کراچی؛ گلشن معمار میں مکان کی چھت گرنے سے 3 بچوں سمیت 5 افراد جاں بحق
اشاعت کی تاریخ: 8th, March 2025 GMT
کراچی:
گلشن معمار کے علاقے جنجال گوٹھ میں مکان کی چھت گرنے سے دو خواتین اور 3 بچیاں جاں بحق ہوگئیں اور مزید 5 زخمی ہوگئے، جن میں سے ایک حالت تشویش ناک ہے۔
ریسکیو حکام نے بتایا کہ جنجال گوٹھ میں مکان کی چھت گرنے سے 10 افراد شدید زخمی ہوگئے تھے، جن میں سے 5 نے دم توڑ دیا۔
ریسکیو نے بتایا کہ حادثے کے زخمیوں اور جاں بحق افراد کو گلشن معمار فاطمہ اسپتال منتقل کیا گیا ہے جہاں ایک زخمی کی حالت تشویش ناک بتائی جا رہی ہے۔
حکام نے بتایا کہ جاں بحق ہونے والوں میں 3 بچیاں اور دو خواتین شامل ہیں اور متاثرہ گھر میں مہمان آئے ہوئے تھے۔
پولیس نے گھر کی چھت گرنے سے 3 خواتین اور 3 بچوں کے جاں بحق ہونے کی تصدیق کرتے ہوئے بتایا کہ 4 افراد زخمی بھی ہیں۔
مزید بتایا کہ متاثرہ گھر پر لینٹر کی چھت تھی اورچھت پر کام جاری تھا اسی دوران چھت ریتی اور بجری کا وزن برداشت نہیں کرسکی اور بیٹھ گئی جبکہ زیرتعمیرگھر میں فیملی رہائش پذیر تھی۔
پولیس نے بتایا کہ واقعے میں جاں بحق اورزخمی ہونے والے تمام افراد ایک ہی خاندان سے تعلق رکھتے ہیں۔
.ذریعہ: Express News
کلیدی لفظ: کی چھت گرنے سے نے بتایا کہ
پڑھیں:
کراچی میں ٹریفک حادثات میں 2 کمسن بہن بھائی سمیت 5 افراد جاں بحق
شہر کے مختلف علاقوں میں ٹریفک حادثات میں 2 کمسن سگے بہن اور بھائی سمیت 5 افرار جاں بحق جبکہ 4 کمسن بہن بھائی سمیت 11 افراد زخمی ہوگئے۔
تفصیلات کے مطابق اسٹیل ٹاؤن کے علاقے گلشن حدید لنک روڈ کے قریب ٹریفک حادثے میں موٹر سائیکل پر سوار 2 کمسن بہن بھائی شدید زخمی ہوئے، بچی اسپتال منتقلی کے دوران جبکہ بڑا بھائی دوران علاج دم توڑ گیا۔
ایس ایچ او اسٹیل ٹاؤن الن خان عباسی نے بتایا کہ متوفی کمسن بچی کی شناخت 6 سالہ گل زادی جبکہ بھائی کی شناخت 12 سالہ عبدالرزاق ولد رضا محمد کے نام سے کی گئی۔
انھوں نے بتایا کہ دونوں بہن بھائی گھگھر پھاٹک کے رہائشی تھے اور مخالف سمت سے آتے ہوئے ان کی کار سے ٹکر ہوگئی جس کے نتیجے میں دونوں بہن بھائی شدید زخمی ہو کر جاں بحق ہوگئے۔
انھوں نے بتایا کہ پولیس نے حادثے کے ذمہ دار ڈرائیور کو حراست میں لیکر کار کو اپنے قبضے میں لے لیا جبکہ ضابطے کی کارروائی کے بعد لاش ورثا کے حوالے کر دی اور اس حوالے سے مزید تحقیقات کا عمل جاری ہے۔
پورٹ قاسم کے قریب ٹریفک حادثے میں نوجوان جاں بحق ہوگیا جس کی لاش ایدھی کے رضا کاروں نے ضابطے کی کارروائی کے لیے قریبی تھانے منتقل کی۔ ریسکیو حکام کا کہنا ہے کہ متوفی کی شناخت 23 سالہ ہاشم ولد سخاوت کے نام سے کی گئی جو ٹریلر کا کلینر تھا اور اپنے ٹریلر کے پہیوں تلے کچل کر جاں بحق ہوگیا۔
اس حوالے سے پولیس مزید تحقیقات کر رہی ہے ، ناردرن بائی پاس افغان کٹ انڈس چوک کے قریب ٹریفک حادثے میں ایک شخص جاں بحق ہوگیا ، متوفی کی لاش ایدھی ایمبولینس کے ذریعے عباسی شہید اسپتال لیجائی گئی۔
ریسکیو حکام کا کہنا ہے کہ متوفی کی فوری طور پر شناخت نہیں ہو سکی جو کہ کار میں سوار تھا جس کی عمر 28 سال ہے جبکہ حادثہ کار اور ٹریلر میں تصادم کے نتیجے میں پیش آیا تھا۔
پولیس واقعہ کی مزید تحقیقات کر رہی ہے ، سپر ہائی وے جمالی پل کے قریب ٹریفک حادثے میں ایک شخص جاں بحق ہوگیا جس کی لاش ایدھی کے رضا کاروں نے عباسی شہید اسپتال پہنچائی۔ ایس ایچ او سائٹ سپر ہائی وے صنتعی ایریا خالد عباسی نے بتایا کہ حادثہ موٹر سائیکل سلپ ہونے کی وجہ سے پیش آیا تھا جبکہ متوفی کی کی شناخت 28 سالہ شفیق احمد کے نام سے کی گئی متوفی اپنے دوست کے ہمراہ موٹر سائیکل پر سپر ہائی وے پر قائم نجی ہاؤسنگ سوسائٹی سے اپنی رہائش گاہ خادم سولنگی گوٹھ جا رہے تھے کہ موٹر سائیکل سلپ ہونے کی وجہ سے حادثے کا شکار ہوگئے۔
قیوم آباد پل کے قریب ٹریفک حادثے میں 4 کمسن بھائی اور بہن زخمی ہوگئے جنھیں ایدھی کے رضا کاروں نے فوری طبی امداد کے لیے جناح اسپتال پہنچایا جہاں ان کی شناخت 15 سالہ توقیر ، 11 سالہ تسکین ، 7 سالہ ابیہ اور 5 حمزہ کے نام سے کی گئی جبکہ حادثہ قیوم آباد پل اترتے ہوئے ڈیفنس کی جانب جاتے ہوئے موٹر سائیکل بے قابو ہو کر دیوار سے ٹکرانے کے باعث پیش آیا تھا۔
دریں اثنا سپرہائی وے دنبہ گوٹھ رمضان چورنگی کے قریب 2 ٹرکوں کے درمیان تصادم میں 7 افراد زخمی ہوگئے جس کی اطلاع ملتے ہی پولیس نے موقع پر پہنچ کر زخمیوں کو چھیپا ایمبولینسوں کے ذریعے فوری طبی امداد کے لیے جناح اور عباسی اسپتال منتقل کیا گیا۔
ریسکیو حکام کا کہنا ہے کہ زخمیوں کی شناخت 32 سالہ آصف ولد ولد اظہر حسین ، 28 سالہ حیات ولد ولایت ، 26 سالہ شاہد ولد فقیر محمد ، 30 سالہ رفیق ولد غلام قادر ، 30 سالہ عابد ولد غفور ، 25 سالہ قمر ولد شہباز اور 30 سالہ فیصل ولد مقبول کے نام سے کی گئی۔
رمضان المبارک میں مہنگائی، وزیراعلیٰ پنجاب نے بڑے احکامات جاری کردیے