کراچی؛ سحری کے وقت موٹرسائیکل سواروں کی فائرنگ، گلی کا سیکورٹی گارڈ جاں بحق
اشاعت کی تاریخ: 6th, March 2025 GMT
کراچی کے علاقے پی ای سی ایچ ایس سوسائٹی میں موٹرسائیکل سواروں کی فائرنگ سے گلی کا سیکورٹی گارڈ جاں بحق ہوگیا۔
ترجمان کراچی پولیس کے مطابق فیروز آباد کے علاقے پی ای سی ایچ ایس بلاک 2 گلی نمبر 4 میں موٹر سائیکل سوار ملزمان کی فائرنگ سے ایک شخص جاں بحق ہو گیا۔ مقتول کی لاش جناح اسپتال منتقل کی گئی۔ مقتول کی شناخت 38 سالہ مرزا ساجد بیگ ولد ریاض بیگ کے نام سے کی گئی۔
مقتول لائنز ایریا کا رہائشی اور نجی سیکیورٹی کمپنی کا گارڈ تھا۔ واقعے کے وقت مقتول مزکورہ علاقے کی گلی میں بطور سیکیورٹی ڈیوٹی انجام دے رہا تھا کہ نامعلوم موٹرسائیکل سوار ملزمان آئے اور فائرنگ کر کے فرار ہوگئے۔ علاقہ مکینوں کے مطابق مقتول ساجد ایک بیٹی کا باپ تھا اور گزشتہ ڈیڑھ سال سے گلی میں سیکیورٹی کے فرائض انجام دے رہا تھا۔ ، مکینوں نے بتایا کہ واقعہ سحری کے ٹائم پیش آیا۔ محلے والے سحری میں مصروف تھے فائرنگ کی آواز سنائی دی فوری طور پر گلی میں نکل کر دیکھا تو ساجد کی خون میں لت پت لاش پڑی ہوئی تھی۔
انہوں نے بتایا کہ علاقے کی گاڑیوں سے آئے دن بیٹریاں چوری ہو رہی تھیں جبکہ اسٹریٹ کرائم کی وارداتیں بھی بہت زیادہ بڑھ گئیں تھیں۔ متعدد بار فیروز آباد تھانے والوں کو درخواست دی کہ علاقے میں پولیس کا گشت بلکل نہیں ہے وہ بڑھایا جائے تاہم نامعلوم وجوہات پر پولیس نے گشت نہیں بڑھایا بلکہ کبھی کبھی جو دن کے وقت پولیس موبائل آتی تھی وہ بھی اب چکر نہیں لگاتی تھی۔ ساجد کے سکیورٹی گارڈ رکھنےکے بعد سے وارداتیں تھم گئی تھیں جس پر علاقے والو ں نے سکون کا سانس لیا تھا۔
پولیس کو جائے وقوعہ سے تیس بور پستول کے تین خول ملے ہیں۔ کراٸم سین یونٹ کی ٹیم واقعے کے بعد جائے وقوعہ پر پہنچ گئی تھی اور شواہد اکھٹے کیے۔ پولیس کا کہنا تھا کہ ورثا کو اطلاع کردی گئی۔
دوسری جانب گڈاپ سٹی کے علاقے سپرہائی وے ڈی ایچ اے 9 کے قریب فائرنگ سے ایک شخص زخمی ہوگیا۔ زخمی ہونے والے شخص کو ایدھی ایمبولینس کے ذریعے فاطمہ بقائی اسپتال ٹول پلازہ منتقل کیا گیا۔ ترجمان کراچی پولیس کے مطابق زخمی ہونے والے شخص کی شناخت 69 سالہ زاہد حسین ولد بادل خان کے نام سے کی گئی۔ فائرنگ کا واقعہ ڈکیتی کی واردات کے دوران مزاحمت پر پیش آیا۔ علاقہ پولیس واقعے کی تحقیقات کر رہی ہے ۔
.ذریعہ: Express News
پڑھیں:
کراچی: قائد آباد میں مزاحمت پر نوجوان جاں بحق، شہریوں کے تشدد سے ڈاکو بھی مارا گیا
کراچی کے علاقے قائدآباد میں ڈکیتی کے دوران مزاحمت پر نوجوان جاں بحق ہوگیا جبکہ مشتعل افراد کے تشدد سے ڈاکو بھی مارا گیا۔ سہراب گوٹھ میں بھی مزاحمت پر ایک شخص جان سے گیا۔
قائدآباد مرغی خانہ اسٹاپ کے قریب دو ملزمان نے بابر نامی شہری کو لوٹنے کی کوشش کی جس پر اس نے مزاحمت کی تو ملزمان نے فائرنگ کردی۔ اس دوران ایک ملزم فرار ہوگیا جبکہ دوسرے کو موقع پر موجود افراد نے پکڑ کر تشدد کا نشانہ بنا ڈالا۔
شہری اور ڈاکو دونوں کو شدید زخمی حالت میں جناح اسپتال لے جایا جارہا تھا کہ اس دوران شہری بابر دم توڑ گیا جبکہ زخمی ڈاکو کو ورثاء اور پولیس اہلکار اسپتال سے واپس تھانے لے جانے لگے کہ راستے میں وہ بھی ہلاک ہوگیا۔
پولیس حکام کے مطابق بابر اسی علاقے کا ہی رہائشی تھا جبکہ وہ بطور اسٹیٹ ایجنٹ کام کرتا تھا جبکہ علاقے میں اس کا سوئمنگ پول بھی تھا۔
واقعے کے بعد علاقہ مکینوں نے قائد آباد پر احتجاج بھی کیا جو کچھ دیر بعد ختم کردیا گیا۔
دوسری جانب سہراب گوٹھ کے علاقے میں بس اڈے کے قریب ڈکیتی کے دوران مزاحمت پر وسیم نامی نوجوان جاں بحق ہوگیا۔
پولیس حکام کے مطابق وسیم کو ملزمان نے سر پر گولی ماری اور فرار ہوگئے۔ ملزمان وسیم سے اس کی موٹر سائیکل چھین رہے تھے۔ پولیس واقعے کی مزید تحقیقات کر رہی ہے۔
سویلینز کا ملٹری ٹرائل: آفیشل سیکرٹ ایکٹ کے تحت حوالگی تفتیش کے بعد ہی ممکن ہوگی، جسٹس جمال مندوخیل