طارق روڈ پر لگژری گاڑی نے کرتب کے دوران موٹر سائیکل سواروں کو روند ڈالا
اشاعت کی تاریخ: 11th, March 2025 GMT
کراچی:
شہر قائد کے علاقے طارق روڈ کے قریب ایک دل دہلا دینے والے حادثے میں لگژری گاڑی کے ڈرائیور نے کرتب کے دوران دو موٹر سائیکل سواروں کو روند ڈالا، جس کے نتیجے میں دونوں افراد زخمی ہو گئے۔
واقعہ کی ویڈیو سوشل میڈیا پر وائرل ہو گئی ہے، جس میں سفید رنگ کی گاڑی میں سوار دو افراد دکھائی دیتے ہیں۔
ویڈیو میں واضح طور پر دیکھا جا سکتا ہے کہ گاڑی کا ڈرائیور چلتی ٹریفک میں گاڑی کو چکر لگاتے ہوئے دکھائی دیتا ہے، اور اچانک اس کی رفتار بڑھا کر ڈرفٹنگ شروع کر دیتا ہے۔
اس دوران گاڑی کی زد میں آ کر موٹر سائیکل سوار دونوں افراد زخمی ہو جاتے ہیں اور ان کی موٹر سائیکل گاڑی کے اگلے بمپر میں پھنس جاتی ہے۔
حادثے کے فوراً بعد گاڑی سوار دونوں افراد موقع سے فرار ہونے میں کامیاب ہو گئے۔ پولیس نے واقعے کی تحقیقات شروع کر دی ہیں، تاہم ابھی تک ملزمان کی گرفتاری عمل میں نہیں آئی۔
اس واقعے نے شہریوں میں غم و غصے کی لہر دوڑا دی ہے، اور ٹریفک قوانین کی خلاف ورزی کرنے والوں کے خلاف سخت کارروائی کا مطالبہ کیا جا رہا ہے۔
.ذریعہ: Express News
کلیدی لفظ: موٹر سائیکل
پڑھیں:
کراچی میں ٹریفک حادثات میں 2 کمسن بہن بھائی سمیت 5 افراد جاں بحق
شہر کے مختلف علاقوں میں ٹریفک حادثات میں 2 کمسن سگے بہن اور بھائی سمیت 5 افرار جاں بحق جبکہ 4 کمسن بہن بھائی سمیت 11 افراد زخمی ہوگئے۔
تفصیلات کے مطابق اسٹیل ٹاؤن کے علاقے گلشن حدید لنک روڈ کے قریب ٹریفک حادثے میں موٹر سائیکل پر سوار 2 کمسن بہن بھائی شدید زخمی ہوئے، بچی اسپتال منتقلی کے دوران جبکہ بڑا بھائی دوران علاج دم توڑ گیا۔
ایس ایچ او اسٹیل ٹاؤن الن خان عباسی نے بتایا کہ متوفی کمسن بچی کی شناخت 6 سالہ گل زادی جبکہ بھائی کی شناخت 12 سالہ عبدالرزاق ولد رضا محمد کے نام سے کی گئی۔
انھوں نے بتایا کہ دونوں بہن بھائی گھگھر پھاٹک کے رہائشی تھے اور مخالف سمت سے آتے ہوئے ان کی کار سے ٹکر ہوگئی جس کے نتیجے میں دونوں بہن بھائی شدید زخمی ہو کر جاں بحق ہوگئے۔
انھوں نے بتایا کہ پولیس نے حادثے کے ذمہ دار ڈرائیور کو حراست میں لیکر کار کو اپنے قبضے میں لے لیا جبکہ ضابطے کی کارروائی کے بعد لاش ورثا کے حوالے کر دی اور اس حوالے سے مزید تحقیقات کا عمل جاری ہے۔
پورٹ قاسم کے قریب ٹریفک حادثے میں نوجوان جاں بحق ہوگیا جس کی لاش ایدھی کے رضا کاروں نے ضابطے کی کارروائی کے لیے قریبی تھانے منتقل کی۔ ریسکیو حکام کا کہنا ہے کہ متوفی کی شناخت 23 سالہ ہاشم ولد سخاوت کے نام سے کی گئی جو ٹریلر کا کلینر تھا اور اپنے ٹریلر کے پہیوں تلے کچل کر جاں بحق ہوگیا۔
اس حوالے سے پولیس مزید تحقیقات کر رہی ہے ، ناردرن بائی پاس افغان کٹ انڈس چوک کے قریب ٹریفک حادثے میں ایک شخص جاں بحق ہوگیا ، متوفی کی لاش ایدھی ایمبولینس کے ذریعے عباسی شہید اسپتال لیجائی گئی۔
ریسکیو حکام کا کہنا ہے کہ متوفی کی فوری طور پر شناخت نہیں ہو سکی جو کہ کار میں سوار تھا جس کی عمر 28 سال ہے جبکہ حادثہ کار اور ٹریلر میں تصادم کے نتیجے میں پیش آیا تھا۔
پولیس واقعہ کی مزید تحقیقات کر رہی ہے ، سپر ہائی وے جمالی پل کے قریب ٹریفک حادثے میں ایک شخص جاں بحق ہوگیا جس کی لاش ایدھی کے رضا کاروں نے عباسی شہید اسپتال پہنچائی۔ ایس ایچ او سائٹ سپر ہائی وے صنتعی ایریا خالد عباسی نے بتایا کہ حادثہ موٹر سائیکل سلپ ہونے کی وجہ سے پیش آیا تھا جبکہ متوفی کی کی شناخت 28 سالہ شفیق احمد کے نام سے کی گئی متوفی اپنے دوست کے ہمراہ موٹر سائیکل پر سپر ہائی وے پر قائم نجی ہاؤسنگ سوسائٹی سے اپنی رہائش گاہ خادم سولنگی گوٹھ جا رہے تھے کہ موٹر سائیکل سلپ ہونے کی وجہ سے حادثے کا شکار ہوگئے۔
قیوم آباد پل کے قریب ٹریفک حادثے میں 4 کمسن بھائی اور بہن زخمی ہوگئے جنھیں ایدھی کے رضا کاروں نے فوری طبی امداد کے لیے جناح اسپتال پہنچایا جہاں ان کی شناخت 15 سالہ توقیر ، 11 سالہ تسکین ، 7 سالہ ابیہ اور 5 حمزہ کے نام سے کی گئی جبکہ حادثہ قیوم آباد پل اترتے ہوئے ڈیفنس کی جانب جاتے ہوئے موٹر سائیکل بے قابو ہو کر دیوار سے ٹکرانے کے باعث پیش آیا تھا۔
دریں اثنا سپرہائی وے دنبہ گوٹھ رمضان چورنگی کے قریب 2 ٹرکوں کے درمیان تصادم میں 7 افراد زخمی ہوگئے جس کی اطلاع ملتے ہی پولیس نے موقع پر پہنچ کر زخمیوں کو چھیپا ایمبولینسوں کے ذریعے فوری طبی امداد کے لیے جناح اور عباسی اسپتال منتقل کیا گیا۔
ریسکیو حکام کا کہنا ہے کہ زخمیوں کی شناخت 32 سالہ آصف ولد ولد اظہر حسین ، 28 سالہ حیات ولد ولایت ، 26 سالہ شاہد ولد فقیر محمد ، 30 سالہ رفیق ولد غلام قادر ، 30 سالہ عابد ولد غفور ، 25 سالہ قمر ولد شہباز اور 30 سالہ فیصل ولد مقبول کے نام سے کی گئی۔
بھارت کیخلاف شائقین کو اچھا مقابلہ دیکھنے کو ملے گا، اسٹیو اسمتھ