واشنگٹن حادثہ جاں بحق پاکستانی نژاد خاتون اسریٰ حسین کی حادثے سے قبل شوہر سے کیا بات چیت ہوئی؟
اشاعت کی تاریخ: 31st, January 2025 GMT
امریکی ایئر لائنز کی ذیلی کمپنی امریکن ایگل کی پرواز 5342 واشنگٹن کے رونلڈ ریگن نیشنل ایئرپورٹ کے قریب پہنچ چکی تھی اور توقع تھی کہ کچھ ہی دیر میں لینڈ کر جائے گی، طیارے میں 26 سالہ اسریٰ حسین بھی سوار تھی جبکہ ان کے شوہر حماد رضا پر ان کا انتظار کررہے تھے، اسریٰ حسین نے اپنے شوہر کو فون کیا کہ پرواز کے اترنے میں 20 منٹ ہی رہ گئے ہیں۔
یہ بھی پڑھیں: امریکی مسافر طیارے اور فوجی ہیلی کاپٹر میں تصادم، تمام 67 افراد ہلاک
حماد رضا اپنی اہلیہ اسریٰ حسین سے بات کرہی رہے تھے تھے کہ اچانک ایمرجنسی سروس کے لوگ ان کے پاس سے تیزی سے گزرے اور ساتھ ہی ان کا فون پر اپنی اہلیہ سے رابطہ بھی منقطع ہوگیا۔
معلوم ہوا کہ ان کی اہلیہ جس طیارے سے واشنگٹن آرہی ہے اس سے ایک فوجی ہیلی کاپٹر ٹکرا گیا ہے جس سے طیارہ تباہ ہوگیا ہے اور حادثے میں کسی کے زندہ بچنے کی کوئی امید نہیں ہے۔
یہ بھی پڑھیں: ’کوئی میری بیوی کو دریا سے نکال لے‘، امریکی طیارے کی مسافر خاتون کے شوہر کی ویڈیو وائرل
حماد رضا کے مطابق اسریٰ حسین نے انہیں فون پر پیغام بھی بھیجا کہ وہ 20 منٹ میں پہنچ جائیں گی، ان کے لیے گھر پر کھانا تیار تھا۔’ میں ہمیشہ اس کو واپسی پر ایئر پورٹ سے لیتا تھا اور اس کا سامان گاڑی میں رکھتا تھا۔‘
حماد رضا کے مطابق ان کی اسریٰ حسین سے ڈھائی سال قبل شادی ہوئی تھی اور دونوں کی ملاقات دوران تعلیم کالج میں ہوئی تھی۔ اسریٰ حسین اور حماد رضا بطور کنسلٹنٹ کام کرتے تھے، حماد رضا کا کہنا ہے کہ وہ اب تک یقین نہیں کر پائے کہ کیا ہوا ہے اور اپنی اہلیہ کے بارے میں سوچ رہے ہیں اور یہ کہ ’وہ جہاز میں کیا سوچ رہی ہوگی۔‘
یہ بھی پڑھیں: فلائٹ نمبر 404: گلگت سے اسلام آباد روانہ ہونے والا جہاز جو 35 سال بعد بھی لاپتا ہے
یاد رہے کہ حادثے کا شکار ہونے والے بدقسمت طیارے میں اسریٰ حسین اور عملے کے افراد سمیت 64 افراد سوار تھے، جن میں سے 28 افراد کی لاشیں نکالی جاچکی ہیں۔
اسریٰ حسین واشنگٹن سے ڈومیسٹک پرواز کے ذریعے کینساس کے شہر ویچیٹا کسی کام سے گئی تھیں اور واپس لوٹ رہی تھیں کہ حادثے کا شکار ہوگئیں۔
یہ بھی پڑھیں: کینیڈا: بہت دیر کی مہرباں، ڈوبے جہاز کا ملبہ 200 برس بعد ساحل پر آلگا
شوہر حامد رضا نے بتایا کہ ان کی اہلیہ ہوائی جہاز کے سفر سے گھبراتی تھیں اور ان کی کوشش ہوتی تھی کہ وہ ہوائی سفر نہ کریں۔
حماد رضا کے والد ڈاکٹر ہاشم رضا کا تعلق کراچی سے ہے اور وہ میزوری کے بیپٹیسٹ میڈیکل سینٹر میں خدمات انجام دے رہے ہیں۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
we news اسریٰ حسین امریکا ایئرلائن حادثہ پاکستان پاکستانی خاتون حماد رضا واشنگٹن.ذریعہ: WE News
کلیدی لفظ: امریکا ایئرلائن حادثہ پاکستان پاکستانی خاتون واشنگٹن
پڑھیں:
مراکش کشتی حادثہ میں بچ جانے والے 7 پاکستانی وطن واپس پہنچ گئے
مراکش میں گزشتہ دنوں تارکین وطن کی کشتی کو پیش آنے والے حادثے میں بچ جانے والے 7 پاکستانی شہری وطن واپس پہنچ گئے۔
میڈیا رپورٹس کے مطابق حادثے میں بچ جانے والے عامر علی، عزیز بشارت، عمران اقبال اور شعیب ظفر براستہ دبئی واپس اسلام آباد پہنچے، جبکہ محمد آصف، مدثرحسین اور عباس کاظمی براستہ دوحہ واپس آئے۔
یہ بھی پڑھیں یورپ جانے کا جنون، بحیرہ روم میں ایک اور کشتی الٹنے سے 44 پاکستانیوں سمیت 50 افراد ہلاک
حادثے میں بچ جانے والے شہریوں کا تعلق سیالکوٹ، حافظ آباد، گجرات اور منڈی بہاؤالدین سے ہے۔
ابتدائی تفتیش کے مطابق حادثے میں بچ جانے والے پاکستانی براستہ سینیگال اسپین جانا چاہتے تھے۔ اور انہوں نے ایجنٹ کے ساتھ فی کس 16 سے لاکھ سے 25 لاکھ روپے میں معاملے طے کیے تھے۔
میڈیا رپورٹس کے مطابق جن ایجنٹوں نے ان شہریوں سے باہر بھجوانے کے لیے رقم ہتھیائی ان کا تعلق سیالکوٹ، گجرات، لاہور اور وزیر آباد سے ہے، ادارے ان کی نشاندہی کے لیے معلومات لے رہے ہیں۔
یہ بھی پڑھیں یونان کشتی حادثہ:وزیراعظم نے انسانی اسمگلنگ سے متعلق رپورٹ طلب کرلی
واضح رہے کہ گزشتہ دنوں مغربی افریقہ سے کشتی کے ذریعے اسپین پہنچنے کی کوشش کرنے والے 50 تارکین وطن ڈوب کر ہلاک ہو گئے تھے جن میں سے 44 کا تعلق پاکستان سے تھا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
wenews پاکستانی تارکین وطن مراکش کشتی حادثہ وطن واپس پہنچ گئے وی نیوز
برطانیہ کیلئے پروازوں کی بحالی: برطانوی ٹیم آڈٹ کیلئے آج پاکستان پہنچے گی