’’پراجیکٹ عمران خان‘‘۔۔۔بہت مہنگا پڑ رہا ہے!
اشاعت کی تاریخ: 18th, March 2025 GMT
’جعفر ایکسپریس‘ کے دہشت گردانہ اغوا نے پاکستان ہی نہیں دنیا بھر کو لرزا دیا ۔ مسلح افواج کے دلیرانہ اور جزئیات کی حد تک پختہ کار پیشہ ورانہ آپریشن نے بہت بڑی خون ریزی سے بچالیا۔ فوج کے جوانوں نے اپنی جانیں نچھاور کرکے، اپنے ہم وطنوں کی جانیں بچائیں۔
دشوار گزارسنگلاخ پہاڑی سلسلوں میں، دہشت گردوں کے نرغے میں گھری جعفر ایکسپریس کے چارسُو رات کے اندھیرے گہرے ہو رہے تھے، سینکڑوں گھرانے اپنے پیاروں کی زندگیوں کے بارے میں امیدوبیم کی صلیب پر لٹکے ہوئے تھے اورنیند سے عاری آنکھوں میں چنگاریاں سی بھر گئی تھیں جب رات دس بج کر بتیس منٹ پر، بانی پی۔ٹی۔آئی، عمران خان کے تصدیق شدہ ذاتی ایکس اکائونٹ سے ایک طویل بیان جاری ہوا۔ خارجہ پالیسی کو شدید تنقید کا نشانہ بنانے اور افغانستان کے ساتھ تعلقات کے بگاڑ کی تمام تر ذمہ داری پاکستان پر ڈالنے کے بعد موصوف نے فرمایا __ ’’خفیہ اداروں کا اصل کام، سرحدوں کا تحفظ اور دہشت گردی سے بچائو ہے۔ اگر وہ پولیٹیکل انجینئرنگ اور تحریک انصاف کو توڑنے میں ہی لگے رہیں گے تو سرحدوں کا تحفظ کون کرے گا؟‘‘ جعفر ایکسپریس پر دہشت گردوں کے حملے اور مسلح افواج کے آپریشن کو یکسر نظرانداز کرتے ہوئے اپنی ’’اُفتاد‘‘ کی داستان سناتے ہوئے فرمایا __ ’’میری اپنے بچوں سے بات نہیں کرائی جاتی۔ جیل مینوئل کے مطابق اپنی بیوی سے نہیں ملایا جارہا۔‘‘
یہ ہے اُس ’’پراجیکٹ عمران خان‘ کا تازہ ترین چہرہ جسے بڑی ہُنرمندی سے تراشا اور 25 جولائی 2018 ء کی رات کی اولیں ساعتوں میں آر۔ٹی۔ایس کی شہہ رگ دبوچ کر قوم پر مسلّط کیاگیا۔ علی الصبح جنرل آصف غفور نے ’’وتُعزُّ من تشاء وتُزِلُّ من تشاء‘‘ (وہ جسے چاہے عزت دے جسے چاہے ذلت دے) کا شہرۂِ آفاق ٹویٹ کرکے اہل وطن کو یہ مژدۂِ جانفزا سنایا کہ ہم ایک مدّت سے جس شجرِآرزو، کو سینچ رہے تھے، وہ بالآخر پھل لے آیا ہے۔ یہ پھَل قوم وملک کو کس بھائو پڑا، اِس کا اندازہ سرِدست نہیں لگایاجاسکتا کیونکہ ’’صدقۂِ جاریہ‘‘ کی طرح یہ پراجیکٹ جانے کب تک ’صدمۂِ جاریہ‘ بن کر، عذابِ پیہم کی طرح ہم پر مسلّط رہے گا۔
معاشی امور پر گرفت رکھنے والے مبصر خُرّم حسین نے 13 مارچ کو معروف انگریزی اخبار ’’ڈان‘‘ میں ایک چشم کُشا آرٹیکل لکھا۔ خُرّمکا کہنا ہے کہ افراط زر (مہنگائی) کی شرح میں بے تحاشا اضافے کا سلسلہ عمران خان کے دور میں شروع ہوا جب یہ شرح 38 فی صد تک پہنچ گئی۔ اُن کے اقتدار سے ہٹنے کے فوراً بعد یہ شرح نقطۂِ عروج پر پہنچ گئی لیکن عمران خان نے، اقتدار سے محرومی کا فائدہ اٹھاتے ہوئے اِس کا ملبہ آنے والوں پر ڈال دیا۔‘‘ اِسی آرٹیکل میں خُرّم حسین نے دو اور اقتصادی مبصرین کی آراء کا حوالہ بھی دیا ہے جن میں سے ایک، حفیظ پاشا لکھتے ہیں کہ ’’2008ء سے2017ء تک عام پاکستانی کی قوّتِ خرید میں اوسطاً 3 فی صد سالانہ کی شرح سے اضافہ ہوا۔‘‘ حفیظ پاشا مزید کہتے ہیں __ ’’یہ امر انتہائی افسوس ناک ہے کہ آج ایک غریب پاکستانی ورکر کی قوّتِ خرید، اُس قوّتِ خرید سے بھی بہت کم ہے جو اُسے آٹھ سال پہلے (2017ء میں) حاصل تھی۔ شاذونادر ہی دیکھاگیا ہے کہ غریب کارکنوں کی آمدنی/ قوّتِ خرید پر ایسی تباہ کُن ضرب لگی ہو۔‘‘ خُرّم حسین نے ایک اور معتبر اقتصادی مبصر، عادل منصور کا حوالہ بھی دیا ہے جس نے اعدادو شمار کی مدد سے واضح کیا ہے کہ ’’اگر آنے والے مزید پانچ سالوں تک، عام پاکستانی کی اُجرت میں دس فی صد سالانہ کی شرح سے اضافہ کیاجاتا رہے، تو اُس کی قوّتِ خرید 2029ء میں، اُس قوّتِ خرید کے برابر پہنچے گی جو اُسے 2017ء میں حاصل تھی۔‘‘ کاش اِس امر کا بھی جائزہ لیاجائے کہ اگر 2017ء والا پاکستان، نوازشریف کی قیادت میں اُسی ثابت قدمی اور سُبک روی کے ساتھ آگے بڑھتا رہتا تو آج کہاں کھڑا ہوتا اور عام پاکستانی کے شب و روز میں کتنی بہتری آچکی ہوتی۔
اِس فتنہ ساماں ’’پراجیکٹ‘‘ نے پاکستان کی سیاسی، سماجی اور جمہوری اقدار پر کتنے چرکے لگائے اور باہمی نفرتوں کے کیسے کیسے خارزار کاشت کئے، اِس کا اندازہ لگانے میں کئی سال لگیں گے۔ 9 مئی کی غارت گری کو خوش آمدید کہنے اور اِسے اپنے فدائین کا فطری ردّعمل قرار دینے کے مہینوں بعد پی۔ٹی۔آئی نے یہ پُرفریب بیانیہ تراشا کہ 9 مئی تو فوج کا ’’فالس فلیگ آپریشن‘‘ تھا۔ مطلب یہ ہے کہ خود فوج نے سینکڑوں فوجی تنصیبات پر حملے کئے، فضائیہ کے اڈوں پر کھڑے طیارے جلائے، شہداء کی یادگاروں کی بے حُرمتی کی اور الزام، آب زمزم میں دھلی، پاکیزہ ومعصوم پی۔ٹی۔آئی کے سر تھوپ دیا۔ اب تحریک انصاف کے سیکریٹری جنرل، سلمان اکرم راجہ نے، جانے پہچانے اور معروف ایکس اکائونٹس سے کئے جانے والے پاکستان دشمن پراپگنڈے سے لاتعلقی کی کوشش کرتے ہوئے کہاکہ ’’پی۔ٹی۔آئی، لاکھوں اکائونٹس کو کنٹرول نہیں کرسکتی۔ لوگوں کو باہر بٹھاکر، پی۔ٹی۔آئی کا لبادہ اوڑھاتے ہوئے، دانستہ منصوبے کے تحت، اُن سے ٹویٹس کرائے جاتے ہیں۔ اُن کا پی۔ٹی۔آئی سے کوئی تعلق نہیں۔‘‘ کوئی ہے جو اِس بے سروپا دلیل پر یقین کرے ؟ پی۔ٹی۔آئی کی کانِ نمک میں جاکر، نمک ہوجانے والے، اچھے خاصے خوش سلیقہ وشیریں کلام سلمان اکرم راجہ، لاکھوں اکائونٹس نہ سہی، صرف عمران خان ہی کا باضابطہ اور مصدقہ ذاتی ایکس کائونٹ بند کرا دیں جو ملک کے اداروں اور قومی سلامتی کے خلاف زہریلے پرپگنڈے کا آتش فشاں بنا ہوا ہے۔ اور اگر لاکھوں اکائونٹس بند نہیں کرائے جاسکتے تو کیا کھُل کر اُن کی مذمت بھی نہیں کی جاسکتی؟ کیا ایف۔آئی۔اے کے سائبر کرائم ونگ کو اُن کے خلاف شکایت بھی نہیں کی جاسکتی؟ اور کیا اُن جانے پہچانے فتنہ پردازوں کے خلاف کوئی کارروائی نہیں ہوسکتی جو پی۔ٹی۔آئی کے بیانیے کو پروان چڑھانے کے لئے سرِشام اپنی چھابڑیاں لگا کر بیٹھ جاتے ہیں؟
’’پراجیکٹ عمران خان‘‘ ایک ایسے عجیب الخلقت سانچے میں ڈھل چکا ہے جس کی کوئی نظیر قومی سیاست میں نہیں ملتی۔ کھیل کے میدان سے آئی۔ایم۔ایف کے دسترخوان تک، پاکستان کے حصے میں آنے والی ہر ناکامی پر اُن کے ہاں گھی کے چراغ جل اُٹھتے اور ہر کامیابی پر صفِ ماتم بچھ جاتی ہے۔ کوئی کچھ بھی کہتا رہے، اُن کے دل ودماغ سے پاکستانیت رُخصت ہوچکی ہے۔ کڑے امتحان کے نازک لمحات میں بھی، عمران خان کا ٹویٹ، کسی طور قوم کے جذبات واحساسات کی ترجمانی نہیں کرتا۔ اُس کے لفظ لفظ سے دہشت گردوں سے ہمدردی اور مسلح افواج سے بُغض کی بُو آ رہی ہے۔شرق وغرب کے تمام ممالک نے کسی تحفظ کے بغیر اِس مکروہ واردات کی مذمت کی یہاں تک کہ اقوام متحدہ کی سلامتی کونسل نے بھی مذمتی بیان جاری کیا لیکن آج ایک ہفتہ ہونے کو آیا، عمران خان کا ٹوئٹر خاموش ہے۔ نہ دہشت گردوں کے لئے کوئی کلمۂِ مذمت، نہ کامیاب آپریشن پر مسلح افواج کے لئے کوئی حرفِ تحسین۔ اُوپر سے ضد یہ کہ خان کو پیرول پر رہا کرکے آل پارٹیز کانفرنس میں لایا جائے۔موصوف وزیراعظم تھے تو بھی قومی سلامتی کے موضوع پر کسی ایسی کانفرنس میں نہیں جاتے تھے جس میں تمام پارلیمانی جماعتیں اور مسلح افواج کی قیادت موجود ہوتی ۔ دلیل یہ تھی کہ جہاں یہ چور اور ڈاکو بیٹھے ہوں گے، میں نہیں جائوں گا۔ جنرل باجوہ ترلے ہی کرتے رہ جاتے ۔ کوئی پوچھے کہ کون سے فرشتوں کی ہم نشینی کے لئے آج یہ پیرول پر رہا ہونا چاہتے ہیں؟
ذریعہ: Daily Ausaf
کلیدی لفظ: مسلح افواج پی ٹی ا ئی نے والے کے لئے
پڑھیں:
پارلیمنٹ کا جوائنٹ سیشن بلایا جائے، عمران خان کو رہا کیا جائے: تحریکِ تحفظِ آئینِ پاکستان
اسکرین گریبتحریک تحفظ آئین پاکستان کی مرکزی قیادت نے قومی سلامتی کمیٹی کے اجلاس میں شرکت سے انکار کردیا، پارلیمنٹ کا جوائنٹ سیشن بلانے کا مطالبہ کرتے ہوئے کہا ہے کہ عمران خان کو پرول پر رہا کیا جائے تاکہ وہ قومی سلامتی سے متعلق اجلاس میں شرکت کر سکیں، بانئ پی ٹی آئی کے بغیر کسی میٹنگ کی اہمیت نہیں ہوگی۔
اسلام آباد میں تحریک تحفظ آئین کے رہنماؤں کے ہمراہ پریس کانفرنس کرتے ہوئے تحریک انصاف کے سیکرٹری جنرل سلمان اکرم راجہ نے کہا کہ ہم نے اس اجلاس میں شریک ہونے سے انکار کردیا ہے ، گزشتہ روز سیاسی کمیٹی کے اجلاس میں ہم نے فیصلہ کیا تھا، ہماری طرف سے کوئی نمائندہ میٹنگ میں نہیں جائے گا۔
انہوں نے کہا کہ علی امین گنڈا پور بطور وزیر اعلیٰ خیبر پختونخوا اجلاس میں شریک ہونگے، اس وقت ہم کسی بھی آپریشن کے حق میں نہیں ہیں، 77 سال سے ان حالات کا شکار ہیں اور ان حالات کے حق میں نہیں ہیں، ہم نے پاکستان کے پسماندہ طبقات کے لوگوں کے حقوق دلوانے ہیں، ہم نے اس ملک کو ٹھیک کرنا ہے اور فسطائیت کا خاتمہ کرنا ہے۔
تحریک تحفظ آئین پاکستان کے سربراہ محمود خان اچکزئی نے کہا پاکستان انتہائی خطرناک دور سے گزر رہا ہے، ہم اس غیر آئینی وزیراعظم کی دعوت پر کیسے جائیں۔
محمود اچکزئی نے کہا ملکی سلامتی کے لیے طلب میٹنگ میں ہر سیاسی جماعت کے نمائندوں کو بلایا جائے، بانئ پی ٹی آئی کو بھی اس میٹنگ میں بلایا جائے، ملکی سلامتی کی میٹنگز میں جماعت اسلامی کے نمائندے بھی شریک ہونے چاہیئیں۔
انہوں نے کہا کہ ہم چاہتے ہیں جوائنٹ سیشن بلایا جائے اور وہ دو دن کا اجلاس ہو، تمام پارلیمانی ارکان کو بلاکر جوائنٹ میٹنگ کی جائے، جس میں سب کو بریفنگ دی جائے۔
تحریک انصاف نے قومی سلامتی کمیٹی اجلاس میں شرکت پارٹی رہنماؤں کی بانی پی ٹی آئی سے ملاقات کرانے سے مشروط کردی۔
محمود خان اچکزئی نے کہا ہے کہ اس وقت سب سے خطرناک بات یہ ہے کہ الیکشن میں جیتی ہوئی جماعت کو ہرایا گیا، ہمیں دکھ ہے کہ الیکشن دھاندلی انہوں نے کی جنہوں نے آئین کا حلف لیا ہے۔
ان کا کہنا ہے کہ قومی اسمبلی کا ممبر کسی بھی جیل کا جائزہ لے سکتا ہے، بانئ پی ٹی آئی سے ملنے پارٹی رہنما جاتے ہیں انہیں اجازت نہیں ملتی، یا تو اعلان کردیاجائے کہ عمران خان خطرناک آدمی ہے اس سے کوئی نہیں مل سکتا، ہمارے ساتھ عوامی طاقت ہے اور جیل سپرنٹنڈنٹ اور حکام کو اس کا حساب دینا ہوگا۔
صاحبزادہ حامد رضا کا کہنا ہے کہ ہم نےان کیمرا اجلاس کا مطالبہ کیا تھا، گزشتہ روز ہم نے اپنے نمائندوں کے نام دیے جو مشروط تھے، سیاسی کمیٹی کا اجلاس بلایا جس میں ہم نے فیصلہ کیا کہ کمیٹی میں نہیں جائیں گے۔
انہوں نے کہا کہ کل پارلیمانی کمیٹی اجلاس میں فیصلہ کیا تھا کہ عمر ایوب اسپیکر کو خط لکھیں گے، 26 ویں آئینی ترمیم کے دوران ساری ساری رات اسمبلی اجلاس ہوتے رہے ہیں، اس وقت ملک کی خودمختاری کا مسئلہ ہے۔
صاحبزادہ حامد رضا نے کہا ہمارا مطالبہ ہے کہ پارلمنٹ کا جوائنٹ سیشن بلایا جائے، عمران خان ایک بڑے لیڈر ہیں ان کو اعتماد میں لیے بغیر آگے نہیں بڑھ سکتے، بانئ پی ٹی آئی کو اعتماد میں لیے بغیر عوامی سپورٹ نہیں ملے گی، ہماری رائے ہے کہ آپریشن کی بجائے مذاکرات پر غور کرنا چاہیے،
راجہ ناصر عباس نے کہا پاکستان کے عوام اس حکومت پر اعتماد نہیں کرتی، عدلیہ میں ریفارمز کر کے ان کو بھی کمزور کردیا گیا، ضروری وقت میں جیل سے قیدیوں کو بھی پرول پر لایا جاتا ہے، بانئ پی ٹی آئی کو آن بورڈ لیے بغیر جو بھی فیصلے ہوئے وہ عوامی فیصلے نہیں ہوں گے، عوام ان فیصلوں کو قبول نہیں کرے گی۔
امریکا: حماس کی حمایت کرنے والوں کے گرین کارڈ اور ویزے منسوخ کرنے کا عمل شروع