تاجروں کے ساتھ نامناسب سلوک بند کیا جائے،ادریس چوہان
اشاعت کی تاریخ: 18th, February 2025 GMT
سینئر نائب صدر چیمبر ادریس چوہان آل حیدر آباد گروسری اینڈ جنرل اسٹور نمائندگان کے اجلاس سے خطاب کر رہے ہیں ، نائب صدرشان سہگل و دیگر موجود ہیں
حیدرآباد(اسٹاف رپورٹر) حیدرآباد چیمبر آف اسمال ٹریڈرز اینڈ اسمال انڈسٹری کے سیکرٹریٹ میں سینئر نائب صدر احمد ادریس چوہان کی زیر صدارت آل حیدرآباد گروسری اینڈ جنرل اسٹور نمائندگان کا ایک ہنگامی اجلاس منعقد ہوا، جس میں شہر بھر کے گروسری، ریٹیلرز اور جنرل اسٹورز مالکان نے شرکت کی۔ اجلاس میں تاجروں نے شدید احتجاج کرتے ہوئے اَفسران اور اُن کے نمائندوں کی جانب سے مارکیٹ میں ریٹ لسٹ چیکنگ کے دوران غیر مہذب رویے، دُکانوں کی سیلنگ اور چالان کی رقوم بینک کے بجائے نقد وصول کرنے جیسے اقدامات پر اپنے تحفظات کا اِظہار کیا۔ تاجروں کا کہنا تھا کہ ڈپٹی کمشنر آفس کی جانب سے قیمتوں کے تعین میں متعلقہ کاروباری نمائندگان کو شامل نہیں کیا جاتا جس کی وجہ سے غیر حقیقت پسندانہ ریٹ لسٹ جاری کی جاتی ہے۔ تاجروں نے مزید کہا کہ مارکیٹ میں کئی اشیاء کے نرخ روزانہ بلکہ بعض اوقات گھنٹوں کے حساب سے تبدیل ہوتے ہیں جبکہ ضلعی انتظامیہ دو ماہ پرانی ریٹ لسٹ پر عمل درآمد نہ کرنے کی بنیاد پر دُکانیں سیل اور بھاری چالان عائد کر رہی ہے۔ سینئر نائب صدر احمد ادریس چوہان نے تاجروں کے تحفظات سننے کے بعد کہا کہ حیدرآباد چیمبر آف اسمال ٹریڈرز اینڈ اسمال انڈسٹری ہمیشہ تاجروں کے مسائل کو اعلیٰ حکام تک پہنچاتا رہا ہے اور اُن کے حل کے لیے عملی اقدامات کیے ہیں۔ اُنہوں نے اعلان کیا کہ چیمبر نے شہر کے مختلف علاقوں سے تعلق رکھنے والے ہول سیلرز، ریٹیلرز، مارٹس اور جنرل اسٹورز کے نمائندگان پر مشتمل ایک کمیٹی تشکیل دی ہے جو چیمبر کے وفد کے ساتھ ڈپٹی کمشنر سے ملاقات کرے گی۔ اُس ملاقات میں رمضان المبارک کی ریٹ لسٹ جاری کرنے سے قبل تاجروں کے تمام تحفظات اور زمینی حقائق پر مبنی سفارشات پیش کی جائیں گی تاکہ رمضان کے دوران تاجروں اور انتظامیہ کے درمیان کسی بھی قسم کے تنازع سے بچا جاسکے۔ حیدرآباد چیمبر آف اسمال ٹریڈرز اینڈ اسمال انڈسٹری نے حکومت سے مطالبہ کیا کہ وہ مارکیٹ کی زمینی صورتحال کو مدِ نظر رکھتے ہوئے کاروباری برادری کے ساتھ مشاورت کرے اور تاجروں کے ساتھنا مناسب سلوک بند کیا جائے، تاکہ کاروباری سرگرمیوں کو متاثر ہونے سے بچایا جاسکے۔ اس اجلاس میں نائب صدر شان سہگل، سابق صدر محمد اکرم انصاری، سکندر علی راجپوت، محمد یاسین خلجی، محمد عمر عیدو، محمد اسلم انصاری، محمد رضوان انصاری، عرفان، فیصل پاریکھ، عبدالحفیظ، محمد عرفان میمن، شہروز، فاروق گلزار و دیگر نے شرکت کی۔
.ذریعہ: Jasarat News
کلیدی لفظ: تاجروں کے چیمبر ا ریٹ لسٹ
پڑھیں:
حکومت تاجروں سے واجب الادا ٹیکس وصول کرنے میں بری طرح ناکام
اسلام آباد (مانیٹرنگ ڈیسک) حکومت تاجروں اور ہول سیلرز سے واجب الادا ٹیکس وصول کرنے میں بری طرح ناکام ہوگئی۔ ذرائع کے مطابق تنخواہ دار طبقے کی انکم ٹیکس ادائیگیاں پچھلے سال اسی مدت کے ٹیکس سے 100 ارب روپے زاید رہیں، رواں مالی سال کے پہلے 7 ماہ میں سیلری کلاس نے 285 ارب ٹیکس جمع کرایا، سیلری کلاس نے گزشتہ مالی سال کے7 ماہ کے مقابلے میں 53 فیصد زاید ٹیکس دیا۔ذرائع نے کہا کہ سیلری کلاس نے ایف بی آر کی توقع سے 20 ارب سے زاید جمع کرایا، پچھلے مالی سال تنخواہ دار طبقے نے مجموعی طور پر 368 ارب روپے ٹیکس ادا کیا، آئی ایم ایف پروگرام کے تحت گزشتہ بجٹ میں سیلری کلاس پر 75 ارب اضافی بوجھ ڈالا گیا۔ذرائع کے مطابق نان کارپوریٹ سیکٹر ملازمین نے رواں سال 122 ارب ٹیکس ادا کیا، نان کارپوریٹ سیکٹر ملازمین نے گزشتہ سال سے 41 فیصد زاید ٹیکس دیا، نان کارپوریٹ سیکٹر ملازمین نے انکم ٹیکس کی مد میں 86 ارب ادا کیے، صوبائی حکومتوں کے ملازمین نے 48 ارب روپے ادا کیے۔ذرائع کا کہنا تھا کہ صوبائی حکومتوں کے ملازمین نے پچھلے سال سے 96 فیصد زاید ٹیکس ادا کیا، وفاقی حکومت کے ملازمین نے گزشتہ مالی سال کی نسبت 29 ارب روپے زاید ادا کیا، وفاقی حکومت کے ملازمین نے گزشتہ مالی سال کے مقابلے میں 63 فیصد زاید انکم ٹیکس دیا۔
جنگ بندی معاہدہ: حماس نے چٹھے مرحلے میں مزید 3 اسرائیلی یرغمالیوں کو رہا کردیا