امریکی انٹلیجنس، پاک فوج کا مشورہ، عمران کا دورۂ روس، ان کہی کہانی
اشاعت کی تاریخ: 22nd, February 2025 GMT
اسلام آباد (نیوز ڈیسک) سابق وزیر اعظم عمران خان کے فروری 2022 میں روس کے دورے سے قبل پس پردہ مذاکرات کے متعلق نئی تفصیلات سامنے آئی ہیں۔
سرکاری بیانات اور ذرائع کی جانب سے کیے گئے انکشافات سے معلوم ہوتا ہے کہ یوکرین پر روس کے حملے کے امکانات کے حوالے سے امریکا سے خفیہ معلومات ملنے کے باوجود، پاکستان کی قیادت نے خدشات کو مسترد کر دیا۔
تین سال بعد، یہ دورہ پاکستان کی سیاسی گفتگو اور عالمی تنازعات پر اس کے سفارتی موقف کے بارے میں ایک اہم حوالہ ہے۔
سابق وزیراعظم عمران خان کے دورۂ روس سے چند روز قبل پاکستان کے قومی سلامتی کے مشیر معید یوسف کو امریکی قومی سلامتی کے مشیر جیک سلیون کی فون کال موصول ہوئی۔
سلیون نے روس کے منصوبے کے بارے میں اہم خفیہ معلومات کا تبادلہ کیا لیکن پاکستان نے اسے مسترد کردیا۔
معید نے امریکی خفیہ معلومات کو ناقابل اعتبار قرار دیا اور سوال کیا کہ کیا یہ عراق میں بڑے پیمانے پر تباہی پھیلانے والے ہتھیاروں کے دعووں کی طرح جھوٹا ہے، جو بعد میں غلط ثابت ہوا۔ ایک ایسے وقت میں جب بین الاقوامی میڈیا یہ پیش گوئی کر رہا تھا کہ روس کسی بھی وقت یوکرین پر حملہ کر سکتا ہے، عمران خان کے دورہ روس کے فیصلے نے سوالات پیدا کر دیے۔
اس نمائندے نے سرکاری حکام، سابق وزیروں اور سکیورٹی حکام سے یہ جاننے کیلئے رابطہ کیا کہ کیا ملٹری اسٹیبلشمنٹ یا دفتر خارجہ نے عمران خان کو روس کا سفر کرنے کے برخلاف مشورہ دیا تھا یا نہیں۔
دی نیوز نے سابق قومی سلامتی کے مشیر ڈاکٹر معید یوسف کو ایک تفصیلی سوالنامہ بھی بھیجا، لیکن انہوں نے کوئی جواب نہیں دیا۔
باوثوق ذرائع نے بتایا کہ وزیراعظم عمران خان نے اس وقت کے آرمی چیف جنرل قمر جاوید باجوہ سے روس کا دورہ کرنے اور یوکرین پر روس کے حملے کے منصوبے کے بارے میں مشورہ طلب کیا۔
ذریعے کے مطابق، فوجی اسٹیبلشمنٹ نے عمران خان کے دورے کے فیصلے سے اتفاق کیا اور انہیں بتایا کہ ان کے پاس یوکرین پر روس کے ممکنہ حملے کے متعلق مصدقہ معلومات نہیں۔
ایک ذریعے کے مطابق، پاکستان کے پاس انٹیلی جنس تھی کہ روس نے یوکرین میں فوج بھیجی ہے لیکن لاجسٹک سپورٹ کے حوالے سے کوئی ثبوت نہیں۔
اس سے یہ معلوم ہوتا ہے کہ روس کا یوکرین پر جلد حملہ کرنے کا منصوبہ نہیں، کیونکہ اصل حملے کیلئے لاجسٹکس کی ضرورت ہوگی۔
ذریعے کا کہنا تھا کہ عسکری لحاظ سے اس اقدام کو بطور خطرہ دیکھا جا سکتا ہے لیکن اصل حملہ نہیں۔ منصوبہ بندی کے لحاظ سے دیکھیں تو پاکستان کو یقین تھا کہ حملہ جلد نہیں ہوگا اور اس وقت خان کے دورے سے کوئی نقصان نہ ہوگا۔
پاکستانی انٹیلی جنس کے علاوہ عمران خان کی ٹیم کو امریکا سے کال موصول ہوئی جس میں کہا گیا کہ روس یوکرین پر حملہ کر دے گا۔
امریکی قومی سلامتی کے مشیر جیک سلیون نے معید یوسف کو فون کیا اور پوچھا کہ کیا آپ کے وزیراعظم روس کا دورہ کرنے والے ہیں؟ معید نے جواب دیا ہاں۔
اس کے بعد، سلیون نے روس کے منصوبوں کے بارے میں انٹیلی جنس شیئر کی، لیکن پاکستانی حکام نے اس معلومات کو مسترد کردیا۔
ذرائع نے مزید بتایا کہ امریکی انٹیلی جنس کو نظر انداز کرنے کے باوجود روس نے عمران خان کے ماسکو پہنچتے ہی یوکرین پر حملہ کر دیا جس سے عمران خان اور ان کا وفد مشکل میں پڑ گیا۔ انہیں یہ فیصلہ کرنا تھا کہ صدر پوتن سے ملاقات کے بعد دورہ جاری رکھا جائے یا مختصر کیا جائے۔
ذرائع نے بتایا کہ معید یوسف نے عمران خان کو دورہ مختصر کرنے کا مشورہ دیا کیونکہ یہ وفد کیلئے ایک شرمناک صورتحال تھی۔ ذریعے کے مطابق، وفد کے دیگر ارکان نے منصوبہ بندی کے مطابق دورہ مکمل کرنے پر اصرار کیا۔
سابق امریکی صدر ڈونلڈ ٹرمپ کے یوکرین کے صدر ولادیمیر زیلنسکی کے بارے میں بیان نے پاکستان میں بھی بحث چھیڑ دی ہے۔ روس یوکرین تعلقات کے تناظر میں متعلقہ رہنے کیلئے پی ٹی آئی والوں کا دعویٰ ہے کہ عمران خان روس کے بارے میں درست تھے۔
پی ٹی آئی رہنمائوں نے سابق آرمی چیف جنرل قمر جاوید باجوہ پر الزام عائد کیا کہ وہ روس سے متعلق ان کی پالیسیوں پر عمران خان کو دھوکہ دے رہے تھے۔ اپنے دورہ روس کی شرمندگی چھپانے کیلئے عمران خان نے دعویٰ کیا تھا کہ انہوں نے سستا تیل درآمد کرنے کا معاہدہ کیا ہے اور انہیں روس کا ساتھ دینے کی سزا دی گئی ہے۔
تاہم، ذرائع کہتے ہیں کہ روس کے ساتھ تیل کی درآمد کا کوئی معاہدہ نہیں تھا، اور فوج نے عمران خان کو اس دورے کیخلاف کبھی مشورہ نہیں دیا۔ ذرائع نے مزید کہا کہ درحقیقت اعلیٰ عسکری قیادت نے عمران خان کے دورے کی حمایت کی تھی۔
.ذریعہ: Daily Mumtaz
کلیدی لفظ: قومی سلامتی کے مشیر عمران خان کے عمران خان کو کے بارے میں انٹیلی جنس معید یوسف یوکرین پر بتایا کہ کے مطابق کے دورے حملہ کر روس کا تھا کہ کہ روس روس کے
پڑھیں:
ٹرمپ، عمران خان کی رہائی کی کال کب دیں گے؟
اسلام ٹائمز: ہمیں جمہوریت کے لیے جنگ خود لڑنی ہے۔ تاہم یہ احساس کہ انتخابات میں ان کا مینڈیٹ چوری کیا گیا اور بنیادی حقوق چھین لیے گئے ہیں، نے بیرون ملک مقیم بہت سے پاکستانیوں کو انتہائی حدود تک جانے کے لیے جواز فراہم کیا ہے۔ یقیناً بیرونی مداخلت کو دعوت دینے کی کوئی وضاحت پیش نہیں کی جاسکتی لیکن قصور کسی حد تک اسٹیبلشمنٹ کی حمایت یافتہ حکومت کا بھی ہے جس نے حالات ہی اس طرح کے پیدا کردیے کہ عوام کا نظام پر سے اعتماد مکمل طور پر اٹھ گیا۔ آمرانہ طرزِ حکمرانی نے پاکستان کی خودمختاری کو ٹھیس پہنچائی ہے۔ تحریر: زاہد حسین
ڈونلڈ ٹرمپ کی جس کال کا بےصبری سے انتظار کیا جارہا ہے وہ ابھی دی نہیں گئی ہے یا شاید وہ کال کبھی دی بھی نہیں جائے گی۔ تاہم پاکستان تحریک انصاف (پی ٹی آئی) کے حامیوں نے ہمت نہیں ہاری ہے اور وہ پُرامید ہیں کہ امریکی قانون سازوں کی جانب سے پاکستان پر عمران خان کی رہائی کے لیے دباؤ ڈالا جائے گا۔ حالیہ ہفتوں میں کچھ پاکستانی-امریکی گروپس، سینیٹرز اور کانگریس اراکین کے ساتھ روابط میں تیزی لے کر آئے ہیں اور انہوں نے زور ڈالا ہے کہ وہ پاکستان میں انسانی حقوق اور جمہوریت کے لیے مضبوط مؤقف اختیار کریں۔ دورہِ امریکا کے دوران سابق صدر مملکت عارف علوی بھی اس مہم کا حصہ بنے جہاں کپیٹل ہل میں انہوں نے ایک اجلاس منعقد کیا۔ خبریں سامنے آئیں کہ انہوں نے درجن سے زائد امریکی قانون سازوں کو پاکستان کی سیاسی صورت حال سے متعلق بریفنگ دی۔
گمان ہوتا ہے کہ ان کی یہ کوششیں کامیاب ہوگئیں کیونکہ چند کانگریس اراکین نے بیانات جاری کرکے پاکستانی حکومت سے سابق وزیراعظم کی رہائی کا مطالبہ کیا۔ گزشتہ ہفتے امریکی کانگریس رکن جو ولسن جوکہ متعدد مواقع پر پی ٹی آئی لیڈر کی رہائی کا مظالبہ کرچکے ہیں، نے اس سلسلے میں اسٹیٹ سیکریٹری سے ملاقات کی لیکن اب تک ایسی کوئی پیش رفت نہیں ہوئی جس سے یہ اشارہ ملے کہ ٹرمپ انتظامیہ پاکستانی حکومت کے سامنے اس معاملے کو اٹھائے گی۔ یقیناً انسانی حقوق اور جمہوریت کا تحفظ ڈونلڈ ٹرمپ کی اس خارجہ پالیسی میں ترجیح نہیں جوکہ امریکی حمایت کے بدلے امریکا کے لیے کچھ کرنے کی ٹرمپ سوچ کی تابع ہے یا پی ٹی آئی نے شاید ڈونلڈ ٹرمپ کی عمران خان کے لیے پسندیدگی کو غلط پیرایے میں لے لیا ہے۔ جو بھی ہو چند امریکی کانگریس اراکین کی جانب سے بیانات نے پاکستانی حکومت کو پریشان کردیا ہے۔
پی ٹی آئی کی کوششوں پر جوابی اقدامات لیتے ہوئے وزیر داخلہ عجلت میں دورہِ واشنگٹن پر پہنچے۔ رپورٹس کے مطابق امریکی قانون سازوں سے اپنی ملاقات میں انہوں نے حکومت کا پالیسی ایجنڈا ان کے سامنے رکھا۔ دوسری جانب واشنگٹن میں پاکستانی سفیر نے بھی کپیٹل ہل میں اجلاس منعقد کیے۔ بدقسمتی سے پاکستان کی اندرونی سیاسی جنگ کا دائرہ امریکا تک پھیل چکا ہے جبکہ امریکا میں موجود پاکستانی ملک میں جمہوریت کی بحالی کے لیے واشنگٹن کی جانب سے متحرک کردار ادا کرنے اور امریکی حمایت کے حصول کے لیے کوششوں میں مصروف ہیں۔ ڈونلڈ ٹرمپ کی اقتدار میں واپسی کے بعد سے ان کی کوششوں میں واضح طور پر تیزی آئی ہے۔ ان میں سے زیادہ تر نے امریکی صدارتی انتخابات میں ڈونلڈ ٹرمپ کی حمایت اس لیے کی کیونکہ انہیں لگتا تھا کہ وہ عمران خان کی اقتدار سے برطرفی میں جو بائیڈن انتظامیہ کے مبینہ کردار کے پی ٹی آئی الزامات کو بہتر انداز میں سمجھیں گے۔
نام نہاد سائفر جس میں پاکستانی سفیر اور امریکی اسٹیٹ ڈیپارٹمنٹ کے سینیئر اہلکار ڈونلڈ لو کے درمیان تفصیلی گفتگو تھی، عمران خان عوامی حمایت سمیٹنے کے لیے اس سائفر کا استعمال کیا۔ انہوں نے اپنی حکومت جانے کے لیے بائیڈن انتظامیہ کو موردِ الزام ٹھہرایا۔ انہوں نے کہا تھا، ’ہم کوئی غلام ہیں؟‘۔ ان پاپولسٹ نعروں نے عوام میں امریکا مخالف جذبات کو ہوا دی اور اس سے عمران خان کی مقبولیت میں اضافہ ہوا۔ اس مؤقف کی وجہ وہ ایک ایسے قومی رہنما کے طور پر سامنے آئے جنہوں نے بیرونی دراندازی کے خلاف مزاحمت کی۔ قومی اسمبلی میں عدم اعتماد کی تحریک کامیاب ہونے کی وجہ سے پی ٹی آئی کی برطرف حکومت کے حامیوں کا ماننا ہے کہ یہ تمام منصوبہ بندی بائیڈن انتظامیہ کی تھی جسے سیکیورٹی اسٹیبلشمنٹ کی سرپرستی حاصل تھی۔ بیرون ملک مقیم بہت سے پاکستانیوں نے اس مؤقف پر یقین کیا۔
امریکا میں مقیم پاکستانی شہریوں میں عمران خان بہت طویل عرصے سے انتہائی مقبول ہیں۔ ان کی مقبولیت صرف اس لیے نہیں کہ انہوں نے پاکستان کو کرکٹ کا عالمی چیمپیئن بنایا بلکہ لوگ ان کے فلاحی کاموں کے بھی معترف ہیں۔ سیاست میں آنے کے بعد ان کی مقبولیت میں نمایاں اضافہ ہوا جس کی سب سے بڑی وجہ عوام کا مرکزی دھارے کی دو بڑی جماعتوں پر بڑھتا عدم اعتماد تھا جو دہائیوں سے اقتدار پر براجمان ہیں۔ شاید یہی وہ وجہ ہوسکتی ہے جس کی بنا پر ماضی میں بیرونِ ملک پاکستانیوں کے ایک نمایاں حصے نے آمرانہ حکومتوں کی حمایت کی لیکن اسٹیبلشمنٹ کی روایتی حمایت اس وقت ختم ہوگئی جب عمران خان اور دیگر پی ٹی آئی رہنماؤں کو گرفتار کیا گیا۔ بیرونِ ملک مقیم پاکستانی حلقوں میں بڑے پیمانے پر یہ سوچ پائی جاتی ہے کہ 8 فروری 2024ء کے انتخابات میں غیرسیاسی قوتیں ملوث تھیں جنہوں نے پی ٹی آئی کی جیت کو تسلیم نہیں کیا اور مسلم لیگ (ن) اور پیپلز پارٹی (پی پی پی) کو اقتدار دیا۔
اسٹیبلشمنٹ مخالف جذبات بڑھتے گئے جن کی جھلک بیرونِ ملک مقیم پاکستان کے تعلیم یافتہ پیشہ ور اور تعلیم یافتہ طبقے میں نظر آتی ہے۔ گزشتہ موسمِ گرما میں امریکا اور کینیڈا کے دورے کے دوران میں نے جب پاکستانیوں سے گفتگو کی تو مجھے یہ تبدیلی واضح طور پر محسوس ہوئی۔ عوام میں جو عدم اعتماد آج پایا جاتا ہے، ہمیں ماضی میں اس کی کوئی مثال نہیں ملتی۔ شاید یہی وجہ ہے کہ بہت سے بیرونِ ملک مقیم پاکستانی عمران خان کی رہائی اور پاکستان میں جمہوری حقوق کی بحالی کے لیے مہم میں متحرک کردار ادا کررہے ہیں۔ اس کے لیے وہ واشنگٹن کی حمایت حاصل کرنے سے بھی دریخ نہیں کررہے جنہیں وہ ماضی میں عمران خان کے دشمن قرار دیتے تھے۔ بہت سے بااثر پاکستانی نژاد امریکی شہری عمران خان کی رہائی کے لیے لابنگ کررہے ہیں۔ ان کی بڑی تعداد پاکستانی امریکیوں کی سیاسی سرگرمیوں کی کمیٹی میں شامل ہیں جسے پاک پیک کہا جارہا ہے۔
اس کمیٹی نے پاکستان میں انسانی حقوق کی بدتر ہوتی صورت حال اور حزب اختلاف کے رہنماؤں کے خلاف کریک ڈاؤن پر کانگریس اور سینیٹ اراکین سے اپنے خدشات کا اظہار کیا ہے۔ گزشتہ چند برسوں میں وہ گروپ جو اپنے آپ کو غیرجانبدار کہتا تھا، بیرونِ ملک مقیم پاکستانیوں کے سب سے طاقتور اور بااثر گروہ کے طور پر سامنے آیا ہے۔ انہوں نے حالیہ ہفتوں میں کپیٹل ہل میں کئی میٹنگز کا انعقاد کیا ہے اور چند کانگریس اراکین کی جانب سے عمران خان کی رہائی کے مطالبے نے انہیں کسی حد تک کامیابی بھی دلوائی ہے۔ انہوں نے پاکستان کی متزلزل معاشی صورت حال اور ملک کو درپیش دیگر چیلنجز کو بھی امریکی قانون سازوں کے سامنے اٹھایا ہے۔ بیرونِ ملک مقیم پاکستانی، ملک میں رائج آمرانہ طرزِ حکمرانی کے خلاف جتنی مضبوط لابنگ کررہے ہیں، اتنی مضبوط لابنگ ہم نے پہلے کبھی نہیں دیکھی لیکن وہ اب تک ٹرمپ انتظامیہ سے کسی طرح کا ردعمل حاصل نہیں کرپائے ہیں۔
شاید کوئی ردعمل آئے بھی نہیں کیونکہ چند تجزیہ کاروں نے نشاندہی کی ہے کہ واشنگٹن، پاکستان پالیسی میں امریکا اپنی قومی سلامتی اور خارجہ پالیسی کو ترجیح دے گا جبکہ اسے جمہوریت اور انسانی حقوق کے لیے کوئی خدشات نہیں ہوں گے۔ ملکی اندرونی معاملات میں بیرونی مداخلت کو دعوت دینا پاکستان کے مفادات کے حق میں اچھا نہیں ہوگا۔ امریکا پاکستان کے اندرونی سیاسی معاملات میں اپنا کردار ادا کرچکا ہے بالخصوص آمرانہ حکومتوں میں۔ ہمیں جمہوریت کے لیے جنگ خود لڑنی ہے۔ تاہم یہ احساس کہ انتخابات میں ان کا مینڈیٹ چوری کیا گیا اور بنیادی حقوق چھین لیے گئے ہیں، نے بیرون ملک مقیم بہت سے پاکستانیوں کو انتہائی حدود تک جانے کے لیے جواز فراہم کیا ہے۔ یقیناً بیرونی مداخلت کو دعوت دینے کی کوئی وضاحت پیش نہیں کی جاسکتی لیکن قصور کسی حد تک اسٹیبلشمنٹ کی حمایت یافتہ حکومت کا بھی ہے جس نے حالات ہی اس طرح کے پیدا کردیے کہ عوام کا نظام پر سے اعتماد مکمل طور پر اٹھ گیا۔ آمرانہ طرزِ حکمرانی نے پاکستان کی خودمختاری کو ٹھیس پہنچائی ہے۔
اصل تحریر:
https://www.dawn.com/news/1892944/waiting-for-trumps-call
“تعلیم کے بارے میں چینی صدر کے اہم بیانات”کی فرانسیسی، روسی، ہسپانوی اور عربی زبانوں میں اشاعت