Nawaiwaqt:

جماعت اسلامی کا مظفر آباد میں کشمیر مارچ، مسلمان ملکوں سے بھارت کے بائیکاٹ کا مطالبہ

اشاعت کی تاریخ: 3rd, February 2025 GMT

مظفر آباد (نامہ نگار+نوائے وقت رپورٹ) مظفر آباد میں ہونے والے کشمیر مارچ میں ہزاروں افراد نے شرکت کی۔ مقررین نے کہا کہ یو این چارٹر مزاحمت کا حق دیتا ہے۔ کشمیری نوجوانوں کو فوجی تربیت دیں گے۔ وزیراعظم آزاد کشمیر چودھری انوار الحق نے جماعت اسلامی کے زیراہتمام کشمیر مارچ سے خطاب کرتے ہوئے کہا ہے کہ مودی حکومت ساری انسانیت کیلئے خطرہ بن چکی ہے۔ ہمیں تحریک آزادی کشمیر پر توجہ مرکوز کرنا ہے۔ کشمیر کے بیٹے مودی اور اس کی فوج سے ٹکرانے کی صلاحیت رکھتے ہیں۔ آزادی کی بقاء کیلئے نوجوان دفاع کی تعلیم و تربیت حاصل کریں۔ ایل او سی پر پاک فوج نے اپنا لہو دے کر خطے کی آزادی کو قائم رکھا ہوا ہے۔ اکیسویں صدی میں جنگ سرحدوں کی نہیں‘ بیانیہ پر چل رہی ہے۔ ہمیں ایک متفقہ بیانیہ بنانا ہے آزادی ہی ہماری منزل ہے۔ مظفرآباد کے آزادی چوک میں کشمیر مارچ میں مختلف علاقوں سے خواتین سمیت ہزاروں شہریوں نے شرکت کی۔ شرکاء نے جھنڈے اٹھا کر کشمیری عوام سے اظہار یکجتی کرتے ہوئے نعرہ بازی کی۔ سٹیج پر موجود قائدین نے ہاتھوں میں ہاتھ ڈال کر یکجہتی کا مظاہرہ کیا۔ حافظ نعیم الرحمن نے کہا کہ پاکستان کے 25 کروڑ لوگ کشمیریوں کی پشت پر کھڑے ہیں اور کشمیریوں کو آزادی ملے گی۔ ’’کشمیر پاکستان کی شہ رگ ہے‘‘ یہ بانی پاکستان نے کہا ہے۔ تحریک آزادی دراصل تحریک پاکستان کا تسلسل ہے، تکمیل پاکستان کی تحریک ہے۔ ہندوستان کی دس لاکھ فوج جنگی جرائم کے مرتکب ہورہی ہے۔گزشتہ عرصہ میں سیاست پر کنٹرول رکھنے والوں نے مایوس کیا ہے۔ حکمرانوں کی کوتاہی کی وجہ سے کشمیری عوام مایوس نہ ہوں۔ ہم پاکستان کے عوام مقبوضہ کشمیر کے عوام کے ساتھ ہیں۔ یہ جغرافیہ کی نہیں نظریے کی لڑائی ہے۔ پاکستان جہاد سے آزاد ہوا تھا۔ کشمیر کے لوگو! ہم اس چوک سے نیا رخ دینے کا اعلان کررہے ہیں۔ مقبوضہ کشمیر میں آبادی کا تناسب تبدیل کیا جارہا ہے۔ پاکستانی جرنیل آگے بڑھیں، آزادی حاصل کریں۔ ہندوستان صرف جہاد کی زبان سمجھتا ہے۔ کشمیر بزور شمشیر آزاد ہو گا۔ جماعت اسلامی آزاد کشمیر گلگت بلتستان کے امیر ڈاکٹر محمد مشتاق خان نے کہا کہ کشمیری شہادتوں کے لیے تیار ہیں۔ تحریک آزادی کشمیر 77 سالوں سے جاری اور اپنی منزل کی طرف رواں ہے۔ جدوجہد میں شامل جتنے مرد و زن ہیں نہ تھکے ہیں نہ جھکے ہیں نہ بکے ہیں۔ مسئلہ کشمیر کا واحد حل ہمہ گیر جہاد ہے۔ آزاد کشمیر اور گلگت بلتستان کا بچہ بچہ جہاد کرے گا۔ یہ ہمارے اسلاف کی سنت ہے۔ مودی کو پیغام دیتا ہوں کہ تمہارے سارے اقدامات کی مذمت کرتے ہیں۔ کنوینر کل جماعتی حریت کانفرنس غلام محمد صفی نے کہا کہ پاکستان اپنی شہ رگ بچانے کے لیے کردار ادا کرے۔ قاضی حسین احمد اپنے عہد پر قائم رہے اور کشمیری بھی اپنے عہد پر قائم ہیں۔ مارچ سے خطاب کرتے ہوئے فیصل ممتاز راٹھور نے کہا سالار نعیم الرحمان کو یقین دلاتے ہیں کہ ہم مسئلہ کشمیر پر ایک ہیں۔ مسئلہ کشمیر برصغیر کی تقسیم کا نامکمل ایجنڈا ہے، اسے جلد حل ہونا چاہیے۔ عزیز غزالی نے کہا کہ فلسطین اور کشمیر کے ساتھ مارچ کرنے پر مبارک باد پیش کرتے ہیں۔ فلسطین اور کشمیر کی آزادی تک جماعت اسلامی ساتھ رہے گی۔ اس موقع پر پیپلز پارٹی کے سیکرٹری جنرل وزیر حکومت فیصل ممتاز راٹھور، لبریشن فرنٹ کے رہنما راجہ عبدالقیوم، سیکرٹری جنرل کل جماعتی حریت کانفرنس پرویز احمد ایڈووکیٹ، جماعت اسلامی کے مرکزی نائب امیر شیخ عقیل الرحمان، سیکرٹری جنرل جماعت اسلامی آزاد کشمیر راجہ جہانگیر خان، ڈپٹی سیکرٹری جنرل قاضی شاہد حمید ایڈووکیٹ، امیر ضلع راجہ آفتاب احمد، جاوید احمد کار، حبیب الرحمان آفاقی، طاہر اسلام نے بھی خطاب کیا۔ مارچ کے بعد جاری اعلامیہ میں کہا گیا کہ یہ اجتماع مطالبہ کرتا ہے کہ طلبہ وطالبات کے لیے این سی سی کی لازمی تربیت فوری بحال کی جائے اور یکسوئی کے ساتھ پوری قوم کو تحریک آزادی کشمیر کا پشتیبان بنانے کے لیے اقدامات کیے جائیں۔ تمام اسلامی ممالک بھارت کا سیاسی‘ معاشی‘ سفارتی بائیکاٹ کریں۔

.

ذریعہ: Nawaiwaqt

کلیدی لفظ: جماعت اسلامی سیکرٹری جنرل اور کشمیر نے کہا کہ کشمیر کے کے لیے

پڑھیں:

جماعت اسلامی کے تحت آج کشمیرکانفرنس اور 5 فروری کو یوم یکجہتی کشمیر ریلی ہوگی،منعم ظفر

امیر جماعت اسلامی کراچی منعم ظفر خان ادارہ نورحق میں 5فروری ، بھارتی تسلط کے شکار کشمیریوں سے اظہار یکجہتی وشہری مسائل کے حوالے سے پریس کانفرنس سے خطاب کررہے ہیں

کراچی (اسٹاف رپورٹر) امیر جماعت اسلامی کراچی منعم ظفر خان نے ادارہ نور حق میں پریس کانفرنس سے خطاب کرتے ہوئے اعلان کیا ہے کہ5 فروری، بھارتی جبر و تسلط کے شکار کشمیریوں سے اظہار یکجہتی کے لییآج ادارہ نورحق میں ’’کشمیر کانفرنس‘‘،کل 4 فروری کو شہر بھر کی شاہراہوں اور اہم پبلک مقامات پر کیمپس لگائے جائیں گے اور5 فروری کو جیل چورنگی تا مزار قائد مرکزی نائب امیر جماعت اسلامی پاکستان لیاقت بلوچ کی زیر قیادت ’’یوم یکجہتی کشمیر ریلی‘‘ کا انعقاد کیا جائے گا۔ انہوں نے اپنے خطاب کہا کہ پیپلزپارٹی نے اپنے ویژن ’’جہالت سب کے لیے‘‘ کے مطابق سندھ اسمبلی میں قانون پاس کر کے جامعات کی خود مختاری پر کاری ضرب لگائی ہے۔ اسی ویژن کے تحت پیپلزپارٹی کی صوبائی
حکومت تعلیم پر وار کر رہی ہے، پیپلزپارٹی کے صدر آصف علی زرداری نے پیکا ایکٹ پر دستخط کیے۔ پیپلزپارٹی وفاقی حکومت کا حصہ ہے اور ایم کیو ایم اس کی پارٹنر ہے، مسلم لیگ ن، پیپلزپارٹی اور ایم کیوا یم نے مل کر آزادی صحافت کا گلا گھونٹا ہے، جمہوریت کی بات کرنے والے آمرانہ طرز عمل کے مطابق رویہ اختیار کررہے ہیں۔ یہ تمام لوگ آپس میں صرف بیان بازی اور نورا کشتی کرتے ہیں اور عوام کے خلاف فیصلے کرتے ہیں۔ قابض میئر مرتضیٰ وہاب نے کہا ہے کہ شہر کی بہتری کے لیے ایم کیو ایم سے بات چیت کے لیے تیار ہیں، حقیقت تو یہی ہے کہ ایم کیو ایم اور پیپلزپارٹی دونوں شہر کی تباہی و بربادی کے ذمے دار ہیں، پیپلزپارٹی آج بھی ٹاؤنز کو اختیارات اور وسائل دینے کے لیے تیار نہیں ہے، جماعت اسلامی کے نعمت اللہ خان ایڈووکیٹ جو2001ء سے 2005ء تک سٹی ناظم رہے، بلا تخصیص تمام یونین کمیٹیوں میں برابر کے فنڈز کی تقسیم کیے۔ ہمارا واضح اور دوٹوک مطالبہ ہے کہ کراچی کے تمام ٹاؤنز کو2 ارب اور ہر یوسی کو5 کروڑ روپے کے ترقیاتی فنڈز دیے جائیں۔ پریس کانفرنس میں نائب امیر کراچی و پارلیمانی لیڈر سٹی کونسل سیف الدین ایڈووکیٹ، ڈپٹی پارلیمانی لیڈر سٹی کونسل قاضی صدر الدین، ٹاؤن چیئرمین گلبرگ نصرت اللہ، سیکرٹری اطلاعات زاہد عسکری، سیکرٹری پبلک ایڈ کمیٹی نجیب ایوبی اور نائب صدر پبلک ایڈ کمیٹی عمران شاہد بھی موجود تھے۔ منعم ظفر خان نے مزید کہا کہ سابق امیر جماعت اسلامی قاضی حسین احمد نے گزشتہ35 سال قبل پوری دنیا کو کشمیر کی تحریک آزادی کی پشت پر لاکھڑا کیا تھا اور کہا تھا کہ وہ جدوجہد جو برصغیر کی تقسیم کا نامکمل ایجنڈا ہے کہ کشمیریوں کو ان کاجائز حق دیا جائے۔1947ء کو جب پاکستان معرض وجود میں آیا تو بھارت نے دھوکے سے کشمیر میں اپنی فوجیں بھیج کر قبضہ کرلیا۔ آزاد کشمیر جسے قبائلیوں نے فوج کے ساتھ مل کر آزاد کروالیا اور سر ی نگر تک پہنچ گئے تھے لیکن بھارت کے جواہر لال نہرو اقوام متحدہ پہنچ گئے اور ایک قرارداد منظور ہوئی کہ کشمیریوں کو آزادی ہے کہ وہ جہاں ضم ہونا چاہیں ہوسکتے ہیں۔ بھارت نے مقبوضہ کشمیر میں8 لاکھ سے زائد فوج بھیجیں کشمیریوں نے سید علی گیلانی کی قیادت میں مزاحمت کا راستہ اختیار کیا، بھارتی فوج نے مظلوم و نہتے کشمیروں پر ظلم وستم ڈھایا، عورتوں، بچوں اور بوڑھوں پر ظلم کیا گیا ۔ انہوں نے مزیدکہا کہ 5 اگست 2019ء کوآرٹیکل 370 اور 35-A کے تحت مقبوضہ کشمیر کو دی گئی ریاستی خود مختاری کو غصب کر کے کشمیر کو بھارت کا حصہ بنالیا۔ مشرقی تیمور اور جنوبی سوڈان کے معاملے میں اقوام متحدہ اور مغربی اقوام نے آگے بڑھ کر آزادی دلوائی لیکن مسئلہ کشمیر کے معاملے میں اقوام متحدہ اور مغربی اقوام کی جانب سے خاموشی ہے۔ آج اقوام متحدہ سمیت پوری مغربی اقوام فلسطین کے معاملے میں اسرائیل کی پشتیبان بنی ہوئی ہیں۔ بانی پاکستان قائد اعظم محمد علی جناح کے فرمان کے مطابق کشمیر پاکستان کی شہ رگ ہے اور اس شہ رگ کی حفاظت کرنا ہم سب کی ذمے داری ہے، پاکستان کے حکمران بھارت سے دوستی بڑھانے کی باتیں کرتے ہیں، بھارت سے کسی بھی صورت میں دوستی نہیں کی جاسکتی، ایک ہی حل ہے کہ اقوام متحدہ کی قراردادوں کے مطابق کشمیریوں کو ان کا حق دیا جائے۔ منعم ظفر خان نے کہا کہ پیپلزپارٹی کی صوبائی حکومت کہتی ہے کہ جمہوریت میں مذاکرات ہوتے ہیں اور نقطہ نظر کا اختلاف بھی ہو تو ایک دوسرے کی بات سنی جاتی ہے لیکن جامعا ت کے اساتذہ کرام سندھ اسمبلی کے باہر سراپا احتجاج ہیں اور مطالبہ کررہے ہیں کہ جامعات کو مالی بحران سے نکالا جائے اور اساتذہ کا میرٹ کی بنیاد پر نہیں بلکہ مستقل بھرتی کیا جائے۔ پیپلزپارٹی کی صوبائی حکومت جامعات میں اساتذہ کرام کی بھرتی میں مستقل کے بجائے کنٹریکٹ کی بنیاد پر بھرتی کے عمل سے مال بنانے کا دھندا شروع کرنا چاہتی ہے اور وائس چانسلر کے تقرر کے لیے پی ایچ ڈی اور تعلیمی تجربہ کی شق کو ختم کردیا گیا ہے۔ جماعت اسلامی اساتذہ و طلبہ کی جامعات کی خود مختاری سلب کرنے اور طلبہ یونین کی بحالی کے حوالے سے تحریک میں ساتھ ہے اور ان کے حقوق کے لیے آواز بلند کرتے رہیں گے۔ منعم ظفر خان نے کہا کہ پیپلزپارٹی کی صوبای حکومت نے کراچی کے ساڑھے 3 کروڑ عوام کے لیے باعزت ٹرانسپورٹ کا انتظام نہیں کیا۔ پیپلز پارٹی کے صوبائی وزیر کہتے ہیں کہ کراچی کی بسوں میں کرایوں میں اضافہ صرف اس کے لیے کیا جا رہا ہے تاکہ اضافی کرایوں سے مزید بسیں خریدی جائیں، انتہائی شرم کا مقام ہے کہ پیپلز پارٹی نے گزشتہ16 سال میں صرف300 بسیں دیں، کراچی کو 15 ہزار بسوں اور ماس ٹرانزٹ کی ضرورت ہے، کراچی کے عوام سے اربوں روپے ٹیکس تو وصول کیے جاتے ہیں لیکن بدلے میں کوئی سہولت فراہم نہیں کی جاتی۔ شہر کا انفرااسٹرکچر تباہ ہے، شہری چنگی چی رکشوں پر سفر کرنے پر مجبور ہیں ۔ پیپلزپارٹی سن لے کہ کراچی کے ساڑھے3 کروڑ عوام کے جائز و قانونی حقوق کے حصول کے لیے جماعت اسلامی ہر محاذ پر پیپلز پارٹی اور ان کے فرینڈلی اپوزیشن ایم کیو ایم کا مقابلہ کرتے رہیں گے۔ شہر میں اسٹریٹ کرائمز و مسلح ڈکیتی کی وارداتوں میں مسلسل اضافہ ہو رہا ہے، گزشتہ 1 ماہ میں45 افراد قیمتی جانوں سے ہاتھ دھو بیٹھے ہیں، گزشتہ روز مہران ٹاؤن کورنگی میں ایک شہری کو گولی مار کر ہلاک کردیا گیا، صوبائی حکومت، پولیس اور قانون نافذ کرنے والے ادارے کہاں ہیں؟۔ گزشتہ سال 109شہریوں کو موبائل اور موٹر سائیکل چھیننے کے موقع پر ہلاک کردیا گیا، شہری اپنے گھروں میں مفلوج ہوکر رہ گئے ہیں، گارڈن سے2 جنوری کو بچوں کو اغوا کیا گیا، جس کا آج تک کوئی پتا نہیں چلا، ایسا محسوس ہوتا ہے کہ شہر کا کوئی والی وارث نہیں ہے۔ کراچی کے عوام امن و سکون اور شہر کی ترقی چاہتے ہیں،جماعت اسلامی کراچی کے عوام کے ساتھ ہے ، انہیں کسی صورت تنہا نہیں چھوڑیں گے ۔