نئے کینالز کی بظاہر مخالف پیپلزپارٹی نے پس پردہ وفاق کو حمایت کی یقین دہانی کرادی
اشاعت کی تاریخ: 15th, January 2025 GMT
کراچی (رپورٹ /واجد حسین انصاری) پاکستان پیپلزپارٹی نے سندھ کے مفادات کا ایک مرتبہ پھر سودا کرلیا، دریائے سندھ سے نئے کینالز نکالنے کے معاملے کی بظاہر مخالفت کرنے والی پیپلزپارٹی نے پس پردہ وفاق کو منصوبے کی حمایت کی یقین دہانی کرادی۔ پارٹی نے عوامی ردعمل کو روکنے کیلیے پارٹی رہنماؤں کو کینالز منصوبے کے خلاف سخت بیانات دینے کے احکامات جاری کردیے لیکن اعلیٰ سطح پر منصوبے میں کوئی رکاوٹ نہیں ڈالی جائے گی اور مخالفت صرف بیانات کی حد تک محدود رہے گی۔ تفصیلات کے مطابق دریائے سندھ سے نئے کینالز نکالنے کیلیے صوبہ سندھ کی تمام سیاسی اور مذہبی جماعتیں اس وقت ایک پیج پر نظرآتی ہیں۔ دریائے سندھ بچاؤ تحریک کی جانب سے اس وقت حیدرآباد سے میرپور خاص تک بیداری مارچ کیا جارہا ہے۔ کمیٹی کے رہنماؤں کا موقف ہے کہ ایوان صدر نے گرین انیشٹو پروگرام کی منظوری دی ہے، پیپلز پارٹی منافقت کی سیاست کر رہی ہے، ہمیں صدر زرداری کی زبانی باتوں پر اعتبار نہیں ہے، عوام کسی دھوکے میں نہیں آئیں گے، ہم اپنا دبا ؤبرقرار رکھیں گے۔ ادھر وفاقی وزیر منصوبہ بندی ترقیات احسن اقبال نے اپنے حالیہ دورہ کراچی میں کینالز منصوبے پر سندھ کے تحفظات کو بے بنیاد قرار دیا تھا لیکن حیرت انگیز طور پر ان کے بیان پر پیپلزپارٹی کی جانب سے صرف نثار کھوڑو نے جواب دیا اور صوبائی حکومت کی سطح پر احسن اقبال کی کسی بات کا جواب نہیں دیا گیا۔ اس ضمن میں ذرائع کا دعویٰ ہے کہ پس پردہ کینال منصوبے پر پیپلزپارٹی کی قیادت اور وفاق کے درمیان رابطے موجود ہیں۔ بلاول زرداری اس حوالے سے ماضی میں ایک نرم بیان دے چکے ہیں کہ وفاقی حکومت تمام اسٹیک ہولڈرز کو اعتماد میں لے اور شراکت داروں سے بات چیت کرکے اتفاق رائے قائم کیا جائے۔ ذرائع کا کہنا ہے کہ اسی اتفاق رائے کے سلسلے میں ہونے والی بات چیت کے دوران پیپلزپارٹی نے وفاق کے سامنے یہ موقف رکھا تھا کہ صوبے میں اس منصوبے کے حوالے سے شدید مخالفت موجود ہے اس لیے کھل کر اس کی حمایت نہیں کرسکتی ہے۔یہاں یہ امر بھی دلچسپ ہے کہ سندھ کی قوم پرست جماعتیں دعویٰ کررہی ہیں کہ اس منصوبے کی منظور ی ایوان صدر نے گرین انیشیٹو پروگرام کی منظوری کی صورت میں دی ہے اور اب عوام کو دکھانے کیلیے اس کی مخالف کی کی جارہی ہے۔ ذرائع نے مزید بتایا کہ پیپلزپارٹی کی اہم ترین شخصیت کی جانب سے حکومت کو یقین دہانی کرائی گئی ہے کہ وہ کینالز منصوبے پر کام جاری رکھے پیپلزپارٹی باضابطہ طور پر اس کی مخالفت نہیں کرے گی تاہم عوامی ردعمل سے بچنے کے لیے پارٹی رہنماؤں کو ہدایت کی گئی ہے کہ وہ وقتاً فوقتاً اس منصوبے کے خلاف تند و تیز بیانات دینے کا سلسلہ جاری رکھیں۔واضح رہے کہ دریائے سندھ پر نئے کینالز نکالنے کے منصوبے کے حوالے سے جماعت سلامی ،جی ڈی اے اور قوم پرستوں سمیت دیگر جماعتوں کا مؤقف ہے کہ یہ منصوبہ سندھ کو بنجر بنانے کے مترادف ہے اس لیے اسے کسی صورت میں قبول نہیں کیا جائے گا۔
.ذریعہ: Jasarat News
کلیدی لفظ: پیپلزپارٹی نے دریائے سندھ نئے کینالز منصوبے کے پارٹی نے
پڑھیں:
متنازع کینال منصوبہ، آئین میں صدر کو ایک کلومیٹر سڑک کی منظوری کا اختیار بھی نہیں ہے، شرجیل میمن
ٹنڈو جام: سندھ کے سینئر صوبائی وزیر شرجیل انعام میمن نے کہا ہے کہ صدر کے پاس ایک کلومیٹر سڑک کی منظوری دینے کا بھی اختیار نہیں ہے۔
ٹنڈوجام میں جلسے سے خطاب کرتے ہوئے شرجیل انعام میمن نے کہا کہ اگر دریائے سندھ سے 6 کینالز نکالی گئیں تو پھر سندھ کے 7 کروڑ عوام پیاس سے مرجائیں گے۔
انہوں نے کہا کہ پیپلزپارٹی یہ کینالز کسی صورت بننے نہیں دے گی اور ہر فورم پر مزاحمت کرے گی۔ شرجیل میمن کا کہنا تھا کہ سندھ کے عوام کا بھروسہ پیپلزپارٹی پر ہے، آج کینالز کیخلاف ریلیاں نکالنے والوں نے کالا باغ کی حمایت میں ریلیاں نکالی تھیں اور وہ تمام ریکارڈ پر موجود ہیں جبکہ پیپلزپارٹی کالا باغ ڈیم کے خلاف نکلی تھی۔
شرجیل انعام میمن کا کہنا تھا کہ آصف علی زرداری نے ہمیشہ پاکستان بچایا، آج بھی اُن کے خلاف پروپیگنڈا ہورہا ہے، اگر کسی نے پاکستان کا قانون و آئین پڑھا ہے تو دیکھ لے صدر کے پاس کسی چیز کی منظوری کا اختیار نہیں ہے۔
انہوں نے واضح کیا کہ صدر مملکت ایک کلومیٹر سڑک کی مںظوری بھی نہیں دے سکتے۔ شرجیل میمن نے کہا کہ پیپلزپارٹی نے ہمیشہ عوام کو ریلیف دیا، بلاول نے غریب عوام کے زخموں پر مرہم رکھا ہے، سیلاب میں جن لوگوں کے گھر تباہ ہوئے اُن کو گھر بناکر دیے گئے۔
جلسے میں شرجیل میمن نے اپیل کی کہ 18 اپریل کو حیدرآباد جلسے میں شرکت کریں اور اس معاملے پر پُرزور احتجاج ریکارڈ کروائیں۔ شرجیل میمن نے کینالز کے خلاف نعرے لگائے اور شرکا سے کہا کہ اتنی زور سے جواب دیں کہ اسلام آباد تک اس کی آواز سنائی دے۔
جلسے سے پیپلزپارٹی شعبہ خواتین کی صدر فریال تالپور، نثار کھوڑو سمیت دیگر نے خطاب کیا۔
اسٹیک ہولڈرز کی شمولیت سے ہی بہتر عدالتی اصلاحات ممکن ہے، چیف جسٹس