مریم نواز نے پنجاب کے پہلے کرائم کنٹرول ڈیپارٹمنٹ کے قیام کی منظوری دیدی
اشاعت کی تاریخ: 27th, February 2025 GMT
لاہور (نیوز رپورٹر +نوائے وقت رپورٹ) آرگنائزڈ کرائم میں کمی اور عوام کے جان و مال کے یقینی تحفظ کیلئے وزیراعلیٰ مریم نواز شریف نے پہلے کرائم کنٹرول ڈیپارٹمنٹ کی منظوری دے دی۔ وزیراعلیٰ پنجاب مریم نواز شریف کی زیر صدارت خصوصی اجلاس میں بتایا گیا کہ کرائم کنٹرول ڈیپارٹمنٹ سات بڑے آرگنائزڈ کرائم میں کمی کے لئے خدمات سرانجام دے گا۔ منظم جرائم پر قابو پانے کیلئے پنجاب کا پہلاکرائم کنڑول ڈیپارٹمنٹ جدید ٹیکنالوجی استعمال کرے گا۔ وزیراعلیٰ مریم نواز شریف کے حکم پر سی سی ڈی کو ڈرون سرویلنس ٹیکنالوجی مہیا کرنے کا فیصلہ کیا گیا۔ جرم سرزد ہونے کی صورت میں سرویلنس ڈرون پانچ منٹ میں جائے وقوعہ پر پہنچ جائے گا اور مانیٹرنگ شروع کر دے گا۔ قتل اور زیادتی کے واقعات میں مجرم تک پہنچنے کیلئے کرائم کنٹرول ڈیپارٹمنٹ فوری طور پر حرکت میں آئے گا۔ سی سی ڈی صوبے کے مختلف علاقوں میں شوٹر مافیا پر قابو پانے کیلئے فوری اقدام کرے گا۔ سی سی ڈی آرگنائزڈ قبضہ مافیا کیخلاف کارروائی بھی عمل میں لائے گا۔ گینگسٹر ریکٹ اور مافیاز پر قابو کیلئے سی سی ڈی سرگرم عمل ہوگا۔ ڈکیتی، راہ زنی، زیادتی، قتل، منظم چوری، لینڈ مافیا کے خلاف فوری کارروائی ہو گی۔ سی سی ڈی پنجاب بھر میں جرائم اور مجرموں سے متعلق ڈیٹا مینجمنٹ کا ذمہ دار بھی ہوگا۔ وزیراعلیٰ مریم نواز شریف نے کرائم کنٹرول ڈیپارٹمنٹ میں تعیناتیوں کی منظوری دے دی۔ ایڈیشنل انسپکٹرجنرل کرائم کنٹرول ڈیپارٹمنٹ کے سربراہ ہونگے۔ تین ڈی آئی جی، ڈویژنل ہیڈ کوارٹر میں ایس ایس پی، ایس پی اور ہر ضلع میں ڈی ایس پی تعینات کرنے کا فیصلہ کیا گیا۔ کرائم کنٹرول ڈیپارٹمنٹ مجموعی طور پر 4258 افسروں و اہلکاروں پر مشتمل ہو گا۔ پنجاب پولیس سے 2258 افسر اور اہلکار فوری طور پر سی سی ڈی ٹرانسفرکیے جا رہے ہیں۔ وزیراعلیٰ مریم نواز شریف نے سی سی ڈی کیلئے بلڈنگز، گاڑیوں اور جدید آلات کی منظوری بھی دے دی۔ وزیراعلیٰ مریم نواز شریف نے خصوصی اجلاس میں کرائم کنٹرول ڈیپارٹمنٹ کیلئے فوری قانون سازی اور قیام کیلئے فوری اقدامات کرنے کا حکم دیا۔ وزیراعلیٰ مریم نواز شریف نے ڈیپارٹمنٹ کو درکار وسائل مہیا کرنے کی ہدایت کی۔ وزیراعلیٰ مریم نواز شریف نے کہا کہ پنجاب میں کرائم کنٹرول ڈیپارٹمنٹ جرائم میں واضح کمی لائے گا۔ سی سی ڈی کے قیام سے جرائم پیشہ افراد میں واضح خوف نظر آنا چاہیے۔ عوام کے تحفظ کو یقینی بنانے کیلئے وسائل کی کمی کو آڑے نہیں آنے دیں گے۔ جرم پر قابو پانے کیلئے بہتر سے بہترین ٹیکنالوجی حاصل کی جائے۔
.ذریعہ: Nawaiwaqt
کلیدی لفظ: کرائم کنٹرول ڈیپارٹمنٹ مریم نواز شریف نے کی منظوری سی سی ڈی
پڑھیں:
مستقبل مریم نواز
تحریر: عظمیٰ زاہد بخاری
ہمیشہ ہمیں ایک ہی جملہ اکثر سننے کو ملتا ہے کہ بیٹا بڑا ہوگا باپ کا نام روشن کرے گا لیکن اب وقت بدل چکا ہے اور اب بیٹیاں باپ کا نام روشن کر رہی ہیں، بیٹیاں ہر شعبے میں صف اول کا رول ادا کر رہی ہیں۔ مریم نواز کے وزیراعلیٰ پنجاب بننے کے بعد پنجاب کی بیٹیوں میں ایک نیا حوصلہ اور جذبہ پیدا ہوا ہے۔
پنجاب کی بیٹیوں کی اپنی ماں، بہن اور بیٹی مریم نواز کے ساتھ والہانہ محبت کا اظہار اب کسی سے پوشیدہ نہیں رہا۔ مریم نواز آج جس مقام پر پہنچی ہیں اس میں اللہ تعالی کے بعد ان کی اپنی محنت، جدوجہد اور مشکلات سے بھرپور پچھلے پانچ سے چھ سال کا کٹھن ترین سفر ہے۔ مریم نواز کو پنجاب کی وزارت اعلیٰ پلیٹ میں رکھ کر نہیں ملی اور نہ ہی ملکی سیاسی منظر نامے پر ان کی مقبولیت کسی کی مرہون منت ہیں بلکہ انہوں نے ایک بہادر بیٹی ہونے کے جرم میں پہلے اپنے والد میاں نواز شریف کے ساتھ دو مرتبہ بے گناہ جیل کاٹی پھر اس دوران ان کو ہر طرح سے اذیتیں پہنچانے کی بھی کوشش کی گئی۔ ان کا میڈیا ٹرائل کیا گیا لیکن مریم نواز نے ہمت نہیں ہاری۔ وہ ان مشکلات کے دور میں ذاتی کردار کشی سے خوف زدہ ہونے کے بجائے اپنے والد کے ساتھ ڈٹ کر اور قدم سے قدم ملا کر کھڑی رہیں۔ اس کا صلہ اللہ تعالی نے ان کو پنجاب کی پہلی خاتون وزیراعلیٰ بنا کر دیا۔
پنجاب کے عوام نے مریم نواز کو تاریخ کے سب سے بڑے مینڈیٹ سے عزت بخشی۔ مریم نواز پہلے کبھی کسی سیاسی انتظامی یا ریاستی عہدے پر نہیں رہی اس کے باوجود ان کا انتظامی معاملات کو اس احسن طریقے سے چلانا لائق تحسین ہے۔ مریم نواز نے بطور وزیراعلیٰ پنجاب پہلے سال میں وہ تاریخی اور انقلابی اقدامات اٹھائے جو ان سے پہلے ملک کی تاریخ کے تجربہ کار حکمران بھی نہیں عوام کے لیے کر سکے۔
ایک سال میں 90 سے زائد عوامی فلاح و بہبود کے منصوبے شروع کرنا کوئی معمولی بات نہیں ہے اور ان منصوبوں میں سے 50 سے زائد منصوبے مکمل بھی کر دیے۔ ان میں اپنی چھت اپنا گھر، الیکٹرک بائیکس، الیکٹرک بسیں، آسان کاروبار پروگرام، 400 ارب کا کسان کارڈ، گرین ٹریکٹر، سپر سیڈر، ہزاروں کلو میٹر کی نئی سڑکیں، دھی رانی پروگرام، ہمت کارڈ، مینارٹی کارڈ، لائیو اسٹاک، مفت ادویات کی فراہمی، ستھراء پنجاب پروگرام، لاہور میں پاکستان کے پہلے سرکاری نواز شریف کینسر اسپتال کا قیام جبکہ سرگودھا میں کارڈیالوجی اسپتال کا قیام عمل میں لایا جا رہا ہے۔
پہلے سال میں مریم نواز نے ثابت کر دیا ہے کہ وہ ایک کامیاب سیاست دان ہونے کے ساتھ ساتھ ایک کامیاب حکمران عوام کے خدمت گزار ہونے کی بھی صلاحیتیں رکھتی ہیں۔ یہاں ایک حکومت ایسی بھی آئی کہ ایک سال میں جس نے صرف اپنی سمت درست کی اور قوم کو ایک سال بعد بتایا گیا کہ ہم سیکھ رہے تھے۔ الحمداللہ آج مریم نواز فخر کے ساتھ قوم کو بتا سکتی ہیں کہ انہوں نے مزدور، کسان طلبہ، خواتین، نوجوانوں سمیت ہر طبقے کے لیے تاریخی اقدامات اٹھائے ہیں۔ مریم نواز کے منصوبوں کی سب سے بڑی خصوصیت یہ رہی ہے کہ انہوں نے تب ہی منصوبے کا افتتاح کیا جب وہ عوام کو ریلیف دینے کے قابل ہوگیا۔ مریم نواز کے منصوبے فائلوں کی نظر نہیں ہوتے بلکہ گراؤنڈ پر نظر آرہے ہیں۔
مریم نواز کے منصوبوں سے اب تک کروڑوں لوگ مستفید ہو چکے ہیں۔ ایک سال میں پنجاب حکومت نے اپنی پانچ سالہ ترجیحات قوم کے سامنے پیش کر دی ہیں۔ پہلے سال میں جو عوامی فلاح و بہبود کے منصوبے شروع ہوئے یا مکمل ہو چکے ہیں اسی گراؤنڈ پر حکومت پنجاب آگے بڑھے گی۔ یہ سال پنجاب کے عوام کے لیے ترقی اور خوشحالی کا سال ہے۔ 2024 کا سال باقی صوبوں کی طرح پنجاب کے عوام کے لیے بھی مشکل تھا لیکن 2025 کا سال پنجاب کے عوام کے لیے ترقی کا سال ثابت ہوگا۔
میری سیاست میں ایک طویل جدوجہد ہے، کئی حکومتیں میں نے دیکھی، اپوزیشن میں بھی رہی لیکن مریم نواز کی حکومت کا کام کرنے کا طریقہ باقی سابقہ حکومتوں سے بالکل مختلف ہے۔ مریم نواز عوام کی نفسیات کو سمجھتی ہیں، ان کو بہت اچھے سے معلوم ہے کہ مختلف شعبہ جات کے لوگوں کے کیا مسائل ہیں اور ان کا حل کیسے ممکن ہے۔ یہ انہوں نے اپنے پہلے ایک سال میں ثابت کر دیا ہے۔ مریم نواز کی نظر میں پنجاب کے 13 کروڑ عوام یکساں ہیں کسی مذہب، رنگ، نسل، ذات، برادری میں کوئی تفریق نہیں رکھتی ہیں۔ ان کی ترجیحات بہت واضح ہیں۔ سیاست صرف تنقید برائے تنقید کا نام نہیں بلکہ سیاست خدمت کا نام ہے۔ اگر باقی صوبوں کے وزرائے اعلی کو بھی خدمت کا طریقہ سیکھنا ہے تو مریم نواز ان کے لیے آج رول ماڈل کا درجہ رکھتی ہیں۔
مریم نواز پہلی بار وزیراعلیٰ بنی ہے لیکن ان کے کام کا طریقہ کار بہت واضح ہے اسی لیے باقی صوبوں کے لوگ بھی آج کھلے عام خواہشات کا اظہار کرتے ہیں کہ ان کی وزیر اعلیٰ بھی کاش مریم نواز ہوتی۔ سیاست کو خدمت میں تبدیل کرنے کا یہ ہنر مریم نواز نے اپنے والد میاں نواز شریف سے سیکھا ہے۔ میاں نواز شریف میرے لیڈر ہیں اور مجھے فخر ہے کہ نواز شریف سے زیادہ کوئی بھی پاکستان کی تاریخ میں حکمران ڈلیور نہیں کر سکا۔ میاں نواز شریف کی کارکردگی کا پیمانہ پاکستان اور پاکستان کے عوام ہیں۔ پاکستان کے لیے جو کچھ میاں نواز شریف نے کیا ہے اس کی بھی کوئی مثال نہیں ملتی۔ مشکلات سے بھرپور سیاسی زندگی گزارنے والے میاں نواز شریف نے پاکستان کو دنیا میں ایک منفرد پہچان دی ہے، چاہے وہ ایٹمی قوت بنا کر ہو یا سی پیک لا کر ہو۔ اس لیے دنیا کے آج بھی بڑے ممالک نواز شریف کو ایک عظیم لیڈر مانتے ہیں۔
صرف ایک سال کے عرصے میں مریم نواز نے بھی دنیا میں اپنی نمایاں پہچان بنائی ہے۔ ان کا طرز حکومت بالکل میاں نواز شریف جیسا ہے۔ چین کے دورے کے دوران مریم نواز کے طرز حکومت کی تعریف کی گئی۔ چین کی کمیونسٹ پارٹی کے ڈائریکٹر نے واضح الفاظ میں کہا کہ میں مریم نواز میں پاکستان کی ایک بڑی لیڈر دیکھ رہا ہوں۔ لیڈر ہمیشہ ملک اور قوم کی خدمت کرنے سے بنتے ہیں بلند و بانگ دعوے کرنے اور جذبات بھڑکانے والی تقریریں کرنے سے لیڈر نہیں بنا جا سکتا اس سے آپ وقتی طور پر لوگوں کو ورغلا سکتے ہیں، ان کی ذہن سازی کر سکتے ہیں لیکن نہ لوگوں کے پیٹ بھر سکتے ہیں اور نہ ملک میں خوشحالی لا سکتے ہیں۔
مریم نواز پانچ سال اسی ڈگر پر چلتے ہوئے پنجاب کے عوام کی خدمت کرتی ہیں تو یقینی طور پر پنجاب سے منفی سیاست کرنے والے اور فتنہ فساد پھیلانے والوں کا مکمل خاتمہ ہو جائے گا۔ مریم نواز ان شاءاللہ پاکستان کی دوسری خاتون وزیراعظم بھی بنیں گی اور عالمی دنیا میں پاکستان کو ایک نئی پہچان دلائیں گی کیونکہ پاکستان کا مستقبل مریم نواز ہی ہیں۔
مائیکروسافٹ کا کوانٹم کمپیوٹنگ میں تاریخی پیش رفت کا دعویٰ