لاہور، شیعہ علماء کونسل کے زیراہتمام القدس ریلی، فلسطینیوں سے اظہار یکجہتی
اشاعت کی تاریخ: 28th, March 2025 GMT
علامہ سید ساجد علی نقوی کی اپیل پر شیعہ علما کونسل نے لاہور پریس کلب سے پنجاب اسمبلی تک ریلی نکالی، القدس ریلی کی قیادت صفی الحسنین شیرازی نے کی، شرکائے ریلی نے اسرائیل اور امریکہ کیخلاف شدید نعرے بازی کی، اسرائیل بین الاقوامی قوانین کی خلاف ورزی کر رہا ہے، مقررین نے اسرائیلی مصنوعات کے مکمل بائیکاٹ کا مطالبہ کیا۔ اسلام ٹائمز۔ علامہ سید ساجد علی نقوی کی اپیل پر ملک بھر میں شیعہ علماء کونسل کے زیر اہتمام یوم القدس منایا گیا۔ نماز جمعتہ الوداع کے بعد فرزندان اسلام نے القدس ریلیاں نکال کر مظلوم فلسطینی عوام سے اظہار یکجہتی اور اسرائیل کی ناجائز صیہونی ریاست کے خاتمے کا مطالبہ کیا۔ لاہور پریس کلب سے پنجاب اسمبلی ہال تک نکالی جانیوالی القدس ریلی کی قیادت جنرل سیکرٹری شیعہ علماء کونسل وسطی پنجاب سید صفی الحسنین شیرازی نے کی۔ شرکائے ریلی نے اسرائیل اور امریکہ کیخلاف نعرہ بازی کی اور مختلف قراردادوں کے ذریعے فلسطینی عوام سے اظہار یکجہتی کیا گیا اور افسوس کا اظہار کیا گیا کہ اسرائیل بین الاقوامی قوانین کی خلاف ورزی کر رہا ہے، مگر امریکی سرپرستی کی وجہ سے اس کیخلاف اقوام متحدہ اور عالمی طاقتوں نے کوئی کارروائی نہیں کی۔ جبکہ شام میں فلسطین کی حمایتی حکومت کو ختم کرکے اسرائیل کی سہولت کاری کی گئی ہے۔
ایک قرارداد میں چند نام نہاد پاکستانی صحافیوں کے مبینہ اسرائیلی دورے کی مذمت کی گئی اور حکومت سے تحقیقات کرکے حقائق منظر عام پر لانے کا مطالبہ بھی کیا گیا۔ ملک میں جاری دہشتگردی کے واقعات کی مذمت کرتے ہوئے شہداء کے خاندانوں سے اظہار تعزیت کیا گیا اور تشویش کا اظہار کیا گیا کہ اتنے بڑے سانحات میں سے کسی ایک کے بھی حقائق منظر عام پر نہیں لائے گئے۔ ریلی سے خطاب میں سید صفی الحسنین شیرازی نے امریکی استعمار اور اتحادی ممالک کی مذمت کرتے ہوئے کہا کہ فلسطین پر مجرمانہ خاموشی کا مسلم ممالک کو قیامت کے دن حساب دینا ہوگا کہ ایک مسلم ریاست پر قبضہ کیا گیا، وہاں کے عوام نے اپنی جدوجہد کی مگر کئی عرب ریاستوں نے اسرائیل کو تسلیم کرکے یہودیوں کا ساتھ دیا۔ انہوں نے کہا کہ سوائے اسلامی جمہوری ایران، حزب اللہ لبنان اور انصاراللہ یمن کے کسی نے میدان میں حماس کا ساتھ نہیں دیا۔ جبکہ پاکستانی حکومت کامحض زبانی اظہار یکجہتی کافی نہیں، عملی مدد کی جائے۔
ریلی میں شیعہ علماء کونسل وسطی پنجاب کے نائب صدور علامہ حسن رضا قمی، جعفر علی شاہ، سیکرٹری اطلاعات سید شہباز حیدر نقوی، ڈویژنل سیکرٹری آصف علی زیدی اور دیگر بھی شریک ہوئے اور خطاب میں کہاکہ عالم تشیع فسلطینی مسلمانوں کو تنہا نہیں چھوڑے گا۔
ذریعہ: Islam Times
کلیدی لفظ: شیعہ علماء کونسل اظہار یکجہتی نے اسرائیل القدس ریلی سے اظہار کیا گیا
پڑھیں:
ملتان، ایم ڈبلیو ایم یوتھ ونگ، عزاداری ونگ اور علماء ونگ کے زیراہتمام القدس ریلی
ریلی سے خطاب کرتے ہوئے رہنمائوں نے کہا کہ اسرائیل ایک غاصب ریاست ہے، غزہ کے مظلوم مسلمانوں کی استقامت نے دنیا کو ورطہ حیرت میں ڈال دیا ہے، اسماعیل ہانیہ، یحیی السنوار اور سید حسن نصر اللہ امت مسلمہ کے ہیرو ہیں جنہوں نے امت کو مقاومت، مزاحمت اور عالمی استکبار سے ٹکرانے کا درس دیا ہے۔ اسلام ٹائمز۔ عالمی یوم القدس کے موقع پر قائد وحدت علامہ راجہ ناصر عباس جعفری کے حکم پر وحدت یوتھ، عزاداری ونگ، مجلس علمائے مکتب اہلیبیت، مجلس اتحاد بین المومنین، جامعہ شہیدمطہری کے زیراہتمام امام بارگاہ چوک کمہارانوالہ سے قبلہ اول کی آزادی اور مظلومین فلسطین و غزہ ،یمن و پاراچنار کی حمایت میں مرکزی احتجاجی ریلی نکالی گئی، جس کی قیادت علامہ قاضی نادر حسین علوی، علامہ غلام مصطفی انصاری، انجینئر مہر سخاوت علی سیال، سید نوید عباس شاہ، علامہ طاہر عباس نقوی، جواد رضا جعفری، علامہ امیر حسین ساقی، علامہ مجاہد جعفری، سید ثقلین نقوی نے کی۔ جبکہ خواتین ریلی کی قیادت خانم تصدق زہرا قاضی اور خانم ساجدہ بتول گردیزی نے کی۔ شرکا سے خطاب کرتے ہوئے علامہ قاضی نادر حسین علوی نے کہا یہ احتجاج فقط ایک اجتماع نہیں بلکہ اللہ کے دین کی حمایت اور مظلوموں کے حق میں ایک آواز ہے، یوم القدس مظلومین جہان کی حمایت اور صیہونی جارحیت کے خلاف صدائے احتجاج ہے۔ یہ دن ہمیں یاد دلاتا ہے کہ القدس محض ایک شہر نہیں بلکہ امت مسلمہ کے ایمان، غیرت اور اسلامی تشخص کی علامت ہے۔
علامہ غلام مصطفی انصاری نے کہا کہ اسرائیل ایک غاصب ریاست ہے، غزہ کے مظلوم مسلمانوں کی استقامت نے دنیا کو ورطہ حیرت میں ڈال دیا ہے، اسماعیل ہانیہ، یحیی السنوار اور سید حسن نصر اللہ امت مسلمہ کے ہیرو ہیں جنہوں نے امت کو مقاومت، مزاحمت اور عالمی استکبار سے ٹکرانے کا درس دیا ہے، اسرائیل یہ جنگ ہار چکا ہے، آج پوری دنیا اسرائیل کو ایک ظالم فرعونی ریاست کے طور پر جانتی ہے۔ انجینئر مہر سخاوت علی سیال نے کہا غزہ کے مظلوموں نے اپنے صبر و استقامت سے پوری دنیا کو فلسطین کی تحریک مزاحمت کی طرف متوجہ کیا ہے، آج فلسطین عالم انسانیت کا سب سے بڑا مسئلہ بن چکا ہے اور آزادی فلسطین و مسجد اقصی کی منزل قریب آ چکی ہے۔
علامہ طاہر عباس نقوی نے کہا امریکہ و اسرائیل نے مل کر غزہ و فلسطین میں 50 ہزار بے گناہ انسانوں کا قتل کیا ہے، لہذا اُمت مسلمہ کو اسرائیلی مصنوعات کا بائیکاٹ کرتے ہوئے غاصب اسرائیل اور امریکہ کے ظلم و بربریت کے خلاف بھرپور آواز بلند کرنی چاہیے، خانم تصدق زہرا قاضی اور خانم ساجدہ گردیزی نے خطاب کرتے ہوئے کہا کہ ہم کنیزان سیدہ زینب کبری کی سیرت پر عمل کرتے ہوئے ہر دور میں ظالم کے خلاف اور مظلوم کے حق میں آواز بلند کرتی رہیں گی، غزہ کی مظلوم ماں بہنوں کی جرات و بہادری اور صبر کو سلام پیش کرتی ہیں۔ مقررین نے مطالبہ کیا کہ عالم اسلام یکجا ہو کر اسرائیل سے قبلہ اول اور بیت المقدس کو بحال کروا کر یہودیوں سے آزاد کروائیں۔ریلی میں علامہ غلام جعفر انصاری، علامہ ہادی حسین، حسنین انصاری، زاکر صابر خان، ملک عمران، ناصر گردیزی سمیت بچوں، بزرگوں اور خواتین نے کثیر تعداد میں شرکت کی۔ ریلی کے آخر میں اسرائیل و امریکہ کے پرچم اور ٹرمپ اور نیتن یاہو کے پتلے نذرآتش کیے گئے۔
بلوچستان:یوم پاکستان پر ڈیرہ بگٹی میں شاندار ریلی