Express News:

مکالمہ اور مصافحہ ہی امن کا ضامن !

اشاعت کی تاریخ: 24th, March 2025 GMT

جین گڈال ( Jane Goodall)مشہور برطانوی دانشور، مصنف اور زوالوجسٹ ہیں ۔ اِس وقت اُن کی عمر 90برس ہے ۔ وہ کہتی ہیں:’’ دِلوں اور ذہنوں میں تبدیلی کا آغاز اُس وقت ہوتا ہے جب دو مخالف اور متحارب فریق ایک دوسرے کی بات سُننے کو تیار ہوجاتے ہیں ۔ شنیدن کے اِس عمل کے بعد ہی باہمی مکالمہ شروع ہوتا ہے ۔

یہ مکالمہ ایسے فریقین میں ہوتا ہے جو یقین کیے بیٹھے ہوتے ہیں کہ مخالف فریق کا ہر عمل غلط ہے ۔ مکالمہ ، مصافحہ اور پھر معانقہ دلوں اور ذہنوں پر جمی تعصب کی برف پگھلا دیتے ہیں۔ مکالمے کی اصل رُوح صبر ہے۔‘‘کیسی خوب بات کہی ہے !ہلاکت خیز جنگوں کا آخری فیصلہ بھی تو مکالمے کی میز پر ہی ہوتا ہے ۔ پھر کیوں نہ ہم ، ہماری سیاسی جماعتیں اور ادارے اپنے اپنے متنازع معاملات مذاکرات اور مکالمے سے طے کریں؟ مکالمے کی بساط بچھانے کی بازگشت ہر طرف سنائی دے رہی ہے ۔حتیٰ کہ وزیر اعلیٰ کے پی بھی کہہ رہے ہیں کہ مکالمے اور مذاکرے ہی سے اُن کے صوبے میں (ٹی ٹی پی کے ہاتھوں) پھیلی دہشت گردی کی آگ ٹھنڈی ہو سکتی ہے۔

جناب علی امین گنڈا پور کے زندانی لیڈر تو شہباز حکومت سے مکالمہ اور مصافحہ کرنے پر تیار نہیں ہیں ، لیکن علی امین صاحب خود مغربی سرحد پار دہشت گرد عناصر سے مکالمہ کی بات کررہے ہیں ۔ موصوف نے 21مارچ2025کو اسلام آباد میں سینئر صحافیوں کے ساتھ ایک نشست میں کہا:’’ مجھے ٹاسک دیں ۔مَیں افغان طالبان سے مکالمہ اور مذاکرات کر لیتا ہُوں ۔

افغان طالبان کو مکالمے کی میز پر بٹھائیں ۔ امن کے لیے اُن سے مذاکرات ہی واحد حل ہیں۔ تمام قبائلی ایجنسیوں کے قبائلی مشران سے مذاکرات کا پلان بنا کر ہم نے پاکستان کے دفترِ خارجہ اور وزارتِ داخلہ کو بھیجا ، مگر کسی جانب سے کوئی جواب نہیں آیا ۔ مجھے یقین ہے کہ قبائلی مشران سے افغان طالبان مکالمے اور مذاکرے سے انکار نہیں کر سکتے ۔مجھے اگر یہ ٹاسک دیا جائے تو مَیں کل ہی اخونزادہ ( افغان طالبان کے مرکزی امیر) کے ساتھ بیٹھا نظر آؤں گا۔ مجھے (افغانستان) بھجوائیں ، پھر(امن کی) بات بنے گی ۔‘‘ جناب علی امین گنڈا پور نے اتنا بڑا دعویٰ کر دیا ہے تو ہمارے اصل فیصلہ سازوں کو انھیں آزما ہی لینا چاہیے ۔

سوال مگر یہ ہے کہ ٹی ٹی پی اور مقتدر افغان طالبان پر اعتبار کیسے اور کیونکر کیا جائے ؟ پاکستان میں یہ تاثر گہرا ہے کہ ٹی ٹی پی اور ٹی ٹی اے ، دونوں نے رَل مل کر پاکستان کو دغا دیا ہے ۔ قیامِ امن کی خاطر مقتدر افغان طالبان سے مکالمہ اور مذاکرات کرنے حضرت مولانا فضل الرحمن بھی افغانستان گئے تھے ، مگر نتیجہ صفر نکلا ۔ علی امین گنڈا پور مگر اِس بارے تبصرہ کرتے ہُوئے مبینہ طور پر کہتے ہیں: ’’ (یہ مکالمہ اس لیے بے ثمر رہا تھا کہ) مولانا فضل الرحمن سے افغان طالبان کی نچلی سطح کی قیادت کا رابطہ ہُوا تھا۔‘‘ تو اَب علی امین گنڈا پور کو آزما لینا چاہیے کہ وہ افغان طالبان کی ’’اعلیٰ سطح‘‘ قیادت سے مکالمہ کرکے دیکھ لیں ۔

حالات بہر حال تشویشناک ہیں۔اس لیے قیامِ امن کے لیے(ناقابلِ اعتبار ٹی ٹی اے سے) مکالمے کا رسک لینے میں بھی کوئی مضائقہ نہیں ہے ۔ 18مارچ  2025کو جب بلوچستان کی دگرگوں صورتحال پر اسلام آباد میں قومی سلامتی کمیٹی کا اعلیٰ ترین اجلاس ہو رہا تھا، ہمارے کئی اخبارات بلوچستان بارے (احتیاط کا دامن ملحوظِ خاطر رکھتے ہُوئے) تشویشناک حقائق سامنے رکھ رہے تھے ۔

مثال کے طور پر ایک انگریزی معاصر نے ’’ٹائم لائن‘‘ کے تحت بلوچستان میں وقوع پذیرہونے والے دہشت گردی کے سانحات کی ایک تفصیلی رپورٹ شایع کی ہے ۔اِس رپورٹ کے مطابق:  30 جنوری2024 تا3مارچ2025 بلوچستان میں دہشت گردی کے خونریز اور خونی سانحات ، واقعات میں 119فیصد اضافہ ہُوا ہے ۔ اِس دوران بلوچستان میں دہشت گردوں اور انسانیت و پاکستان دشمنوں نے 225 بے گناہ افراد کی جانیں لے لیں ۔ بلوچستان میں بروئے کار دو معروف دہشت گرد تنظیموں (بی ایل اے اور بی ایل ایف) نے، مبینہ طور پر، یہ خونریزی کی ہے۔ کوئی بھی غیر ملکی محقق اور اخبار نویس اگر مذکورہ رپورٹ کا مطالعہ کرتا ہے تو بلوچستان بارے اُس کا پہلا تاثر یہی ہوگا : بلوچستان کے حالات نہائت خراب ہیں !

بلوچستان کے اِنہی خراب حالات کے سدھار کے لیے18مارچ کو اسلام آباد میں ہمارے کئی بڑوں کی بیٹھک ہُوئی ۔ جب یہ ’’بیٹھک‘‘ ہو رہی تھی ، ملکی میڈیا میں یہ بھی وچار کیا جارہا تھا کہ آتشناک بلوچستان کے ’’ناراض عناصر‘‘ کو منایا جائے تو کیسے ؟ انگریزی معاصر کی ایک مشہور پاکستانی دانشور نے اپنے مفصل تجزیئے میں مشورہ دیا ہے کہ مبینہ طور پر غیروں کے ہاتھوں چڑھے ناراض بلوچ عناصر سے براہِ راست مکالمہ کیا جائے ۔

موصوفہ نے بطورِ دلیل لکھا :’’ اگر پاکستان کی دشمن اور کئی پاکستانیوں کی قاتل دہشت گرد تنظیم ، ٹی ٹی پی، سے ریاستِ پاکستان براہِ راست مکالمات و مذاکرات کر سکتی ہے تو ناراض بلوچ عناصر سے کیوں نہیں ؟ہمارے ایک آمر کے دَور میں ٹی ٹی پی کے لیڈر، نیک محمد، کے گلے میں ہار ڈالے گئے اور صوفی محمد سے بھی مصافحہ اور معانقہ کیا گیا ۔

یہ اقدامات اس لیے کیے گئے تاکہ انھیں منا کر اصل قومی دھارے میں لایا جائے ۔ تو پھر بلوچ عناصر سے براہِ راست بات چیت میں کیا امر مانع ہے؟۔‘‘یہ منطق و دلیل شاید درست ہی ہو مگر سوال یہ ہے کہ ٹی ٹی پی کے چند افراد سے مذاکرات اور مکالمے کا کیا کوئی مثبت نتیجہ بھی نکلا؟ ٹی ٹی پی کے دہشت گرد آج بھی پاکستان و پاکستانیوں کے خلاف ہتھیار اُٹھائے ہُوئے ہیں ۔ تو کیا یہی راستہ پھر سے اختیار کرنے پر کوئی مثبت نتیجہ نکلنے کی اُمید کی جا سکتی ہے؟ ؛چنانچہ کسی دانشمند کا کہنا ہے کہ : دُنیا بھر کا اصول یہ ہے کہ جہاں کہیں دہشت گردی اور مرکزِ گریز قوتیں سر اُٹھاتی ہیں ، اُن کا سر کچلنے کے لیے مکالمے اور تلوار کو یکساں طور پر بروئے کار لایا جاتا ہے، اِسی کے آمیزے سے سلامتی اور امن کا راستہ نکلتا ہے ۔

بلوچستان میں قیامِ امن اور ناراضوں کو گلے لگانا ہی ہمارا اجتماعی کرداربن جانا چاہیے ؟ مکالمے ، مصافحے اور معانقے کی بساط بچھانے کا وقت ہُوا چاہتا ہے ۔ ایک دوسرے پرالزام تراشی کاوقت گزر چکا ہے ۔ مثال کے طور پر گزشتہ روز بلوچستان اسمبلی میں ایک خاتون ایم پی اے نے شعلہ فشانی کرتے ہُوئے کہا:’’ بلوچستان کے حالات اس لیے دگرگوں ہیں کیونکہ بلوچستان کے سردار اور اُن کی آل اولادیں امیر سے امیر ترین ہو گئے ہیں اور بلوچستان کے عوام غریب سے غریب ترین ہو گئے ہیں۔‘‘ بلوچستان اسمبلی کے اسپیکر نے مذکورہ خاتون ایم پی اے کا مائیک بند کرکے اگرچہ انھیں مزید بولنے سے روک دیا، مگر کہنا پڑے گا کہ خاتون کی باتیں اتنی بے بنیاد بھی نہیں ہیں ۔ مسئلہ مگر اب ایسی تہمتوں سے آگے نکل چکا ہے ۔

 جب18مارچ کو اسلام آباد میں قومی سلامتی کی بیٹھک ہو رہی تھی ، ایک قومی روزنامہ نے یہ خبر شایع کی کہ ’’بولان ( بلوچستان) میں سرنگوں کی حفاظت کرنے والے لیویز کے اہلکار3ماہ کی تنخواہوں سے محروم ہیں۔‘‘ اگر واقعی صورتحال یہ ہے تو بلوچستان کے عوام کی حفاظت کون کرے گا؟ واضح رہے کہ11مارچ 2025کو جعفر ایکسپریس ٹرین کے اغوا کا سانحہ بھی بلوچستان کی ایک سرنگ ہی میں پیش آیا تھا ۔

سوال پوچھا جا سکتا ہے کہ مرکزی حکومت سے بلوچستان حکومت کو فراہم کردہ اربوں روپے کس Sink Holeمیں غائب ہو گئے ؟ اور اب 21مارچ2025 کو بلوچستان کے دو علاقوں ( قلات اور نوشکی)میں دہشت گردوں نے 4پولیس اہلکاروں اور4پنجابی محنت کشوں کو بیدردی سے قتل کر دیا ہے۔ کیا ایسے خونی اور خوں آشام قاتلوں سے بھی مکالمہ کیا جائے ؟ ناممکن!21مارچ ہی کو مہرنگ بلوچ کی تنظیم( BYC) نے نام نہاد احتجاج سے کوئٹہ شہر بند کر نے کی ناکام کوشش تو کی لیکن اِس تنظیم نے مذکورہ8بیگناہ افراد کے قتل کی مذمت نہیں کی ۔تو کیا ایسی تنظیموں کے لیے بھی بات چیت کے دروازے کھولے جائیں؟؟

.

ذریعہ: Express News

کلیدی لفظ: علی امین گنڈا پور اسلام ا باد میں بلوچستان میں افغان طالبان بلوچستان کے مکالمہ اور ٹی ٹی پی کے مکالمے کی سے مکالمہ ہوتا ہے کے لیے دیا ہے اس لیے

پڑھیں:

85 ویں یوم پاکستان کے موقع پر تشدد کے واقعات

اسلام آباد (اُردو پوائنٹ ۔ DW اردو۔ 23 مارچ 2025ء) 85 ویں یوم پاکستان کے موقع پر بلوچستان اورخیبرپخونخوا میں پرتشدد کارروائیوں میں کم از کم بیس افراد مارے گئے ہیں۔ حکام نے بتایا ہے کہ قلات ڈسٹرکٹ میں کیے گئے ایک حملے میں چار پنجابی ورکرز کو ہلاک کر دیا گیا۔

کسی گروہ نے اس کارروائی کی ذمہ داری قبول نہیں کی ہے لیکن حالیہ عرصے میں بلوچ لبریشن آرمی متعدد حملوں کی ذمہ داری قبول کر چکی ہے، جن میں جعفر ایکسپریس پر کیا گیا خونریز حملہ بھی شامل ہے۔

تشدد کا دوسرا واقعہ پاکستان اور افغانستان کی سرحد پر رونما ہوا، جس میں سکیورٹی فورسز نے سولہ حملہ آوروں کی ہلاکت کی تصدیق کی ہے۔

پاک فوج کے شعبہ تعلقات عامہ (آئی ایس پی آر) نے بتایا ہے کہ یہ واقعہ بائیس اور 23 مارچ کی درمیانی رات شمالی وزیرستان کے علاقے غلام خان کلے میں پیش آیا۔

(جاری ہے)

دریں اثنا صدر پاکستان آصف علی زردای نے یوم پاکستان کے مرکزی تقریب سے خطاب میں کہا ہے کہ پاکستان کو متعدد سیاسی و جغرافیائی مسائل کا سامنا ہے۔

انہوں نے مزید کہا کہ پاکستانی عوام مسلح افواج کے ساتھ کھڑے ہیں۔

اسلام آباد میں منعقد اس تقریب میں صدر زرداری نے مزید کہا کہ ففتھ جنریشن وار فیئر ایک چیلج بن چکا ہے تاہم پاکستانی فوج تمام تر چینلجوں سے نمٹنے کے لیے تیار ہے۔

یوم پاکستان کے دن کی مبارکباد دیتے ہوئے انہوں نے عوام سے کہا کہ فوج دہشت گردی کو جڑ سے اکھاڑ پھینکے گی۔

یوم پاکستان 23 مارچ 1940کو برصغیر کے مسلمانوں کے اپنے لیے ایک علیحدہ وطن کی قرارداد منظور کرنے کی یاد میں منایا جاتا ہے۔

اسی طرح وزیر اعظم پاکستان شہباز شریف نے بھی قوم کو مبارکباد دی اور کہا کہ ان کی حکومت ملک کے معاشی بحران پر قابو پانے میں کامیاب ہو چکی ہے۔

ساتھ ہی انہوں نے دہشت گردی کے خلاف جنگ میں مسلح افواج، پولیس، ایف سی اور رینجرز سمیت تمام قانون نافذ کرنے والے اداروں کی 'بے مثال ہمت، جرات اور بہادری‘ کو بھی سراہا۔

حکومت کی طرف سے دہشت گردی کو ختم کرنے کے دعوؤں کے برخلاف پاکستان میں حالیہ عرصے میں پرتشدد کارروائیوں میں اضافہ نوٹ کیا جا رہا ہے۔ ان میں سے زیادہ تر حملوں کے لیے پاکستانی طالبان کو ذمہ دار قرار دیا جاتا ہے، جن کے بارے میں کہا جا رہا ہے کہ تحریک طالبان پاکستان کے جنگجو طالبان کے افغانستان میں پناہ گاہیں بنائے ہوئے ہیں۔ افغان طالبان البتہ اس الزام کو مسترد کرتے ہیں۔

ادارت: رابعہ بگٹی