امریکہ، مسلمانوں پر سفری پابندیوں کا بل تنقید کی زد میں
اشاعت کی تاریخ: 19th, February 2025 GMT
سینیٹر کرس کونز نے اس اقدام کو غیر منصفانہ قرار دیتے ہوئے کہا کہ ٹرمپ کی پہلی مدت کے دوران نافذ کردہ مسلم بین نے امریکا کی عالمی ساکھ کو نقصان پہنچایا، اب جبکہ ٹرمپ دوبارہ اقتدار میں ہیں، وہ ایک بار پھر امیگریشن پالیسی کو خوف اور تعصب کی بنیاد پر چلا رہے ہیں۔ اسلام ٹائمز۔ کانگریس کی رکن جوڈی چو اور سینیٹر کرس کونز نے نیشنل اوریجن بیسڈ اینٹی ڈسکرمنیشن فار نان امیگرینٹس (NO BAN) ایکٹ کو دوبارہ متعارف کروا دیا ہے جو کسی بھی صدر کو مذہب کی بنیاد پر سفری پابندیاں لگانے سے روکنے کے لیے امیگریشن اینڈ نیشنلٹی ایکٹ کو مزید مضبوط بنائے گا۔ یہ بل اس بات کو یقینی بنائے گا کہ امریکا میں داخلے پر کسی بھی قسم کی پابندی صرف مخصوص اور مستند شواہد کی بنیاد پر عائد کی جائے اور اس میں کانگریس سے مناسب مشاورت بھی شامل ہو۔ صدر ڈونلڈ ٹرمپ نے اپنی دوسری مدت کے پہلے دن ایک ایگزیکٹیو آرڈر پر دستخط کیے تھے۔
اس کے تحت حکومت کو 60 دنوں کے اندر ان ممالک کی نشاندہی کرنی ہو گی جہاں امیگریشن اور اسکریننگ کے عمل میں سنگین خامیاں پائی جاتی ہیں۔ اس حکم نامے کے تحت ایک نئی سفری پابندی کے نفاذ کی راہ ہموار کی گئی ہے جو ممکنہ طور پر مسلم اکثریتی ممالک کے شہریوں کو نشانہ بنا سکتی ہے۔ ریپبلکن حکومت کے اس اقدام پر سخت ردِعمل کا اظہار کرتے ہوئے کانگریس کی رکن جوڈی چو نے کہا ہے کہ مسلم بین ہماری قوم کی تاریخ پر ایک بدنما داغ تھا، جو تعصب اور اسلاموفوبیا پر مبنی تھا اور اس نے لاتعداد خاندانوں کو ناقابلِ تلافی نقصان پہنچایا۔ انہوں نے کہا کہ صدر ٹرمپ نے اپنی مہم کے وعدے کو پورا کرتے ہوئے ایک بار پھر سفری پابندی لگانے کا اشارہ دیا ہے۔
ان کا کہنا ہے کہ ہم اس NO BAN ایکٹ کو دوبارہ متعارف کروا رہے ہیں تاکہ مستقبل میں کسی بھی صدر کو مذہب کی بنیاد پر پابندیاں لگانے سے روکا جا سکے۔ سینیٹر کرس کونز نے اس اقدام کو غیر منصفانہ قرار دیتے ہوئے کہا کہ ٹرمپ کی پہلی مدت کے دوران نافذ کردہ مسلم بین نے امریکا کی عالمی ساکھ کو نقصان پہنچایا، اب جبکہ ٹرمپ دوبارہ اقتدار میں ہیں، وہ ایک بار پھر امیگریشن پالیسی کو خوف اور تعصب کی بنیاد پر چلا رہے ہیں۔ انہوں نے کہا کہ نو بین ایکٹ کا نفاذ اب پہلے سے کہیں زیادہ ضروری ہے تاکہ کسی بھی انتظامیہ کو متعصبانہ پالیسیوں کے نفاذ سے روکا جا سکے۔
ایکٹ کے بنیادی نکات:
یہ بل جلد ہی امریکی کانگریس میں ووٹنگ کے لیے پیش کیا جائے گا اور اس کے حامی امید کر رہے ہیں کہ یہ جَلد قانون کی شکل اختیار کر لے تاکہ مستقبل میں کسی بھی صدر کو مذہب کی بنیاد پر سفری پابندیاں لگانے سے روکا جا سکے۔ یہ بل درج ذیل نکات پر مشتمل ہے:
1۔ امیگریشن اور نیشنلٹی ایکٹ میں مذہبی امتیاز کی ممانعت کو مزید واضح اور مضبوط بنانا۔
2۔ کسی بھی سفری پابندی کے لیے مستند اور واضح شواہد فراہم کرنا لازمی قرار دینا۔
3۔ کسی بھی نئی سفری پابندی کے نفاذ سے قبل کانگریس کو 48 گھنٹوں کے اندر مطلع کرنا اور اس پر نظرِ ثانی کی شرائط طے کرنا۔
4۔ کانگریس کی مسلمان ارکان، بشمول الہان عمر، رشیدہ طلیب، اور آندرے کارسن نے اس ’نو بین‘ بل کی بھرپور حمایت کی ہے۔
الہان عمر نے کہا ہے کہ بطور ایک ایسی رکنِ کانگریس جو ماضی میں مسلم بین کا براہِ راست نشانہ بننے والے ملک سے آئی ہو، میں جانتی ہوں کہ یہ پابندیاں صرف امیگرینٹس کے لیے نہیں بلکہ ان کے پورے خاندانوں کے لیے بھی تباہ کن ثابت ہوتی ہیں، NO BAN ایکٹ ایسے ظالمانہ احکامات کے نفاذ کو روکنے کے لیے ضروری ہے۔ رشیدہ طلیب نے تنبیہ کرتے ہوئے کہا کہ ٹرمپ ایک بار پھر اسلاموفوبیا کو ہوا دے کر مسلم بین کو بحال کرنے کی کوشش کر رہے ہیں، ہمیں اس امتیازی اور غیر انسانی پالیسی کے دوبارہ نفاذ کو روکنے کے لیے سخت اقدامات اٹھانے ہوں گے۔
دریں اثناء متعدد انسانی حقوق کے گروپس، بشمول ACLU، نیشنل امیگریشن لاء سینٹر، مسلم ایڈووکیٹس، اور ایمپاور چینج ایکشن فنڈ نے بھی NO BAN ایکٹ کی مکمل حمایت کا اعلان کیا ہے۔ ACLU کے ایک سینئر اہلکار ناؤرین شاہ نے کہا ہے کہ ہم نے پہلے بھی ٹرمپ کے مسلم بین کے خلاف قانونی جنگ لڑی اور اس بار بھی ہم کسی ظالمانہ سفری پابندی کے نفاذ کو ہر ممکن طریقے سے روکیں گے۔ یہ بل پہلی بار 2020ء میں کانگریس میں پیش کیا گیا تھا اور 2021ء میں ایوانِ نمائندگان سے منظور بھی ہو چکا ہے۔ اس وقت کی بائیڈن انتظامیہ نے اس کی حمایت کی تھی جبکہ اب نئی ٹرمپ انتظامیہ کی جانب سے مسلم بین کے دوبارہ نفاذ کی کوششوں کے پیشِ نظر اس قانون کی منظوری پہلے سے زیادہ اہمیت اختیار کر گئی ہے۔
ذریعہ: Islam Times
کلیدی لفظ: سفری پابندی کے کی بنیاد پر ایک بار پھر رہے ہیں کسی بھی کہ ٹرمپ کے نفاذ نے کہا کہا کہ اور اس کے لیے
پڑھیں:
ٹرمپ کا اصل ہدف کمزور قوموں کے معدنی ذخائر پہ قبضہ ہے، علامہ جواد نقوی
لاہور میں خطاب کرتے ہوئے ٹی بی یو ایم کے سربراہ کا کہنا تھا کہ پاکستان پہلے ہی چین کو اپنے معدنی ذخائر دے چکا ہے اور اب امریکہ بھی اسی فہرست میں شامل ہونے جا رہا ہے۔ اگر ہم نے ہوش کے ناخن نہ لیے، تو یہی خزانوں والے پہاڑ، جن سے ہماری آنیوالی نسلیں فائدہ اٹھا سکتی تھیں، عالمی طاقتوں کی ملکیت بن جائیں گے۔ یہ تجارتی جنگ، ٹیرف، اور دباؤ دراصل کمزور قوموں کو جھکانے، ان کے وسائل ہتھیانے، اور ان کی خودمختاری چھیننے کا نیا انداز ہے۔ اسلام ٹائمز۔ تحریک بیداری امت مصطفی کے سربراہ علامہ سید جواد نقوی کا لاہور میں تقریب سے خطاب میں کہنا تھا کہ امریکہ نے یوکرین کو جنگ میں الجھا کر اس کی زمین میں چھپی قیمتی معدنیات پر قبضے کی راہ ہموار کی، ویسے ہی اب امریکہ دیگر کمزور ممالک کی طرف بھی دیکھ رہا ہے۔ ٹرمپ کھل کر کہہ چکا ہے کہ دنیا کی سب سے قیمتی دھاتیں، یورینیم، اور معدنی ذخائر یوکرین میں ہیں۔ اب وہاں جنگ کے سائے میں، ان خزانوں پر قبضے کا کھیل کھیلا جا رہا ہے۔ انہوں نے کہا کہ اسی طرح پاکستان جیسے ممالک کی زمینیں، پہاڑ اور زمین دوز خزانے اب امریکہ کی آنکھوں کا نشانہ ہیں۔ ٹرمپ جانتا ہے کہ ان ممالک کی معیشتیں کمزور ہیں، قرضوں میں ڈوبی ہوئی ہیں، پابندیوں کی سکت نہیں رکھتیں۔ چنانچہ وہ پہلے تجارتی جنگ چھیڑتا ہے، ٹیرف لگاتا ہے، پھر دباؤ ڈال کر کہتا ہے "اپنے معدنی ذخائر ہمارے حوالے کرو، ہم پابندیاں ہٹا دیں گے۔" اور افسوس کی بات یہ ہے کہ ہمارے حکمران اس سودے کیلئے تیار دکھائی دیتے ہیں۔
انہوں نے کہا کہ پاکستان کے موجودہ وزیراعظم، جو دن رات اپنی محنت اور کوششوں کے گُن گاتے ہیں، میڈیا جن کی تعریف میں رطب اللسان ہے، وہ بھی اب کھل کر کہہ رہے ہیں کہ "ہم اپنے معدنی ذخائر کے ذریعے ملک کو قرضوں سے نکالیں گے۔" یہ بیان ایسے وقت میں دیا گیا ہے جب امریکی وفد پاکستان میں موجود ہے، مذاکرات ہو رہے ہیں، اور دباؤ کی فضا قائم ہے۔ یہ بیان بظاہر امید دلاتا ہے، مگر درحقیقت یہ قوم کی جڑوں کو مزید بیچنے کے مترادف ہے۔ انکا کہنا تھا کہ پاکستان پہلے ہی چین کو اپنے معدنی ذخائر دے چکا ہے اور اب امریکہ بھی اسی فہرست میں شامل ہونے جا رہا ہے۔ اگر ہم نے ہوش کے ناخن نہ لیے، تو یہی خزانوں والے پہاڑ، جن سے ہماری آنیوالی نسلیں فائدہ اٹھا سکتی تھیں، عالمی طاقتوں کی ملکیت بن جائیں گے۔ یہ تجارتی جنگ، ٹیرف، اور دباؤ دراصل کمزور قوموں کو جھکانے، ان کے وسائل ہتھیانے، اور ان کی خودمختاری چھیننے کا نیا انداز ہے۔
فوجی سرگرمیاں ریکارڈ ہونیکا خدشہ، برطانوی اراکین پارلیمنٹ اسرائیل سے ڈی پورٹ