خود کو کبھی سیلف میڈ نہ کہیں
اشاعت کی تاریخ: 18th, January 2025 GMT
’’اس کی وجہ تکبر ہے‘ ہر کام یاب انسان اپنی کامیابی کو ذاتی اچیومنٹ سمجھتا ہے‘ یہ احساس اس کے اندرغرور اور تکبر پیدا کر دیتا ہے اور یہاں سے خرابی جنم لیتی ہے‘‘ ان کے چہرے پر مسکراہٹ تھی‘ یہ ایک خاص قسم کی مسکراہٹ تھی اوریہ مسکراہٹ دنیا کے ہر صوفی‘ ہر نیک‘ عالم اور اصلی دانشور کے چہرے پر ہوتی ہے۔
دنیا کا ہر صوفی‘ ہر عالم اور ہر نیک شخص اپنی نیکی‘ اپنے علم اور اپنے تصوف کو لوگوں سے چھپا کر رکھتا ہے لیکن وہ اپنی مسکراہٹ نہیں چھپا پاتا۔ یہ مسکراہٹ اچھے لوگوں کا ٹریڈ مارک ہوتی ہے اور یہ آپ کو مدرٹریسا سے لے کر نیلسن منڈیلا‘ میاں محمد بخش سے شاہ حسین اور امام غزالیؒ سے لے کر مولانا رومؒ تک دنیا کے ہر اچھے‘بڑے‘ نیک‘ عالم اور صوفی کے چہرے پر دکھائی دیتی ہے۔
میں نے ہمیشہ اچھے لوگوں کو ان کی اس مسکراہٹ سے پہچانا‘ میں نے ان سے ایک ایسا سوال پوچھا جومیرے دل میں ہمیشہ سے کھٹکتاچلا آ رہا ہے ۔ میں نے ان سے پوچھا ’’دنیا کا ہر کام یاب انسان آخر میں تنہا کیوں ہوتا ہے؟‘‘ انھوں نے فوراً جواب دیا ’’اپنے تکبر اور غرور کی وجہ سے‘‘ میں ان سے تفصیل کا متقاضی تھا‘ وہ بولے ’’دنیا میں تکبر کی سب سے بڑی شکل سیلف میڈ ہے‘‘میں نے حیرت سے ان کی طرف دیکھا‘ انھوں نے فرمایا ’’جب کوئی انسان اپنے آپ اور اپنی کام یابیوں کو سیلف میڈ کا نام دیتا ہے تو وہ نہ صرف اﷲ تعالیٰ‘ قدرت اورفطرت کی نفی کرتاہے بلکہ وہ ان تمام انسانوں کے احسانات اور مہربانیوں کو بھی روند ڈالتا ہے جنھوں نے اس کی کام یابی میں مرکزی کردار ادا کیا تھا اور یہ دنیا کا بدترین تکبرہوتاہے‘‘۔
وہ رکے‘ چند لمحے سوچا اور اس کے بعد بولے ’’تم فرعون اور نمرود کو دیکھ لو‘یہ دونوں انتہا درجے کے ذہین‘ فطین اور باصلاحیت حکمران تھے‘ فرعون نے نعشوں کو حنوط کرنے کا طریقہ ایجاد کیاتھا‘ اس نے ایک ایسی سیاہی بھی بنوائی تھی جو قیامت تک مدھم نہیں ہوتی‘ اس نے ایسے احرام بھی تیار کیے تھے جن کی ہیئت کو آج تک کی جدید سائنس نہیں سمجھ پائی۔
اس نے دنیامیں آب پاشی کا پہلا نظام بھی بنایا تھا اور فرعون کے دور میں مصر کے صحراؤں میں بھی کھیتی باڑی ہوتی تھی لیکن یہ فرعون بعدازاں عبرت کی نشانی بن گیا۔ کیوں؟‘‘ انھوںنے میری طرف دیکھا‘ میں نے فوراً عرض کیا ’’اپنے تکبر‘ اپنے غرور کی وجہ سے‘‘ انھوں نے اثبات میں سر ہلایا اور مسکرا کر بولے ’’ہاں لیکن فرعون کا تکبر سیلف میڈ لوگوں کے غرور سے چھوٹا تھا‘ اس نے صرف اﷲ کی نفی کی تھی‘ وہ اﷲ کے سوا اپنے تمام بزرگوں‘اپنے تمام دوستوں اور اپنے تمام مہربانوں کا احسان تسلیم کرتا تھا۔
وہ اپنے استادوں کو دربار میں خصوصی جگہ دیتا تھا اور وہ اپنی بیویوں کا اتنا احترام کرتا تھا کہ اس نے اپنی اہلیہ محترمہ کے کہنے پر حضرت موسیٰ ؑکو گود لے لیا تھا‘‘ وہ رکے اور دوبارہ بولے ’’تم نمرود کو دیکھو‘ نمرود نے کھیتی باڑی کے جدید طریقے ایجاد کرائے تھے۔
اس نے دنیا میں پہلی بار زمین کو یونٹوں میں تقسیم کیاتھا‘ اس نے اونچی عمارتیں بنوائیں تھیں‘ اس نے شہروں میں فوارے لگوائے تھے‘ اس نے دنیا میں پہلی بار درخت کاٹنے کی سزا تجویز کی تھی اور وہ دنیا کا پہلا بادشاہ تھا جس کے ملک سے غربت اوربے روزگاری ختم ہو گئی تھی اور جس کی رعایا کاہر فرد خوشحال اور مطمئن تھا۔
لیکن پھر یہ بادشاہ بھی اﷲ کے عذاب کاشکار ہوا۔ کیوں؟‘‘ میںنے فوراً عرض کیا ’’غرور کی وجہ سے‘‘ انھوں نے اثبات میں سر ہلایا اور بولے ’’ہاں وہ اﷲ کے وجود کی نفی کا مرتکب ہوا تھا اور یہ اس کا واحد جرم تھاجب کہ عام زندگی میں وہ ایک اچھا انسان اور شان دار بادشاہ تھا‘ وہ مہمان نواز تھا‘ وہ شائستگی کو ہاتھ سے نہیں جانے دیتا تھا‘ اس نے اپنے دربار میںدنیا جہاں کے عالم اورماہرین جمع کررکھے تھے‘ وہ بہادری اور شجاعت میں یکتا تھا‘ وہ اپنے دوست احباب‘ ماں‘ باپ اور عزیز رشتے داروں کا بھی احترام کرتا تھا اوروہ لوگوں کے احسانات اور مہربانیوں کو بھی یاد رکھتا تھا لیکن اس نے اﷲ کی ذات کی نفی کی‘ خود کو خدا کہہ بیٹھا اور اﷲ کی پکڑ میں آ گیا‘‘ وہ رک گئے۔
وہ چند لمحے سوچتے رہے اور اس کے بعد بولے ’’فرعون اور نمرود نے صرف اﷲ کی ذات میں برابری کی تھی جب کہ خود کو سیلف میڈ کہنے والا شخص نعوذ باللہ نہ صرف اس سے برتری کا دعویٰ کرتا ہے بلکہ وہ دنیا بھر کے ان لوگوں کے احسانات بھی فراموش کردیتا ہے جنھوں نے اس کی کام یابی میں کلیدی کردار ادا کیا۔
چناںچہ یہ شخص فرعون اور نمرود کے مقابلے میں بھی کئی گنا بڑے غرور اور تکبر کامظاہرہ کرتا ہے لہٰذا یہ آخر میں اﷲ کی پکڑ میں آ جاتاہے اور اﷲ تعالیٰ اس پرتنہائی کا عذاب نازل فرما دیتا ہے‘‘ وہ رکے‘ انھوںنے ایک لمبا سانس لیا اور دوبارہ بولے ’’انسان مجلسی جانور ہے۔
انسان‘ انسان کا محتاج ہے‘ ہم سب اپنے جیسے لوگوں میں بیٹھنا چاہتے ہیں‘ ان کے ساتھ گپ شپ کرنا چاہتے ہیں‘ ان کے ساتھ اپنے جذبات شیئر کرنا چاہتے ہیں‘ ہمارے لیے سب سے بڑی سزا تنہائی ہوتی ہے اسی لیے قید تنہائی کو دنیا میں سب سے سنگین سزاقرار دیا گیا۔
انسان بڑے سے بڑا عذاب برداشت کر جاتاہے لیکن وہ تنہائی کی سزا نہیں بھگت سکتا۔ اﷲ تعالیٰ کیوںکہ ہماری رگ رگ‘ ہماری نس نس سے واقف ہے چناںچہ وہ خود کو سیلف میڈ قرار دینے والوں کو تنہائی کی حتمی سزا دیتا ہے۔ تم دیکھ لو‘ دنیا میں جس بھی شخص نے خود کو سیلف میڈ قرار دیا‘ جس نے بھی اپنی اچیومنٹس کو اپنی ذاتی کوشش‘ جدوجہد اور محنت کا نتیجہ کہا وہ کام یابی کی آخری اسٹیج پر پہنچ کر تنہائی کا شکار ہوگیا۔
وہ تنہائی کی موت مرا‘‘ وہ خاموش ہوگئے‘ میں چند لمحے انھیں دیکھتا رہا‘ جب خاموشی کا وقفہ طویل ہو گیا تو میں نے عرض کیا ’’ہمیں سیلف میڈ کے بجائے کیا کہنا چاہیے‘‘ وہ فوراً بولے ’’اﷲ میڈ‘‘وہ چندلمحے مجھے دیکھتے رہے اور اس کے بعد بولے ’’ کام یاب اور کامران لوگوں پر اﷲ کا خصوصی کرم ہوتا ہے‘ اﷲ ان لوگوں کو کروڑوں‘ اربوں لوگوں میں سے کام یابی کے لیے خصوصی طور پر چنتا ہے‘ انھیں وژن اور آئیڈیاز دیتا ہے‘ ان کو محنت کرنے کی طاقت دیتا ہے‘ انھیں دوسرے انسانوں کے مقابلے میں زیادہ توانائی بخشتا ہے‘ ان کے آگے بڑھنے کے خصوصی مواقع پیدا کرتا ہے‘ ان کے لیے کام یابی کے راستے کھولتا ہے‘ معاشرے کے بااثر اوراہم لوگوں کے دلوں میں ان کے لیے محبت اور ہمدردی پیدا کرتاہے اور آخر میں تمام لوگوں کو حکم دیتاہے وہ ان لوگوں کو کام یاب تسلیم کریں‘ وہ اپنی نشستوں سے اٹھ کر ان کے لیے تالی بجائیں۔
اگریہ حقیقت ہے تو پھر یہ ساری کام یابی اﷲ کی کامیابی نہ ہوئی‘ہم لوگ اورہماری ساری کام یابیاں اﷲ میڈ نہ ہوئیں‘ تم سوچو‘ تم بتاؤ‘‘ ۔ انھوںنے رک کر میری طرف دیکھا‘ میں نے اثبات میں سر ہلا دیا۔
وہ بولے ’’ اور جب کوئی کام یاب شخص اپنی کام یابی کو اﷲ کا کرم اور مہربانی قرار دیتا ہے تو اﷲ تعالیٰ اس کے جواب میںاس کے گرد رونق لگا دیتاہے‘ وہ لوگوں کے دلوں میں اس شخص کے لیے محبت ڈال دیتاہے یوں یہ شخص زندگی کی آخری سانس تک لوگوں کی محبت اور رونق سے لطف اٹھاتا رہتا ہے‘ اﷲ اس کی زندگی پر تنہائی کا سایہ نہیں پڑنے دیتا‘‘۔
میں نے ان کی طرف دیکھا اور ڈرتے ڈرتے پوچھا ’’پھر انسان کی زندگی میں اس کی کوشش اور جدوجہد کا کیا مقام ہوا؟‘‘ انھوںنے غور سے میری طرف دیکھا اور بولے ’’ہماری کیا مجال ہے ہم اس کی اجازت کے بغیر محنت کر سکیں یا ہم اس کی مہربانی کے بغیرجدوجہد کر سکیں‘ ہم میں تو اتنی مجال نہیں کہ ہم اس کی رضا مندی کے بغیر اس کانام تک لے سکیں‘ پھر ہماری محنت‘ ہماری جدوجہد کی کیا حیثیت ہے‘ یہ سب اﷲ کی مہربانی کا کھیل ہے‘ یہ سب اﷲ میڈ ہے‘ ہم اور ہم سب کی کام یابیاں اﷲ میڈ ہیں‘ خدا کے بندو‘اﷲ کے کریڈٹ کو تسلیم کرو تا کہ تمہاری زندگیاں تنہائیوں سے بچ سکیں‘ تم پر غم کا سایہ نہ پڑے‘‘۔وہ رکے اور اس کے بعد زور دے کر بولے ’’یاد رکھو‘ زندگی میں کبھی خود کو سیلف میڈ نہ کہو‘ ہمیشہ اپنے آپ کو اﷲ میڈ سمجھو‘ اﷲ تم پر بڑا کرم کرے گا‘‘۔
.ذریعہ: Express News
کلیدی لفظ: اور اس کے بعد طرف دیکھا اﷲ تعالی لوگوں کے دنیا میں انھوں نے ان لوگوں لوگوں کو عالم اور کام یابی تھا اور دنیا کا کام یاب اﷲ میڈ کی نفی کی کام وہ رکے ہے اور کی وجہ کے لیے اور یہ
پڑھیں:
کیا وہ واقعی پاگل تھا؟
ایک پاگل تھا، پاگل ہی تھا کیوں کہ وہ جو کچھ کرتا تھا، بولتا تھا ، وہ پاگل ہی کرتے ، دانا، ہوشیار اورعقل مند نہیں کرتے۔ وہ نہ جانے کہاں سے آیا تھا ، گاؤں کے کنارے قبرستان کے پاس جوتے گانٹھنے کا اڈہ لگائے ہوئے تھا، جوتے بڑے کمال کے گانٹھتا تھا اورپیسے بھی بہت کم لیتا تھا، اس لیے لوگ اچھی تعداد میں آتے تھے۔
ایک دن گاؤں کے کچھ شریر لڑکوں نے سوچا کہ یہ بہت کماتا ہے، اس کے پاس بہت مال ہوگا لیکن اڈے کی تلاشی لی تو کچھ بھی نہ ملا چنانچہ غصے میں اس کے سارے آوزار لے جاکر کہیں دبادیے۔ بیچارے کے پاس آوزار نہ رہے تو مزدوری کرنے لگا لیکن یہاں سارے مزدور اس کے دشمن ہوگئے کہ وہ ان کی طرح کام چوری نہیں کرتا تھا، جی جان لگا کر کام کرتا تھا۔ مزدوروں نے اسے اپنے ڈھب پر لانا چاہا لیکن اس نے انکار کرتے ہوئے کہا کہ میں حق حلال روزی کماؤں گا ۔
آخر مزدوروں نے جب دیکھا کہ وہ پورا کام کرکے مالکوں کوخوش کرتا ہے اورہمارے بارے میں بدظن کررہا ہے تو ایک دن اس کی جھونپڑی میں گھس کر اسے خوب مارا پیٹا اورجو کچھ ہاتھ لگا، وہ بھی لے گئے لیکن اسپتال میں اس نے کسی پر الزام نہیں لگایا، تشدد کرنے والے مطمئن ہوگئے کہ ہماری نقاب پوشی کی وجہ سے اس نے ہمیں پہچانا نہیں ہے لیکن جب وہ دکھاوے کی عیادت کے لیے گئے تو اس نے کہا، میں نے تم سب کو پہچانا ہے اورمعاف بھی کردیا ہے لیکن استدعاکرتا ہوں کہ راہ راست پر آجاؤ، حرام کی مت کماؤ ،حلال میں برکت ہوتی ہے ۔
وہ متعجب ہوکر بولے، جب تم نے ہمیں پہچان لیا تھا تو پولیس کے سامنے ہمارا نام کیوں نہیں لیا۔ جواب میں اس نے کہا ، پولیس والے تمہیں لے جاتے تو پیچھے تمہارے بچے پریشان ہوجاتے ، بھوک کاشکار بھی ہوجاتے، اس لیے ۔وہ لوگ اتنے ممنون اورمتاثر ہوگئے کہ انھوں نے بھی ایمانداری سے کام شروع کر دیا۔ وہ لڑکے جو اس کے اوزار لے گئے تھے، برے نہیں تھے، صرف بگڑے بچے تھے اوران ہی لوگوں کے تھے، انھوں نے بھی ایک دن چپکے سے اوزار اس کی چھونپڑی میں رکھ دیے ۔
اسپتال سے فارغ ہوکر اس نے پھر اپنا کام شروع کردیا، لوگوں کو اس بات پر حیرانی تھی کہ وہ پیسے کما کر لے جاتا کہاں ہے؟ اپنے اوپر تو ایک پیسہ بھی خرچ نہیں کرتا، پھر لوگوں کو آہستہ آہستہ پتہ چل گیا کہ وہ چپکے چپکے سے گاؤں کے غریبوں ، بیواؤں ، یتیموں اورمعذوروں پر اپنی کمائی خرچ کرتا ہے ۔ایک اورکام وہ یہ بھی کرتا تھا کہ گاؤں میں جہاں جہاں وہ راستے خراب دیکھتا، اسے ٹھیک کردیتا تھا، کوڑا کرکٹ بھی صاف کرتا تھا، کسی کے ہاں میت ہوتی، قبرکھودنے بھی لگ جاتا ، قبرستان کی شکستہ قبریں بھی ٹھیک کرتا تھا اوراس میں درخت بھی لگاتا تھا ،تھوڑے ہی عرصے میں قبرستان سایہ دار درختوں سے بھر گیا اورتجہیز و تکفین کو آنے والے جو پہلے دھوپ میں جلتے تھے ،اب سائے میں آرام سے رہتے۔ اپنے اڈے کے قریب قبرستان میں اس نے ایک کنواں بھی کھدوایا ، لوگ اب وہاں آسانی سے وضو بھی کرتے اورپانی بھی پیتے ۔ آہستہ آہستہ خاموشی سے لوگ اس سے متاثر ہونے لگے اوراسی کی طرح بننے کی کوشش کرنے لگے۔ لڑائی جھگڑے، حرام خوری کم ہوگئی۔ لوگ جو پہلے ایک دوسرے سے لڑتے تھے، حسد کرتے تھے، نفرت کرتے تھے، آپس میں شیر وشکر ہوگئے حالانکہ وہ کسی کو کچھ کہتا نہیں تھا ، لوگ خود بخود اس کے جیسے ہوتے گئے ۔ لیکن لوگوں کو اس بات سے بڑی حیرت ہوتی تھی کہ ایک تو وہ داڑھی نہیں رکھتا تھا، دوسرے نماز بھی نہیں پڑھتا تھا اور روزے بھی نہیں رکھتا تھا ۔
آخر ایک دن کچھ لوگ اس کے پاس گئے اورکہا کہ تم اتنے اچھے ہو،کبھی کوئی برا کام نہیں کرتے ہو، اتنا لوگوں کے کام آتے ہو، لوگوں کی مدد کرتے ہو یعنی ہرلحاظ سے اچھے ہو تو داڑھی کیوں نہیں رکھتے؟ نماز کیوں نہیں پڑھتے؟ اورروزے کیوں نہیں رکھتے؟ تھوڑی دیر تک وہ چپ رہا، سکون سے سب کچھ سن رہا تھا، پھر آہستہ آہستہ بولنے لگا ۔داڑھی میں اس لیے نہیں رکھتا کہ یہ میرے محبوب نبیﷺ کی پیاری سنت ہے اوراگر میں اسے اپنے اورگناہگارچہرے پر رکھ لوں اورپھر بھی گناہ کروں گا تو یہ میرے نبیﷺ کی اوران کی اس پاک محترم اور بابرکت سنت کی توہین ہوگی، تضحیک ہوگی، بے حرمتی ہوگی، لہٰذا کوشش کرتا ہوں خود کو اوراپنے چہرے کو اس کے لائق بناؤں اوراگر بن سکا تو پھر محبت، احترام اورفخر سے اپنے چہرے کی زینت بنالوں گا۔
اور نماز؟ لوگوں نے پوچھا ۔ہاں نماز۔۔۔ ؟ میرا خیال ہے کہ یہ نہایت بے شرمی اور ڈھٹائی نہیں ہوگی کہ میں نمازی بن کر بھی ناجائز منافع خوری کروں، جھوٹ بولوں، اس کے احکام کی خلاف ورزی کروں، پیٹ میں حرام رکھوں ۔ اورہاں روزے؟ روزہ بھی صرف منہ کا نہیں ہوتا ، آنکھوں، زبان ،کانوں، ہاتھوں، پیروں اورذہن ودل کابھی ہوتا ہے اورخدا کو عملی طور پر یہ ثبوت دینا ہوتا ہے کہ ’’تمہارے حکم ‘‘پر میں جائزحلال چیزیں بھی استعمال کرنا بند کرسکتا ہوں تو ناجائز، ناروا اورحرام چیزیں کیوں نہیں چھوڑوںگا۔
میں ان محترم چیزوں کامنکر نہیں اورجب بھی خود کو ان کے قابل بناسکا، شروع کردوں گا ۔جب تک میں خود کو سدھار نہیں لیتا، دوسروں کو سدھرنے کے لیے کسے کہہ سکتا ہوں۔
کیا وہ واقعی پاگل تھا؟
سینیٹر تاج حیدر کون تھے؟