شیعہ علماء کونسل کے تحت کراچی میں مرکزی القدس ریلی، علامہ شبیر میثمی کا خصوصی خطاب
اشاعت کی تاریخ: 29th, March 2025 GMT
ریلی کے شرکاء سے خطاب کرتے ہوئے علامہ اسد اقبال زیدی، حسنین مہدی، مولانا جعفر سبحانی، مولانا بدرالحسنین، مولانا عباس مہدی ترابی، مولانا حسن رضا، مولانا سجاد حاتمی و دیگر رہنماؤں کا کہنا تھا کہ اسرائیل کا چپا چپا آج مزاحمتی گروہوں کے نشانے پر ہے اور اسرائیل اندرونی ٹوٹ پھوٹ کا بھی شکار ہو رہا ہے۔ اسلام ٹائمز۔ شیعہ علماء کونسل پاکستان کراچی ڈویژن کی جانب سے مرکزی القدس ریلی ریگل تا کراچی پریس کلب تک ریلی نکالی گئی جس میں ہزاروں کی تعداد میں مرد، خواتین و کارکنان نے بڑی تعداد میں شرکت کی۔ ریلی سے ایس یو سی پاکستان کے رہنماؤں علامہ شبیر میثمی اور علامہ اسد اقبال زیدی نے خطاب کیا جبکہ اس موقع پر ملی یکجہتی کونسل سندھ کے رپنما علامہ قاضی احمد نورانی، فلسطین فاؤنڈیشن پاکستان کے سیکریٹری جنرل ڈاکٹر صابر ابومریم نے بھی خصوصی شرکت کی۔ اپنے خطاب میں رہنماؤں کا کہنا تھا کہ پاکستانی حکومت مسلمان رہنماؤں کے وزرائے خارجہ کی کانفرنس بلا کر فلسطین میں جاری صیہونی بمباری، بربریت، نمازیوں، بچوں اور عورتوں پر ڈھائے جانے والے مظالم کے خلاف صدائے احتجاج بلند کریں، دنیا دیکھ رہی ہے کہ اسرائیل کا زعم اور ناقابل تسخیر ہونے کا دعوی ختم ہوتا جا رہا ہے، اسرائیل کا چپا چپا آج مزاحمتی گروہوں کے نشانے پر ہے اور اسرائیل اندرونی ٹوٹ پھوٹ کا بھی شکار ہو رہا ہے، انسانیت اور انسانی حقوق کی پامالی کرنے سے دنیا میں امن قائم نہیں ہوسکتا، انسانی حقوق کے چیمپئنز کو فلسطین میں اسرائیل کی جانب سے انسانیت سوز مظالم کیوں نظر نہیں آتے، کفار کی جانب سے مسلمانوں کو تقسیم کیے جانا لمحہ فکریہ ہے۔
ریلی کے شرکاء سے خطاب کرتے ہوئے حسنین مہدی، مولانا جعفر سبحانی، مولانا بدرالحسنین، مولانا عباس مہدی ترابی، مولانا حسن رضا، مولانا سجاد حاتمی و دیگر رہنماؤں کا کہنا تھا امت مسلمہ کے مسائل کا حل ان کے اتحاد میں مضمر ہے، اس وقت مسئلہ فلسطین امت کا سب سے بڑا اور اہم موضوع ہے، اپنے آپ کو انسانی حقوق کا چیمپئن کہنے والوں کو فلسطین میں اسرائیلی اور کشمیر میں بھارتی انسانیت سوز مظالم نظر کیوں نہیں آتے، ان کا یہ منافقانہ طرز عمل انتہائی قابل مذمت ہے، فلسطین میں مسلمانوں کو مذہبی عبادات کرنے سے روکا جا رہا ہے، یہ سب اس لئے ہو رہا ہے کیونکہ دنیا بھر میں بسنے والے مسلمان گروہوں میں بٹ گئے ہیں، ان مسائل سے نکلنے کا واحد راستہ امت مسلمہ کا اتحاد ہے۔ ریلی کے اختتام پر شرکاء ریلی نے امریکہ و اسرائیل کے پرچم نذر آتش کئے۔