ستاروں سے آگے جہاں اور بھی ہیں
اشاعت کی تاریخ: 1st, February 2025 GMT
(تحریر: سہیل یعقوب)
آج کل سنا ہے کہ ستارے لائن پر آگئے ہیں۔ اب آپ ہی بھلا بتائیے کہ وہ اسٹار ہی کیا ہوا جو لائن پر آگیا ہو۔ اس لیے وہ یقیناً ستارہ نہیں بلکہ سیارہ ہوگا۔ اس پر تصحیح کی گئی کہ ستارے یا سیارے لائن پر نہیں آئے ہیں بلکہ قطار میں آگئے ہیں۔
اب سوال یہ ہوا کہ ستارے اور سیارے میں کیا فرق ہے؟ ستارے کی اپنی روشنی ہوتی ہے کہ جس کا اخراج ہوتا ہے اور سیارہ وہ ہوتا ہے کہ جس کی اپنی روشنی نہ ہو۔ اس لحاظ سے تو واپڈا اور K الیکٹرک بھی ستارے ہوئے۔ واقعی واپڈا اور K الیکٹرک ہمارے ملک کے ستارے ہی تو ہیں اور باقی ہم سب سیارے ہیں، جو ان کے اردگرد گھومتے ہیں اور صرف گھومتے ہی نہیں بلکہ بل کے ذریعے گھما بھی دیے جاتے ہیں۔
کہتے ہیں کہ یہ سیارے پانچ یا دس سال میں ایک دفعہ قطار میں آتے ہیں اور آج کل چھ سیارے قطار میں آئے ہوئے ہیں، جن میں سے چار یعنی زحل، زہرہ، مشتری اور مریخ کو بغیر کسی ٹیلی اسکوپ کے دیکھا جاسکتا ہے اور باقی دو یعنی نیپچون اور یورینس کو دیکھنے کےلیے نہ صرف طاقتور ٹیلی اسکوپ کی ضرورت ہوتی ہے بلکہ بہتر ہوتا ہے کہ شہر سے باہر جاکر دیکھا جائے تاکہ آسمان صاف ہو۔ ان چار سیاروں کو دیکھنے کےلیے ہم 23 جنوری کی شام پی آئی اے پلانیٹوریم پہنچے، جہاں کراچی اسپیس آبزرویٹری کے مہدی حسین کے ساتھ وقت طے تھا اور وہ اپنی ٹیم اور ٹیلی اسکوپ کے ساتھ موجود تھے۔
انھوں نے سب سے پہلے تو وہاں موجود تمام لوگوں کو اس حوالے کچھ معلومات بہم پہنچائیں کہ ان سیاروں کو دیکھنے کےلیے پچیس جنوری یا کوئی خاص دن نہیں بلکہ فروری کے ابتدائی دنوں تک ان کا نظارہ کیا جاسکتا ہے۔ سب سے پہلے ہم نے زحل کا نظارہ کیا۔ یہ سورج سے چھٹا سیارہ ہے اور نظام شمسی کا دوسرا بڑا سیارہ ہے۔ سب سے بڑا سیارہ مشتری ہے۔ زحل کے گرد گیس کا بہت بڑا ہالہ بھی دیکھا۔ اس کے بعد زہرہ کو دیکھا۔ یہ زمین سے قریب ترین سیارہ ہے، اس لیے اس کو زمین کی بہن بھی کہا جاتا ہے۔ مقدر کا سکندر میں ریکھا کا نام ’’زہرہ بائی‘‘ شاید اسی سیارے سے متاثر ہوکر رکھا گیا تھا۔
اس کے بعد ہم نے مشتری کو دیکھا اور اس کے چار چاند بھی دیکھے۔ دو مشتری سے اوپر تھے اور دو اس کے نیچے۔ آج کل مشتری کے حوالے سے سماجی ذرائع ابلاغ پر ایک خبر چل رہی ہے کہ ’’نام مشتری، کام اوکاڑہ کی نجمہ کی جاوید سے شادی کو روکنا۔‘‘ بھئی ایمانداری کی بات ہے کہ ہمیں تو کوئی ایسی بات نظر نہیں آئی بلکہ مجھے تو سرے سے مشتری کی اوکاڑہ یا اس کی نجمہ میں ہی کوئی دلچسپی نظر نہیں آئی اور جاوید میں تو ویسے بھی کسی کو کوئی دلچسپی نہیں۔
اس کے بعد ہم نے مریخ دیکھا، جس کو دیکھ کر میٹ ڈیمن کی The Martian یاد آگئی، جو کہ ایک بہت ہی شاندار فلم تھی۔ آج کل ویسے بھی انسان مریخ پر رہائش کا سوچ رہا ہے، اس حوالے سے ماضی میں Total Recall بھی بن چکی ہے۔ ہندوستان نے بھی ’’مشن منگل‘‘ کے نام سے فلم بنائی ہے۔ ہندی میں Mars کو منگل کہتے ہیں۔
سورج اور آٹھ سیارے نظام شمسی کا حصہ ہے۔ ہماری گیلیکسی (Galaxy) کا نام ملکی وے ہے کہ جس میں نامعلوم ایسے کتنے نظام گردش کررہے ہیں۔ اس کائنات میں اربوں کھربوں گلیکسی ہیں کہ جس سے ہم اس کائنات کی وسعت کے بارے میں سوچ تو سکتے ہیں پر اس کا اندازہ نہیں لگا سکتے اور یقیناً اس پوری کائنات کا ایک ہی خالق اور مالک ہے کہ جس کے تابع یہ پورا نظام ہے۔ پھر یوں ہماری سیاروں کی سیر اپنے اختتام کو پہنچی۔
آخر میں ایک بات اور اس تحریر کا اختتام۔ اگر کسی طرح ہم مریخ یا کسی دوسرے سیارے پر پہنچ بھی گئے اور جب ہم انھیں بتائیں گے کہ ہم آپ کے سیارے پر رہنے آئے ہیں اور اگر انھوں نے ہم سے پوچھا کہ آپ نے اپنے سیارے کے ساتھ کیا کیا؟ تو میرے پاس تو اس کا کوئی جواب نہیں ہے۔ اگر آپ کے پاس اس کا جواب ہو تو ضرور بتائیے گا۔
نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں۔
اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 800 سے 1,200 الفاظ پر مشتمل تحریر اپنی تصویر، مکمل نام، فون نمبر، فیس بک اور ٹوئٹر آئی ڈیز اور اپنے مختصر مگر جامع تعارف کے ساتھ [email protected] پر ای میل کردیجیے۔
.ذریعہ: Express News
کلیدی لفظ: ہیں بلکہ ہے کہ جس ہیں اور کے ساتھ
پڑھیں:
ریاست لاپتا افراد کی بازیابی میں ناکام ہوگئی‘ ہم جہاں سے چلے تھے وہیں کھڑے ہیں‘ اسلام ہائی کورٹ
اسلام آباد(صباح نیوز)اسلام آباد ہائیکورٹ نے مسنگ پرسنز کی بازیابی کے کیسز کی سماعت مارچ کے پہلے ہفتے تک ملتوی کر دی، عدالت نے اٹارنی جنرل منصور اعوان کو آئندہ سماعت پر معاونتکیلیے طلب کر لیا۔اسلام آباد ہائی کورٹ کے جج جسٹس محسن اختر کیانی نے کہا ہے کہ ریاست لاپتا افراد کی بازیابی میں ناکام ہوگئی ہم جہاں سے چلے ہیں وہیں کھڑے ہیں، یہ کیس تب ختم ہوگا جب تمام بندے بازیاب ہوجائیں گے۔ اسلام آباد ہائی کورٹ میں لاپتا افراد کی بازیابی کے لیے دائر درخواستوں پر لارجر بینچ نے سماعت کی۔ جسٹس محسن اختر کیانی کی سربراہی میں تین رکنی لارجر بینچ نے سماعت کی۔جسٹس طارق محمود جہانگیری اور جسٹس ارباب محمد طاہر بینچ میں شامل ہیں۔ وکیل درخواست گزار ایمان مزاری اور ایڈیشنل اٹارنی جنرل منور اقبال دوگل عدالت میں پیش ہوئے۔ایمان مزاری ایڈووکیٹ نے کہا کہ میری عدالت سے استدعا ہے کہ حکومت کو مزید وقت نہ دیا جائے اور ذمہ داروں کا تعین کیا جائے، جس پر جسٹس ارباب محمد طاہر نے کہا کہ ذمہ داروں کا تعین کرنے کیلیے ہی تو یہ تمام کارروائی کر رہے ہیں۔جسٹس ارباب محمد طاہر نے کہا کہ ایڈیشنل اٹارنی جنرل صاحب ذہن میں رکھیں کہ اب پھر یہ لوگ ذمہ دار ہوں گے، ہو سکتا ہے ہم کمیٹی کو عدالت میں بلا لیں اور وہ آ کر ہمیں بریف بھی کریں۔جسٹس محسن اختر کیانی نے کہا کہ میرا موقف تھا کہ خفیہ ایجنسیز کی کمیٹی ممبران کو اِن کیمرا بریفنگ کیلیے طلب کیا جائے، میرے ساتھی ججز کا موقف تھا کہ پہلے وفاقی حکومت کو ایک موقع دینا چاہیے، جبری گمشدہ افراد انکوائری کمیشن کے سربراہ ہمارے جج تھے جو انتقال کرگئے، جبری گمشدہ افراد کمیشن کام نہیں کر رہا، وفاقی حکومت کچھ نہیں کر رہی پھر کسی نہ کسی نے تو دیکھنا ہے۔جسٹس محسن اختر کیانی نے کہا کہ جبری گمشدہ افراد کمیشن اگر کام نہیں کر رہا تو میرا خیال ہے اسے بند کر دیا جائے، کابینہ کی جو سب کمیٹی بنائی گئی اس میں خفیہ اداروں کے لوگوں کو شامل ہی نہیں کیا گیا، میرے ساتھی ججوں کا موقف تھا کہ وفاقی کابینہ خفیہ ایجنسیز کو بلا کر خود پوچھے، یہ سب کام وزیر دفاع اور وزیر داخلہ کر سکتے ہیں جو ہمارے سامنے نہیں ہیں۔عدالت اتنی بھی اندھی نہیں ہونی چا ہیے نہ ہی اسے اندھا کریں، میرا بڑا واضح موقف ہے کہ جو دہشت گرد ہو گا اس کو دہشت گرد کہوں گا، میں واضح ہوں کہ جو دہشت گرد نہیں ہو گا اسے پھر رہا کرنا ہو گا، اس سے یہ ہو گا کہ اسٹیٹ کی ساری ورکنگ ایکسپوز ہو جائے گی۔جسٹس محسن اختر کیانی نے کہا کہ میرے ساتھی ججز نے یہ معاملہ وفاقی حکومت کو بھیجا، میں ان کی عقلمندی کو سراہتا ہوں، حساس اداروں کو بھی قانون کے تحت اختیار دے دیں، سی ٹی ڈی کو قانون میں تحفظ ہے تو دوسرے حساس اداروں کو کیوں نہیں؟۔عدالت نے استفسار کیا کہ جب ان اداروں کے پاس اختیار ہو گا تو پھر یہ مسنگ پرسنز والا ایشو حل ہو گا، آپ نے ہمیں ہر 15 دن میں اپنی کارکردگی کی رپورٹ دینی ہے۔ایڈیشنل اٹارنی جنرل نے کہا کہ کمیٹی معاوضے کی ادائیگیوں کے حوالے سے بھی دیکھے گی، پانچ سال سے جو مسنگ ہیں کمیٹی پہلے ان کی فیملیز کو بلائے گی، آٹھ جنوری کو کابینہ کی سب کمیٹی کی میٹنگ ہوئی ہے۔جسٹس محسن اختر کیانی نے کہا کہ عدالت آپ کو کیوں کہے یہ آپ کو خود بتانا ہے، جو دہشت گردی میں ملوث ہے اس کا بتائیں یا جو بھی ہے بتائیں، لیکن نتائج کچھ نہیں آرہے۔عدالت نے پوچھا کہ کیا گزشتہ سماعت کے بعد کوئی ریکور ہوئے ہیں؟ اس پر ایڈیشنل اٹارنی جنرل اور وزارت دفاع کے نمائندوں نے کہا کہ ہماری نالج میں نہیں ہے۔ایڈیشنل اٹارنی جنرل نے وفاقی حکومت کی جانب سے مہلت دینے کی استدعا کردی۔جسٹس محسن اختر کیانی نے لاپتا افراد کے کیسز میں تمام پیش رفت کو بے سود قرار دے دیا اور کہا کہ میری عدالت میں جتنی فیملیز بیٹھی ہیں مجھے ان کو جواب دینا ہے، ریاست لوگوں کو بازیاب کرنے میں ناکام رہی ہے، ہم جہاں سے شروع ہوئے تھے وہیں پر کھڑے ہیں، یہ کیس تب ختم ہوگا جب تمام بندے بازیاب ہو جائیں گے، یہ انسانی حقوق کی خلاف ورزیوں کا کیس ہے، یہ ملک کے لیے بدنامی کا باعث بنتے ہیں۔وکیل ایمان مزاری نے کہا کہ اٹارنی جنرل اس عدالت کو یقین دہانی کروا گئے تھے، اٹارنی جنرل کی یقین دہانی کی بار بار خلاف ورزی ہوتی رہی، خضدار سے کل 15سال کے ایک بچے کو اغوا کرلیا گیا، اٹارنی جنرل عدالت کو یقین دہائی کراکے گئے تھے کہ مگر اس کے باوجود عدالتی احکامات کی خلاف ورزیاں ہوئیں۔جسٹس محسن کیانی نے کہا کہ جبری گمشدہ افراد کی فیملیز کے آنسوئوں کا مداوا قانون نافذ کرنے والی ایجنسیوں کو ہی کرنا ہے، اگر کوئی گمشدہ شخص دہشت گرد ہے تو یہ بھی لا انفورسمنٹ ایجنسیز کو ہی بتانا ہے، فتنہ الخوارج کے خلاف روزانہ کی بنیاد پر آپریشنز جاری ہیں، اگر کوئی لاپتا شخص دہشت گرد حملے میں مر گیا تو اس کا کوئی ڈیٹا اکٹھا کیا گیا؟ کوئی ایسا میکنزم ہے کہ جس میں ایجنسیز یہ سارا کام کرتی ہوں؟ جسٹس محسن کیانی نے کہا کہ یہ بات بھی ہے کہ قانون نافذ کرنے والے ادارے نہ ہوں تو ہمارا تو کوئی تحفظ ہی نہ کرسکے۔منور اقبال دوگل نے کہا کہ عدالت نے وفاقی حکومت کو احساس دلایا تو حکومت سنجیدگی سے اس مسئلے کو دیکھ رہی ہے۔جسٹس محسن کیانی نے کہا کہ ایسا تو کہیں نہیں ہوا کہ کسی نے ذمہ داری لی، ناکام ہوگئے اور استعفادے کر گھر چلے گئے، جس طرح مہذب معاشروں میں ہوتا ہے ایسا کچھ یہاں تو نہیں ہوتا، چاہے جبری گمشدہ افراد کمیشن ہو، قانون نافذ کرنے والے ادارے یا وزیراعظم ہی ہو، جب تک کسی کا کوئی بندہ اغوا نہ ہو اسے تو یہ احساس ہی نہیں ہوسکتا آرام سے گھر جا کر سو جاتا ہے۔جسٹس محسن کیانی نے کہا کہ کابینہ کی سب کمیٹی اور انٹیلی جنس افسران پر مشتمل کمیٹی آپس میں میٹنگ کریں، جو لوگ مسنگ ہیں دونوں کمیٹیاں ان کی فیملیز کو بلا کر سن تولیں، دس سال سے جو بندہ مسنگ ہے اس کے گھر والے کس طرح رہ رہے ہوں گے؟ اگر کوئی زندہ نہیں ہے تو اس کی فیملی کو معاوضہ تو دے دیا جائے، آپ نے کمیٹی بنا کر وزرا کو شامل کر دیا ہے وہ لوگوں کو جواب دہ ہیں۔اسلام آباد ہائی کورٹ کے لارجر بینچ نے آئندہ سماعت پر اٹارنی جنرل کو طلب کرلیا اور ہدایت دی کہ اٹارنی جنرل آئندہ سماعت پر ذاتی حیثیت میں پیش ہوں۔بعدازاں لاپتا افراد کی بازیابی کے کیسز کی سماعت چھ مارچ تک ملتوی کردی گئی۔
بلوچستان میں لوکل گورنمنٹ کے ضمنی الیکشن، کون کامیاب رہا؟