قصور: ڈرائیور گاڑی چلاتے ہوئے سوگیا، وین نالے میں جا گری، خاندان کے8 افرادجاں بحق
اشاعت کی تاریخ: 22nd, February 2025 GMT
قصور(نیوز ڈیسک) قصور میں تھانہ صدر کی حدود میں رائے ونڈ روڈ پر ڈرائیور گاڑی چلاتے ہوئے سو گیا، جس کے نتیجے میں منی وین روہی نالے میں جاگری، ایک ہی خاندان کے 8 افراد ہلاک اور 2 شدید زخمی ہوگئے۔
نجی اخبار میں شائع خبر کے مطابق بد قسمت خاندان ایک شادی میں شرکت کے بعد رائے ونڈ کے علاقے بھٹہ سوہنڈن واپس آ رہا تھا۔
ریسکیو 1122 کے مطابق جمعرات اور جمعہ کی درمیانی شب کھارا موڑ کے قریب نال روہی نالے میں گرنے والی وین میں ایک مسیحی خاندان کے 10 افراد سوار تھے، ریسکیو اہلکاروں نے وین سے 8 لاشیں اور 2 زخمیوں کو باہر نکالا۔
پولیس نے لاشوں اور زخمیوں کو ڈی ایچ کیو ہسپتال منتقل کردیا، زخمیوں کی حالت تشویش ناک بتائی جاتی ہے۔
ہلاک اور زخمی ہونے والے تمام افراد کی عمریں 30 سے 40 سال کے درمیان ہیں، مرنے والوں میں خلیل، سلیم، عمران، مقصود، سوہنی، کارنیلیس، سنی اور طلحٰہ شامل ہیں، جب کہ زخمیوں میں ساجد اور ڈرائیور شکیل شامل ہیں۔
ریسکیو 1122 کے مطابق حادثہ اس وقت پیش آیا جب ڈرائیور گاڑی چلاتے ہوئے سو گیا۔
دوسری جانب صدر پولیس نے ڈرائیور شکیل کو ذمہ دار قرار دیتے ہوئے مقدمہ درج کرلیا۔
تاہم مقامی لوگوں کی ایک بڑی تعداد صبح کے وقت جائے حادثہ پر جمع ہوگئی، انہوں نے انتظامیہ پر الزام عائد کیا کہ وہ 20 فٹ گہرے نالے اور سڑک کو تقسیم کرنے کے لیے کوئی باڑ لگانے یا دیوار کھڑی کرنے میں ناکام رہی ہے۔
لوگوں نے ڈان کو بتایا کہ حال ہی میں نالے پر ایک پل تعمیر کیا گیا تھا، لیکن اس پر باڑ نہیں لگائی گئی تھی، جس کی وجہ سے اکثر حادثات پیش آتے رہتے ہیں۔
انہوں نے انتظامیہ پر غفلت برتنے اور سڑک استعمال کرنے والوں کی زندگیوں کو خطرے میں ڈالنے کا الزام عائد کیا۔
.ذریعہ: Daily Mumtaz
پڑھیں:
اوکاڑہ: گمبر پھاٹک کے قریب مال بردار گاڑی پٹڑی سے اتر گئی
اوکاڑہ میں گمبر پھاٹک کے قریب ایک مال بردار ٹرین کا انجن اور پانچ بوگیاں پٹڑی سے اتر گئیں۔ ابتدائی اطلاعات کے مطابق حادثہ بروقت بریک نہ لگنے کے باعث پیش آیا۔
ریلوے ذرائع کے مطابق مال گاڑی لاہور سے کراچی جا رہی تھی کہ اچانک بریک فیل ہونے کے باعث حادثے کا شکار ہوگئی۔ واقعے کی اطلاع ملتے ہی ریلوے انتظامیہ اور مقامی پولیس موقع پر پہنچ گئی اور امدادی کارروائیاں شروع کر دیں۔
حادثے کے باعث ریلوے ٹریک پر ٹریفک معطل ہو گیا جبکہ ریلوے حکام نے واقعے کی تحقیقات کا آغاز کر دیا ہے۔
روسی حکام سے مذاکرات کے لیے امریکی وزیر خارجہ سعودی عرب پہنچ گئے