منہاج القرآن علماء کونسل لاہور کے زیر اہتمام ’’ شان علی المرتضیٰ ؑ کانفرنس‘‘ کا انعقاد
اشاعت کی تاریخ: 14th, January 2025 GMT
شان علی مرتضیٰؑ کانفرنس سے خطاب میں مقررین کا کہنا تھا کہ حضرت علی ؑ عظیم سپہ سالار، جرات و شجاعت کے پیکر، علم و حکمت کا بحر بیکراں، خلیفۃ المسلمین تھے، حضرت علیؑ کی پوری زندگی صبر و استقامت کا مظہر تھی، مولا علی ؑ کے افکار اور عمل کو اپنانے سے معاشرہ امن و سکون کا گہوارہ بن سکتا ہے۔ اسلام ٹائمز۔ منہاج القرآن علماء کونسل لاہور کے زیراہتمام یوم ولادت سیدنا علی المرتضیٰ وجہہ الکریم کی مناسبت سے’’ شان علی المرتضیٰ ؑ کانفرنس‘‘ کا انعقاد کیا گیا۔ کانفرنس کی صدارت مرکزی صدر منہاج القرآن علماء کونسل مفتی غلام اصغر صدیقی نے کی۔ ناظم اعلیٰ نظام المدارس پاکستان علامہ ڈاکٹر میر آصف اکبر قادری سمیت منہاج القرآن علماء کونسل کے رہنمائوں نے کانفرنس میں شرکت کی۔ کانفرنس میں شریک مقررین نے حضرت علی ؑ کی سیرت و تعلیمات پر روشنی ڈالتے ہوئے انتہائی عقیدت و محبت سے فضائل و مناقب سیدنا حضرت علی کرم اللہ وجہہ بیان کئے۔ کانفرنس سے خطاب کرتے ہوئے مرکزی صدر منہاج القرآن علماء کونسل مفتی غلام اصغر صدیقی نے کہا کہ حضرت علی کرم اللہ وجہہ عظیم سپہ سالار، جرات و شجاعت کے پیکر، علم و حکمت کا بحر بیکراں،خلیفۃ المسلمین تھے، آپؑ نہایت نرم جو اور خوش گفتار شخصیت کے مالک تھے، مگر میدان جنگ میں آپؑ کے نام اور آمد کے خوف سے دشمنان اسلام پر لرزہ طاری ہو جاتا تھا، سب سے بڑھ کر یہ کہ آپؑ حضور نبی کریم ﷺ کے جانثار تھے۔
مقررین نے کہا کہ مولا علی ؑ کی زندگی تقوی، عبادت ،اللہ اور اسکے رسول ﷺ کی محبت کا عملی نمونہ تھی۔ آپ کی شجاعت، علم اور عدل و انصاف جیسے اوصاف ہر مسلمان کیلئے رہنمائی کا ذریعہ ہیں۔ حضور نبی کریم ﷺ نے حضرت علیؑ کو "بابِ علم" قرار دیا۔ آپ کے خطبے، فیصلے اور اقوال حکمت و دانائی کا ایسا خزانہ ہیں جو رہتی دنیا تک انسانیت کی رہنمائی کرتے رہیں گے۔ حضرت علی ؑ نے ہمیشہ حق و سچ کا ساتھ دیا اور ظلم کے آگے کبھی سر نہیں جھکایا۔ آپ کے فیصلے عدل کی بنیاد پر ہوتے تھے، چاہے معاملہ کسی بھی عزیز کیخلاف ہو۔ دنیاوی آسائشوں سے بے نیاز ہو کر آپ نے ہمیشہ اللہ کی رضا کو مقدم رکھا۔ امت مسلمہ کیلئے اہلِ بیتؑ کی محبت ایمان کا حصہ ہے۔ حضرت علیؑ کی پوری زندگی صبر و استقامت کا مظہر تھی، چاہے مشکلات کا سامنا ہو یا منافقین کی مخالفت، آپ نے ہمیشہ صبر کا دامن تھامے رکھا۔ آپ کی شہادت صبر اور قربانی کی اعلیٰ ترین مثال ہے۔
علامہ ڈاکٹر میر آصف اکبر قادری نے اپنے خطاب میں کہا کہ نبی کریم ﷺ نے فرمایا ہے کہ: "علی سے محبت ایمان کی علامت ہے اور علی سے دشمنی نفاق کی نشانی۔" یہ حدیث مبارکہ حضرت علیؑ کی عظمت اور ان کے مقام کو واضح کرتی ہے۔ حضرت علی ؑ کی مبارک زندگی کا سب سے بڑا درس یہ ہے کہ انسان حق و سچائی پر قائم رہے۔ آپ نے اپنی زندگی سے یہ ثابت کیا کہ اللہ کی رضا کیلئے قربانی دینا اور عدل و انصاف کو تھامے رکھنا ہی اصل کامیابی ہے۔ مولائے کائنات کی زندگی نوجوانوں کیلئے ایک کامل نمونہ ہے۔ ان کی تعلیمات پر عمل پیرا ہو کر ہم اپنی زندگی کو بہتر بنا سکتے ہیں۔ علامہ ڈاکٹر میر آصف اکبر قادری نے امت مسلمہ کو حضرت علیؑ کی تعلیمات سے رہنمائی لینے کی تلقین کی اور کہا کہ ان کے افکار اور عمل کو اپنانے سے معاشرہ امن و سکون کا گہوارہ بن سکتا ہے۔ کانفرنس میں علامہ اشفاق چشتی، مفتی خلیل حنفی، علامہ عثمان سیالوی، علامہ عبد الخالق باروی، علامہ عامر ندیم، علامہ جاوید عارف، علامہ افتخار چشتی سمیت دیگر رہنمائوں نے شرکت کی۔
ذریعہ: Islam Times
پڑھیں:
مسلم پرسنل لاء بورڈ کے زیر اہتمام حیدرآباد میں وقف ترمیمی ایکٹ کے خلاف 19 اپریل کو احتجاج کی کال
مجلس اتحاد المسلمین کے سربراہ نے کہا کہ وہ پارلیمنٹ وقف کمیٹی کے ارکان سے بھی بات کرنے کی کوشش کررہے ہیں اور اگر انکا شیڈول اجازت دیتا ہے تو وہ بھی اس جلسہ عام میں شامل ہوسکتے ہیں۔ اسلام ٹائمز۔ آل انڈیا مسلم پرسنل لاء بورڈ وقف ترمیمی ایکٹ کے خلاف 19 اپریل کو یہاں ایک احتجاجی جلسے کا انعقاد کرے گا۔ آل انڈیا مجلس اتحاد المسلمین کے صدر اسد الدین اویسی نے اتوار کو اس بات کی جانکاری دی۔ میڈیا سے خطاب کرتے ہوئے اسد الدین اویسی نے کہا کہ یہ جلسہ دارالسلام (آل انڈیا مجلس اتحاد المسلمین کے ہیڈکوارٹر) میں شام سات بجے سے رات 10 بجے تک مسلم پرنسل لاء بورڈ کے صدر خالد سیف اللہ رحمانی کی قیادت میں منعقد ہوگا۔ حیدرآباد کے رکن پارلیمنٹ نے کہا کہ اس احتجاج میں تلنگانہ اور آندھرا پردیش کے مسلم پرسنل لاء بورڈ کے ارکان اور دونوں ریاستوں کی دیگر مسلم تنظیمیں کارکنان شرکت کریں گے۔ انہوں نے کہا کہ وہ بھی اجلاس سے خطاب کریں گے اور عوام کو بتائیں گے کہ وقف (ترمیمی) ایکٹ کس طرح وقف کے حق میں نہیں ہے۔
مجلس اتحاد المسلمین کے سربراہ نے کہا کہ وہ پارلیمنٹ وقف کمیٹی کے ارکان سے بھی بات کرنے کی کوشش کر رہے ہیں اور اگر ان کا شیڈول اجازت دیتا ہے تو وہ بھی اس جلسہ عام میں شامل ہو سکتے ہیں۔ قابل ذکر ہے کہ پانچ اپریل کو صدر جمہوریہ دروپدی مرمو نے وقف (ترمیمی) بل 2025 کو اپنی منظوری دی تھی، جسے حال ہی میں پارلیمنٹ نے منظور کیا تھا۔ اسد الدین اویسی نے الزام لگایا کہ نریندر مودی حکومت کی طرف سے لایا گیا وقف (ترمیمی) ایکٹ غیر آئینی ہے اور یہ آئین کے آرٹیکل 14، 15، 25، 26 اور 29 سمیت کئی دفعات کی خلاف ورزی کرتا ہے۔ انہوں نے کہا کہ یہ ایکٹ مسلمانوں کے حق میں نہیں ہے۔ مجلس اتحاد المسلمین کے سربراہ نے نریندر مودی سے اپیل کی کہ وہ اس ایکٹ پر دوبارہ غور کریں۔ انہوں نے کہا کہ مودی یہ قانون بنا رہے ہیں جو ہندوستان کے آئین کے خلاف ہے اور آپ اپنا نظریہ ملک پر مسلط کر رہے ہیں، آپ کا نظریہ ملک و آئین کی بنیاد پر چاہیئے۔
انہوں نے مرکز کی بی جے پی حکومت پر یہ کہہ کر جھوٹ پھیلانے کا الزام لگایا کہ کوئی بھی وقف ٹریبونل کے فیصلے کو عدالتوں میں چیلنج نہیں کر سکتا۔ انہوں نے کہا کہ انکم ٹیکس ٹریبونل، این جی ٹی اور ریلوے کلیمز ٹریبونل سمیت کئی ٹریبونل ہیں اور ان کے فیصلوں کے خلاف ہائی کورٹ میں نظرثانی کی درخواستیں دائر کی جا سکتی ہیں۔ انہوں نے کہا کہ بی جے پی نے یہ سیاہ قانون این ڈی اے کے اتحادیوں این چندرابابو نائیڈو (ٹی ڈی پی)، نتیش کمار (جے ڈی-یو)، چراغ پاسوان (ایل جے پی-رام ولاس) اور جینت چودھری (آر ایل ڈی) اور دیگر کے تعاون سے بنایا ہے۔ اسد الدین اویسی نے استفسار کیا کہ حکومت بتائے کہ اس قانون میں وقف بورڈ اور مسلمانوں کو فائدہ پہنچانے والی دفعات کون سی ہیں۔
اسد الدین اویسی نے کہا کہ دراصل یہ سب کچھ مسلمانون کی جائیداد چھیننے کے لئے کیا جا رہا ہے۔ انہوں نے کہا کہ ان ترامیم کے ذریعے وقف کو تباہ کرنے کی تمام کوششیں کی گئی ہیں۔ اسد الدین اویسی نے کہا کہ ہم اس کی مخالفت کر رہے ہیں، ہم مسلم پرسنل لاء بورڈ کے اس فیصلے کی حمایت کرتے ہیں کہ وہ وقف (ترمیمی) ایکٹ کے خلاف ملک گیر تحریک کی قیادت کرے گی۔ انہوں نے کہا کہ ہم اپیل کرتے ہیں کہ احتجاج جہاں کہیں بھی ہو، اسے کامیاب بنائیں اور سب سے اہم بات یہ ہے کہ احتجاج پُرامن ہونا چاہیئے۔
گھر سے بے دخل خاتون ٹک ٹاکر نے نہر میں چھلانگ لگا دی