القادر ٹرسٹ کیس: سزاؤں کے خلاف عمران خان اور بشریٰ بی بی کی اپیلیں دائر
اشاعت کی تاریخ: 27th, January 2025 GMT
اسلام آباد (اُردو پوائنٹ ۔ DW اردو۔ 27 جنوری 2025ء) پاکستان کے جیل میں قید سابق وزیر اعظم عمران خان اور ان کی اہلیہ بشریٰ بی بی نے پیر کے روز بدعنوانی سے متعلق القادر ٹرسٹ کیس میں اپنی سزاؤں کے خلاف درخواستیں دائر کر دیں۔
اس بات کی تصدیق کرتے ہوئے عمران خان کے وکیل خالد یوسف چوہدری نے خبر رساں ادارے اے ایف پی سے اسلام آباد ہائی کورٹ کے باہر گفتگو کے دوران کہا، ''ہم نے آج اپیلیں جمع کرا دی ہیں اور اگلے چند دنوں میں اس حوالے سے دفتری کارروائی کے بعد انہیں سماعت کے لیے مقرر کر دیا جائے گا۔
‘‘عمران خان اگست 2023ء سے جیل میں ہیں اور ان کے خلاف تقریباﹰ 200 مقدمات درج کیے گئے ہیں۔ تاہم عمران خان کا دعویٰ ہے کہ ان کے خلاف یہ مقدمات سیاسی بنیادوں پر قائم کیے گئے ہیں۔
(جاری ہے)
ان میں سے القادر ٹرسٹ کیس میں عدالت نے اسی ماہ عمران خان کو 14 سال اور بشریٰ بی بی کو سات ماہ قید کی سزائیں سنائی تھیں۔ عدالت نے ان دونوں کو ''بدعنوانی‘‘ کے مرتکب پایا تھا۔
اس سے قبل یہ فیصلہ تین بار مؤخر کیا گیا تھا۔ اس حوالے سے عمران خان کی سیاسی جماعت پاکستان تحریک انصاف (پی ٹی آئی) کا دعویٰ تھا کہ فیصلے میں تاخیر کا مقصد عمران خان پر موجودہ حکومت کے ساتھ ایک معاہدہ کر کے سیاست سے علحیدگی اختیار کرنے کے لیے دباؤ ڈالنا تھا۔
اے ایف پی کے مطابق اس وقت پاکستان میں عمران خان کی مقبولیت میں اضافہ دیکھا جا رہا ہے اور جیل سے وہ اپنے وکلا کے ذریعے موجودہ حکومت کے خلاف تنقیدی بیانات جاری کرتے رہے ہیں۔
پاکستان میں سیاسی تناؤ کم کرنے کے لیے پی ٹی آئی اور حکومت کے مابین بات چیت کا سلسلہ بھی شروع ہوا تھا لیکن پچھلے ہفتے عمران خان نے ان مذاکرات کی منسوخی کا فیصلہ کیا تھا۔
سن 2022 میں اس وقت کی اپوزیشن جماعتوں کی جانب سے لائی گئی ایک تحریک عدم اعتماد عمران خان کی اقتدار سے بر طرفی کا سبب بنی تھی۔ تب سے ہی وہ فوجی اسٹیبلشمنٹ پر بھی تنقید کرتے رہے ہیں۔
م ا / م م (اے ایف پی)
.ذریعہ: UrduPoint
کلیدی لفظ: تلاش کیجئے کے خلاف
پڑھیں:
190ملین پاونڈ کیس میں سزا کیخلاف بانی پی ٹی آئی اور بشریٰ بی بی کی اپیلیں دائر
—فائل فوٹو190 ملین پاؤنڈ ریفرنس میں سزا کے خلاف بانئ پی ٹی آئی اور بشریٰ بی بی کی اپیلیں اسلام آباد ہائی کورٹ میں دائر کر دی گئیں۔
بانئ پی ٹی آئی اور بشریٰ بی بی کی جانب سے اپیلیں خالد یوسف چوہدری نے دائر کیں۔
اپیل میں مؤقف اپنایا گیا ہے کہ نیب نے بدنیتی سے اپنے اختیارات کا غلط استعمال کیا، نامکمل تفتیش کی بنیاد پر جلد بازی میں سزا سنائی گئی۔
بانیٔ پی ٹی آئی اور بشریٰ بی بی پر الزام ہے کہ انہوں نے 190 ملین پاؤنڈ پاکستان منتقل ہونے سے قبل ’ایسٹ ریکوری یونٹ‘ کے سربراہ شہزاد اکبر کے ذریعے پراپرٹی ٹائیکون سے خفیہ معاہدہ کیا۔
درخواست میں کہا گیا ہے کہ این سی اے سے معاہدے کا متن حاصل نہ کرنا تفتیشی ایجنسی کی ہچکچاہٹ کو واضح کرتا ہے، این سی اے حکام کو شامل تفتیش بھی نہیں کیا گیا، استغاثہ مکمل شواہد پیش کرنے میں ناکام رہی۔
اپیل میں اسلام آباد ہائی کورٹ سے سزا کالعدم قرار دینے کی استدعا کی گئی ہے۔
اسلام آباد ہائی کورٹ احتساب عدالت کا 17 جنوری کا فیصلہ کالعدم قرار دے، بانئ پی ٹی آئی اور بشریٰ بی بی کو بری کیا جائے۔
واضح رہے کہ راولپنڈی کی احتساب عدالت کے جج ناصر جاوید رانا نے اڈیالہ جیل میں 190 بلین پاؤنڈ کے ریفرنس میں بانیٔ پی ٹی آئی کو 14 سال جبکہ بشریٰ بی بی کو 7 سال قید کی سزا سنائی تھی۔
علاوہ ازیں بانیٔ پی ٹی آئی کو 10 لاکھ روپے اور بشریٰ بی بی کو 5 لاکھ روپے جرمانے کی سزا بھی سنائی گئی تھی۔
پارلیمنٹ کا مشترکہ اجلاس طلب