PTI سوشل میڈیا کا غلط استعمال، پارٹی کی سیاسی کمیٹی معاملہ عمران کے سامنے اٹھائے گی
اشاعت کی تاریخ: 15th, March 2025 GMT
اسلام آباد (نیوز ڈیسک)پی ٹی آئی کی سیاسی کمیٹی نے فوج اور ملکی مفادات کیخلاف پارٹی کے آفیشل سوشل میڈیا اکائونٹس کے غیر ذمہ دارانہ استعمال کا معاملہ پارٹی کے بانی چیئرمین عمران خان کے روبرو لانے کا فیصلہ کیا ہے۔
پارٹی ذرائع نے انکشاف کیا کہ حال ہی میں کے پی ہائوس اسلام آباد میں ہونے والی سیاسی کمیٹی کے اجلاس میں اس معاملے پر تبادلہ خیال کیا گیا اور پارٹی کے آفیشل سوشل میڈیا اکائونٹس سے جارحانہ اور بے ضابطہ مواد پھیلائے جانے پر تشویش کا اظہار کیا گیا۔
ساتھ ہی اس بات پر اتفاق کیا گیا کہ جیل میں عمران خان سے پارٹی کے سینئر رہنما ملاقات کریں گے تاکہ انہیں سوشل میڈیا پلیٹ فارمز (جس میں ان سے براہ راست تعلق رکھنے والے اکائونٹس بھی شامل ہیں) کا غلط استعمال روکنے کیلئے نگرانی کا طریقہ کار نافذ کرنے پر آمادہ کیا جا سکے۔
پارٹی کے اندرونی ذرائع کہتے ہیں کہ عمران خان کو مشورہ دیا جائے گا کہ وہ پی ٹی آئی کے اہم رہنمائوں پر مشتمل ایک کمیٹی تشکیل دیں جو پارٹی کے آفیشل اکاؤنٹس بشمول ایکس (سابقہ ٹوئٹر) اور فیس بک پر پوسٹ کیے جانے سے قبل تمام مواد کی جانچ کرے۔ اس تجویز کا بنیادی مقصد بیرون ملک مقیم افراد کے اثر و رسوخ کو روکنا ہے جو مبینہ طور پر یہ اکائونٹس فوج مخالف مہمات اور پوسٹس کیلئے استعمال کرتے ہیں۔
اس سے ملکی مفادات کو نقصان ہو سکتا ہے۔ اگرچہ عمران خان پہلے بھی ان اکائونٹس کا دفاع کر چکے ہیں لیکن پارٹی کے اندر ان اکائونٹس کے استعمال کے حوالے سے بے چینی میں اضافہ ہو رہا ہے۔
کئی سینئر رہنمائوں نے ان اکائونٹس کے ذریعے پھیلائے جانے والے مواد پر تحفظات کا اظہار کیا ہے لیکن یہ پہلی بار ہے کہ پارٹی کی سیاسی کمیٹی نے باضابطہ طور پر اس معاملے کو اٹھایا ہے۔
ماضی میں، انفرادی سطح پر پارٹی رہنمائوں نے عمران خان پر زور دیا تھا کہ وہ پارٹی کی سوشل میڈیا پالیسیوں کا از سر نو جائزہ لیں، لیکن انہوں نے ان لوگوں کیخلاف کبھی کارروائی نہیں کی جن پر بیرون ملک سے ان پلیٹ فارمز کے غلط استعمال کا الزام ہے۔
پارٹی کے ایک سینئر ذریعے نے بتایا کہ پی ٹی آئی کے تقریباً تمام سرکردہ رہنمائون بشمول بیرسٹر گوہر، علی امین گنڈا پور، سلمان اکرم راجہ، شبلی فراز، جنید اکبر، رئوف حسن، عامر ڈوگر، حافظ فرحت اور اسد قیصر نے کے پی کے ہائوس اسلام آباد اجلاس میں شرکت کی اور اس بات پر اتفاق کیا کہ سوشل میڈیا پلیٹ فارمز پر سخت کنٹرول ضروری ہے۔
اس معاملے پر بلوچستان میں پیش آنے والے دہشت گردی کے واقعے سے قبل غور کیا گیا تھا۔ اس واقعے کو پی ٹی آئی کے سوشل میڈیا نے ہوا دی تھی۔
پارٹی کے کچھ مصدقہ اکائونٹس کے حوالے سے الزام ہے کہ ان کے ذریعے ٹرین ہائی جیکنگ میں ملوث عسکریت پسندوں کے بیانات سے ہم آہنگ پروپیگنڈا شیئر کیا گیا۔
پی ٹی آئی کی سینئر قیادت کا پارٹی کے سوشل میڈیا اکائونٹس پر کوئی کنٹرول نہیں، یہ اکائونٹس بیرون ملک سے چلائے جا رہے ہیں۔
پارٹی چیئرمین بیرسٹر گوہر علی خان، سیکرٹری جنرل سلیمان اکرم راجہ اور سیکریٹری اطلاعات وقاص اکرم شیخ کا بھی پوسٹ کیے جانے والے مواد پر کوئی اثر رسوخ نہیں۔ متنازع بیانیہ پھیلانے کا عمل روکنے کیلئے پی ٹی آئی کے امریکا چیپٹر سے بات چیت کا معاملہ بھی ماضی میں نظر انداز کیا جاتا رہا ہے۔
پارٹی رہنمائوں کو یہ شکایت بھی ہے کہ پارٹی کے آفیشل اکائونٹس پر ان کے کئی بیانات اور پریس کانفرنسز کو نظر انداز کر دیا جاتا ہے لیکن بیرون ملک بیٹھے کچھ یوٹیوبرز کی پوسٹس اور بیانات پر توجہ مرکوز رکھی جاتی ہے۔
پی ٹی آئی کے سوشل میڈیا اور بیرون ملک بیٹھے (ڈائسپورا) مخصوص گروپس کا دبائو ایسا ہے کہ پارٹی رہنما جھوٹے یا مبالغہ آرائی پر مبنی بیانات اور پروپیگنڈے کی تردید سے کتراتے ہیں۔ کئی لوگوں کا خیال ہے کہ صرف عمران خان ہی پارٹی کے ڈیجیٹل پلیٹ فارمز کو ضابطے میں لا سکتے ہیں۔
تاہم، انہیں قائل کرنے کی سابقہ کوششیں ناکام رہی ہیں، کیونکہ وہ پی ٹی آئی کے آفیشل سوشل میڈیا اکائونٹس سے پھیلائے گئے مواد کی مسلسل تعریف و تائید کرتے رہے ہیں۔
انصار عباسی
Post Views: 1.ذریعہ: Daily Mumtaz
کلیدی لفظ: سوشل میڈیا اکائونٹس پارٹی کے ا فیشل پی ٹی ا ئی کے اکائونٹس کے سیاسی کمیٹی پلیٹ فارمز بیرون ملک کیا گیا نے والے
پڑھیں:
چھ نسلوں سے جاری مزاحمت (قسط پنجم)
بیسویں صدی کی پہلی چوتھائی کے فلسطینی سماج کا سیاسی سرمایہ روائیتی عصبیتی سوچ کا مظہر تھا اور اسی نظام کے مدار میں مقامی سیاست بھی گھوم رہی تھی جس پر لامحالہ اشرافیہ کا قبضہ تھا۔جب کہ ان کا حریف (صیہونی) یورپی اقدار ، شہری پس منظر اور جدت کارانہ سوچ سے مسلح تھا۔
بالاخر انیس سو سترہ کے اعلانِ بالفور نے فلسطینی سماج کو اپنی بقا کے لیے جدید قوم پرستی اور منظم سیاسی جدوجہد کے قرینے اپنانے پر مجبور کر دیا۔ قوم پرستی کی آنچ سے تشکیل پانے والی سول سوسائٹی کی پرورش میں شرحِ خواندگی میں اضافے ، ابھرتے ہوئے اخباری و صوتی میڈیا اور رابطہ کاری کے تیز رفتار ذرایع نے اہم کردار نبھایا۔
سماج کو سیاسی طور پر متحرک کرنے کے کئی طریقے سامنے آنے لگے۔مثلاً یادگار دن منانے کی روائیت۔جیسے دو نومبر بطور یومِ بالفور ( یومِ سیاہ ) منانے کی روائیت۔ تاکہ عام لوگوں کو یاد رہے کہ کس طرح ان کی زمین غصب کرنے کی کوششوں میں برطانیہ کا کلیدی کردار ہے۔ چار جولائی گیارہ سو ستاسی عیسوی کی جنگِ حطین یومِ فتح کی شکل میں فلسطینی سیاسی کیلنڈر کا حصہ بنی۔جنگِ حطین میں صلاح الدین ایوبی نے یورپی صلیبی لشکر کو شکست دی تھی۔
سولہ مئی انیس سو چھتیس سے یومِ فلسطین منانے کا آغاز ہوا تاکہ صدیوں سے بسنے والی اکثریت کی شناخت اجاگر ہو سکے۔ یروشلم میں سالانہ نبی موسی تہوار جو کہ روائیتی روحانی عقیدت کے اظہار کے لیے جانا جاتا تھا۔اب اس میلے میں سیاستِ حاضرہ کا رنگ بھی بھرنے لگا۔
ہم گزشتہ مضامین میں عزالدین القسام اور ان کے مسلح گروہ الکف الاسود کے بارے میں بتا چکے ہیں کہ القسام نے ہی یہ نکتہ اپنے عمل سے اجاگر کیا کہ مسلح جدوجہد دراصل سیاسی مقصد کے حصول کا ہی ایک راستہ ہے بشرطیکہ مسلح طاقت کو ذمے دارانہ انداز میں انفرادی کے بجائے اجتماعی اہداف حاصل کرنے کی نیت سے استعمال کیا جائے۔
القسام کے مسلح سیاسی جدوجہد کے نظریے سے متاثر ہو کے فلسطین کے متعدد علاقوں میں کئی مقامی گروہ ابھرے۔جیسے شمالی فلسطین میں القف الخضرہ ، یروشلم کے علاقے میں الجہاد المقدس ، اور تلکرم و قلقالیہ کے علاقے میں الشباب التحئیر نام سے انیس سو انتیس تا انیس سو پینتیس مسلح گروہ متحرک رہے۔کچھ تحلیل یا ضم ہو گئے اور کچھ انیس سو چھتیس تا انتالیس کی مزاحمتِ عظمی کا حصہ بن گئے۔
اسی طرح کئی سیاسی جماعتیں بھی وجود میں آگئیں۔مگر زیادہ تر جماعتوں کی قیادت کا انحصار قبائلی و برادری وفاداریوں پر تھا۔مثلاً حزب الدفاع الوطنی بااثر برطانیہ نواز النشیشیبی خاندان کی نمایندہ تھی۔ابتدا میں یہ پارٹی مزاحمتی تحریک کا حصہ بنی مگر پھر اس نے یہی تحریک دبانے میں برطانوی نوآبادیاتی انتظامیہ کا بھرپور ساتھ بھی دیا۔ چنانچہ جب دیگر فلسطینی سیاسی جماعتوں کی سرگرمیاں خلافِ قانون قرار پائیں تب بھی نوآبادیاتی انتظامیہ کی وفادار حزب الدفاع الوطنی کو کام کرنے کی کھلی چھوٹ تھی۔یہ واحد مقامی جماعت تھی جس نے فلسطین کی تقسیم کی سب سے پہلے حمائیت کی۔
النشیشیبی خاندان کے سیاسی حریف یروشلم کے الحسینی خاندان نے الحزبِ العربی الفلسطینی کی بنیاد رکھی۔یہ صیہونی مخالف جماعت کٹر قوم پرست موقف اپنانے کے سبب جلد ہی مقبول ہو گئی۔اس جماعت کا بنیادی مطالبہ تھا کہ برطانیہ جلد از جلد عرب اکثریتی نمایندوں کو اقتدار سونپ کر رخصت ہو جائے۔
اکتوبر انیس سو سینتیس میں برطانوی انتظامیہ نے حسینی خاندان کی الحزب العربی الفلسطینی کو کالعدم قرار دے کر کارکنوں کی وسیع پیمانے پر پکڑ دھکڑ شروع کی۔پارٹی سربراہ جمال الحسینی شام فرار ہو گئے۔ بعد ازاں برطانویوں نے انھیں پکڑ کے اپنی دوردراز افریقی نوآبادی روڈیشیا میں قید رکھا اور پھر قاہرہ منتقل کر دیا۔جب کہ الحسینی خاندان کے سب سے معروف رکن امین الحسینی کو بھی انھی حالات سے گذرنا پڑا۔
انیس سو چھتیس تا انتالیس کی مزاحمت میں امین الحسینی کا اہم کردار رہا اور انھوں نے تمام سیاسی جماعتوں کو عرب ہائر کمیٹی کے پلیٹ فارم پر جمع کر کے تحریک کو منظم رکھنے میں بنیادی کردار ادا کیا۔جب کریک ڈاؤن شروع ہوا تو وہ بیرونِ ملک چلے گئے اور جرمنی میں ایڈولف ہٹلر سے ملاقات کر کے برطانویوں کے خلاف مدد طلب کی۔الحزب العربی الفلسطینی نے انیس سو اکتالیس میں عراق میں برطانیہ نواز وزیرِ اعظم نوری السعید کی حکومت کا تختہ الٹنے والے جرمنی نواز فوجی افسروں کی بھی حمائیت کی مگر جلد ہی برطانیہ نے اس حکومت کو برطرف کرنے میں کامیابی حاصل کر لی۔
ایک اور پارٹی حزبِ استقلال العربی کے نام سے متوسط طبقے کے ان فلسطینی رہنماؤں نے قائم کی جن کے عرب حکمرانوں سے قریبی تعلقات تھے۔مگر اس جماعت کو کوئی خاص عوامی پذیرائی نہ مل سکی۔حزبِ استقلال انڈین نیشنل کانگریس کی طرز پر عدم تشدد پر مبنی جدوجہد کی حامی تھی۔
ایک اور معروف فلسطینی الخالدی خاندان نے حزبِ اصلاح قائم کی۔اس کے سربراہ یروشلم کے مئیر حسین الخالدی تھے۔انھیں مزاحمتی تحریک میں حصہ لینے پر اپنے عہدے سے ہاتھ دھونا پڑے اور برطانوی انتظامیہ نے چار دیگر فلسطینی رہنماؤں کے ساتھ حسین الخالدی کو بھی بحرِ ہند کے جزیرہ سیشلز بجھوا دیا اور حزبِ اصلاح کو کالعدم قرار دے دیا۔
یہاں پر فلسطینی کیمونسٹ پارٹی کا تذکرہ بھی ضروری ہے۔یہ فلسطین میں متحرک ہونے والی پہلی منظم سیاسی پارٹی تھی جو انیس سو تئیس میں قائم ہوئی۔اس کے ارکان میں صیہونیت مخالف عرب اور یہودی شامل تھے۔تاہم جب انیس سو سینتالیس میں اسٹالن نے اقوامِ متحدہ کے تحت فلسطین کی تقسیم اور اسرائیل کے قیام کی حمائیت کی تو فلسطین کیمونسٹ پارٹی بھی دو دھڑوں میں بٹ گئی۔
ایک دھڑے نے نیشنل لبریشن لیگ کے نام سے فلسطین کی تقسیم کی مخالفت کی جب کہ دوسرے دھڑے نے مکئی کے نام سے کیمونسٹ پارٹی آف اسرائیل کا روپ دھار لیا۔یہ دھڑا اگرچہ عربوں کو اسرائیل میں مساوی حقوق دینے کا حامی تھا مگر اسرائیل کے قیام کو بھی جائز سمجھتا تھا۔( فلسطینی کیمونسٹ پارٹی نے انیس سو ستاسی میں پیپلز پارٹی کے نام سے پی ایل او میں شمولیت اختیار کر لی )۔
فلسطینی خواتین کی سیاسی بیداری کا تذکرہ تاراب عبدالہادی کے بغیر نامکمل رہے گا۔تاراب نے انیس سو بیس کے عشرے میں فلسطین عرب ویمنز کانگریس کے قیام میں بنیادی کردار ادا کیا۔یہ تنظیم بھی صیہونیت مخالف اور فلسطین کی آزادی کی پرزور حامی تھی۔انیس سو اڑتالیس میں تاراب کو بھی اپنے وطن سے جبری ہجرت کر کے قاہرہ جانا پڑا۔جہاں انیس سو چھہتر میں ان کا انتقال ہوا۔
یہ تھا وہ سیاسی پس منظر جسے سمجھے بغیر انیس سو چھتیس تا انتالیس کی پہلی بڑی فلسطینی مزاحمت سمجھ میں نہیں آ سکتی۔ ( جاری ہے )
(وسعت اللہ خان کے دیگر کالم اور مضامین پڑھنے کے لیے bbcurdu.com اورTweeter @WusatUllahKhan.پر کلک کیجیے)
خواتین کو تعلیم، معیشت اور قیادت میں آگے لانا قوم کے مفاد میں ہے: صدر زرداری