جوں جوں القادر ٹرسٹ کیس کے فیصلے کی گھڑی قریب آرہی ہے یہ تاثر گہرا ہو رہا ہے کہ بانی پی ٹی آئی کی قانونی ٹیم اس مقدمے میں مضبوط دفاع پیش کرنے میں ناکام رہی ہے۔ وکلا دوران سماعت قانونی نکات پر بات کرنے کی بجائے کیس کو سیاسی رنگ دینے کی کوشش کرتے رہے ہیں۔ احتساب عدالت اسلام آباد میں زیر سماعت مقدمے کے مطابق بانی پی ٹی آئی اور ان کی اہلیہ 190 ملین پائونڈ ریفرنس میں قومی احتساب آرڈیننس کی دفعات کے تحت کرپشن اور بدعنوانی میں ملوث ہونے کے ساتھ ساتھ سرکاری خزانے کو نقصان پہنچانے کے مرتکب ہیں۔اس کرپشن کیس میں نیب راولپنڈی نے انکوائری کا آغاز 2022 ء میں کیا اور بعد ازاں نا قابل تردید شواہد اور ثبوت حاصل کرنے کے بعد انکوائری کو باقاعدہ تحقیقات میں تبدیل کیا گیا۔
190 ملین پائونڈ کرپشن کیس میں نیب راولپنڈی نے یکم دسمبر 2023 ء کو 8 ملزمان کے خلاف ریفرنس دائر کیا جن میں بانی پی ٹی آئی اور ان کی اہلیہ بشری بی بی سمیت فرح گوگی ، شہزاد اکبر ، زلفی بخاری ، بیرسٹر ضیا اور معروف پراپرٹی ٹائیکون بھی شامل تھے احتساب عدالت اسلام آباد نے کرپشن ریفرنس پر کارروائی کا آغاز کرتے ہوئے چھ مفرور ملزمان کو دسمبر 2023 ء میں اشتہاری قرار دیتے ہوئے ان کا کیس الگ کر دیا جبکہ بانی پی ٹی آئی اور انکی اہلیہ پر فروری 2024 میں فرد جرم عائد کر دی گئی۔ اس کے بعد مقدمے کا باقاعدہ آغاز ہوا ۔پراسیکیوشن کی جانب سے 35 گواہان کی شہادتیں ریکارڈ کروائی گئیں۔ یہ شہادتیں مفصل بیانات اور نا قابل تردید ثبوتوں پر مشتمل ہیں۔ شنید یہ ہے کہ ملزمان کے وکلا موثر دفاع کرنے میں ناکام رہے ہیں۔
احتساب عدالت کی جانب سے بانی پی ٹی آئی کی لیگل ٹیم کو گواہان پر جراح کے مکمل مواقع فراہم کیے گئے۔ معقول وقت فراہم کئے جانے کے باوجود وکلا نے بامقصد جرح پر توجہ مرکوز نہیں کی۔ قانونی ماہرین کے مطابق بانی پی ٹی آئی پر قائم کئے گئے مقدمات میں سے القادر ٹرسٹ کیس شواہد کے لحاظ سے سب سے زیادہ مضبوط ہے۔ اس مقدمے میں پیش کیے گئے تمام ثبوت کرپشن کی نشاندہی کرتے ہیں۔احتساب عدالت میں پیش کئے گئے شواہد سے یہ ثابت ہوتا ہے کہ بانی پی ٹی آئی اور اہلیہ نے ذاتی فوائد کی خاطر قومی خزانے کو ناقابل تلافی نقصان پہنچایا ۔
190 ملین پائونڈ کی خطیر رقم جو کہ قومی خزانے میں جمع ہونی چاہیے تھی بانی پی ٹی آئی اور ات کی اہلیہ کی ایما پر معروف ہائوسنگ اسکیم کے ذمے واجب الادا 460ارب روپے کے جرمانے کی ادائیگی میں ایڈجسٹ کر دی گئی۔ اس کے عوض بانی پی ٹی آئی اور بشری بی بی نے مارچ 2021ء میں القادر یونیورسٹی ٹرسٹ کے نام پر سوہاوہ میں 458 کنال اراضی حاصل کی ۔ جب زمین منتقل کی گئی تو ٹرسٹ میں بانی پی ٹی آئی اور بشری بی بی کے علاوہ زلفی بخاری اور بابر اعوان بھی شامل تھے ۔تاہم بعد ازاں یہ ٹرسٹ سے علیحدہ ہو گئے۔
برطانیہ سے 190 ملین پائونڈ کی پاکستان واپسی میں بانی پی ٹی آئی خصوصی دلچسپی لیتے رہے اور اس سارے معاملے کو قانونی رنگ دینے کے لئے باقی ملزمان کی ملی بھگت سے ایک مشکوک دستاویز بند لفافے کی صورت میں کابینہ میٹنگ میں پیش کیا گیا۔ تمام وفاقی کابینہ کو اندھیرے میں رکھتے ہوئے صرف لفافہ لہرا کر نادیدہ ڈیل کی منظوری لی گئی۔ ہر لحاظ سے یہ معاملہ غیر شفاف اور مشکوک ہے۔ نئے پاکستان کی کوکھ سے جنم لینی والی کرپشن نے پرانے پاکستان کی داستانوں کو پیچھے چھوڑ دیا ہے۔ سوشل میڈیا پر اپنی قیادت کو دودھ کا دھلا ثابت کرنے والے انصافی حامیوں کے پاس ان سوالوں کا کوئی جواب نہیں۔ اول، رئیل سٹیٹ ٹائیکون کے مالی معاملات اور غیر قانونی اقدامات سے پی ٹی آئی کی حکومت کو کیا دلچسپی تھی؟ دوم، ریاست کے خزانے میں جانے والی رقم کو جرمانے کی مد میں شمار کرنا جرم میں معاونت کے مترادف ہے۔ سوم، یکا یک رئیل سٹیٹ ٹائیکون کی جانب سے اراضی کا انتقال یہ ثابت کرنے کو کافی ہے کہ در پردہ مالی منفعت کے حصول کے لئے حکومت کے ساتھ مشکوک ڈیل طے پا چکی تھی۔چہارم، انصاف اور اعلیٰ اخلاقی قدروں کا ڈھول پیٹنے والی جماعت کی قیادت پر عائد بدعنوانی کے الزامات فوری تحقیقات اور تادیبی کاروائی کے متقاضی ہیں۔
ذریعہ: Daily Ausaf
کلیدی لفظ: بانی پی ٹی آئی اور احتساب عدالت ملین پائونڈ کی اہلیہ
پڑھیں:
190 ملین پائونڈ ریفرنس کا فیصلہ چیلنج کرینگے ، تحریک انصاف کا اعلان
اسلام آباد(نیوزڈیسک)190 ملین پاؤنڈ ریفرنس میں بانی پی ٹی آئی عمران خان اور ان کی اہلیہ بشریٰ بی بی کو سزاؤں پر پی ٹی آئی کا ردعمل آ گیا۔پی ٹی آئی رہنما عمر ایوب نے میڈیا سے گفتگو کرتے کہا کہ القادر ٹرسٹ کیس میں عمران خان اور بشریٰ بی بی کو سزا سنائے جانے کے فیصلے کی شدید مذمت کرتے ہیں، ہم اس فیصلے کیخلاف اعلیٰ عدالت میں جائیں گے۔
انہوں نے مزید کہا کہ نواز شریف کے بیٹے حسن نواز نے جس پیسے سے لندن میں ون ہائیڈ پارک کی عمارت خریدی وہ پیسہ کس طرح باہر لیکر گئے اور آگے پھر وہ عمارت بیچی، اس رقم کا تم نے کیا کیا؟ آج وہ دندناتے پھر رہے ہیں۔
دریں اثنا شبلی فراز نے کہا ہے کہ القادر ٹرسٹ سے حکومت کو ایک دھیلے کا نقصان نہیں ہوا ،انتہائی افسوس کی بات ہے کہ اس ملک میں چور دندناتے پھر رہے ہیں جبکہ معصوم اور ایماندار لوگوں کو سزا سنا دی جاتی ہے۔
190 ملین پاؤنڈ کیس کا فیصلہ سنا دیا گیا، عمران خان کو 14 سال اور بشریٰ بی بی کو 7 سال کی سزا
حکومت اور اپوزیشن مذاکرات: سپیکر نے دونوں کمیٹیوں کا اجلاس 15 جنوری کو طلب کرلیا