۔  پھر اس کے بعد نواز شریف کی حکومت آئی۔ یہ سلسلہ آگے بڑھا۔ نئے آئی پی پیز اس میں شامل ہوتے رہے۔ پھر مشرف دور میں کے ای ایس ای کی پرائیویٹائزیشن ہوئی اور کے الیکٹرک بنی۔ اس میں کرپشن اور لوٹ مار ہوئی۔ ایم کیو ایم پوری طرح اس میں شریک جرم تھی۔ ان لوگوں نے کراچی کا ادارہ کھمبوں کی قیمت کے برابر بیچ دیا۔ شہر کراچی آج تک اس کو بھگت رہا ہے۔  پھر قاف لیگ اور اس کے بعد ایک بار پھر پیپلزپارٹی کی حکومت آئی۔  ہر حکومت میں ایم کیو ایم شامل رہتی ہے۔ یہ لوٹ مار کا سلسلہ پورے ملک میں جاری رہا۔ کراچی سمیت پورے ملک کے لوگ پریشان رہے۔ پھر نواز شریف، پھر پی ٹی آئی، اس کے بعد پی ڈی ایم ون اور پی ڈی ایم ٹو کی حکومت۔

انہوں نے کہا کہ عمران خان کے دور میں چند آئی پی پیز سے ایک فکس پرائس پر مذاکرات کیے گئے۔  پھر جو رپورٹ آئی اس پر عمل درآمد نہیں ہوا۔ کیونکہ عمران خان کے قریب ترین لوگوں میں آئی پی پیز کے مالکان شامل تھے۔

حافظ نعیم الرحمان کا کہنا تھا کہ ان ساری حکومتوں میں پاکستانی قوم کا خون نچوڑنے والی آئی پی پیز کو مکمل سپورٹ دی گئی۔ اس لیے بجلی کی قیمتوں میں کمی ہی کی بات نہیں ہے۔ جن لوگوں نے بھی پاکستانی قوم کے ساتھ کھلواڑ کیا ہے، ان سب کو قوم کے سامنے لانا پڑے گا۔ فرانزک آڈٹ ہوگا تو سب کا پتہ چل جائے گا۔

یہ بھی دیکھیں  حکومتی آئی پی پیز کیپیسٹی چارجز چھوڑیں تو چین بھی مان جائے گا، حافظ نعیم الرحمان

 انہوں نے کہا کہ ہر حکومت، آئی پی پیز اور 1997 سے بننے والا ادارہ نیپرا۔ یہ نیپرا کیا کرتا ہے؟ ہر جرم کے اندر یہ ادارہ شریک ہوتا ہے۔ اگر آپ صرف نیپرا کی رپورٹس ہی دیکھ لیں تو ساری کہانی سمجھ آ جائے گی۔ اس کی رپورٹس ایک طرف اور اس کے فیصلے دوسری طرف۔ یہ فیصلے چند لوگوں کو مضبوط بنانے والے، کرپشن کے کاروبار کو بڑھانے والے ہوتے ہیں۔ اور عوام ان فیصلوں کو بھگتتے رہتے ہیں۔

حافظ نعیم الرحمان نے وزیر اعظم شہباز شریف سے مطالبہ کیا کہ فارنزک آڈٹ کریں۔ ابھی آپ نے 27 یا 29 آئی پی پیز کی بات کی ہے۔ آئی پی پیز 100 سے زائد ہیں۔ انہوں نے پوچھا کہ گورنمنٹ اپنی آئی پی پیز سے بجلی سستی کرنے والا عمل تیز رفتاری سے مکمل کیا جارہا؟  اس عمل کو مکمل کیا جائے اور اس کے اثر براہ راست بجلی کے بلوں پر آنا چاہیے۔

انہوں نے کہا کہ ہماری جدوجہد کے نتیجے میں قوم کے سامنے ایک بات آئی ہے، اس پر پیش رفت ہوئی ہے تو ہم اس کا خیر مقدم کرتے ہیں۔  یہ آغاز ہے اختتام نہیں ہے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں

بجلی کی قیمتوں میں کمی جماعت اسلامی حافظ نعیم الرحمان