Juraat:

دہشت گردہتھیار ڈال دیں ورنہ ریاست سے رحم کی توقع نہ کریں، آرمی چیف

اشاعت کی تاریخ: 17th, February 2025 GMT

 

فوج میں کوئی سندھی، بلوچی،پنجابی یا پٹھان نہیں ، پاکستانی ہیںگمراہ گروہ کو یہ اجازت نہیں ہے کہ اپنی اقدار ہمارے ملک پر مسلط کرے،ہم فتنہ الخوارج کے فسادیوں سے لڑ رہے ہیں

فسادی ٹولہ فتنہ الخوارج اسلام سے نابلد اور قطعی طور پر خارجی ہیں،اسلام کی غلط تشریح اور دینی تعلیمات کی خلاف ورزی کر رہے ہیں،جنرل عاصم منیر کی طلبہ سے خصوصی گفتگو کا کلپ وائرل

آرمی چیف جنرل سید عاصم منیر نے دو ٹوک الفاظ میں واضح کیا کہ فسادی ٹولہ فتنہ الخوارج اسلام سے نابلد اور قطعی طور پر خارجی ہیں۔آرمی چیف جنرل سید عاصم منیر کی طلبہ سے خصوصی گفتگو کلپ کی صورت میں سوشل میڈیا پر نظر آئی ہے جس میں آرمی چیف نے نئی نسل کو مخاطب کرتے ہوئے نہایت جامع، مدلل اور معنی خیز انداز میں اپنا نقطہ نظر واضح کیا ہے۔طلبہ سے خطاب کرتے ہوئے آرمی چیف نے کہا کہ ریاست کے سامنے اپنے ہتھیار پھینک دیں پھر وہ ریاست سے رحم کی توقع کرسکتے ہیں لیکن گمراہ گروہ کو یہ اجازت نہیں ہے کہ اپنی اقدار ہمارے ملک پر مسلط کرے۔آرمی چیف نے کہا کہ ہم فتنہ الخوارج کے فسادیوں سے لڑ رہے ہیں، یہ خارجی عناصر اسلام کی غلط تشریح اور اسلامی تعلیمات کی خلاف ورزی کر رہے ہیں، ہم کامریڈز کی طرح لڑتے ہیں اور فوج کا یہی تو مزہ ہے کہ کوئی سندھی، بلوچی، پنجابی پٹھان نہیں بلکہ ہم سب پاکستانی ہیں۔خطاب میں آرمی چیف نے کہا کہ نوجوانوں سے گفتگو ہمیشہ میرے لیے انتہائی خوشی کی حامل ہوتی ہے اور جب تک قوم خصوصا ہمارے نوجوان فوج کے پیچھے ہیں تب تک پاک فوج کبھی نہیں ہارے گی۔قرآن مجید کی آیات کے کچھ حوالے دیتے ہوئے آرمی چیف نے اس موقف کو مزید واضح کیا کہ فتنہ الخوارج کے حوالے سے قرآن مجید میں واضح احکامات اور سزائیں متعین ہیں۔فتنہ الخوارج کے حوالے سے آرمی چیف نے کہا کہ قرآن میں واضح کہا گیا ہے کہ اللہ اور اس کے رسول سے جو جنگ کرتے ہیں، اور زمین پر فساد برپا کرتے ہیں، ان کی سزا یہ ہے کہ انہیں قتل کر دو، پھانسی پر لٹکا دو یا ان کے ہاتھ ہاں مختلف سمتوں سے کاٹ دو، یا پھر اپنی زمین سے انہیں دربدر کر دو۔ دنیا میں ان کے لیے یہ سزا ہے جبکہ آخرت میں دردناک عذاب دیا جائے گا۔آرمی چیف نے کہا کہ قرآن میں بتایا گیا ہے جو عذاب سے بچنا چاہتے ہیں وہ اپنے ہتھیار پھینک دیں یا سرخم تسلیم کرلیں تو پھر اللہ بڑا غفور و رحیم ہے، اس طرح ریاست سے بھی رحم کی توقع کرسکتے ہیں۔خواتین کے حوالے سے آرمی چیف نے واضح کیا کہ اسلام نے عورت کو آسمان تک پہنچایا اور اس کو عزت دی ہے، چاہے وہ ماں ہو یا بیوی ہو یا بہن لیکن آج تم کون ہو اسے چھیننے والے یا تمھیں یہ اختیار کس نے دیا ہے، اسے کوئی نہیں چھین سکتا۔خطاب میں آرمی چیف کا فتنہ الخوارج اور افغانستان میں ان کی سہولت کاری کے بارے میں دلیرانہ موقف ہر لحاظ سے اسلامی احکامات اور پاکستان کے مفادات اور نظریات کی عکاسی کرتا ہے۔

.

ذریعہ: Juraat

پڑھیں:

مطالعہ کیوں اورکیسے کریں؟

انسانی زندگی کے ہر دور میں کتاب اور اس کے مطالعے کو ہمیشہ بلند مقام حاصل رہا ہے لیکن موجودہ دور میں مطالعے کا شوق اب خطرناک حد تک زوال پذیر ہے۔ طالب علموں نے صرف نصابی ضروریات کی تکمیل اور امتحانات پاس کرنے کی حد تک خود کو محدود کر لیا ہے وہ نصابی کتب کے علاوہ کچھ پڑھنے پر راضی نہیں، ایسے حالات میں ضروری ہو جاتا ہے کہ طالب علموں پر مطالعے کی اہمیت واضح کی جائے۔

ان پر واضح کیا جائے کہ انسان کے مزاج اور اس کی شخصیت کو متوازن رکھنے میں بہت سے عوامل کلیدی کردار ادا کرتے ہیں مگر سب سے بڑا اور فیصلہ کن کردار مطالعے کا ہوتا ہے۔ منظم مطالعہ انسانی فکر کو پختہ اور گفتگو کو پُر دلیل بنا دیتا ہے مطالعہ فکر اور نظر کو وسعت عطا کرتا ہے۔ اس سے خیالات میں بلندی اور سوچ میں معاملہ فہمی پیدا ہوتی ہے۔ اس طرح مطالعہ انسانی شخصیت کی تعمیر میں غیر معمولی کردار ادا کرتا ہے۔

مطالعے کے ضمن میں طلبا کو ایک مشکل پیش آتی ہے وہ یہ ہے کہ زندگی محدود ہے، علم لامحدود، اس لیے یہ ممکن نہیں کہ انسان اپنی زندگی میں سب کچھ پڑھ ڈالے۔ سوال یہ ہے کہ ایسی صورت میں طالب علم کیا راہ اختیار کرے۔

اس ضمن میں یاد رکھیں کہ کوئی علم بھی اپنی افادیت کے حوالے سے خالی نہیں مثلاً مذہب انسانی تخلیق کا راز بتاتا ہے اور انسان کو زندگی کا صحیح فلسفہ حیات دیتا ہے اور انسان کو فکری انتشار سے محفوظ کرکے اس کی زندگی کو معنی عطا کرتا ہے۔ اس لیے مذہب کی اہمیت اپنی جگہ مسلمہ ہے اس کی اہمیت سے کوئی ذی شعور شخص انکار نہیں کر سکتا۔

تاریخ کا مطالعہ بھی اپنی جگہ اہمیت کا حامل ہے، تاریخ واقعات کا مجموعہ ہوتی ہے۔ واقعات کے رونما ہونے میں سیاسی، معاشی، سماجی اور فکری اسباب پوشیدہ ہوتے ہیں اسی کو سمجھنے کا نام تاریخ ہے اس کے مطالعے سے ہمیں تاریخی شعور حاصل ہوتا ہے اس شعور کی بدولت ہم بحرانوں کا تجزیہ کرکے اس کی اصل وجوہات کی تہہ تک پہنچنے کے قابل ہو جاتے ہیں اور اس کے حل کی صلاحیت حاصل کر لیتے ہیں بشرط یہ کہ ہم نے تاریخ کا مطالعہ تعصب کی عینک اتار کر اور آزادی فکر کے ساتھ مطالعہ کیا ہو۔

نفسیات میں انسان کی ذہنی کیفیت، طرز عمل اور کردار کا مطالعہ کیا جاتا ہے۔ اس کی مدد سے ہمیں فرد اور اس کے طرز عمل کو سمجھنے میں مدد ملتی ہے جس طرح نفسیات میں فرد کے انفرادی طرز عمل کا مطالعہ کیا جاتا ہے بالکل اسی طرح عمرانیات (سماجیات) میں افراد یعنی معاشرے اور سماج کے اجتماعی طرز عمل اور رویے کا مطالعہ کیا جاتا ہے معاشرے یا سماج کو کس طرح اصول اور قوانین کے تحت ضابطے میں لایا جاتا ہے اس مطالعے کا نام سیاست ہے۔ نفسیات، عمرانیات اور سیاست کے مطالعے کے نتیجے میں ہمیں سماجی اور سیاسی شعور حاصل ہوتا ہے۔ اس لیے ان مضامین کے مطالعے کی اہمیت سے انکار ممکن نہیں۔

فلسفہ ہمیں بتاتا ہے کہ ہمیں کس طرح سوچنا چاہیے ادب احساس کی قوت کو جگاتا ہے۔ یہ مذہب کی طرح انسان سے برائے راست مخاطب نہیں ہوتا بلکہ غیر محسوس انداز میں آنکھوں اور کانوں کے راستے آپ کے دل و دماغ میں اتر کر آپ کے زاویہ نگاہ کو بدل دیتا ہے اس سے آپ کو زندگی گزارنے کا سلیقہ حاصل ہوتا ہے۔

فنون لطیفہ مثلاً مجسمہ سازی، رقص، موسیقی اور مصوری وغیرہ ہمارے خیالات اور جذبات کو خوبصورت بناتے ہیں۔ یہ خوب صورت خیالات اور جذبات ہماری خوبصورت زندگی کے ضامن ہوتے ہیں، اس لیے ادب اور فنون لطیفہ کا مطالعہ اپنی جگہ ایک خاص اہمیت رکھتا ہے۔

اب سوال یہ ہے ہر علم اپنی جگہ اپنی ایک افادیت رکھتا ہے کسی کو نظرانداز نہیں کیا جاسکتا تو ایسی صورت حال میں کس علم کو مطالعے کے حوالے سے خصوصی حیثیت دی جائے۔میری ذاتی رائے میں ہر موضوع پر تعارفی کتب کے طور پر واجبی معلومات لازمی حاصل کر لیں تاکہ زندگی کے تمام پہلوؤں سے ضروری آگاہی حاصل ہو جائے جہاں تک خصوصی مطالعے کا تعلق ہے اس ضمن میں اسی علم کا انتخاب کیا جائے جس میں آپ کا رجحان اور دلچسپی ہو۔ کتابوں کے انتخاب میں ہمیشہ احتیاط کی ضرورت پڑتی ہے۔ خام ذہن کے لیے بغیر سوچے سمجھے ہر طرح کی کتابوں کا مطالعہ فائدے کے بجائے نقصان کا باعث بن سکتا ہے۔ اس حوالے سے چند باتوں کا خیال رکھنا ضروری ہے۔

اکثر طالب علم مطالعہ کرنے کے لیے صحیح کتابوں کا انتخاب نہیں کرتے وہ ابتدا میں دقیق اور خشک موضوعات چنتے ہیں نتیجے میں وہ ابتدا میں ہی عدم دلچسپی کا شکار ہو کر مطالعے کے شوق سے دست بردار ہو جاتے ہیں۔ اس لیے ضروری ہے کہ مطالعے کے وقت کتب کی درجہ بندی کر لی جائے۔ ابتدا میں ابتدائی کتب کا مطالعہ کریں اوپر درجے کی وہ کتابیں جو ایک مدت بعد سمجھ میں آسکتی ہیں انھیں ابتدائی کتب کے مطالعے کے بعد زیر مطالعہ لیا جائے۔

ہر انسان کا کسی بھی چیز کو دیکھنے کا اپنا ایک زاویہ نگاہ ہوتا ہے۔ ہمارے یہاں بیشتر لکھنے والے جب کسی موضوعات بالخصوص کسی سیاسی موضوع پر لکھتے ہیں۔تو عموماً تصویر کا ایک رخ پیش کرتے ہیں تصویر کا دوسرا رخ نظرانداز کر دیتے ہیں وہ سمجھتے ہیں کہ تصویر کا دوسرا رخ پیش کرنے سے ان کا موقف کمزور ہو جائے گا۔

یہ بات درست نہیں ہے میری ذاتی رائے میں تصویر کا دوسرا رخ پیش کرنے سے تحریر نہ صرف دلکش ہو جاتی ہے بلکہ پراثر بھی اس لیے پڑھنے والوں کو ایسی کتابوں کا انتخاب کرنا چاہیے جس کے لکھنے والے متوازن سوچ کے حامل ہوں۔ انتہا پسندانہ تحریر کے مطالعے کے نتیجے میں انسان نہ صرف تنگ نظر ہو جاتا ہے بلکہ مطالعے کی افادیت سے بھی محروم ہو جاتا ہے۔ لسانی تعصبات اور فرقہ واریت پر مبنی کتب کے مطالعے سے گریز ضروری ہے ایسی کتب کے مطالعے سے انسان میں منفی جذبات جنم لیتے ہیں اور انسان ایسی چمگادڑ بن جاتا ہے جسے روشنی میں بھی اندھیرا دکھائی دیتا ہے۔

انسان کی ترجیحات میں اس کے معاشی سماجی اور مذہبی فرائض کی ادائیگی کو اولین حیثیت حاصل ہے اس لیے مطالعے کے لیے اپنا مناسب وقت مقرر کریں اس میں اتنا غرق نہ ہوں کہ زندگی کے باقی امور متاثر ہوں ان سب میں توازن ضروری ہے۔