قومی اسمبلی میں گزشتہ روز بدترین غربت مہنگائی اور بیروزگاری کے شکار عوام کے مفادات یا حقوق پر ایک اور ڈاکہ ڈالا گیا ھے , ایک اور بل کی منظوری دی گئی ہے جس کے مطابق ارکان پارلیمینٹ کی تنخواہوں میں مزید اضافہ کر دیا گیا ہے، ایک رْکن پارلیمینٹ کی تنخواہ دو لاکھ اٹھارہ ہزار روپے سے بڑھا کر اب پانچ لاکھ اْنیس ہزار کر دی گئی ہے ، یہ بل سینٹ سے شاید پہلے ہی منظورہو چکا ہے ، کام کا کوئی کام نہ کرنے کے لئے ارکان پارلیمینٹ کی تنخواہیں اب بھی کم ہیں ، پاکستان میں فارغ رہنے کی تنخواہ لاکھوں میں نہیں کروڑوں میں ہونی چاہئے، ارکان پارلیمینٹ کی تنخواہوں میں حالیہ اضافے کے بعد سرکاری محکموں میں جتنے او ایس ڈی ہیں اْن سب کا اب یہ حق بن گیا ہے وہ بھی سرکار سے یہ مطالبہ کریں ‘‘ہم بھی فارغ بیٹھے ہیں ہماری تنخواہوں میں بھی فوری اضافہ کیا جائے ’’ ارکان پارلیمنٹ نے جس طرح عدلیہ کی آزادی سلب کرنے کی چھبیسویں آئینی یا آہنی ترمیم کی منظوری دی اْس کے صلے یا بدلے میں اْن کا بھی واقعی یہ حق بنتا تھا اْن کی تنخواہوں میں تھوک کے حساب سے اضافہ کیا جائے جو کہ کر دیا گیا ہے ، وہ اگر اپنی تنخواہوں میں مزید اضافہ چاہتے ہیں سرکار کو مجبور کریں ایسی ترامیم پارلیمینٹ میں لاتی رہا کرے جس سے مْلک کے اصل مالکان کو فائدے پہنچتے رہیں ، ایسی صورت میں مْلک کے اصل مالکان کو ارکان پارلیمینٹ کی تنخواہوں میں لاکھوں کیا کروڑوں کے اضافے پر بھی کوئی اعتراض نہیں ہوگا ، پی ٹی آئی کے کچھ ارکان اسمبلی نے اس بل کی اسی طرح کمزور مخالفت کی جس طرح چھبیسویں آئینی ترمیم کی کمزور مخالفت کر کے گونگلوؤں سے اْنہوں نے مٹی جھاڑی تھی ، اس چھبیسویں آئینی یا آہنی ترمیم کے ثمرات سے موجودہ سیاسی حکمران تو ظاہر ہے فیض یاب ہوہی رہے ہیں ، آنے والی حکومتیں بھی اسی طرح فیض یاب ہوتی رہیں گی چاہے وہ عمران خان کی حکومت ہی کیوں نہ ہو ، ہمارے اکثر سیاستدانوں کو عدلیہ کی آزادی کی باتیں اْس وقت اچھی لگتی ہیں جب وہ اپوزیشن میں ہوتے ہیں ، حکمران بن کر عدلیہ کی صرف وہی آزادی اْنہیں اچھی لگتی ہے جس کے مطابق تمام فیصلے اْن کے حق میں ہوں ، صحافت کی آزادی کا معاملہ بھی اسی طرح کا ہے ، اس آزادی کے مروڑ بھی اْن کے پاپی پیٹوں میں صرف اْس وقت اْٹھتے ہیں جب وہ اپوزیشن میں ہوتے ہیں، جیسے ہی وہ حکمران بنتے ہیں صحافت کی بھی صرف وہی آزادی اْنہیں اچھی لگتی ہے جس میں اْن کے ہر بْرے کام کی اچھی طرح ستائش کی جائے ، کرپشن کی طرح منافقت بھی ہمارے رویوں میں اس قدر سرایت کر چکی ہے پورا معاشرہ اس کی لپیٹ میں ہے ، ارکان پارلیمینٹ کی تنخواہوں میں اضافے کا بل بھی پی ٹی آئی کی اسی منافقت کے نتیجے میں آسانی سے منظور کر لیا گیا ، اس منافقت کو قومی اسمبلی کے سپیکر ایاز صادق اور وفاقی وزیر قانون اعظم نذیر تارڑ نے بْری طرح ایکسپوز کر دیا ، اْنہوں نے اس موقع پر احتجاج کرتے اور شور مچاتے پی ٹی آئی کے ارکان اسمبلی سے کہا ‘‘جو بڑھی ہوئی تنخواہ نہیں لینا چاہتا وہ لکھ کر دے اْس کی تنخواہ نہیں بڑھائیں گے ’’ ، پی ٹی آئی کا ایک رْکن اسمبلی ایسا نہیں تھا جس نے کاغذ پر چند انکاری لائنیں لکھ کر وہ کاغذ سپیکر یا وزیر قانون کے منہ پر ماراہو ، اس سے ظاہر ہوگیا کئی اور معاملات کی طرح منافقت میں بھی پی ٹی آئی موجودہ حکمرانوں کے کاندھے سے کاندھا جوڑ کے کھڑی ہے ، پاکستان میں آتا ہوا مال چاہے کسی ذریعے سے آرہا ہو کسے اچھا نہیں لگتا ؟ البتہ پلے سے ایک پائی بھی جارہی ہو اْس کی تکلیف ناقابل برداشت ہوتی ہے ، ایک رْکن اسمبلی سے میں نے پوچھا ‘‘آپ کے پاس سو مربع زمین ہو آدھی زمین آپ اللہ کی راہ میں دے دیں گے ؟ وہ بولے ‘‘بالکل دے دیں گے ’’ ، میں نے پوچھا ‘‘آپ کے پاس دو ہوائی جہاز ہوں ایک اللہ کی راہ میں دے دیں گے ’’ ، وہ بولے ‘‘بالکل دے دیں گے ’’ ، میں نے پوچھا ‘‘اگر آپ کی تنخواہ میں سو گنا اضافہ ہو جائے آپ آدھی تنخواہ اللہ کی راہ میں دے دیں گے ؟’’ ،وہ بولے ‘‘بالکل نہیں دیں گے ’’ ، میں حیران ہوا ، میں نے پوچھا ‘‘جب آپ سو مربع زمین اللہ کی راہ میں دے سکتے ہیں ، ایک جہاز اللہ کی راہ میں دے سکتے ہیں ، تو بڑھی ہوئی آدھی تنخواہ اللہ کی راہ میں کیوں نہیں دے سکتے ؟ وہ بولے دو سو مربع زمین اور دوہوائی جہاز تو میرے پاس ہیں نہیں جنہیں میں اللہ کی راہ میں دْوں جبکہ تنخواہ تو مجھے پتہ ہے میری بڑھ جانی ہے وہ میں اللہ کی راہ میں کیوں دْوں گا جی ؟ ،میں اکثر سوچتا ہوں رتی بھر شرم و حیا بھی ہمارے حکمرانوں میں نہیں رہی ، وہ شخص تو بالکل ہی بے شرم ہوگیا ہے جو کہتا تھا اپنے کپڑے بیچ کر غریبوں کو روٹی دے گا ، اب غریبوں سے روٹی چھین کر اپنے مزید کپڑے شاید وہ بنا رہا ہے ، زرداری کو سڑکوں پر گھسیٹنے سے لے کر اپنے کپڑے بیچ کر غریبوں کو روٹی دینے تک کا ہر دعویٰ غلط ثابت ہوا ،ایک طرف عوام بھوک اور بیماریوں سے مر رہے ہیں ، سرکاری ہسپتالوں میں کام کا علاج ہے نہ دوائیں ہیں ، کاروبار تباہ ہو رہے ہیں ، بیروزگاری کا عالم یہ ہے کسی محکمے میں دو خالی سیٹوں کا اعلان ہوتا ہے اْس پر ہزاروں لاکھوں بیروزگار اپنی درخواستیں جمع کراتے ہیں ، اور یہ خدشہ الگ سے اْن بیچاروں کو لگا رہتا ہے سفارش و رشوت آگے نکل جائے گی ٹیلنٹ پیچھے رہ جائے گا ، سڑکوں پر گداگروں کی تعداد اس قدر بڑھتی جا رہی ہے یوں محسوس ہوتا ہے پاکستان گداگروں کے لئے اب سب سے محفوظ مقام ہے ، ان حالات میں امیر کبیر ارکان پارلیمینٹ کی تنخواہوں میں اضافہ انتہائی تکلیف دہ ہے ، ارکان پارلیمنٹ کی اکثریت کے پاس اندرون و بیرون مْلک اتنا مال و زر ہے اتنی جائیدادیں ہیں اْنہیں تنخواہیں نہ بھی ملیں اْنہیں کوئی فرق نہیں پڑے گا ، مگر لالچ اورہوس اکثر سیاستدانوں کی اب بنیادی شناخت ہیں ، یہ شناخت ان سے چھن جائے ان کا کچھ نہیں بچنا ، مجھے یقین ہے ارکان پارلیمینٹ کی تنخواہیں بڑھنے کے بعد ممبران صوبائی اسمبلیوں کی تنخواہیں بھی اب مزید بڑھیں گی ، پنجاب اس معاملے بھی شاید بازی لے جائے ، جیسے پنجاب اپنے سرکاری ملازمین کے حقوق سلب کرنے میں بازی لے گیا ہے ، سرکاری ملازمین کو ریٹائرمنٹ پر ملنے والی رقم اور پینشن میں صرف پنجاب میں کمی ہوئی ہے ، وزیراعلیٰ پنجاب مریم نواز شریف اگر سرکاری ملازمین کو ‘‘بھیڑ بکریاں’’ نہیں سمجھتیں ، اْن کے دل میں سرکاری ملازمین کے لئے واقعی کوئی رحم یا نرم گوشہ ہے اْنہیں ریٹائرڈ ہونے والے سرکاری ملازمین کے حقوق پر اْس ڈاکہ زنی کا فوراً نوٹس لینا چاہئے جو صرف پنجاب میںہوئی ہے۔
.ذریعہ: Nai Baat
کلیدی لفظ: ارکان پارلیمینٹ کی تنخواہوں میں اللہ کی راہ میں دے سرکاری ملازمین پی ٹی ا ئی دے دیں گے ا نہیں گیا ہے
پڑھیں:
اس کا حل کیا ہے؟
’’ابھی میں کسی سے سن رہا تھا کہ کراچی میں ایک دن کی ہڑتال سے پتا نہیں کتنے ارب روپے میرے ذہن سے تعداد نکل گئی، نقصان ہوا۔ تو آپ مجھے بتائیے کہ فلسطین کے لیے اس طرح کی ہڑتال کرنے کا فائدہ کسے ہوا، کسی کو نہیں ہوا بلکہ آپ کو الٹا نقصان ہی ہوا ہے۔‘‘
’’بالکل درست فرمایا، اس طرح تو بھئی! ہماری قوم ہی کا نقصان ہوا ہے، میں تو کہتی ہوں کہ اس سے بہتر یہ تھا کہ آپ کام کرتے اور ایک دن کی کمائی جو بھی بنتی وہ ان کو پہنچا دی جاتی تو کم ازکم ان کا بھلا تو ہوتا۔‘‘
’’میں کہتا ہوں کہ اگر ہم صرف یہاں چند ایک لائن کی دکانوں سے بھی جمع کرتے تو کم از کم پچیس لاکھ تو جمع ہو جاتے اور اس طرح صرف اس علاقے سے کم از کم ایک کروڑ اور تخمینہ لگائیں تو اور بھی بلکہ کروڑوں روپے جمع ہو سکتے تھے کم از کم ان فلسطینیوں کے لیے جو پانی کی قلت کا شکار ہیں کچھ تو بھلا ہو سکتا تھا لیکن نہیں، الٹا اپنا نقصان کر دیا۔ یہ کام دراصل کسی اور کا ہے اور کر عوام رہے ہیں۔‘‘
’’ان کی پروڈکٹس خریدنا بند کردیں یہ تو کر سکتے ہیں بھئی۔‘‘
’’دیکھیں ان کی پروڈکٹس جو امپورٹ ہوتی ہیں وہ چلیں بائیکاٹ کی بات سمجھ آتی ہے، پر وہ جو کہتے ہیں ان کی یہ اشیا نہ کھاؤ، وہ نہ کھاؤ۔ تو ایک بات سمجھ لیں کہ یہ ان کی فرنچائز ہیں، یہ ان کی ملکیت نہیں ہے، یہ دراصل ان کی بنی بنائی مشہور پروڈکٹس کا نام جو آپ کے ملک میں خریدے گئے یہ آپ کے اپنے پاکستانی بھائیوں کی ہیں بلکہ پہلے تو ان فرنچائز میں چیزیں امپورٹ ہو کر آتی تھیں لیکن اب سب کچھ یہاں پاکستان میں بنتا ہے۔
وہ لوگ تو اپنا نام بیچتے ہیں کہ جی آپ یہاں کتنی فرنچائز کھول سکتے ہیں، لیکن ہمارے یہاں تاثر یہ ہے کہ اس طرح ہم اسرائیل کو نقصان پہنچائیں گے، درحقیقت نقصان تو ہمارا بھی ہے ناں، یہاں ہمارے کتنے لوگ کام کرتے ہیں، وہاں نقصان تو ہمارا بھی ہوا ہے، لوگوں کی تنخواہیں کیسے نکالیں گے۔۔۔ ان کا کیا فائدہ؟‘‘
’’نہیں، نقصان تو ہو سکتا ہے ناں، پیسے تو ان تک پہنچتے ہی ہیں اور ہو سکتا ہے کہ لوگ پھر کام ہی بند کردیں، اس طرح اسرائیل کو تو نقصان ہوا ناں۔‘‘
اسرائیل کی فلسطینی عوام پر دوبارہ بمباری نے دنیا کی آزمائش شروع کر دی ہے، کون کیا سوچتا ہے؟ کیا کرنا چاہتا ہے؟ اور کس کے حق میں ہے۔ دو واضح پلیٹ فارم ہیں ایک مضبوط، بظاہر طاقتور اور اتحادیوں کے نرغے میں جب کہ دوسرا شکستہ، زبوں حال، خون سے رنگا۔ ایک ظالم ہے اور ایک مظلوم کہ آج کی دنیا لاکھوں سال پہلے پتھر کے دور میں پہنچ چکی ہے۔ ایسا وقت جب انسانوں کے دل بھی شاید پتھر کے تھے اور آج بھی ایسا ہی ہے۔
بڑے بڑے طاقتور اور انصاف کے علم بردار آج فرعون کے ساتھ ہیں۔ فرعون سے خوب یاد آیا کہ اس مغرور اور ظالم و جابر کی بھی بس ہوگئی تھی، اس کا وقت مقرر تھا اور اس مدت تک پہنچنے کے لیے تو تماشا خون و آگ کا تو ظالموں کے لیے چلتا ہی رہے گا۔
ادھر ٹرمپ اسرائیلی وزیر اعظم سے ملنے کے پروگرام بناتے ہیں اور وہاں غزہ میں ان زخمیوں کے کیمپوں پر حملے کیے گئے جنھیں عارضی طور پر اسپتالوں کے باہر قائم کیا گیا تھا۔ اسرائیلی فوجی دعوے کرتے ہیں کہ وہ شہریوں کو نقصان پہنچانے سے گریز کرتے ہیں لیکن منظر عام پر ان کی وحشت میں ڈوبی وڈیوز آ چکی ہیں جو مسلمانوں کی نفرت میں اس قدر بڑھ چکی ہے کہ وہ دیوانوں کی مانند مظلوم فلسطینیوں کے ساتھ وحشیانہ سلوک کر رہے تھے جب کہ وہ نہ صرف خیموں میں قائم عارضی کیمپوں پر بلکہ گھروں پر بھی حملے کر رہے ہیں۔
دو سو اکیاون اسرائیلی شہریوں کے عوض جو دہشت گردی اور بربریت کا بازار غزہ میں بپا کیا گیا ہے،کیا اسے انصاف کی عالمی عدالت میں چیلنج کیا جاسکتا ہے،کیا نیتن یاہو کا مظلوم فلسطینیوں کی رضاکارانہ ہجرت کا پلان مکمل ہو سکتا ہے،کیا واقعی بچے کچھے فلسطینی دنیا کے دوسرے ممالک میں منتقل ہو جائیں گے؟
یہ حقیقت ہے کہ فلسطین کی سنہری انبیا کی زمین پر قبضے کا خواب تو دیکھنے والے کب سے دیکھ رہے ہیں لیکن 19 جنوری کو طے کیا جانے والا جنگ بندی کا وہ معاہدہ جس کے ثالث امریکا، قطر اور مصر تھے گو اس کے مراحل تو تین تھے پر وہ سب تین تیرہ ہوکر رہ گئے۔
کیا جنگ بندی کے بعد تھکے ہارے اپنوں کے دکھوں میں کھوئے جنگ ختم کی فلم چلا دینے سے اصل مقصد کیا تھا؟ باقی ماندہ مظلوموں کو بھی ٹھکانے لگانا یا کچھ اور؟ یہ بھی تو کسی منصوبے کا حصہ ہو سکتا ہے لیکن اس پوری حقیقت کا سرا کس کے ہاتھ میں ہے کہ اب ڈونلڈ ٹرمپ تو اسرائیل کی پارٹی کا مضبوط حصہ بن چکے ہیں۔
پھر دنیا کے ٹھیکے داران اب کیا کر سکتے ہیں، منصوبہ کیا ہے، اس کے اصل مقاصد سے کون کون واقف ہے، کون کون اس منصوبے کا حصہ ہے؟ وائرل وڈیوز میں مظلوموں پر ظلم کرنے والوں کی وردیوں پر اتحادیوں کے جھنڈوں کے نشانات واضح ہیں۔ ایک کھلا جرم جو سینہ تان کر کیا گیا۔ پاکستان ایٹمی طاقت کا مالک مختلف مسائل میں گھرا اپنوں سے ڈسا فلسطین کے مسئلے کو کس نظر سے دیکھ رہا ہے یا آزمائش کے مراحل میں ہے۔ہمارا مذہب ہمیں سکھاتا ہے کہ:
’’ہر شخص اپنے عمل کے ساتھ وابستہ ہے۔‘‘
سورۃ الطور کی آیت نمبر اکیس میں یہی بیان کیا جا رہا ہے۔ اللہ تعالیٰ مسلمانوں کو ان کی عطا کردہ صلاحیتوں سے کام لینے کی تلقین کرتا ہے اور النفس و آفاق کی آیات پر غور و فکر کی دعوت دیتا ہے۔ وہ کہتا ہے کہ انسان کو عقل دی گئی ہے لیکن وہ غور و فکر سے کام نہیں لیتا، رب العزت نے عمل اور سعی کو بہت اہمیت دی ہے۔
انسان کا عمل ہی اسے ترقی کی جانب لے جاتا ہے لیکن ہم تنزلی کی جانب جا رہے ہیں۔ ہمارے پاس عقل و شعور تو ہے لیکن نفسانی خواہشات نے بحیثیت قوم ہمیں گھٹنوں پر بٹھا دیا ہے، ہمیں خوف ہے کہ اگر ہم کسی بھی سپر پاورکے خلاف ری ایکٹ کرتے ہیں تو پکڑے جائیں گے بالکل ایسا ہی دیگر مسلم طاقت بھی سوچ رہی ہیں۔
بہت ساری عداوتیں کمزوری کو جنم دیتی ہیں اور یہ کمزوری ہمارے تعصب، اقربا پروری اور نفس کی کمزوری جیسی بیماریاں ابھارتی ہے۔ امت مسلمہ ان بیماریوں میں ڈوب چکی ہے۔ ہماری تقدیر کا فیصلہ کاتب نے لکھ دیا ہے۔ جیت، ہار یا بے عزتی اور شرمندگی اب ہم کس جانب بہتے چلے جاتے ہیں کون جانے۔عالمی عدالت نے تو اسرائیل کو غیر قانونی ریاست قرار دے دیا ہے جس کے مطابق دنیا بھر میں اسرائیل کو ایک خود مختار قوم کے طور پر تسلیم نہیں کرنا چاہیے لیکن اس عدالت کے فیصلے پر عمل ہو سکتا ہے یا نہیں یا یہ بھی جنگ بندی کے معاملے کی مانند اوپر سے میٹھا اور اندر سے کڑوا ہو، پر ہم اپنے رب پر یقین رکھتے ہیں کہ مایوسی کفر ہے۔
ڈاکٹرز کا صدرآصف علی زرداری کو مزید ایک دو روز ہسپتال میں گزارنے کا مشور ہ