کوئٹہ، سکیورٹی سے متعلق اعلیٰ سطحی اجلاس، وزیراعظم و آرمی چیف کی شرکت
اشاعت کی تاریخ: 13th, March 2025 GMT
اجلاس میں اعلیٰ سول و عسکری قیادت نے شرکت کی۔ اس موقع پر شرکاء نے کہا کہ شدت پسندوں کیخلاف زیرو ٹالرنس کی پالیسی جاری رکھیں گے۔ اسلام ٹائمز۔ بلوچستان کی سکیورٹی صورتحال سے متعلق اعلیٰ سطحی اجلاس کا انعقاد آج صوبائی دارالحکومت کوئٹہ میں وزیر اعلیٰ ہاؤس میں ہوا۔ جس میں وزیراعظم محمد شہباز شریف، چیف آف آرمی سٹاف جنرل سید عاصم منیر، نائب وزیراعظم و وزیر خارجہ محمد اسحاق ڈار، وفاقی وزیر منصوبہ بندی احسن اقبال، وزیر اطلاعات و نشریات عطاء اللہ تارڑ، گورنر اور وزیراعلیٰ بلوچستان سمیت اعلیٰ سول و عسکری حکام اور سیاسی جماعتوں کے رہنماؤں اور نمائندوں نے شرکت کی۔ بریفنگ کے دوران شرکاء کو بلوچستان میں سکیورٹی کی موجودہ صورتحال، دہشت گردی کے خلاف جاری کوششوں اور جعفر ایکسپریس حملے سے متعلق حالیہ آپریشن کے کامیاب انعقاد کے بارے میں تفصیل سے آگاہ کیا گیا۔
شرکاء نے دہشت گردی کی تمام قسموں اور مظاہر کے خلاف زیرو ٹالرنس کی پالیسی کو برقرار رکھنے کا اعادہ کیا۔ سیاسی جماعتوں کے قائدین و نمائندگان، وفاقی و صوبائی وزراء، سرکاری افسران اور کانفرنس کے شرکاء نے متفقہ طور پر جعفر ایکسپریس پر حملے کی مذمت کی اور شہداء کی لازوال قربانیوں کو خراج عقیدت پیش کرتے ہوئے ان کے لئے فاتحہ خوانی کی۔ بلوچستان اسمبلی کے اراکین اور مختلف سیاسی حلقوں سے تعلق رکھنے والے سیاستدانوں سے بات چیت کے دوران وزیراعظم نے دہشت گرد تنظیموں کے خلاف سیاسی رہنماؤں اور نمائندگان کے عزم اور بلوچستان کے لئے جامع طویل المدتی اصلاحات اور ترقیاتی منصوبوں و قانون سازی کے عزم کو سراہا۔
ذریعہ: Islam Times
پڑھیں:
دہشت گرد امن کیلئے عزم متزلزل نہیں کر سکتے ، وزیراعظم، آج کوئٹہ میں اجلاس طلب
اسلام آباد (اپنے سٹاف رپورٹر سے+ خبرنگار خصوصی+ اے پی پی) وزیراعظم شہبازشریف نے ٹرین حملے پر گفتگو کرتے کہا کہ دہشت گرد امن کیلئے ہمارے عزم کو متزلزل نہیں کر سکتے۔ وزیراعظم محمد شہباز شریف نے جعفر ایکسپریس آپریشن مکمل کرنے اور یرغمال شہریوں کو بحفاظت بازیاب کرنے پر پاک فوج اور سکیورٹی فورسز کو خراج تحسین پیش کیا۔ بدھ کو وزیراعظم آفس کے میڈیا ونگ سے جاری کردہ بیان کے مطابق وزیراعظم نے کہا کہ سکیورٹی فورسز کے جوانوں کی پیشہ ورانہ مہارت اور فوج کے سپہ سالار کی متحرک قیادت کی بدولت جعفر ایکسپریس آپریشن کی بغیر کسی بڑے نقصان کے تکمیل ممکن ہوئی۔ آپریشن انتہائی مہارت کے ساتھ کیا گیا۔ ہمارے بہادر جوانوں اور افسروں نے بہادری اور دلیری کا مظاہرہ کرتے ہوئے 33 دہشت گردوں کو جہنم واصل کیا۔ انہوں نے کہا کہ نہتے اور معصوم شہریوں کی جان و مال کو نقصان پہنچانے والوں کا دین اسلام اور اس ملک سے کوئی تعلق نہیں۔ معصوم شہریوں پر حملہ کرنے والوں کو ہر محاذ پر شکست دینے کے لیے پر عزم ہیں۔ ملک سے دہشت گردی کے مکمل خاتمے تک دہشتگردوں کے خلاف ہماری جنگ جاری رہے گی۔ دہشتگرد حملے سے پوری قوم صدمے میں ہے۔ وزیراعظم شہباز شریف نے آج دہشتگردی کی روک تھام کیلئے اعلیٰ سطح اجلاس طلب کر لیا۔ وزیراعظم شہباز شریف آج ایک روزہ دورے پر کوئٹہ جائیں گے جہاں وہ امن و امان کی صورتحال پر اجلاس کی صدارت کریں گے۔ وزیراعظم کو جعفر ایکسپریس پر دہشتگردوں کے حملے پر بریفنگ دی جائے گی اور دہشت گردوں سے نمٹنے کیلئے اہم فیصلے بھی کئے جائیں گے۔ دوران اجلاس سکیورٹی ادارے جعفر ایکسپریس آپریشن کی مکمل تفصیلات بتائیں گے جبکہ وزیراعظم سانحہ جعفر ایکسپریس میں شہید ہونے والوں کی نماز جنازہ میں بھی شریک ہوں گے۔ سماجی رابطے کی ویب سائٹ ایکس پر جعفر ایکسپریس کے حوالے سے پیغام میں وزیراعظم شہباز شریف نے کہا کہ ابھی میری وزیراعلیٰ بلوچستان سرفراز بگٹی سے ٹیلی فون پر بات ہوئی ہے۔ انہوں نے بتایا کہ وزیراعلیٰ بلوچستان نے مجھے جعفر ایکسپریس پر ہونے والے دہشت گردی کے گھناؤنے حملے کے تازہ ترین حالات سے آگاہ کیا۔ وزیراعظم نے کہا کہ معصوم جانوں کے ضیاع پر پوری قوم غم زدہ ہے، ایسی بزدلانہ کارروائیاں پاکستان کے امن کے عزم کو متزلزل نہیں کر سکتیں۔ وزیراعظم نے کہا کہ میں شہداء کے اہل خانہ سے دلی تعزیت کرتا ہوں، اللہ تعالیٰ ان کو جنت الفردوس میں اعلیٰ مقام اور زخمیوں کو جلد صحت یاب فرمائے۔ انہوں نے کہا کہ آپریشن کے دوران درجنوں دہشت گردوں کو جہنم واصل کر دیا گیا ہے۔ وزیراعظم شہبازشریف سے مختلف چیمبرز آف کامرس کے صدور نے ملاقات کی۔ چیمبرز صدور نے معاشی استحکام پر حکومتی ٹیم کی تعریف، مشاورت پر اظہار تشکر کیا۔ وزیراعظم نے کہا کہ تمام وزارتیں چیمبرز کی مشاورت اور تجاویز پر پالیسی اقدامات کا لائحہ عمل پیش کریں۔ وزیراعظم نے کہا کہ معاشی استحکام کا حصول پہلا زینہ ہے۔ ملکی ترقی کا سفر اب شروع ہوا ہے۔ تمام وزارتیں چیمبرز آف کامرس سے مشاورت کے بعد بجٹ کے لئے لائحہ عمل پیش کریں۔ پاکستان کی معاشی ترقی کے لئے سب کو مل کر کام کرنا ہوگا۔ تاجروں کے مسائل کا حل اولین ترجیح ہے۔ حکومت بھرپور ساتھ دے گی۔ کاروباری برادری کی سہولت کیلئے ہرممکن اقدام اٹھا رہے ہیں۔ تاجر ٹیکس ریونیو میں اضافے کیلئے سسٹم میں اصلاحات پر تجاویز دیں۔ شرکاء نے کہا کہ آپ کی قیادت میں ملک معاشی استحکام کے بعد ترقی کی جانب بڑھ رہا ہے۔ بجٹ کے مشاورتی عمل میں شامل کرنا خوش آئند ہے۔
چھوٹے اور درمیانے درجے کے کاروبار کے فروغ کیلئے حکومت ترجیحی بنیادوں پر کام کر رہی ہے، وزیر اعظم