جیل چورنگی پل کے قریب دو موٹر سائیکلوں میں تصادم، ایک شخص جاں بحق، ایک زخمی
اشاعت کی تاریخ: 2nd, March 2025 GMT
کراچی:
شہر قائد کے علاقے جیل چورنگی پل کے قریب دو موٹر سائیکلوں کے درمیان ٹکر کے نتیجے میں ایک شخص جاں بحق جبکہ ایک زخمی ہوگیا۔
چھیپا حکام کے مطابق یہ حادثہ تیز رفتاری کے باعث پیش آیا۔
حادثے میں جاں بحق ہونے والے شخص کی شناخت 21 سالہ طحٰہ ولد ذوالفقار کے طور پر کی گئی ہے۔ طحٰہ مارٹن کواٹر کا رہائشی تھا اور درزی کے طور پر کام کرتا تھا۔
طحہٰ کی دکان طارق روڈ پر واقع تھی اور وہ اسی راستے سے گھر واپس آ رہا تھا کہ حادثے کا شکار ہوگیا۔
طحٰہ اپنے چار بہن بھائیوں میں سب سے چھوٹا تھا اور غیر شادی شدہ تھا۔ اس کے ماموں کے مطابق، وہ کسی قسم کی قانونی کارروائی نہیں کریں گے۔
زخمی ہونے والے شخص کی شناخت 22 سالہ زبیر ولد ظفر کے طور پر ہوئی ہے، جو رائیڈر کا کام کرتا ہے۔ زخمی کو فوری طور پر چھیپا ایمبولینس کے ذریعے جناح ہسپتال منتقل کیا گیا، جہاں اس کا علاج جاری ہے۔
پولیس نے ابتدائی تحقیقات کے مطابق حادثے کا سبب تیز رفتاری کو قرار دیا ہے اور اس حوالے سے مزید تفتیش جاری ہے۔
.ذریعہ: Express News
پڑھیں:
کراچی؛ دفعہ 144 کے تحت دن کے اوقات میں ہیوی ٹریفک پر پابندی عائد
کراچی:کمشنر کراچی سید حسن نقوی نے شہر میں ٹریفک حادثات پر قابو پانے کے لیےدفعہ 144 کے تحت صبح 6 بجے سے رات 10 بجے تک ہیوی ٹریفک کے داخلے پر پابندی عائد کر دی اور اس حوالے سے نوٹیفکیشن بھی جاری کردیا گیا۔
کمشنر کراچی سید حسن نقوی نے ڈی جی آئی جی ٹریفک کی سفارش پر شہر میں دفعہ 144 کے تحت شہر میں ہیوی ٹریفک کے داخلے پر دو ماہ کے لیے پابندی عائد کی ہے۔
کراچی میں ٹریفک حادثات میں مسلسل اضافہ ہو رہا ہے اور ہیوی گاڑیوں کی زد میں آکر موٹرسائیکل سوار جاں بحق ہور ہے ہیں، جس پر ڈی آئی جی ٹریفک کی سفارش پر کمشنر کراچی حسن نقوی نے ایک نوٹیفیکشن جا ری کیا۔
نوٹیفکیشن کے مطابق دفعہ 144 کے تحت صبح 6 بجے سے رات 10 بجے تک شہر میں ہیوی گاڑیوں کے داخلے پر پابندی ہوگی اور پابندی کا اطلاق مال بردار گاڑیوں پر بھی ہوگا۔
ہیوی ٹریفک کو سپرہاوے سے نیو کراچی انڈسٹریل ایریا براستہ سلپ روڈ چلنے کی اجازت ہوگی، اسی طرح نیشنل ہائی وے سے گودام چورنگی براستہ منظر پیٹرول پمپ، یونس چورنگی، داؤد چورنگی سے جام صادق چلنے کی اجازت ہوگی جبکہ ناردرن بائی سے پراچہ چوک، اسٹیٹ ایونیو، سیمنز چورنگی سے گلبائی ماڑی پورروڈ پر ہیوی ٹریفک کو آمدورفت کی اجازت ہوگی۔
امریکا میں رواں ماہ ہزار سال کا بد ترین سیلاب آنے کا امکان ہے، ناسا