صدر مسلم لیگ ن میاں نواز شریف اور وزیراعلیٰ پنجاب مریم نواز شریف سے ارکان پنجاب اسمبلی کی ملاقات
اشاعت کی تاریخ: 7th, February 2025 GMT
لاہور(نیوز ڈیسک)پاکستان مسلم لیگ (ن) کے صدر محمد نواز شریف اور وزیراعلیٰ پنجاب مریم نواز شریف سے پنجاب اسمبلی کے ارکان نے ملاقات کی۔ ملاقات میں فیصل آباد، چنیوٹ، ٹوبہ ٹیک سنگھ اور جھنگ کے اضلاع سے تعلق رکھنے والے ارکان شامل تھے۔ اس موقع پر ملک کی مجموعی صورتحال، پنجاب میں جاری ترقیاتی عمل اور عوام کی خدمت کے مختلف منصوبوں پر تفصیلی غور کیا گیا۔
محمد نواز شریف نے اس موقع پر گفتگو کرتے ہوئے کہا کہ جب نیت ٹھیک ہو تو اللہ تعالیٰ کی مدد ضرور آتی ہے۔ انہوں نے عوامی خدمت کو سب سے بڑی عبادت قرار دیا اور کہا کہ عوام کی خدمت کا صلہ اور انعام صرف اللہ تعالیٰ دیتا ہے۔ ان کا کہنا تھا کہ معاشی بہتری اور مہنگائی میں کمی ملک اور قوم کے لیے مثبت اشارے ہیں۔
محمد نواز شریف نے معاشی ترقی کے حوالے سے کہا کہ 30 ہزار پوائنٹس پر موجود پاکستان اسٹاک ایکسچینج آج ایک لاکھ بیس ہزار پوائنٹس کی حدوں کو چھو رہی ہے، جو سرمایہ کاروں کے اعتماد کا مظہر ہے۔ انہوں نے مزید کہا کہ معاشی ترقی کے تسلسل سے ہی عوام کے حالات بہتر ہو سکتے ہیں۔ نواز شریف نے اس بات پر خوشی کا اظہار کیا کہ پاکستان کا تنزلی کی طرف جاری سفر رک چکا ہے اور وزیراعظم شہباز شریف بڑی محنت کے ساتھ اداروں اور نظام کی اصلاح پر کام کر رہے ہیں۔
محمد نواز شریف نے وزیراعلیٰ پنجاب مریم نواز شریف کی کارکردگی کو سراہتے ہوئے کہا کہ انہوں نے وزیراعلیٰ کے طور پر پارٹی کا سر فخر سے بلند کر دیا ہے۔ انہوں نے کہا کہ اگر نیک نیتی اور محنت سے کام کیا جائے تو اللہ تعالیٰ کی مدد بھی شاملِ حال ہوتی ہے۔
ملاقات کے دوران ارکانِ اسمبلی نے پنجاب میں ہونے والے ترقیاتی کاموں اور عوامی منصوبوں پر وزیراعلیٰ مریم نواز شریف کو خراج تحسین پیش کیا۔ ان کا کہنا تھا کہ مریم نواز شریف نے اپنی محنت اور خدمت سے پنجاب کے عوام کا دل جیت لیا ہے اور وہ بھرپور انداز میں صوبے کی ترقی کے لیے کام کر رہی ہیں۔
ارکانِ اسمبلی نے اس بات پر زور دیا کہ نواز شریف اور شہباز شریف کے ادوار میں جس طرح کام ہوا اور اب مریم نواز جس عزم کے ساتھ عوامی خدمت کر رہی ہیں، اس کی ماضی میں کوئی مثال نہیں ملتی۔ انہوں نے کہا کہ ایک سال میں پنجاب کے ہر شعبے اور ہر علاقے میں ترقیاتی منصوبے مکمل کیے گئے، جس نے عوام کو ایک نیا اعتماد اور حوصلہ دیا ہے۔
ارکانِ اسمبلی نے مختلف فلاحی منصوبوں جیسے ستھرا پنجاب، کسان کارڈ، اسکالرشپ پروگرام، سڑکوں کی تعمیر و بحالی، ‘دھی رانی’ پروگرام، بنیادی و دیہی مراکز اور صحت کے پورے نظام کی اپ گریڈیشن کے میگا منصوبوں پر وزیراعلیٰ مریم نواز شریف کی کارکردگی کو سراہا۔
ارکانِ اسمبلی نے کہا کہ عوام ہر طبقے سے تعلق رکھنے والے افراد وزیراعلیٰ پنجاب کے ان اقدامات پر خوش ہیں اور انہیں دعائیں دے رہے ہیں۔ ان کا کہنا تھا کہ پنجاب کو ایک محنتی وزیراعلیٰ کی ضرورت تھی اور مریم نواز شریف نے اس ذمہ داری کو بخوبی نبھایا ہے۔
وزیراعلیٰ پنجاب مریم نواز شریف نے ارکانِ اسمبلی کا شکریہ ادا کرتے ہوئے کہا کہ عوامی خدمت مسلم لیگ (ن) کی پہچان ہے اور اس روایت کو برقرار رکھنا ہی اصل امتحان ہے۔ انہوں نے کہا کہ قیادت کی رہنمائی اور پارٹی رہنماؤں و کارکنان کی تائید و حمایت ہی ان کی کامیابی کی ضمانت ہے۔
وزیراعلیٰ مریم نواز شریف نے مزید کہا کہ پاکستان کو ترقی کی راہ پر مسلم لیگ (ن) ہی گامزن کرتی ہے اور ان کی حکومت عوامی فلاح و بہبود کے منصوبے جاری رکھے گی۔
اجلاس میں عوامی فلاحی منصوبوں کے علاوہ مستقبل کی سیاسی حکمت عملی پر بھی تفصیلی مشاورت کی گئی۔
پارٹی کے سینئر رہنما سینیٹر پرویز رشید، رانا ثناء اللہ، پنجاب کی سینئر وزیر مریم اورنگزیب اور راشد نصر اللہ بھی اجلاس میں شریک تھے۔
.ذریعہ: Daily Mumtaz
کلیدی لفظ: پنجاب مریم نواز شریف مریم نواز شریف نے محمد نواز شریف اسمبلی نے نے کہا کہ انہوں نے مسلم لیگ ہے اور
پڑھیں:
کشمیر بنے گا پاکستان کا نعرہ ضرور پورا ہوگا، وزیراعلیٰ پنجاب
لاہور(مانیٹرنگ ڈیسک)پنجاب کی وزیراعلی مریم نواز نے یوم یک جہتی کشمیر کے موقع پر لاہور کے لبرٹی چوک پر منعقدہ تقریب میں کہا کہ کشمیر بنے گا پاکستان کا نعرہ ایک دن ضرور پورا ہوگا۔وزیراعلیٰ پنجاب مریم نواز نے یوم یکجہتی کشمیر کے موقع پر لبرٹی چوک پر ہونے والی تقریب میں شرکت، جہاں شمعیں روشن کی گئیں، شہدائے کشمیر کے لیے دعائے مغفرت کی اور حکومت پنجاب نے یوم یکجہتی کشمیر کے موقع پر خصوصی ملی نغمہ “ہم کو کشمیر سے پیار ہے” بھی جاری کر دیا۔وزیراعلی مریم نواز شریف نے لبرٹی چوک میں شمع آزادی روشن کی اور شہدائے کشمیر کی یادگار پر پھول رکھ کر نذرانہ عقیدت پیش کیا، تقریب میں یوم یکجہتی کشمیر کے حوالے سے علامتی خاموشی اختیار کی گئی۔اس موقع پر وزیراعلیٰ پنجاب مریم نواز نے صحافیوں سے میڈیا سے غیررسمی گفتگو میں کہا کہ ملک میں آبادی بڑھ چکی ہے، سڑکیں چھوٹی ہو چکی ہیں اسی وجہ سے تجاوزات کے خلاف آپریشن ضروری ہے۔انہوں نے کہا کہ احتجاج کی پہلے بھی بہت کالیں آئیں جنہیں عوام نے مسترد کر دیا، جلاؤ گھیراؤ کی سیاست کو عوام نے رد کر دیا ہوا ہے۔یوم یک جہتی کشمیر کے حوالے سے انہوں نے کہا کہ میری رگوں میں کشمیری خون دوڑتا ہے، کشمیر بنے گا پاکستان کا نعرہ اللہ تعالی ایک دن سچ کر کے دکھائے گا۔
امریکا نے چین، کینیڈا اور میکسیکو پر نئے ٹیرف لاگو کردیے