8 فروری کی کال، پی ٹی آئی کے اندرونی اختلافات اور ریاستی صف بندی
اشاعت کی تاریخ: 7th, February 2025 GMT
پاکستان تحریک انصاف اپنے بانی چیئرمین کی ہدایت پر 8 فروری کو یومِ سیاہ منانے کے معاملے پر شدید نوعیت کی ابہامی کیفیت سے دوچار ہے، اور ابھی تک پارٹی کی مجوزہ روڈ میپ کا بھی کوئی واضح خاکہ سامنے نہیں آیا ہے۔
اب کی بار بھی یہی لگ رہا ہے کہ اس پاور شو کے انعقاد کا تمام بوجھ پی ٹی آئی خیبرپختونخوا اور اس کی صوبائی حکومت کے کاندھوں پر ہے، اور پاور گیم کے مرکز یعنی پنجاب اس بار بھی لاتعلقی پر مبنی رویہ یا پالیسی پر عمل پیرا نظر آئے گا۔
تاہم، پی ٹی آئی کے قلعہ خیبرپختونخوا کا مورچہ بھی پہلے کے برعکس خالی نظر آ رہا ہے اور شاید اسی کا نتیجہ ہے کہ پشاور میں عملاً کوئی سرگرمی یا گہما گہمی دیکھنے کو نہیں مل رہی ہے۔
پارٹی کے نئے صوبائی صدر جنید اکبر خان نے گزشتہ روز پشاور کا پہلا دورہ کیا، جہاں انہوں نے یومِ سیاہ کے حوالے سے مشاورت و ہدایات دینی تھیں۔ مگر ان کے طلب کردہ اجلاس میں خلاف توقع مرکزی یا صوبائی سطح کے کسی بھی خاص لیڈر نے شرکت نہیں کی۔
اس اجلاس سے صوبائی وزرا اور ممبران اسمبلی بھی لاتعلق اور غیر حاضر رہے۔ جنید اکبر خان اور ان کی نئی ٹیم کو دوسرا دھچکا اس وقت لگا جب گروپ لیڈر عاطف خان کے ساتھ پارٹی کے منحرف رہنما عون چودھری کی ایک تازہ تصویر کو پی ٹی آئی ہی نے وائرل کردیا، جس پر وزیر اعلیٰ اور شیخ وقاص اکرم سمیت متعدد دیگر لیڈروں نے بھی شدید ناراضگی کا اظہار کیا اور پارٹی لیڈر شپ کے آفیشل واٹس ایپ گروپ میں تصویر بنوانے کے معاملے پر سابق گورنر شاہ فرمان اور عاطف خان کے درمیان سخت جملوں اور الزامات کا تبادلہ بھی ہوا۔
اسی تلخ کلامی کے اسکرین شاٹس لے کر بعض شرکا نے میڈیا پرسنز کو فارورڈ کر دیے، جس کے باعث کارکنوں کی نظر میں عاطف خان قائد سے بے وفائی کے مرتکب قرار پائے اور ان کی وضاحت کو قبول نہیں کیا گیا، جس کا براہ راست اثر جنید اکبر خان کی صدارت پر پڑنے لگا، کیونکہ عاطف خان آن دی ریکارڈ ان کی صدارت کا کریڈٹ خود کو دیتے رہے۔
ایک اہم رہنما نے اس ضمن میں وی نیوز کو بتایا کہ جنید اکبر خان یومِ سیاہ کی تیاریوں کے سلسلے میں جب جب پارٹی رہنماوں اور دیرینہ کارکنوں سے رابطے کرتے رہے، دوسری جانب سے عون چودھری کے ساتھ عاطف خان کی تصویر کا معاملہ اور مسئلہ اٹھایا جاتا رہا۔
علی امین گنڈاپور کے گروپ نے اس معاملے کو نئے صوبائی صدر جنید اکبر اور گروپ لیڈر عاطف خان کے خلاف زبردست طریقے سے اچھالا، حالانکہ عاطف خان نے موقف اختیار کیا تھا کہ ان کی عون چودھری کے ساتھ کوئی ملاقات یا بات چیت نہیں ہوئی تھی، بلکہ اسلام آباد کلب میں واک کے دوران دونوں کی علیک سلیک ہوئی تھی، اس غیر متوقع اور مختصر ملاقات کی تصویر کسی نے بنا کر وائرل کردی۔
تصویر والے معاملے کو اتنا بڑا مسئلہ اس لیے بنایا گیا کہ خیبرپختونخوا میں پی ٹی آئی کو شدید نوعیت کے اختلافات اور گروپ بندی کا سامنا ہے، اور صوبائی صدارت سے ہٹائے جانے کے بعد وزیر اعلیٰ علی امین گنڈاپور دوسرے گروپس کے خلاف کھل کر میدان میں نکل آئے ہیں۔
وزیر اعلیٰ نے اپنے ایک حالیہ انٹرویو میں اعتراف کیا ہے کہ وہ بشریٰ بی بی اور بعض دیگر لیڈروں کے ہمراہ اسٹیبلشمنٹ کے ساتھ رابطے میں رہے۔ تاہم، ان کے بقول وہ یہ سب کچھ بانی چیئرمین کی ہدایت پر ان کی مرضی کے مطابق کر رہے تھے۔ انہوں نے پارٹی کے ایک گروپ کے ساتھ سی ایم ہاوس میں کی گئی بات چیت کے دوران یہ بھی کہا کہ وہ ماضی کی طرح اب کی بار اس ایونٹ کے لیے صوبائی حکومت کی سہولت کاری کا فریضہ انجام نہیں دیں گے۔
اس صورت حال سے نمٹنے کے لیے اسد قیصر اور بیرسٹر گوہر سرگرم عمل ہیں، اور دونوں بڑے گروپوں کے درمیان مصالحت کرانے کے لیے کوشاں ہیں۔ تاہم، صورتحال اس وقت مزید عجیب شکل اختیار کرچکی جب عاطف خان گروپ کی جانب سے بیرسٹر گوہر کو یہ کہہ کر تعاون کرنے سے انکار کردیا گیا کہ وہ علی امین گروپ کے حامی ہیں اور اسی طرح اسد قیصر پر پہلے والے گروپ نے عاطف خان اور جنید اکبر کی حمایت اور سرپرستی کا الزام لگایا۔
اس صورت حال کو بظاہر مضحکہ خیز اور انتہائی غیر سنجیدہ طرز عمل کا نام دیا جاسکتا ہے، تاہم یہ پی ٹی آئی کا پولیٹیکل کلچر رہا ہے اور کارکن بھی اسی کلچر سے متاثر ہو کر بیانیہ تشکیل دیتے ہیں۔
اب تک کا جو منظر نامہ سامنے آتا دکھائی دے رہا ہے، اس کا خلاصہ یہ ہے کہ علی امین گنڈاپور تاحال مضبوط وکٹ اور پوزیشن پر ہیں، کیونکہ وہ صوبے کے وزیر اعلیٰ ہیں، جبکہ جنید اکبر خان اور ان کے گروپ کو وہ پذیرائی نہیں مل پار رہی، جس کی ان کو ضرورت ہے۔
حالت تو یہ ہے کہ جنید اکبر کے بعض قریبی ساتھی بھی یہ کہتے نظر آتے ہیں کہ عمران خان نے جنید اکبر کی تعیناتی کے فوراً بعد یا اس سے قبل اس یومِ سیاہ کی کال دے کر نئے صوبائی صدر کو کڑی آزمائش میں ڈال دیا ہے اور یہ کہ اگر علی امین گنڈاپور نے واقعتاً صوبائی وسائل کی عدم فراہمی اور اپنی عدم دلچسپی کے اعلان پر عمل کیا تو یہ ایونٹ بری طرح ناکامی سے دوچار ہو جائے گا۔
اگر چہ وزیر اعلیٰ ان حالات میں عمران خان کے کسی فیصلے سے حکم عدولی کا رسک نہیں لے سکتے، اور وہ یومِ سیاہ سے لاتعلق نہیں رہیں گے، تاہم یہ تو واضح ہے کہ ان کی دلچسپی پہلے کی نسبت بہت کم دکھائی دے گی۔
اب تک کی دستیاب معلومات کے مطابق 8 فروری کو خیبرپختونخوا ہی کے علاقے صوابی کی حدود میں ایک احتجاجی اجتماع کا انعقاد کیا جائے گا، تاہم اس ضمن میں تجزیہ کار اور مخالفین سوال اٹھا رہے ہیں کہ اپنے ہی صوبائی حکومت کی موجودگی میں اسی صوبے کی حدود میں اس ایونٹ کے انعقاد کا آخر مطلب کیا ہے؟
اس ضمن میں پی ٹی آئی کے بعض رہنماؤں نے رابطے پر بتایا کہ اسی اجتماع میں اسلام آباد اور پنجاب کی طرف مارچ کرنے کا اعلان متوقع ہے اور اس ایونٹ میں نہ صرف یہ کہ اپنے مطالبات منوانے کے لیے شرائط رکھی جائیں گی، بلکہ وفاقی حکومت کو ایک نئی ڈیٹ لاین بھی دی جائے گی کہ اگر متوقع مطالبات تسلیم نہیں کیے جاتے تو فلاں تاریخ کو اسلام آباد اور پنجاب کی طرف مارچ کیا جائے گا۔
اگر ایسا ہی کیا جا رہا ہے تو اس سے کارکنوں میں مزید مایوسی پھیلے گی، کیونکہ کارکنوں کی بڑی تعداد نے نئے صوبائی صدر سے حسب عادت بہت توقعات وابستہ کی ہیں اور وہ یہ سمجھ بیٹھے ہیں کہ کمپرومائزڈ وزیر اعلیٰ کے مقابلے میں نئے صوبائی صدر کوئی نیا پلان دے کر کچھ خاص ڈیلیور کردیں گے۔
اس سلسلے میں جب وفاقی حکومت کے بعض متعلقہ افراد یا حکام سے رابطہ کیا گیا تو ان کی جانب سے حالات کو پرسکون قرار دیا گیا، اور کہا گیا کہ ماضی کے برعکس اب کی بار وفاقی اور پنجاب حکومتوں کو کوئی تشویش لاحق نہیں ہے، اور پی ٹی آئی اب کچھ بھی کرنے کی خاص پوزیشن میں نہیں ہے۔
تاہم، یہ بھی کہا گیا کہ اگر پی ٹی آئی نے اسلام آباد یا پنجاب کی طرف انتشار پھیلانے کے لیے کوئی حرکت کی تو اس کے ساتھ حسب سابق سختی کے ساتھ نمٹا جائے گا۔
اس صورت حال پر تبصرہ کرتے ہوئے خیبرپختونخوا اسمبلی کے اپوزیشن لیڈر ڈاکٹر عباد اللہ خان نے کہا کہ پی ٹی آئی نے جنگ زدہ صوبے کو اپنی باغیانہ سرگرمیوں کے لیے مورچے میں تبدیل کردیا ہے، اور یہ طرزِ سیاست 2014 کے بعد جاری ہے، تاہم اب یہ سرگرمیاں ناقابل برداشت ہوگئی ہیں، اور وفاقی حکومت کسی کو ریاست مخالف سرگرمیوں اور پروپیگنڈا کی اجازت نہیں دے گی۔
ایک سوال کے جواب میں انہوں نے کہا کہ اس قسم کی سرگرمیوں کے لیے جنگ زدہ صوبے کے سرکاری وسائل کو جس بے دردی کے ساتھ استعمال کیا جاتا رہا وہ تاریخ کا حصہ ہے، اور اب کی بار بھی یہی طرزِ عمل اختیار کیا جائے گا، مگر عوام اس پارٹی اور اس کی صوبائی حکومت سے یہ پوچھنے میں حق بجانب ہیں کہ انہوں نے صوبے کے مسائل حل کرنے پر کتی توجہ دی؟
تجزیہ کار بھی اس ایونٹ کو محض پولیٹیکل پوائنٹ اسکورنگ کا ایک روایتی حربہ قرار دیتے ہیں، ان کا کہنا ہے کہ پی ٹی آئی کے پاس نہ صرف یہ کہ پولیٹیکل کارڈز تیزی کے ساتھ ختم ہو رہے ہیں، بلکہ پارٹی کی اعلیٰ قیادت کو فرسٹریشن کا بھی سامنا ہے۔
سینئر صحافی عرفان خان نے اس ضمن میں تبصرہ کرتے ہوئے کہا کہ پی ٹی آئی اور اس کی صوبائی کابینہ شدید اختلافات سے دوچار ہیں، اور اس وقت آن دی ریکارڈ مختلف گروپوں کے درمیان ایک دوسرے کے خلاف مہم جاری ہے، ایسے میں کارکن اور پارٹی عہدے دار بھی مختلف گروپوں میں تقسیم ہو کر رہ گئے ہیں، اور ان میں یہ تاثر بہت عام ہے کہ بانی چیئرمین کی رہائی کے لیے کوئی سنجیدہ کوشش نہیں ہورہی۔
عرفان خان کے مطابق وزیر اعلیٰ علی امین گنڈاپور کے خلاف دوسرے گروپ کی جانب سے کھلے عام پروپیگنڈا کیا گیا اور یہاں تک کہا گیا کہ صوبائی صدارت سے فارغ ہونے کے بعد ان کو وزارت اعلیٰ کے عہدے سے بھی ہٹایا جاسکتا ہے۔ اس مہم کو نہ صرف یہ کہ وزیر اعلیٰ نے ذاتیات پر مبنی رویہ سمجھا، بلکہ وہ کافی ناراض اور مشتعل بھی ہیں اور اس تمام منظر نامے کے نتیجے میں 8 فروری کا مجوزہ ایونٹ بھی بری طرح متاثر ہوگا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
ذریعہ: WE News
کلیدی لفظ: علی امین گنڈاپور جنید اکبر خان صوبائی حکومت پی ٹی آئی کے اسلام آباد وزیر اعلی اب کی بار انہوں نے اس ایونٹ کے خلاف کے ساتھ جائے گا خان کے کے لیے کہا کہ ہیں کہ اور اس اور ان ہے اور گیا کہ رہا ہے
پڑھیں:
اسرائیل ‘حماس جنگ بندی معاہدے سے ہماراکوئی تعلق نہیں .امریکا
واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔05 فروری ۔2025 )امریکا نے فلسطین جنگ بندی معاہدے سے لاتعلقی کا اعلان کرتے ہوئے کہا ہے کہ یہ وہ معاہدہ نہیں جسے ٹرمپ حکومت نے تجویز کیا تھا لہذا ہمارا اس معاہدے سے کوئی تعلق نہیں ہے‘ تین مراحل میں غزہ کی تعمیر نو کے لیے پانچ سال کا منصوبہ بھی ناممکن ہے مشرقِ وسطیٰ کے لیے امریکہ کے نمائندہ خصوصی اسٹیو وٹکوف نے وائٹ ہاﺅس میں صحافیوں سے گفتگو کرتے ہوئے کہا کہ امریکی حکومت نے جنگ بندی کے دوسرے مرحلے پر مذاکرات شروع کر دیے ہیں انہوں نے کہا کہ امریکی حکومت معاہدے کے بقیہ رہ جانے والے حصوں پر دوبارہ بات چیت کا سوچ رہی ہے.(جاری ہے)
انہوں نے کہا کہ مسئلے کی ایک وجہ یہ ہے کہ یہ وہ معاہدہ نہیں جس پر پہلے دستخط کیے گئے تھے سٹیو وٹکوف نے بتایا کہ میرے لیے فلسطینیوں کو یہ سمجھانا غیر منصفانہ ہے کہ وہ پانچ سال میں واپس آ سکتے ہیں یہ بالکل مضحکہ خیز ہے قبل ازیں امریکی صدر ڈونلڈ ٹرمپ نے کہا کہ وہ چاہتے ہیں کہ امریکہ غزہ کا انتظام سنبھال لے وائٹ ہاﺅس میں اسرائیلی وزیر اعظم بینجمن نیتن یاہو سے ملاقات کے بعد مشترکہ پریس کانفرنس میں صدر ٹرمپ نے کہا کہ امریکہ غزہ کاانتظام سنبھال لے گا اور ہم اس پر کام بھی کریں گے. انہوں نے کہا کہ وہ غزہ کی ترقی چاہتے ہیں انہوں نے کہاکہ غزہ کے امریکی ملکیت میں آنے کے خیال کے بارے میں جس کسی سے بھی بات کی تو اس نے اس خیال کو پسند کیا صدر ٹرمپ نے کہا کہ غزہ بہت ہی خوب صورت علاقہ ہے جسے تعمیر کرنا اور وہاں ہزاروں ملازمتیں پیدا کرنا بہت ہی شان دار ہو گا صدر ٹرمپ نے اس کی کوئی تفصیل نہیں بتائی کہ وہ غزہ پر کنٹرول کے اپنے منصوبے پر کس طرح عمل کریں گے لیکن انہوں نے امریکی فوج غزہ بھیجنے کے امکان کو بھی مسترد نہیں کیا. ایک سوال کے جواب میں انہوں نے کہا کہ اگر ایسا ضروری ہوا تو ہم یہ بھی کریں گے ہم اس علاقے کا کنٹرول سنبھالنے کے بعد اس کی تعمیرنو کریں گے صدر ٹرمپ نے حال ہی میں تجویز دی تھی کہ مصر اور اردن غزہ کے رہائشیوں کو قبول کریں کیوں کہ غزہ کھنڈر بن چکا ہے فلسطینی اتھارٹی اور عرب لیگ میں شامل مصر، اردن اور سعودی عرب نے پہلے ہی صدر ٹرمپ کی اس تجویز کو مسترد کر چکے ہیں ان ممالک نے خدشہ ظاہر کیا تھا کہ اس قسم کا منصوبہ خطے کے استحکام کے لیے خطرہ ہے اور اس سے تنازع مزید پھیل سکتا ہے منگل کو پریس کانفرنس کے دوران جب صدر ٹرمپ سے پوچھا گیا کہ آیا سعودی عرب فلسطینی ریاست کا مطالبہ کر رہا ہے؟ تو اس پر انہوں نے کہا کہ وہ یہ مطالبہ نہیں کر رہے. صدر ٹرمپ نے دی کہ غزہ سے بے گھر ہونے والے فلسطینیوں کو جنگ زدہ علاقے سے باہر مستقل طور پر آباد کیا جائے جبکہ امریکہ اس علاقے کی تعمیر نو کے لیے ملکیت لے جبکہ حماس کے راہنما عزت الرشق نے کہا کہ غزہ کوئی لاوارث زمین نہیں کہ کوئی بھی اس پر کنٹرول کا فیصلہ کرے انہوں نے کہا کہ یہ فلسطینیوں کی مقبوضہ سرزمین کا حصہ ہے اور کسی بھی حل کی بنیاد اسرائیلی قبضے کے خاتمے اور فلسطینی عوام کے حقوق کی بحالی پر ہونی چاہیے نہ کہ کسی رئیل اسٹیٹ کے تاجر کی ذہنیت یا طاقت کے ذریعے تسلط قائم کرنے کی سوچ پر حماس راہنما نے کہاکہ ٹرمپ کے بیانات ایک بار پھر ثابت کرتے ہیں کہ امریکہ مکمل طور پر اسرائیلی قبضے اور فلسطینی عوام کے خلاف جارحیت کی کھلی حمایت کر رہا ہے. عزت الرشق نے کہا کہ فلسطینی عوام اور ان کی متحرک قوتیں عرب و اسلامی ممالک اور دنیا بھر میں آزادی کے حامیوں کی حمایت سے جبری بے دخلی اور نقل مکانی کے تمام منصوبوں کو ناکام بنا دیں گے امریکی نشریاتی ادارے کے مطابق ٹرمپ نے کہا کہ امریکہ غزہ کی پٹی کی ذمہ داری لے گا اور فلسطینیوں کو دوسری جگہ آباد کرنے کے بعد اس کی دوبارہ تعمیر کرے گا اور اس علاقے کو مشرق وسطیٰ کا ریویرا میں تبدیل کر دے گا جس میں فلسطینیوں سمیت دنیا کے لوگ رہیں گے ریویرا ایک ایسی جگہ کو کہتے ہیں جہاں سے سمندر کا کنارہ لگتا ہے اور لوگ عموماً سیاحتی مقاصد کے لیے جاتے ہیں. ٹرمپ تقریبا 18 لاکھ لوگوں کو وہ زمین چھوڑنے پر مجبور کرنا چاہتے ہیں جسے وہ لوگ اپنا گھر کہتے ہیں اور شاید امریکی فوجیوں کے ساتھ مل کر اس کا دعویٰ کرنا چاہتے ہیں ٹرمپ نے کہاکہ مجھے نہیں لگتا کہ لوگوں کو واپس جانا چاہیے آپ اس وقت غزہ میں نہیں رہ سکتے مجھے لگتا ہے کہ ہمیں ایک اور جگہ کی ضرورت ہے مجھے لگتا ہے کہ یہ ایک ایسی جگہ ہونی چاہیے جو لوگوں کو خوش کرے ٹرمپ نے کہا کہ ہم اس بات کو یقینی بنائیں گے کہ یہ عالمی معیار کا ہو یہ لوگوں کے لیے حیرت انگیز ہو گا فلسطینی زیادہ تر فلسطینی جن کے بارے میں ہم بات کر رہے ہیںمشرق وسطیٰ میں مصر اردن اور دیگر امریکی اتحادیوں نے ٹرمپ کو متنبہ کیا ہے کہ غزہ سے فلسطینیوں کی منتقلی سے مشرق وسطیٰ کے استحکام کو خطرہ لاحق ہو گا تنازعے میں توسیع کا خطرہ ہے اور امریکہ اور اتحادیوں کی جانب سے دو ریاستی حل کے لیے دہائیوں سے جاری کوششوں کو نقصان پہنچے گا.
اشتہار