Jasarat News:

کراچی کو نیشنل گرڈ سے براہ راست بجلی فراہم کی جائے ،منعم ظفرخان

اشاعت کی تاریخ: 1st, February 2025 GMT

امیر جماعت اسلامی کراچی منعم ظفر خان آئی پی پیزو کے الیکٹرک مافیا مہنگی بجلی ولوڈ شیڈنگ کے خلاف شاہین کمپلیکس پر احتجاجی مظاہرے سے خطاب کر رہے ہیں

کراچی(اسٹاف رپورٹر)امیر جماعت اسلامی پاکستان حاظ نعیم الرحمن کی اپیل پر آئی پی پیز معاہدوں پر نظر ثانی کے باعث ہونے والی 1100ارب روپے کی بچت کا فائدہ عوام کو منتقل اور بجلی قیمتوں میں کمی نہ کرنے،کے الیکٹرک کی لوڈشیڈنگ اور کراچی کو ملک میں سب سے زیادہ مہنگی بجلی فراہم کرنے کے خلاف جمعہ 31جنوری کو ملک گیر احتجاج اور دھرنو ںکے سلسلے میں کراچی میں بھی 14مقامات پر بیک وقت احتجاجی مظاہرے کیے ۔مظاہرین نے مختلف بینرز و پلے کارڈز اُٹھائے ہوئے تھے اور مطالبات کے حق میں پُر جوش نعرے لگائے ۔امیر جماعت اسلامی کراچی منعم ظفر خان نے شاہین کمپلیکس آئی آئی چند ریگر روڈ پر ہونے والے احتجاجی مظاہرے سے خطاب کرتے ہوئے کہا کہ کے الیکٹرک کراچی کے شہریوں اور صنعتوں کو ملک میں سب سے زیادہ مہنگی بجلی فراہم کر رہی ہے اور بھاری بلوں کی وصولی کے باوجود لوڈشیڈنگ اور اوور بلنگ کے عذاب میں مبتلا کیا ہوا ہے ، ہمارا مطالبہ ہے کہ کے الیکٹرک لائسنس منسوخ ، لوڈشیڈنگ کا خاتمہ اور کراچی کو این ٹی ڈی سی سے براہ ِ راست بجلی فراہم کی جائے ، نومبر 2024ء میں نیشنل گرڈ سے کراچی کو 1100کے بجائے 1600میگا واٹ بجلی فراہم ہونے پر بلوں میں 4.

88 روپے فی یونٹ کمی کا ریلیف ملا اگر کراچی کو 2200میگا واٹ نیشنل گرڈ سے مل جائیں تو اس طرح کے الیکٹرک اور اس کے 40سالہ بوسیدہ و ناکارا پلانٹس سے بھی نجات مل جائے ۔ منعم ظفر خان نے مزید کہا کہ کے الیکٹرک کی سرپرستی اور آئی پی پیز کے ظالمانہ و عوام دشمن معاہدوں میں پیپلز پارٹی ، نواز لیگ ، پی ٹی آئی اور ایم کیو ایم سب شامل ہیں ۔ جماعت اسلامی کی جدو جہد اور عوامی مزاحمت کے باعث آئی پی پیز مافیا اور ان کی لوٹ مار بے نقاب ہوئی ، مقدس گائے سمجھ کر کوئی ان کے خلاف بات کرنے پر تیار نہ تھا کیونکہ 52فیصد آئی پی پیز حکومت کی اور 28فیصد پاکستانی مالکان کی ہیں صرف 20فیصد بیرونی کمپنیاں ہیں ۔ حکومت‘ جماعت اسلامی کے 14روزہ پنڈی دھرنے کے بعد آئی پی پیز سے بات کرنے پر مجبور ہوئی اور خود حکومت کے مطابق اب تک کے نظر ثانی شدہ معاہدوں کے باعث 1100ارب روپے کی بچت ہوئی ہے مگر ابھی تک اس بچت کا کوئی فائدہ عوام تک منتقل نہیں کیا گیا اور بجلی سستی نہیں کی گئی، جماعت اسلامی کا آج کا احتجاج اور دھرنے پورے ملک میں بجلی سستی نہ کرنے کے خلاف ہیں اور ہم واضح کر دینا چاہتے ہیں کہ حکمرانوں کو بجلی سستی کرنی ہوگی اور عوام کو ریلیف دینا ہو گا ، جماعت اسلامی کی جدو جہد اور مزاحمت جاری رہے گی اور ہم حکومت کو گھٹنے ٹیکنے پر مجبور کر دیں گے ۔ انہوں نے کہا کہ حکومت اور حکمران پارٹیاں عوام کو دھوکا دیتی ہیں اور بے وقوف بناتی ہیں ، ہم بلاول زرداری اور مریم نواز سے سوال کرتے ہیں کہ 300یونٹ اور 200یونٹ تک مفت بجلی دینے کے وعدوں کا کیا ہوا ؟ یہ فارم47کے ذریعے مسلط کردہ حکمران ہیں ان کو صرف اپنی حکومت اور اقتدار کی فکر ہے ، یہ حکمران عوام کو ریلیف دینا چاہتے ہیں نہ دے سکتے ہیں ۔ ایک دوسرے کے خلاف فرینڈلی اپوزیشن بنے ہوئے ہیں اور ایم کیو ایم بھی اس پورے عمل میں شریک جرم ہے ۔ تمام حکمران پارٹیوں نے مل کر عوام کے خلاف گٹھ جوڑ کیا ہوا ہے ان سے نجات حاصل کیے بغیر عوام کے مسائل حل نہیں ہوسکتے نہ ملک اور قوم بحرانوں سے نکل سکتے ہیں ۔ ان سے نجات کے لیے بھر پور سیاسی و جمہوری جدو جہد اور مزاحمت کی ضرورت ہے ۔ مظاہرے سے خطاب کرتے ہوئے امیر ضلع جنوبی سفیان دلاور نے کہا کہ کراچی کے عوام 14گھنٹے 16گھنٹے تک لوڈشیڈنگ برداشت کر رہے ہیں ، مہنگی بجلی اور لوڈشیڈنگ نے عوام کی زندگی اجیرن بنا کر رکھ دی ہے ۔ آئی پی پیز کے نظر ثانی شدہ معاہدوں کا کوئی فائدہ ابھی تک عوام کو منتقل نہیں کیا گیا ، جماعت اسلامی نے بجلی قیمتیں کم نہ کرنے کے خلاف اور راولپنڈی دھرنے کے بعد ہونے والے معاہدے پر عمل درآمد کے لیے ایک بار پھر تحریک کا آغاز کر دیا ہے ، ہم حکومت کا تعاقب کرتے رہیں گے ، ہمارا مطالبہ ہے کہ بجلی کے بنیادی ٹیرف میں کمی کی جائے ، آئی پی پیز مافیا کا کورگھ دھندا ختم کیا جائے ،کے الیکٹرک لائسنس منسوخ کیا جائے ۔مظاہرے سے آل پاکستان آرگنائزیشن آف اسمال ٹریڈرز اینڈ کاٹیج انڈسٹری کراچی کے صدر محمود حامد ، جماعت اسلامی کراچی کے سیکرٹری اطلاعات زاہد عسکری ، ناظم علاقہ برنس روڈ محمد نسیم نے بھی خطاب کیا ۔شہر بھر میں ہونے والے احتجاجی مظاہرے شاہراہ فیصل اسٹار گیٹ ، کالا پل ، کورنگی ڈی سی آفس ، دائود چورنگی ،نورانی کباب ہائو س شاہراہ قائدین ، مین سپر ہائے وے ، پاور ہائوس چورنگی ، ڈالمین شاپنگ مال حیدری ، اورنگی ٹائو ن پانچ نمبر چورنگی ، بنارس چوک ، واٹر پمپ چورنگی شاہراہ پاکستان ، قاضی چوک(9نمبر) بلدیہ ٹائو ن اورجوہر موڑ پر کیے گئے جن سے جماعت اسلامی کے ضلعی امرا و دیگر ذمے داران نے خطاب کیا ۔

ذریعہ: Jasarat News

کلیدی لفظ: احتجاجی مظاہرے جماعت اسلامی بجلی فراہم مہنگی بجلی کے الیکٹرک ا ئی پی پیز مظاہرے سے کراچی کو کراچی کے عوام کو کرنے کے کے خلاف کہا کہ

پڑھیں:

فلسطینیوں سے یکجہتی: کراچی میں جماعت اسلامی، جے یو آئی کے غزہ مارچ

کراچی (کامرس رپورٹر+ سٹاف رپورٹر) امیر جماعت اسلامی پاکستان حافظ نعیم الرحمن نے شاہراہ فیصل پر ’’یکجہتی غزہ مارچ‘‘ کے لاکھوں شرکاء سے خطاب کرتے ہوئے کہا ہے کہ حکمرانوں نے اہل غزہ و فلسطین کے لیے عملی کردار ادا نہ کیا تو تاریخ انہیں کبھی معاف نہیں کرے گی۔ حکومت پاکستان لیڈنگ رول اداکرے۔ وزیر اعظم شہباز شریف اور فوجی قیادت آگے بڑھیں۔ عالم اسلام کے حکمرانوں اور فوجی سپہ سالاروں کا اجلاس بلائیں اور اسرائیل کو مشترکہ طور پر واضح پیغام دیں کہ اگر فلسطینیوں کی نسل کشی بند نہ کی گئی تو ہم پیش قدمی کریں گے۔ حماس کی تحریک کبھی بھی ختم نہیں ہوسکتی۔ حماس محبت، خدمت، مزاحمت، مقاومت اور سامراج کے خلاف جہاد و قتال کا عنوان ہے۔ اہل غزہ و حماس سے اظہار یکجہتی کے لیے 22اپریل کو پورے ملک میں شٹر ڈاؤن ہڑتال ہوگی۔ اسلامی ممالک کے حکمرانوں کو خطوط ارسال کرچکے ہیں۔ صیہونی مصنوعات کے بائیکاٹ کی مہم مزید تیز کریں گے۔ بچوں کا بھی مارچ ہوگا۔ 18 اپریل کو ملتان اور 20 کو اسلام آباد میں پاکستان کی تاریخ کا سب سے بڑا مارچ ہوگا۔ ’’یکجہتی غزہ مارچ‘‘ سے چیئرمین القدس اتحاد المسلمین فضیلۃ الشیخ شیخ مروان ابو العاص، حماس کے ترجمان و غزہ کے رہائشی ڈاکٹر زوہیر ناجی، کاشف سعید شیخ، منعم ظفر خان، سیف الدین ایڈووکیٹ، توفیق الدین صدیقی، علامہ حسن ظفر نقوی،  یونس سوہن ایڈووکیٹ، آبش صدیقی نے بھی خطاب کیا۔ شارع فیصل لبیک یا اقصیٰ‘ لبیک یا غزہ کے نعروں سے گونج اٹھی۔ بچوں اور خواتین کی بڑی تعداد شریک ہوئی۔ ترانے اور نظمیں پڑھی گئیں۔ دریں اثنا جمعیت علمائے اسلام کے سربراہ مولانا فضل الرحمن نے اسرائیل مردہ باد ملین مارچ سے خطاب کرتے ہوئے کہا ہے کہ اسرائیلی جارحیت کے خلاف اور فلسطینی عوام سے اظہار یکجہتی کے لیے ہماری جدوجہد جاری رہے گی۔ اسرائیل کو تسلیم کرنے، سیاسی یا معاشی تعلقات قائم کرنے کی کوشش کرنے والوں کی ٹانگیں توڑ دی جائیں گی۔ اسرائیل کے حوالے سے بانی پاکستان قائد اعظم محمد علی جناح اور قیام پاکستان کا واضح موقف ہے کہ اسرائیل ایک ناجائز ریاست ہے۔ علمائے کرام نے مجلس اتحاد امت کے پلیٹ فارم سے جو جہاد کا فتویٰ دیا ہے، ہم سب اس کی تائید کرتے ہیں۔ اسرائیلی وزیر اعظم کو عالمی عدالت انصاف نے جنگی مجرم قرار دیا ہے، اس کو پھانسی دی جائے۔ ملین مارچ سے جمعیت علمائے اسلام سندھ کے امیر سائیں عبدالقیوم ہالیجوی، جنرل سیکرٹری مولانا راشد محمود سومرو، مرکزی رہنما انجینئر ضیاء الرحمن، محمد اسلم غوری، قاری محمد عثمان، مولانا عبدالکریم عابد، عبدالرزاق عابد لاکھو، حاجی عبدالمالک تالپور، مولانا محمد غیاث، مولانا سمیع الحق سواتی، حسین احمد آصفی، سلیم سندھی، مولانا نور الحق، مفتی محمد خالد اور دیگر نے بھی خطاب کیا۔ مولانا فضل الرحمن کے سٹیج پر آنے پر ان کا فقیدالمثال استقبال کیا گیا۔ شرکاء نے ہاتھوں میں فلسطین کے پرچم اٹھا رکھے تھے۔ شرکاء  نے اسرائیل مردہ باد اور فلسطین کی حمایت میں نعرے لگائے۔  بڑا سٹیج تیار کیا گیا تھا۔ جلسہ گاہ میں مولانا فضل الرحمن کو فلسطینی پرچم پہنایا گیا۔ مولانا فضل الرحمن نے ملین مارچ سے خطاب کرتے ہوئے کہا کہ آج کے اجتماع نے اہل عرب اور غزہ کو حوصلہ دیا ہے۔ فلسطینی عوام تنہا نہیں ہیں۔ ہم خون کے آخری قطرے تک ان کے ساتھ ہیں۔ مسلمان حکمران اپنی غیرت کا مظاہرہ کریں اور فلسطینیوں کی مدد کریں۔ لیکن اسلامی ممالک کے حکمران امریکہ کے پٹھو بن چکے ہیں۔ آج سب کو اٹھ کھڑا ہونا ہو گا اور اسرائیل کی جارحیت کو روکنا ہو گا۔ اسرائیل کوئی ملک نہیں۔ اس نے فلسطین پر قبضہ کیا ہوا ہے۔ برطانیہ کی عادت ہے کہ وہ دنیا میں تنازعات چھوڑ دیتا ہے۔ برصغیر سے چلا گیا اور کشمیر کا تنازع چھوڑ گیا۔ امریکہ کے ہاتھوں سے انسانی خون ٹپک رہا ہے۔ اسے اب قیادت کا کوئی حق حاصل نہیں ہے۔ انہوں نے کہا کہ آج دنیا کی معیشت تبدیل ہو رہی ہے۔ ایشیا کی معیشت پر قبضہ کرنے کی کوشش ہو رہی ہے۔ یہاں کی معدنیات اور قدرتی وسائل پر ان کی نظریں ہیں۔ اب 27 اپریل کو مینار پاکستان لاہور میں ’’مردہ باد اسرائیل ملین مارچ‘‘ ہو گا۔ راشد محمود سومرو نے کہا کہ حکومت کو کینال بنانے کا منصوبہ واپس لینا ہو گا۔ سندھ کے کسانوں کی جنگ لڑیں گے۔ کراچی میں ٹینکر مافیا کے خلاف آواز بھی جے یو آئی بلند کرے گی۔ سندھ میں جاگیرداروں کا راج نہیں چلے گا۔ ہم غزہ کی آواز ہیں۔ یہ انسانوں کا سمندر ہے۔ جے یو آئی کے رہنما مولانا ضیاء الرحمن نے کہاکہ فلسطین کے مسئلے پر امت مسلمہ کے حکمران خاموش ہیں۔ آج کا یہ مجمع انہیں یہ پیغام دیتا ہے کہ وہ خواب غفلت ختم کر دیں اور مظلوم فلسطینیوںکا ساتھ دیں۔ مولانا سمیع سواتی‘ مولانا صالح نے کہا اسلامی ممالک کے حکمرانوں کی خاموشی لمحہ فکریہ ہے۔ مولانا عبدالکریم عابد نے کہا کہ ہم غزہ کے مسلمانوں کے ساتھ ہیں اور ان کے لیے ہر ممکن مدد کی کوشش کریں گے۔