Nai Baat:

پی ٹی آئی کے لئے مشکلات

اشاعت کی تاریخ: 19th, February 2025 GMT

پی ٹی آئی کے لئے مشکلات کا اندازہ اس بات سے لگائیے کہ وہ بہت سارے دیہاڑی باز جوسوشل میڈیا پر ہر مہینے بلکہ ہر ہفتے رہائی کی ایک نئی تاریخ دیتے تھے غائب ہوچکے ہیں۔ اب ان کیلئے اْمید کی کوئی کرن نہیں ہے۔ ایک چراغ جو حکومت سے مذاکرات کے ذریعے پی ٹی آئی نے خود ہی جلایا تھا اسے بْجھا بھی خود ہی دیا۔ آرمی چیف کو خطوط لکھ کے راہ ہموار کرنے کی کوشش کی مگر اس پر بھی صاف جواب آ گیا اور اب ایک ٹرک کی بتی ہے کہ رمضان المبارک کے بعد کوئی گرینڈ الائنس بنایا جائے گا اوراس کے بعد کوئی تحریک۔ سوال یہ ہے کہ اگر آپ کچھ مقاصد اور کچھ مفادات پر اکٹھے ہیں توا س کے اعلان کے لئے رمضان المبارک کے گزرنے کا انتظار کیوں ہے یعنی کوئی ڈیڑھ دو ماہ بعد۔ میں جب یہ الفاظ لکھ رہا ہوں تو میرے سامنے دھوپ چمک رہی ہے اور لگ رہا ہے کہ اس مرتبہ گرمی شائد گذشتہ برسوں کی نسبت کچھ پہلے آجائے اور شائد کچھ زیادہ بھی۔

حقیقت تو یہ ہے کہ پی ٹی آئی نے سنگ جانی اور کاہنہ کے جلسوں سے اپنی عوامی حمایت کا اندازہ بھی لگا لیا ہے اور اس نے خیبرپختونخوا کے جلسوں میں اپنی حاضری بھی دیکھ لی ہے، کسی ایک جگہ بھی یہ تعداد دس ہزار نہیں تھی۔ اس کی مزاحمت میں کتنا دم ہے وہ اکتوبر میں ایس سی او کانفرنس سے پہلے احتجاج اور نومبر کی فائنل کال میں چیک کیا جا چکا ہے جب بشریٰ بی بی اور علی امین گنڈا پور اپنے کارکنوں کو چھوڑ کر رات کے اندھیرے میں فرار ہوئے۔اب پی ٹی آئی والے احتجاج کے لئے مولانا فضل الرحمان کی مذہبی اور سیاسی طاقت پر انحصار کرنا چاہ رہے ہیں مگر کیا مولانا ان کی چال میں آ جائیں گے اور اپنے کارکنوں کو حکومت کے سامنے اور اپنی پارٹی کو اسٹیبلشمنٹ کے سامنے ایک ایسی جنگ میں کھڑا کر دیں گے جس کا فائدہ پی ٹی آئی اور بانی پی ٹی آئی اٹھالیں۔ اگر کسی کو اس حوالے سے کوئی غلط فہمی ہے تو وہ چھبیسویں آئینی ترمیم کی پوری ڈویلپمنٹ پر غور کر سکتا ہے جس میں جمعیت العلمائے اسلام کے ارکان اسمبلی نے پی ٹی آئی کی اس موو کو ناکام بنایا جو وہ اعلیٰ عدالتوں میں تقسیم کے ذریعے کرنا چاہتی تھی۔ یہ حکومت کی ایک شاندار سیاسی، پارلیمانی اور قانونی مہم تھی۔ یہ درست ہے کہ مولانا فضل الرحمان نے آئینی عدالت بننے کا راستہ روکا مگر آئینی بینچ قائم ہوا اور وہ تمام مقاصد حاصل ہوئے جو حکومت نے طے کر رکھے تھے۔ یہ شہبازشریف، آصف زرداری اور مولانا فضل الرحمان کی مشترکہ جیت تھی۔
کوئی بھی سیاسی جماعت اگر کوئی بھی تحریک چلانا چاہتی ہے تواس کے لئے اس کے اندر قیادت اور نظرئیے کی یکسوئی ضروری ہے۔ پی ٹی آئی میں بہت سارے لوگ قائل ہیں کہ مزاحمت کی سیاست سے انہیں کچھ نہیں ملے گا اور اگر کچھ ملے گا تو وہ صرف اور صرف مشکل اور رسوائی جیسے نو مئی کے بعد ملی اور جیسے چھبیس نومبر کی رات۔پی ٹی آئی کا سب سے بڑا مسئلہ یہ ہے کہ اس کے پاس گفتار کے غازی ہیں کردار کے نہیں۔ یہ لوگ سوشل میڈیا پر شور مچاتے ہیں مگر عملی طور پر کہیں نظر نہیں آتے۔ پی ٹی آئی اس وقت بہت سارے گروپوں میں تقسیم ہوچکی ہے جیسے مرکزی سطح پر علیمہ بی بی اور بشریٰ بی بی کے گروپ۔ بات یہاں تک محدو د نہیں ہے بلکہ ایک سوشل میڈیا کا گروپ بھی ہے اور ایک وکلا کا گروپ بھی۔ ایک گروپ پارٹی سے نکالے ہوئے رہنماؤں کا ہے جیسے فواد چوہدری اورشیر افضل مروت وغیرہ۔ یہ لوگ سوشل ہی نہیں پرنٹ اور الیکٹرانک میڈیا پر بھی رش لے رہے ہیں۔ بہت سارے لوگ کہتے ہیں کہ یہ اختلاف رائے ہے جو پارٹیوں میں ہوجاتا ہے مگر یہ محض اختلاف رائے ہوتا تو یہ لوگ ایک دوسرے کو تھپڑ نہ مار رہے ہوتے، علیمہ بی بی نے عمران خان کا ایکس اکاؤنٹ چلانے والے جبران الیاس پر جو الزامات عائد کئے ہیں وہ بھی سب کے سامنے ہیں۔ یہ اختلاف رائے نہیں، نفرتیں اور دشمنیاں ہیں۔

پی ٹی آئی کا ہوم گراؤنڈ خیبرپختونخوا ہے اور وہاں پر اس کی تنظیمی حالت سب سے زیادہ خراب ہے۔علی امین گنڈا پور کو پارٹی کی صوبائی صدارت سے ہٹا کے جنید اکبر کو لایا جا چکا ہے اور ان دونوں کے درمیان جو معاملات چل رہے ہیں وہ آٹھ فروری کے جلسے کے موقعے پر واضح رہے۔ خیبرپختونخوا میں گروپ بندی علی امین اور جنید اکبر سے بھی اوپر کی ہے یعنی مراد سعید، اسد قیصر، علی محمد خان اور شیر افضل مروت وغیرہ کے گروپ۔ شیر افضل خان مروت کے ساتھ بہت سارے رہنماؤں اور کارکنوں نے سوشل میڈیا پر باقاعدہ جانے کے اعلانات کر دئیے ہیں۔ سندھ اوربلوچستان میں پی ٹی آئی کا کوئی حال نہیں ہے اور پنجاب میں حماد اظہر،شاہ محمو د قریشی اور چوہدری پرویز الٰہی کے علاوہ میاں اسلم اقبال کے بھی گروپ ہیں۔ کہا جا رہا ہے کہ کچھ ہی دنوں میں شاہ محمود قریشی کے بیٹے زین قریشی کو بھی پارٹی سے نکالنے کا فیصلہ ہوجائے گا کہ اس پر بھرپور مہم چل رہی ہے۔ سوشل میڈیا پر ایک طاقتور گروپ حماد اظہر کو پارٹی کی صوبائی صدارت سے ہٹانے کے لئے سرگرم ہے اور یہ واحد پارٹی ہے جو اپنے عہدوں اور پالیسیوں کا فیصلہ سوشل میڈیا کو دیکھ کے کرتی ہے۔ میں نے یہاں سلمان اکرم راجا کے گروپ کی بات نہیں کی کیونکہ ان کا کوئی گرو پ نہیں اور میں نے انہیں چوبیس نومبر کو اپنی گاڑی میں اکیلے گھومتے اور ویڈیوز بناتے ہوئے دیکھا ہے۔ پنجاب میں فواد چوہدری بھی کارکنوں کی توجہ لے رہے ہیں مگر وہ مرکزی سیاسی کمیٹی کو منی لانڈرنگ کمیٹی بھی کہہ رہے ہیں، شعیب شاہین کو تھپڑ مار رہے تووقاص اکرم پر پوری کے پی حکومت بیچنے کے الزامات لگا رہے ہیں۔

ایک کاؤنٹر آرگومنٹ یہ ہے کہ ووٹ تو عمران خان کا ہے اور وہی ووٹ آٹھ فروری کو بھی پڑاسو ان اختلافات سے فرق نہیں پڑتا مگرتب کیا ہو اگر عمران خان خود جیل میں بیٹھ کے یہ گیم کررہے ہوں، انہیں آپس میں لڑوا رہے ہوں۔ مجھے اس وقت بہت حیرت ہوتی ہے جب وہ بشریٰ بی بی کی بھی تعریفیں کرتے ہیں اور علیمہ بی بی کو بھی ہلہ شیری دیتے ہیں، اسی طرح تھپڑ کھانے والے شعیب شاہین سے بھی ملاقاتیں کرتے ہیں اور تھپڑ مارنے فواد چوہدری سے بھی۔ کیا یہ وہی بڑی گیم ہے جس کا ذکر پی ٹی آئی کے کارکن کرتے ہیں کہ وہ میں جیل میں بیٹھ کے کر رہے ہیں، خیر، اب تو یہ باتیں کہنے والے بھی نہیں رہے ورنہ وہ کیا دن تھے جب روزانہ بتایا جاتا تھا کہ جیل کا پچھلا دروازہ کھلا اور فلاں، فلاں نے عمران خان کے پاؤں پکڑ لئے۔ اب تو اپنے وکیلوں تک ملاقاتیں نہ ہونے کے رونے دھونے ہیں جو اس برس تو اسی طرح چلتے ہوئے نظر آ رہے ہیں۔ رہ گئی تحریک تو یہ بازو میرے آزمائے ہوئے ہیں، یہ منہ اور مسور کی دال؟

.

ذریعہ: Nai Baat

کلیدی لفظ: سوشل میڈیا پر پی ٹی ا ئی بہت سارے یہ ہے کہ رہے ہیں ہے اور کے لئے

پڑھیں:

ہندوستان و طالبان۔۔۔۔۔ یہ سب کہانیاں ہیں

اسلام ٹائمز: آج کے اس کالم میں اپنے پالیسی ساز اداروں سے ہمارا یہ تقاضا ہرگز نہیں ہے کہ مستقبل میں پیش آنیوالی مشکلات کیلئے کوئی منصوبہ بندی کریں بلکہ ہماری تو دست بستہ گزارش یہ ہے کہ کم از کم اپنی آنکھوں کے سامنے موجودہ مشکلات اور موجودہ دشمنوں سے تو ملک اور عوام کو تحفظ دیں۔ کہیں پر بھی ریاستی رِٹ کے مذاق بن جانے کا مطلب یہ ہوتا ہے کہ یا تو حکمران عقل کے اندھے ہیں اور یا پھر عقل کے اندھوں کے ہاتھ میں حکومت آگئی ہے، باقی ہندوستان و طالبان۔۔۔ یہ سب کہانیاں ہیں۔ تحریر: ڈاکٹر نذر حافی

کیا پاکستان کے صوبے براہِ راست بین الاقوامی مذاکرات کرنے اور اپنی خارجہ پالیسی طے کرنے میں خود مختار ہیں۔؟ ایک طرف خیبر پختونخوا اور بلوچستان میں افغانستان و بھارت ہماری ریاستی رِٹ کیلئے چیلنج بن چکے ہیں اور دوسری طرف خیبر پختونخوا کی حکومت بیرسٹر محمد علی سیف کی سربراہی میں اپنے دو وفد  طالبان کے ساتھ براہِ راست مذاکرات کیلئے افغانستان بھیجنے کا فیصلہ کرچکی ہے۔ ایک وفد کے بارے میں شنید ہے کہ وہ سفارتی معاملات طے کرے گا اور دوسرا وفد ایسے اسٹیک ہولڈرز کا ہے، جو اللہ ہی جانے کیا کریں گے۔ ملکی تاریخ میں، صوبوں کی طرف سے ایسی انوکھی پلاننگ پہلے کبھی سامنے نہیں آئی۔ اس عمل کی قانونی حیثیت پر بحث کیلئے قانون دانوں کو ہی موقع دیا جانا چاہیئے، تاہم ملک بچانے کیلئے ساری ملت کے ساتھ مشاورت کا دروازہ بھی کھلا رہنا چاہیئے۔

آج ہم جس فتنہ الخوارج سے زِچ ہو کر طالبان کے سامنے گھٹنے ٹیک چکے ہیں، یہ سارے فتنہ باز جتھہ بردار کوئی اجنبی اور ہمارے نامحرم نہیں بلکہ ہمارے ہی مجاہد بھائی ہیں۔ حالیہ چند دنوں میں ہمارے ان مجاہد بھائیوں نے بلوچستان کے ضلع ہرنائی میں شاہرگ کے مقام پر کوئلے کی کان کے قریب دھماکہ کرکے گیارہ مزدوروں کو خاک و خوں میں غلطاں کر دیا۔ اسی طرح دو دِن پہلے ایک بار پھر پاراچنار جانے والے قافلے پر حملہ ہوا۔ بڑے مزے کے ساتھ مجاہد بھائیوں نے بگن، مندروی، ڈاڈ کمر، چارخیل اور اوچت کے مقام پر گاڑیوں کو لوٹا اور لوٹنے کے بعد آگ بھی لگائی گئی۔ اس حملے میں کئی لوگ زخمی اور جاں بحق ہوئے۔ تاجر برادری کے مطابق پندرہ سے زائد ڈرائیور اس مرتبہ بھی لاپتہ ہوگئے ہیں۔ آگاہ رہیں کہ اس کا عتاب بھی مجاہد بھائیوں کے بجائے بےچارے عام افغان مہاجرین پر ہی نازل ہوگا۔

عرصہ دراز سے مذکورہ بالا علاقوں کا طالبان یا مجاہد بھائیوں کے قبضے میں چلے جانا اور پاکستان کے ہاتھوں سے نکلنا کسی سے مخفی نہیں۔ ان علاقوں کو طالبان سے واپس لینے کے بجائے عام افغان مہاجرین پر شکنجہ کسنا دراصل عوام کی آنکھوں میں دھول جھونکنا ہے۔ کیا طالبان یعنی مجاہد بھائیوں کے ہاتھوں رفتہ رفتہ   پاکستان کے جغرافئے سے دستبردار ہوتے جانا ہماری قومی پالیسی ہے۔؟ اب تو بچے بھی یہ لوری نہیں سُنتے کہ بھارت افغانستان کی سرزمین کو پاکستان میں دہشت گردی کے لیے استعمال کر رہا ہے۔ نئی نسل افغانستان اور ہندوستان سمیت سب ہمسایہ ممالک کے ساتھ اچھے اور دوستانہ تعلقات چاہتی ہے۔ دہشت گردوں کو مذہب کا شیلٹر فراہم کرنا کسی کو بھی پسند نہیں۔ ہم لوگوں کو تو یہ کہتے ہیں کہ دہشت گردوں کا کوئی مذہب نہیں، لیکن جوانوں کو یہ سوچنے سے کون روک سکتا ہے کہ پاکستان کے علاقوں پر مختلف شکلوں میں قبضہ جمانے والے یہ سارے دہشتگرد ایک ہی مذہب سے کیوں تعلق رکھتے ہیں۔؟

کیا عوام کو یہ دکھائی نہیں دیتا کہ اس وقت مسلک وہابیت، اہلحدیث یا مکتب سلفی کے مرکز سعودی عرب میں کوئی داعش، القاعدہ، طالبان، سپاہِ صحابہ، لشکرِ جھنگوی اور خودکُش بمباروں کا کیمپ نہیں۔؟ بھارت ہمارا دشمن ہی سہی، وہیں پر دیوبندی مکتب کا مرکز دارالعلوم دیوبند موجود ہے، پورے ہندوستان میں کہیں بھی ایک انچ زمین بھی کسی سپاہِ صحابہ، داعش، القاعدہ، طالبان یا لشکرِ جھنگوی کے قبضے میں نہیں۔؟ ہمارے ہمسائے میں شیعہ اکثریتی ملک ایران ہے۔ کیا ایران میں کوئی ایسا علاقہ ہے کہ جہاں اہلِ تشیع کے مسلح جتھے اہلِ سُنّت کو کھانا، غذا اور ادویات نہ پہنچنے دیتے ہوں اور اہلِ سُنّت کی مال بردار گاڑیوں کو لوٹ لیتے ہوں۔؟ یہ توجہ طلب نکتہ ہے کہ ہمارا یہی تفتان بارڈر جہاں پاکستانی مسافروں کو جی بھر کر ذہنی ٹارچر کیا جاتا ہے، وہیں ایرانی اسٹاف اپنے شہریوں کے ساتھ کتنے ادب و احترام کے ساتھ پیش آتا ہے۔؟ کیا ہم نے اپنے ہمسایہ ممالک سے کوئی اچھی چیز سیکھنے کے بجائے ہمیشہ نفرت، دشمنی، کینہ، منشیات اور اسلحہ ہی درآمد کرنا ہے۔؟

بالآخر یہ کس نے سوچنا ہے کہ کیوں سعودی عرب، ہندوستان اور ایران میں دیوبندی، وہابی اور شیعہ مسالک کے مراکز ہونے کے باوجود مسلح جتھے وہاں کبھی اس طرح نہ ہی مسافروں کو مارتے ہیں اور نہ ہی گاڑیوں کو لوٹتے ہیں اور نہ ہی جابجا مختلف علاقوں پر قبضہ جماتے ہیں۔؟ کیا ہم پاکستانی اتنے ہی بُرے ہیں کہ ہمیں ایک دوسرے کا خون پینے کی لت پڑ چکی ہے۔؟ کیا ہمیں اپنے ہاں کی مذہبی اقلیتوں نیز بلوچوں، پختونوں، سندھیوں اور پنجابیوں کو جہاد انڈسٹری کے ذریعے تلف کرنے، ختم کرنے اور انہیں صفحہ ہستی سے مٹانے کے بجائے ان کے روزگار، تعلیم اور فلاح و بہبود  کیلئے کچھ کرنے کا نہیں سوچنا چاہیئے۔؟ بات یہ نہیں کہ بلوچستان دہشت گردی کی زد میں ہے یا آئے روز بگن، مندروی،  ڈاڈ کمر چارخیل اور اوچت کے مقام پر مسافروں کو قتل کیا جاتا ہے اور مال بردار گاڑیوں کو لوٹ لیا جاتا ہے، بلکہ بات کچھ اور ہے۔ بات یہ ہے کہ اب بھارت کو بُرا بھلا کہنے سے یہ لوٹا ہوا مال، جاں بحق ہونے والے لوگ اور طالبان کے زیرِ قبضہ علاقے واپس نہیں آسکتے۔ ساری دنیا یہ تماشا دیکھ رہی ہے کہ ہم نے اب تک طالبان کے بجائے بے چارے افغان ماجرین کے گرد گھیرا تنگ کرنے کے سوا کچھ نہیں کیا۔

ان فرسودہ اور بوسیدہ پالیسیوں میں عوام کُشی، عوام دُشمنی اور ملکی بدحالی کے سوا کچھ نہیں۔ عوام افغانستان کے ہوں یا پاکستان کے دونوں طرف کے لوگ ہم سے نالاں ہیں۔ دونوں طرف کے لوگوں کو ناراض کرکے آخر مسلح جتھوں کو ہم کب تک پالتے رہیں گے۔؟ کیا ہے کوئی جو یہ سوچے کہ خیبر پختونخوا کی صوبائی حکومت کا اپنے دو وفد طالبان حکمرانوں کے ساتھ براہِ راست مذاکرات کیلئے بھیجنا دوسرے صوبوں اور ملکی سالمیت کیلئے کیا پیغام رکھتا ہے۔؟ وفد بھیجنے والوں کو یہ طے کرنا چاہیئے کہ ہمارے عوام کو تحفظ، روزگار، علاج، تعلیم اور عدل و انصاف کی ضرورت ہے یا  خودکُش دھماکوں، منشیات اور اسلحے کی۔؟ آج کے اس کالم میں اپنے پالیسی ساز اداروں سے ہمارا یہ تقاضا ہرگز نہیں ہے کہ مستقبل میں پیش آنے والی مشکلات کیلئے کوئی منصوبہ بندی کریں بلکہ ہماری تو دست بستہ گزارش یہ ہے کہ کم از کم اپنی آنکھوں کے سامنے موجودہ مشکلات اور موجودہ دشمنوں سے تو ملک اور عوام کو تحفظ دیں۔ کہیں پر بھی ریاستی رِٹ کے مذاق بن جانے کا مطلب یہ ہوتا ہے کہ یا تو حکمران عقل کے اندھے ہیں اور یا پھر عقل کے اندھوں کے ہاتھ میں حکومت آگئی ہے، باقی ہندوستان و طالبان۔۔۔ یہ سب کہانیاں ہیں۔