علی امین گنڈاپور کو ہمیشہ میدان سے بھاگنے کی عادت ہے، گورنر فیصل کریم کنڈی
اشاعت کی تاریخ: 16th, January 2025 GMT
گورنر خیبرپختونخوا فیصل کریم کنڈی نے کہا ہے کہ کمزور اور بزدل بندے کی نشانی ہے کہ وہ میدان چھوڑ کر بھاگ جاتا ہے۔ علی امین گنڈا پور کی عادت ہمیشہ میدان سے بھاگنے کی ہے۔ یہ میٹنگ سے بھی چلے گئے۔ کافی وقت ہوچکا تھا، انہوں نے سگریٹ بھی نہیں پیا تھا۔
یاد رہے کہ گزشتہ دنوں وزیراعلیٰ علی امین گنڈا پور نے ایک نجی ٹی وی چینل کے پروگرام میں گفتگو کرتے ہوئے کہا تھا کہ ایپکس کمیٹی اجلاس(جس میں وزیر اعظم شہباز شریف اور آرمی چیف جنرل سید عاصم منیر بھی بیٹھے ہوئے تھے) میں گورنر خیبرپختونخوا فیصل کریم کنڈی نے خیبر پختونخوا کو ملنے والی دہشت گردی سے نمٹنے کے فنڈ کے بارے میں غلط اعدادوشمار دیے، انہوں نے کہا کہ ہمیں دہشت گردی سے نمٹنے کے لیے 500 ارب روپے دیے گئے جبکہ حقیقت میں ہمیں اس مد میں 240 ارب روپے نہیں ملے جو ہمیں ملنے تھے، گورنرکےاس دعوے پر میں نے انہیں کہا کہ اپنے اعدادوشمار درست کریں۔
وزیراعلیٰ خیبر پختونخوا نے کہا’ گورنر نے میری بات کا برا منایا اور کہا کہ میری باری پر آپ نہیں بول سکتے، اس پر میں نے کہا کہ مجھے آپ کی فضول باتیں سننے کا کوئی شوق نہیں ہے اور اجلاس چھوڑ کر باہر چلا گیا۔‘
یہ بھی پڑھیےآرمی چیف کی موجودگی میں وزیراعلیٰ گنڈاپور کی وزیراعظم شہباز شریف سے سخت گفتگو کا انکشاف
اسی نجی ٹی وی چینل کے پروگرام میں گفتگو کرتے ہوئے گورنر خیبر پختونخوا فیصل کریم کنڈی نے کہا کہ جب ایک بندہ جھوٹ بولے تو اس پر میں کیا کہہ سکتا ہوں۔
’میں نے میٹنگ میں بات کی کہ ہر جگہ فوج نے کام نہیں کرنا کہ جب زلزلہ آئے، بارش ہو، پولیو کے قطروں کا معاملہ ہو، سب کچھ فوج ہی نے اس صوبے میں کرنا ہے تو صوبائی حکومت کیا کر رہی ہے؟ اس کی بھی کوئی ذمہ داری ہے۔ پھر کہتے ہیں کہ فوج کیوں ہمارے کام میں دخل اندازی کر رہی ہے۔ جب آپ خود کچھ کر نہیں سکتے، آپ خود اس قدر نکمے اور نااہل ہوں تو پھر ایسا تو ہوگا۔ ‘
گورنر فیصل کریم کنڈی نے کہا ’اگر آپ کو 500 ارب روپے ملے ہیں، پارلیمنٹ کو یہ بتایا گیا ہے، وہ آپ کھا پی گئے ہیں، اپنی عیاشیوں کی نذر کرلیا ہے، اپنے دھرنوں کی نذر کردیا ہے تو آپ مان لیں۔ اگر آپ کو یہ رقم نہیں ملی تھی تو آپ جواب دیں نا! یہ کمزور اور بزدل بندے کی نشانی ہے کہ وہ میدان چھوڑ کر بھاگ جاتا ہے۔ ان کی عادت ہمیشہ میدان سے بھاگنے کی ہے۔ یہ میٹنگ سے بھی چلے گئے۔ کافی وقت ہوچکا تھا، انہوں نے سگریٹ بھی نہیں پیا تھا۔ ان کی بہت زیادہ سگریٹ پینے کی عادت ہے۔‘
اس پر اینکر نے کہا کہ اس بات کو چھوڑیں، سگریٹ پینا ان کا ذاتی معاملہ ہے۔
یہ بھی پڑھیےگنڈاپور اندر سرکاری وزیراعلیٰ اور باہر پی ٹی آئی کے وزیراعلیٰ بن جاتے ہیں: گورنر خیرپختونخوا
گورنر فیصل کریم کنڈی نے کہا کہ میں نے بھی سگریٹ پینے کی بات کی ہے۔ میں نے یہ تو نہیں کہا کہ وہ کچھ اور پینے گئے تھے۔ اور یہ نماز کا وقت بھی نہیں تھا جبکہ انھوں نے آپ سے کہا کہ وہ نماز پڑھنے گئے تھے۔
حق تو یہ تھا کہ ان کی پارٹی کے چیئرمین(بیرسٹر گوہر خان) بات کرتے۔ وہ بیٹھے ہوئے تھے۔ وہ خاموش کیوں بیٹھے ہوئے تھے؟ اگر آپ کسی معاملے کا دفاع نہیں کرسکتے تو بھاگنا پڑتا ہے۔ اگر آپ کو وار آن ٹیرر پر پیسے ملے ہیں، پولیس کے لیے ملے ہیں، لیکن وہ پولیس کو نہیں ملے۔ اور آپ وہ کھا پی گئے ہیں۔ یہاں کرپشن کے علاوہ کوئی اور کام ہی نہیں ہے۔ کرپشن ہی کرتے ہیں۔
انہوں نے کہا کہ خیبر پختونخوا حکومت کو جو پیسے ملے ہیں، ان کا کیا کیا، پہلے وہ یہ تو بتائیں۔ مان لیتے ہیں کہ انھیں 240 ارب روپے نہیں ملے، لیکن جو ملے ہیں ان کے بارے میں جواب دیں نا۔ وہ وار آن ٹیرر کے لیے ملے تھے، پولیس کو دینے کے لیے ملے تھے۔ وہ پیسے آپ کی عیاشیوں اور دھرنوں کے لیے نہیں ملے تھے یا آپ کھا پی گئے ہیں۔ حالانکہ وہ اس لیے ملے تھے کہ آپ صوبے کی پولیس کو اپ گریڈ کریں، سیکورٹی فورسز پر خرچ کریں۔
یہ بھی پڑھیےعلی امین گنڈاپور نے گورنر فیصل کریم کنڈی سے چانسلر کے اختیارات چھین لیے
فیصل کریم کنڈی نے کہا کہ یہ اپنا ضلع نہیں سنبھال سکتے۔ دو ہزار تیرہ میں انھیں ایک پرامن صوبہ ملا تھا۔ ان نااہلوں اور نالائقوں نے صوبہ تباہ کردیا ہے۔ آج صوبے کی صورت حال دیکھیں۔ پھر جنوبی اضلاع کی صورت حال دیکھیں ۔
’جس صوبائی اسمبلی میں فوج کے خلاف قراردادیں پاس ہوں، فوج کے خلاف غلط تقاریر کی جاتی ہوں، انھیں حذف نہ کیا جاتا ہو، آپ ان سے امید کرتے ہیں کہ یہ وار آن ٹیرر میں آپ کے ساتھ مل کر لڑیں گے! جو کام انہوں نے کرنے تھے، وہ میں نے کیے ہیں۔ صوبائی حکومت کا کام تھا کہ وہ کل جماعتی کانفرنس بلاتی، آج تک انہوں نے سیاسی جماعتوں کو آن بورڈ نہیں لیا کہ ہم نے صوبے میں کیا کرنا ہے۔ پیپلزپارٹی کو نہ بلاتے، کم از کم اپنی اتحادی اور باقی سیاسی جماعتوں کو بلا لیتے۔‘
یہ بھی پڑھیےناچنے والے گھوڑے میدانوں میں نہیں دوڑتے، گورنر کے پی کا علی گنڈاپور پر طنز
انہوں نے کہا کہ جب ان پر مشکلات آتیں تو پھر فون کرکے منتیں کرتے ہیں اور ان کے پاؤں پڑتے ہیں کہ آئیں، ہمارے وزیراعلیٰ ہاؤس آئیں اور ہمیں ان مشکلات سے نکالیں۔
گورنر نے کہا کہ ہم نے کوئی سیاست نہیں کی۔ ہم نے صوبے میں امن کے لیے ان کے پاس گئے۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
خیبرپختونخوا علی امین گنڈاپور فیصل کریم کنڈی.ذریعہ: WE News
کلیدی لفظ: خیبرپختونخوا علی امین گنڈاپور فیصل کریم کنڈی فیصل کریم کنڈی نے کہا گورنر فیصل کریم کنڈی خیبر پختونخوا نے کہا کہ انہوں نے علی امین نہیں ملے ارب روپے ملے ہیں کی عادت لیے ملے اگر ا پ ہیں کہ یہ بھی کے لیے
پڑھیں:
ترجمان جے یو آئی نے علی امین گنڈاپور کو اسٹیبلشمنٹ کا مہرہ قرار دے دیا
لاہور:ترجمان جے یو آئی نے علی امین گنڈاپور کو اسٹیبلشمنٹ کا مہرہ قرار دے دیا۔
ترجمان جے یو آئی اسلم غوری نے وزیراعلیٰ خیبرپختونخوا علی امین گنڈاپور کے بیان پر سخت ردعمل کا اظہار کرتے ہوئے کہا کہ علی امین گنڈاپور خیبرپختونخوا کی سیاست میں ایک ایسا کردار ہیں جو اپنی خود ساختہ اہمیت جتانے کے لیے جھوٹ اور فریب کا سہارا لیتے ہیں۔ یہ شخص کینٹ کی آرام دہ پناہ گاہوں میں روپوش رہتا ہے اور باہر آ کر ٹی وی اسکرین پر بڑھکیں مارنے کا ماہر ہے۔
ترجمان جے یو آئی نے کہا کہ علی امین گنڈاپور کا اصل کردار ایک ناکام سیاسی مہرے سے زیادہ کچھ نہیں جسے اسٹیبلشمنٹ نے اپوزیشن کو کمزور کرنے کے لیے میدان میں اتارا ہے مگر اپوزیشن کو تقسیم کرنے کی ہر سازش ناکام ہوگی۔
اسلم غوری نے کہا کہ یہ وہی علی امین گنڈاپور ہے جو خیبرپختونخوا کی سرزمین پر کرپشن اور لوٹ مار کے جھنڈے گاڑ کر عوام کے وسائل کا جنازہ نکال چکے ہیں، ان کے لیے عوامی خدمت ایک مذاق، اور سیاست ذاتی مفادات کی دوڑ سے زیادہ کچھ نہیں۔
انہوں نے کہا کہ علی امین گنڈاپور جیسے کردار عمران خان کے قریب رہ کر بھی ان کے لیے شرمندگی کا باعث ہیں۔ یہ شخص اندرون خانہ معافیاں مانگتا ہے، اور باہر آ کر اپنی جعلی بہادری کے دعوے کرتا ہے، ڈی چوک میں اپنے کارکنوں کو بے یار و مددگار چھوڑ کر بھاگنے والے علی امین اب کس منہ سے سیاسی اخلاقیات پر بات کرتے ہیں؟ یہ وہی ہیں جن کی خودغرضی اور بزدلی نے تحریک انصاف کو شرمندہ کیا۔
ترجمان جے یو آئی کا مزید کہنا تھا کہ جے یو آئی نے 2018 اور 2024 کے انتخابات کو عوامی مینڈیٹ کی چوری قرار دیا ہے اور ایسے نتائج کو تسلیم کرنا اس قوم کے ساتھ غداری ہوگا، علی امین جیسے مہرے اس غداری کا حصہ بن چکے ہیں، علی امین گنڈا پور کی سیاست ایک دکان کی طرح ہے، جو جھوٹ اور دھوکہ دہی کے گاہکوں کو فروخت کی جاتی ہے مگر جے یو آئی ایسے کرداروں کو سیاسی میدان میں ہمیشہ کے لیے بے نقاب کرکے چھوڑے گی۔
واضح رہے کہ وزیر اعلیٰ خیبرپختونخوا علی امین گنڈا پور نے جمعیت علمائے اسلام (ف) کے سربراہ مولانا فضل الرحمان پر سخت تنقید کرتے ہوئے کہا تھا کہ مولانا فضل الرحمان تمہاری سیاسی حیثیت عمران خان کے مقابلے جتنی نہیں، تمہاری حیثیت نہیں کہ عمران خان کے ساتھ بیٹھ سکو۔
وزیراعلیٰ خیبرپختو نخوا کا کہنا تھا کہ مولانا فضل الرحمان کو خیبر پختونخوا کے انتخابات پر اعتراض ہے تو آئیں حلقے کھول لیتے ہیں، آپ کے جو چار 5 لوگ ہیں وہ بھی فارم 47 کے ہیں، آپ کا مینڈیٹ چوری نہیں ہوا، آپ بلوچستان سے بھی فارم 47 سے آئے ہیں، آپ کے ساتھ دھوکا ضرور ہوا ہے، جنہوں نے آپ کے ساتھ دھوکا کیا جو وعدے ہوئے تھے وہ پورے نہیں ہوئے، ان کا نام لیں۔
ان کا کہنا تھا کہ اگر کوئی اس طرح کے بیانات دے گا تو بطور وزیراعلیٰ اس کا جواب دوں گا، جنہوں نے آپ کے ساتھ دھوکا کیا ہے ان کا نام لیں ہمارے اوپر بات نہ کریں۔ مولانا فضل الرحمان کہتا ہے میری تیسرے درجہ کی لیڈر شپ عمران خان سے ملے گی، مولانا فضل الرحمان تمہاری سیاسی حیثیت عمران خان کے مقابلے جتنی نہیں۔
پاکستان کے ہر شہری کو کم لاگت رہائش کی فراہمی کیلئے ہر ممکن اقدام کریں گے، وزیراعظم