’’سوشل میڈیا فالوورز فلموں کو کامیاب نہیں بناتے!‘‘ جاوید جعفری کا اروشی روٹیلا پر طنز
اشاعت کی تاریخ: 21st, February 2025 GMT
بھارت کے معروف اداکار اور میزبان جاوید جعفری نے فلم انڈسٹری میں سوشل میڈیا کی بڑھتی ہوئی اہمیت پر سوال اٹھاتے ہوئے اروشی روٹیلا پر بھی طنز کیا ہے۔
جاوید جعفری نے کہا کہ کسی اداکار کی سوشل میڈیا پر بڑی فالوونگ اس بات کی ضمانت نہیں ہے کہ ان کی فلم باکس آفس پر کامیاب ہوگی۔ جعفری نے اپنی بات کو واضح کرنے کےلیے اروشی روٹیلا کی مثال دی، جو انسٹاگرام پر 70 ملین فالوورز کے باوجود فلمی دنیا میں کامیابی حاصل نہیں کرسکیں۔
ایک حالیہ انٹرویو میں جاوید جعفری نے کہا، ’’میں اس بات سے بالکل متفق نہیں ہوں کہ سوشل میڈیا پر لاکھوں فالوورز کسی کو اسٹار بنا دیتے ہیں۔ ہاں، شروعات میں تھوڑا فائدہ ہوسکتا ہے، لیکن 70 سے 100 ملین فالوورز کا مطلب یہ نہیں کہ وہ سب فلم کے ٹکٹ خریدیں گے۔‘‘
انہوں نے اروشی روٹیلا کی مثال دیتے ہوئے کہا، ’’اروشی کے 70 ملین فالوورز ہیں، لیکن کیا ان کے فالوورز ٹکٹ خریدنے والے ناظرین میں تبدیل ہوجاتے ہیں؟ اگر ان کے صرف 10 ملین فالوورز بھی فلم کا ٹکٹ خرید لیں، تو یہ 1 کروڑ لوگ بنتے ہیں۔ اگر ہر ٹکٹ کی قیمت 250 روپے بھی ہو، تو فلم 100 کروڑ روپے کما لے گی۔ لیکن ایسا نہیں ہوتا۔‘‘
جاوید جعفری نے زور دے کر کہا کہ فلم کی کامیابی کا انحصار پروموشن پر نہیں، بلکہ اس کے مواد اور ٹریلر پر ہوتا ہے۔ انہوں نے رجنی کانت کی مثال دیتے ہوئے کہا، ’’رجنی کانت صاحب سب سے بڑے اسٹار ہیں، لیکن وہ کہاں جا کر اپنی فلموں کو پروموٹ کرتے ہیں؟ اگر فلم اچھی ہو، تو وہ خود ہی چلتی ہے۔ لوگ آخر میں اسٹار کےلیے آسکتے ہیں، لیکن بعض اوقات کچھ اسٹارز کو بھی اچھی شروعات نہیں ملتی۔‘‘
سلمان خان کی فلموں کے حوالے سے جعفری نے کہا، ’’سلمان خان کی فلم کو 10-15 کروڑ کی اوپننگ بھی مل سکتی ہے اور 50 کروڑ کی اوپننگ بھی۔ یہ سب ناظرین کے ٹریلر دیکھنے اور اس سے محسوس ہونے والی کشش پر منحصر ہے۔ سلمان خان کی ہر فلم کو 50 کروڑ کی اوپننگ نہیں ملتی۔ سارا کھیل ٹریلر کا ہے۔‘‘
جاوید جعفری نے اپنی بات کا اختتام کرتے ہوئے کہا ’’سوشل میڈیا کی چمک دمک اور فالوورز کا ہجوم فلم کو کامیاب نہیں بناتا۔ فلم کا مواد اور ٹریلر ہی ناظرین کو سینما گھروں تک کھینچتے ہیں۔‘‘
TagsShowbiz News Urdu.
ذریعہ: Al Qamar Online
کلیدی لفظ: جاوید جعفری نے اروشی روٹیلا سوشل میڈیا
پڑھیں:
آرمی چیف کے دورۂ پر سوشل میڈیا مہم چلانے والوں کیخلاف کارروائی کا اعلان
اسلام آباد:وفاقی وزیر اطلاعات و نشریات عطا تارڑ نے کہا ہے کہ آرمی چیف جنرل سید عاصم منیر کے دورۂ برطانیہ پر سوشل میڈیا پر منفی مہم چلانے والوں کے خلاف قانونی کارروائی کی جائے گی۔ انہوں نے کہا کہ تحریک انصاف کو آرمی چیف کا برطانیہ میں پرتپاک استقبال ہضم نہیں ہوا، جس کی وجہ سے وہ سوشل میڈیا پر منفی پروپیگنڈا کر رہے ہیں۔
عطا تارڑ نے کہا کہ آرمی چیف کے برطانیہ دورے کے دوران ان کا شاندار استقبال کیا گیا، جس سے پاکستان کی عزت اور وقار میں اضافہ ہوا۔ پاک فوج کی پیشہ ورانہ صلاحیتوں کا اعتراف پوری دنیا کرتی ہے لیکن تحریک انصاف کو یہ بات ہضم نہیں ہورہی۔پی ٹی آئی کے کچھ کارکنوں نے سوشل میڈیا پر منفی مہم چلائی اور احتجاج بھی کیا، لیکن محب وطن پاکستانیوں نے ان کی اس مہم کو مسترد کر دیا ہے۔
انہوں نے کہا کہ جو بھی پاکستان کی سالمیت، بقا اور مفاد کو نقصان پہنچائے گا، اس کے خلاف قانونی کارروائی کی جائے گی۔انہوں نے تحریک انصاف پر سخت تنقید کرتے ہوئے کہا کہ یہ جماعت ملک دشمن قوتوں کے ایجنڈے پر کاربند ہے۔ تحریک انصاف نے دہشت گردوں کو پاکستان لانے اور انہیں اپنا دوست بنانے کی کوشش کی۔ تحریک انصاف کے بانی چیئرمین نے ہمیشہ دہشت گردوں کی حمایت کی اور آئی ایم ایف کو خط لکھ کر ملک سے دشمنی کا ثبوت دیا۔
وزیر اطلاعات نے 9مئی کے واقعات کا بھی ذکر کرتے ہوئے کہا کہ تحریک انصاف نے اس دن جو کچھ کیا، اس کے شواہد موجود ہیں۔ انہوں نے کہا کہ تحریک انصاف نے دفاعی تنصیبات کو نشانہ بنایا، جناح ہاؤس کو آگ لگائی اور شہدا کی یادگاروں کو بھی مسمار کیا۔
عطا تارڑ کا کہنا تھا کہ پاکستان ترقی کی نئی منازل طے کر رہا ہے اور معیشت میں واضح بہتری آ رہی ہے۔ ترسیلات زر میں 32 فیصد اضافہ ہوا ہے، جس میں بیرون ملک مقیم پاکستانیوں کا اہم کردار ہے۔ انہوں نے کہا کہ جب بیرون ملک پاکستانی ذمے دارانہ کردار ادا کر رہے ہیں، تو کچھ شرپسند عناصر پاکستان کی ساکھ کو نقصان پہنچانے کی کوشش کر رہے ہیں۔
وزیر اطلاعات نے کہا کہ تحریک انصاف کی سیاست زوال کا شکار ہے اور ان کے پاس کوئی مثبت ایجنڈا نہیں ہے۔ تحریک انصاف کبھی آئی ایم ایف کو خط لکھتی ہے اور کبھی آرمی چیف کے دورے پر احتجاج کرتی ہے۔ انہوں نے کہا کہ اگر تحریک انصاف کو پاکستان کی عزت ہضم نہیں ہوتی تو وہ سڑتے رہیں لیکن ان کی تمام مذموم کوششیں ناکام ہوں گی۔
جعفریہ الائنس پاکستان کے تحت کراچی میں علما و ذاکرین کانفرنس