Nai Baat:

کرائم فائٹر VS ٹک ٹاک فائٹر!

اشاعت کی تاریخ: 30th, January 2025 GMT

وزیراعلیٰ پنجاب مریم نواز شریف کی جانب سے پنجاب پولیس کے افسران کی کارکردگی جانچنے کے لیے "کی پرفارمینس انڈیکیٹرز ” (KPI )کا ایک سکور کارڈ بنایا گیا ہے ۔ 100 نمبر کے اس سکور کارڈ میں 37 ایسے انڈیکیٹرز ہیں جن کی بنیاد پر پنجاب کے تمام اضلاع کی پولیس کمانڈ کی کارکردگی جانچی جاتی ہے۔ پولیس افسران اسے سی ایم پرفارمہ بھی کہتے ہیں جس میں کرائم کنٹرول، 15 کالز، انوسٹی گیشن، کھلی کچہری، انسپکشن، ہارڈ کرینمل پالیسی، اشتہاریوں کی گرفتاری، کالز پر رسپانس اور شکایات کے ازالہ سمیت 37 چیزوں کا جائزہ لیا جاتا ہے۔ یہ رپورٹ وزیراعلیٰ آفس سے بنتی ہے جس کی باقاعدہ ویریفکیشن کی جاتی ہے ۔ مجھے یاد ہے کہ پنجاب میں تمام اضلاع کے افسران کو پوائنٹس دینے کا طریقہ ایک سابق آئی جی پنجاب نے شروع کیا تھا جس پر افسران اور کرائم رپورٹرز نے نجی نشستوں میں یہ کہہ کر مذاق اڑایا کہ اب پولیس افسران کو سکول کے طالب علموں کی طرح نمبر دیے جائیں گے؟ وزیراعلیٰ پنجاب نے یہ "کی پرفارمینس انڈیکیٹرز” اپنے ہاتھ میں لے کر زیادہ اچھا کیا کہ اب جواب دہی کا سلسلہ مزید مضبوط ہو گا۔
دسمبر کے "کی پرفارمنس انڈیکیٹر” کے مطابق پورے پنجاب میں سب سے اچھی کارکردگی ڈی پی او وہاڑی منصور امان کی ہے جو 89.

2 نمبرز کے ساتھ ٹاپ پر ہیں ۔ اس سے بھی اہم بات یہ ہے کہ انہوں نے اس ٹاپ پوزیشن پر رہنے کی ہیٹ ٹرک کی ہے ۔ اس سے پہلے اکتوبر اور نومبر میں بھی یہی منصور امان اور ان کا ضلع وہاڑی پہلے نمبر پر تھا جہاں کرائم میں 31 فیصد کمی ریکارڈ ہوئی ہے ۔ میری منصور امان سے واقفیت نہیں ہے لیکن یہ چارٹ دیکھ کر میں سوچ رہا ہوں منصور امان سے مل کر پوچھوں کہ انہوں نے ایسا کونسا سبق یاد کر لیا ہے جو باقی آفیسرز پڑھنا بھول گئے تھے ۔ کارکردگی میں دوسرا نمبر گوجرانولہ کا ہے ۔ یہاں کے سی پی او رانا ایاز سلیم کو میں جانتا ہوں ۔ وہ ماضی میں بطور ایس پی ایڈمن لاہور جو کام کر گئے اس کا مقابلہ پھر کوئی نہیں کر پایا ۔ انہوں نے لاہور پولیس سسٹم کو ٹیکنالوجی بیسڈ کر دیا ۔ خاص طور پر پولیس شہدا کے اہل خانہ کی جو خدمت کی اس سے لگتا ہے کہ شہدا کے بوڑھے والدین ، بچوں اور بیواں کی مستقل دعائیں ان کی کامیابی کی اصل وجہ ہیں ۔ گزشتہ دور حکومت میں انہیں اچانک کارنر کر دیا گیا ۔ شنید ہے کہ کسی نے
طاقت ور شخصیت کے کان میں پھونک مار دی تھی کہ رانا ایاز سلیم ایک سیاست دان کے کزن ہیں ۔کانوں کے کچے شخص کے لیے اتنا ہی کافی ہوتا ہے ۔ بہرحال دیوار سے لگانے والے خود دیوار سے ٹیک لگائے بیٹھے ہیں اور رانا ایاز سلیم جیسے آفیسر اپنی کارکردگی کے جوہر دکھا رہے ہیں ۔ تیسرے نمبر پر ڈی پی او ساہیوال فیصل شہزاد ہیں جنہیں اب سیالکوٹ میں ڈی پی او لگا دیا گیا ہے ۔انہیں بھی متحرک افسر کے طور پر جانا جاتا ہے ۔ چوتھے نمبر پر ڈی پی او قصور محمد عیسی ہیں ۔ قصور ایک عرصہ تک ایسا ضلع سمجھا جاتا رہا ہے جہاں افسران تعینات ہونے سے بچتے تھے ۔ کئی کامیاب ڈی پی اوز قصور میں ناکام ہوئے ۔ حسین خان والا ویڈیو سکینڈل سے لے کر زینب ریپ کیس تک اور جعلی این کاونٹرز سے منشیات سینڈیکیٹ تک ، قصور ملکی میڈیا کی توجہ کا مرکز رہا ہے ۔ ایسے مشکل ضلع میں کارکردگی کی بنیاد پر پورے صوبے کو پیچھے چھوڑ جانا ڈی پی او محمد عیسی کی بہت بڑی کامیابی ہے ۔اسے بھی ہم جیسے کرائم آبزرور ٹیسٹ کیس کے طور پر دیکھ رہے ہیں ۔ ٹاپ فائیو میں پانچویں نمبر پر سی پی او ملتان صادق علی ڈوگر ہیں ۔ یہ بھی ایسے آفیسر ہیں جو اس سے قبل پنجاب کے مختلف اضلاع میں ڈی پی او تعینات رہے اور انہوں نے مشکل اضلاع میں بھی اچھا رزلٹ دیا ہے۔
میرے لیے دلچسپی کی بات یہ ہے کہ صوبے بھر میں سب سے اہم شہر لاہور ہے لیکن "کی پرفارمینس انڈیکیٹرز” کے مطابق لاہور 36 اضلاع میں سے 24 ویں نمبر پر ہے جبکہ راجن پور پولیس کی پرفارمنس لاہور سے بہتر ہے ۔ میڈیا پر عموما لاہور پولیس کی پرفارمنس کا زیادہ چرچا رہتا ہے ، پریس کانفرنس اور انٹرویوز بھی لاہور پولیس کے ہوتے ہیں لیکن بازی بہرحال وہاڑی اور گوجرانولہ پولیس لے گئی ہے۔ یاد آتا ہے کہ گزشتہ برس ماہ جون جولائی کی پرفارمنس رپورٹ میں لاہور پولیس نے 68.64 نمبروں کے ساتھ پہلی پوزیشن حاصل کی تھی لیکن اس وقت پورے ضلع کو تین کیٹگریز میں تقسیم کیا گیا تھا ۔ بڑے شہروں میں لاہور، گوجرانوالہ، فیصل آباد، ملتان اور راولپنڈی کا ایک گروپ تھا ، دوسرے گروپ میں بھکر، میانوالی، سرگودھا اور راجن پور سمیت 14 اضلاع اور تیسری کیٹگری میں خانیوال، چکوال، خوشاب، ننکانہ صاحب اور منڈی بہاالدین سمیت 17 اضلاع کو شامل کیا گیا تھا ۔ اس وقت بھی گروپ اے میں تو لاہور پولیس ٹاپ پر تھی لیکن مجموعی طور پر بھکر پولیس 74.37 نمبروں کے ساتھ سب سے آگے تھی جو اس بار کم از کم لاہور سے ایک درجہ نیچے آ چکی ہے ۔
جب میں نے ایک جگہ لاہور پولیس کی پرفارمنس پر بات کی تو لاہور کے کرائم فائٹر انسپکٹرز خصوصا ناصر حمید ، اشتیاق احمد اور رانا نعیم اللہ وغیرہ مجھ سے باقاعدہ ناراض ہو گئے ۔ان کا کہنا تھا کہ لاہور جیسے بڑے شہر کا تقابل چھوٹے اضلاع سے نہیں کیا جا سکتا ۔ اس حد تک تو یہ بات درست ہے کہ پنجاب کے 737 کے لگ بھگ پولیس اسٹیشنز میں سے 84 پولیس اسٹیشن صرف لاہور میں ہیں ۔آبادی کے لحاظ سے بھی لاہور دیگر اضلاع سے بہت بڑا ہے لیکن یہ بھی درست ہے کہ لاہور پولیس کے پاس دستیاب سہولیات بھی دیگر اضلاع کی نسبت بہت زیادہ ہیں ۔ کئی ایسے پولیس آفیسر ہیں جنہیں آئی جی پنجاب اور سی سی پی او لاہور میں سے کسی ایک سیٹ کا اختیار دیا جائے تو وہ آئی جی شپ کی بجائے سی سی پی او لاہور لگنے کو ترجیح دیں ۔
بہرحال اس پرفارمنس سکور کارڈ کے مطابق میڈیا سے دور چھوٹے اضلاع کی کارکردگی دلچسپ رہی ہے ۔اس سے بھی اہم بات یہ سامنے آئی کہ سوشل میڈیا پر کامیاب سمجھے جانے والے آفیسرز اور اضلاع بھی وزیراعلیٰ کے پرفارمہ انڈیکیٹر میں پیچھے ہیں ۔ سوشل میڈیا خصوصا ٹک ٹاک پر سب سے زیادہ متحرک اور بہترین آفیسر سمجھے جانے والے ڈی پی او چکوال احمد محی الدین ہیں جن کی ویڈیوز خصوصا کھلی کچہریوں میں انصاف کی فراہمی کی ویڈیوز انتہائی متاثر کن ہے ۔ بدقسمتی سے وزیراعلیٰ کے اس کی پرفارمینس انڈیکیٹرز کے اسکور بورڈ پر ان کے ضلع کی پولیس کارکردگی آخر سے دوسرے نمبر پر ہے یعنی 36 اضلاع میں سے چکوال 35 ویں نمبر پر ہے جبکہ 36 ویں نمبر پر بھی ایسا ضلع ہے جو سوشل میڈیا اور نیشنل میڈیا پر اپنے ویڈیو پیکجز اور خبروں کی وجہ سے سب سے اوپر نظر آتا ہے ۔ سابق وزیراعظم کی اس ضلع پر خاص نظر کرم رہی اور یہاں ٹورسٹ پولیس تک متعارف کروائی گئی ۔اس بار ننکانہ پولیس کی کارکردگی پورے پنجاب میں سب سے کم رہی ہے۔ وزیراعلیٰ پنجاب کو چاہیے کہ ایسی "کی پرفارمینس انڈیکیٹرز” ہر محکمہ میں متعارف کرائیں اور بیوروکریسی کی کارکردگی کو بھی جانچیں۔ ممکن ہے اس کے بعد انہیں پولیس مظلوم لگنے لگے۔

ذریعہ: Nai Baat

کلیدی لفظ: کی کارکردگی کی پرفارمنس لاہور پولیس اضلاع میں پولیس کی انہوں نے ڈی پی او سی پی او سے بھی

پڑھیں:

پنجاب سیاحوں کی میزبانی کیلئے مکمل طور پر تیار ہے: مریم نواز شریف

لاہور( نیوزڈیسک) وزیراعلیٰ پنجاب مریم نواز شریف نے کہا کہ پنجاب سیاحوں کی میزبانی کیلئے مکمل طور پر تیار ہے، ای سی او کے معزز مہمانوں کی موجودگی ہمارے لئے باعثِ اعزاز ہے۔

وزیراعلیٰ پنجاب مریم نواز شریف سے اکنامک کوآپریشن آرگنائزیشن کے 25 رکنی وفد نے ملاقات کی، وفد میں تاجکستان، ازبکستان، ترکیہ، ایران اور پاکستان کے سی ایم او میں مستقل مندوب شامل تھے، وفد کی سربراہی ای سی او کے سیکرٹری جنرل اسد مجید خان نے کی۔

مریم نواز نے وفد کی لاہور آمد پر پرتپاک خیر مقدم کیا، سینئر وزیر مریم اورنگزیب نے شرکاء کو بریفنگ دی، وزیراعلیٰ پنجاب نے لاہور کو ای سی او کیپٹل قرار دینے میں معاونت پر ترکمانستان کا شکریہ ادا کیا۔

اس موقع پر گفتگو کرتے ہوئے وزیراعلیٰ پنجاب کا کہنا تھا کہ ای سی او کے معزز مہمانوں کی موجودگی ہمارے لئے باعثِ اعزاز ہے، قدیم اور جدید ثقافت کے شہر لاہور سے محبت ہے، سابق وزیراعظم نواز شریف اپنی ذاتی نگرانی میں لاہور کی ثقافتی بحالی کیلئے کوشاں ہیں۔

انہوں نے کہا کہ لاہور صرف ایک شہر نہیں بلکہ زندہ تاریخ کا میوزیم ہے، لاہور کی گلیوں میں تہذیب کی خوشبو ہے، شہر کے آثار قدیمہ ماضی کی عظمت کے گواہ ہیں، لاہور کے لوگ پیار اور محبت کے پیکر ہیں، لاہوریوں کی میزبانی بے مثال ہے۔

مریم نواز شریف کا کہنا تھا کہ لاہور کے باغات شاہی قلعے اور یونیسکو ورلڈ ہیریٹیج سائٹس اس کی شان و شوکت کا ثبوت ہیں، لاہور نہ صرف تاریخ کا محافظ ہے بلکہ ذائقوں کا مرکز بھی ہے، پنجاب سیاحوں کی میزبانی کیلئے مکمل طور پر تیار ہے، ٹورازم سیکٹر کو ایک نئی صنعت کے طور پرفروغ دینے کیلئے پرعزم ہیں۔

انہوں نے کہا کہ پنجاب حکومت نہ صرف لاہور بلکہ پورے صوبے میں سیاحتی مقامات کو اپ گریڈ کر رہی ہے، ملکی و غیر ملکی سیاحوں کو ہر ممکن سہولت فراہم کی جا رہی ہے۔

وزیراعلیٰ پنجاب کا کہنا تھا پنجاب کاروبار، ٹیکنالوجی اور سروسز کا ابھرتا ہوا مرکز بنتا جا رہا ہے، پنجاب میں زراعت، ٹیکنالوجی، ٹورازم، تعلیم، انڈسٹری اور دیگر شعبوں میں بے پناہ مواقع موجود ہیں، پنجاب میں فارن انویسٹر کیلئے ہر شعبے میں سرمایہ کاری کیلئے زمین ہموار کی جا چکی ہے۔

اس موقع پر سیکرٹری جنرل ای سی او اسد مجید کا کہنا تھا کہ سابق وزیراعظم نواز شریف کی قیادت میں 1992 میں پاکستان ای سی او میں شامل ہوا، وزیراعظم، وزیراعلیٰ پنجاب، سیکرٹری جنرل ای سی او کا لاہور سے ہونا خوشگوار ہے۔

اکنامک کوآپریشن آرگنائزیشن کے وفد نے لاہور کی خوبصورتی، ثقافتی بحالی اور سیاحت کے فروغ کیلئے وزیراعلیٰ مریم نواز شریف اور ان کی ٹیم کی کاوشوں کو سراہا، وفد کے شرکا نے وزیراعلیٰ مریم نواز شریف کو شاندار خطاطی کا نمونہ اور دیگر یادگاری سوونیئر پیش کئے۔

Post Views: 2