نیوزی لینڈ سے بدترین شکست پر آل راؤنڈر نے خاموشی توڑ دی، سخت باتیں کر ڈالیں
اشاعت کی تاریخ: 19th, February 2025 GMT
کراچی:
قومی کرکٹ ٹیم کے آل راؤنڈر نے چیمپئنز ٹرافی کے افتتاحی میچ میں نیوزی لینڈ سے شکست کی وجہ بتادی۔
آئی سی سی چیمپینز ٹرافی کے ابتدائی میچ میں نیوزی لینڈ کے ہاتھوں شکست کے بعد میڈیا سے گفتگو کرتے ہوئے سلمان علی آغاز نے کہا کہ نیوزی لینڈ سے شکست کو بھول بھارت کے خلاف نئی منصوبہ بندی کے ساتھ میدان میں جائیں گے۔
انہوں نے کہا کہ سینیئر بلے فخر زمان کے ان فٹ ہونے سے ہم پاور پلے کا فائدہ نہیں اٹھاسکے، دنیا کی بڑی ٹیموں کے خلاف کامیابی پانے کے لیے ہمیں اپنے کھیل میں مستقل مزاجی لانے کی ضرورت ہے اور ہمیں لمبی اننگز کی عادت ڈالنا ہوگی۔
انہوں نے کہا کہ ہمیں ایک میچ جیتنے اور دوسرا ہارنے کے سلسلے کو ختم کرنا پڑے گا، مڈل آرڈر میں ہمارے بولرز وکٹ نہیں لے رہے ہیں، اس پر بھی کام کی ضرورت ہے۔
آل راؤنڈر نے کہا کہ نیوزی لینڈ کو ہم 270 سے 280 رنز تک محدود رکھنا چاہتے تھے تاہم انہوں نے اعتراف کیا کہ آخر میں ہماری بولنگ زیادہ بہتر نہ رہی جبکہ بیٹنگ میں اچھا آغاز نہ ملنے کے سبب ہدف تک نہ پہنچ سکے اور پوری اننگز میں ایک بھی اچھی پارٹنر شپ نہ بن سکی۔
سلمان علی آغا نے کہا کہ ہمیں جیسا کھیلنا چاہیے تھا ویسا کھیل پیش نہیں کرسکے، مجموعی طور پر ہماری بولنگ اور بیٹنگ دونوں ہی خراب رہی اور بہت ساری خامیاں سامنے آئیں جن کو دور کرنے کی کوشش کررہے ہیں۔
انہوں نے کہا کہ حارث روف 100 فیصد فٹ تھے اسی لیے وہ میچ میں ٹیم کا حصہ بنے۔
فاسٹ بولر نسیم شاہ نے کہا کہ کوشش کررہا ہوں کہ خود کو بہتر آل رائونڈر ثابت کروں، ہمیں بولنگ اور بیٹنگ میں مزید بہتری لانا ہوگی، آل رائونڈر خوش دل شاہ نے کہا کہ ایک مرحلے پر میچ میں واپس آگئے تھے، مگر ہم لمبی اننگز کی کمی کے باعث اچھا فنش نہیں کرسکے۔
انہوں نے کہا کہ تماشائیوں کی آوازیں کسنے پر دکھ ہوتا ہے، میں ہمیشہ ملک کے لیے کھیلتا ہو ں،کبھی انفرادی اننگز نہیں کھیلی۔
.ذریعہ: Express News
کلیدی لفظ: انہوں نے کہا کہ نیوزی لینڈ میچ میں
پڑھیں:
چیمپئنز ٹرافی، دفاعی چیمپئن پاکستان کو پہلے میچ میں نیوزی لینڈسے شکست
کراچی: آئی سی سی چیمپئنز ٹرافی 2025 کے افتتاحی میچ میں نیوزی لینڈ نے پاکستان کو 60 رنز سے شکست دے دی۔
نیشنل سٹیڈیم میں کھیلے جانے والے میچ میں پاکستان کی پوری ٹیم 48 ویں اوور کی دوسری گیند پر 260 رنز بنا کر ڈھیر ہو گئی۔
پاکستان کی جانب سے بابر اعظم 64، خوشدل شاہ نے 69، فخر زمان نے 24 اور سلمان علی آغا نے 42 رنز بنائے۔
اس سے پہلے نیوزی لینڈ نے مقررہ اوورز میں پانچ وکٹوں کے نقصان 320 رنز بنائے تھے۔
نیوزی لینڈ کی جانب سے ٹام لیتھم 118، ویل ینگ 107 اور گلین فلپس 61 رنز کے ساتھ نمایاں رہے۔
نیوزی لینڈ کے بیٹرز کے سامنے پاکستانی بولرز بے بس دکھائی دیے، آخری آٹھ اوورز میں نیوزی لینڈ نے 105 رنز بنائے۔
میچ کے ابتدائی اوور میں پاکستان ٹیم کے اوپننگ بیٹر فخر زمان فیلڈنگ کے دوران بظاہر معمولی زخمی ہو کر گراؤنڈ سے باہر چلے گئے تھے، تاہم اب وہ کھیل کا حصہ ہیں۔
پاکستان نے 321 رنز کے تعاقب کا مایوس کُن آغاز کیا۔ پاکستان کی پہلی وکٹ اوپنر سعود شکیل کی صورت میں چوتھے اوور کی چوتھی گیند پر اس وقت گری جب ٹیم کے مجموعی سکور صرف آٹھ رنز تھے، وہ چھ رنز بنا کرآؤٹ ہوئے۔
ون ڈاؤن آنے والے کپتان محمد رضوان بھی کوئی خاص کارکردگی دکھانے میں ناکام رہے، وہ 14 گیندوں پر صرف تین رنز بنا کر آؤٹ ہوئے۔
فخر زمان کریز پر اترے اور ٹیم کے سکور بڑھانے کی کوشش کی، انہوں نے مسلسل شارٹس کھیلی لیکن قسمت نے ان کا ساتھ نہیں۔ دو مرتبہ کیچ ڈراپ ہونے کے بعد بل آخر وہ کلین بولڈ ہوئے۔
فخر زمان نے چار چوکوں کی مدد سے 50 رنز بنائے۔ اس کے بعد سلمان علی آغا 42 اور طیب طاہر ایک رن بنا کر آؤٹ ہو گئے۔
اننگز کی اوپننگ کرنے والے بابر اعظم طویل دیر تک وکٹ پر موجود رہے۔ سست بیٹنگ کا مظاہرہ کرتے ہوئے وہ 90 گیندوں پر 64 رنز بنا کر آؤت ہوئے۔
نیوزی لینڈ نے پاکستان کی دعوت پر بیٹنگ کا آغاز کیا تو وِل ینگ اور ڈیوون کونوے کریز پر اترے۔ پہلے آٹھ اوورز تک دونوں بیٹرز نے بغیر کسی نقصان کے 39 رنز بنائے۔
ٹیم نیوزی لینڈ کو پہلا نقصان اس وقت ہوا جب آٹھویں اوور کی تیسری گیند پر ڈیوون کونوے 10 رنز بنا کر ابرار احمد کا شکار بنے۔
ون ڈاؤن آنے والے کین ولیمسن بھی کوئی خاص کارکردگی دکھانے میں ناکام رہے۔ وہ صرف ایک رن بنا کر نسیم شاہ کی گیند پر وکٹ کیپر محمد رضوان کو کیچ تھما بیٹھے۔
نیوزی لینڈ کی تیسری وکٹ 17ویں اوور کی دوسری گیند پر ڈیرل مچل کی صورت میں اس وقت گری جب ٹیم کے مجموعی سکور 73 تھے۔
ایونٹ کی پہلی سینچری سکور کرنے والے اوپننگ بیٹر وِل ینگ 113 گیندوں پر ایک چھکے اور 11 چوکوں کی مدد سے 107 رنز بنا کر آؤٹ ہوئے۔
میچ کے آخری اوورز میں نیوزی لینڈ کے بیٹرز نے پاکستانی بولرز کو آڑے ہاتھوں لیا، آخری آٹھ اوورز میں نیوزی لینڈ نے 105 رنز بنائے۔
گلین فلپس نے عمدہ کارکردگی کا مظاہرہ کرتے ہوئے چار چھکوں اور تین چوکوں کی مدد سے 61 رنز کی اننگز کھیلی، وہ حارث رؤف کی گیند پر فخر زمان کو کیچ تھما کر آؤٹ ہوئے۔
نیوزی لینڈ کی جانب سے ٹام لیتھم تین چھکوں اور 10 چوکوں کی مدد سے 118 رنز بنا کر آؤٹ ہوئے جبکہ مائیکل بریسویل بغیر کوئی رنز بنائے پویلین لوٹے۔
پاکستان کی جانب سے نسیم شاہ اور حاررث رؤف نے دو، دو جبکہ ابرار احمد نے ایک وکٹ حاصل کی۔
بلاول بھٹو سال دو سال میں وزیراعظم بن جائیں گے، گورنر پنجاب