کراچی؛ یوگنڈا کی خاتون کی منشیات اسمگلنگ کی کوشش ناکام، ملزمہ ساتھی سمیت گرفتار
اشاعت کی تاریخ: 14th, January 2025 GMT
اینٹی نارکوٹکس فورس (اے این ایف) نے کراچی ایئرپورٹ پر یوگنڈا سے تعلق رکھنے والی خاتون کی منشیات اسمگلنگ کی کوشش ناکام بناتے ہوئے حراست میں لے لیا۔
ترجمان اے این ایف کے مطابق خاتون مسافر براستہ دبئی اینٹا بے سے کراچی پہنچی تھی جسے جناح انٹرنیشنل ایئرپورٹ کراچی پر حراست میں لیا گیا۔
دوران تفتیش، گرفتار خاتون نے اپنے اندر منشیات بھرے کیپسولز کی موجودگی کا اعتراف کیا۔ ملزمہ کو اسپتال منتقل کر کے 144 گرام وزنی 11 کوکین بھرے کیپسول برآمد کر لیے گئے۔
مزید تحقیقات پر خاتون نے لاہور میں موجود منشیات وصول کرنے والے اپنے نائجیرین ساتھی کے بارے میں انکشاف کیا۔
اے این ایف نے موثر حکمت عملی کے ذریعے، اس بات کو یقینی بنایا کہ ملزم کا نائجیرین وصول کنندہ کے ساتھ رابطہ قائم رہے۔ لاہور میں موجود نائجیرین باشندے نے ملزمہ کو منشیات کی ترسیل کے لیے کراچی سے لاہور تک ہوائی سفر کرنے کی ہدایت کی تھی۔
اے این ایف نے نائجیرین باشندے کی گرفتاری کے لیے لاہور میں انٹیلی جنس ٹیم کو تعینات کیا۔ موثر منصوبہ بندی اور قابل عمل انٹیلی جنس کی بنیاد پر لاہور کی فردوس مارکیٹ میں واقع ہوٹل سے ملزم کو گرفتار کر لیا گیا۔
ترجمان کے مطابق اے این ایف منشیات کی اسمگلنگ میں ملوث بین الاقوامی تنظیموں کے خلاف بھی سرگرم عمل ہے، جو غیر ملکی شہریوں کو استعمال کرتے ہوئے منشیات کی اسمگلنگ میں ملوث ہیں۔
یہ آپریشن سفارتی تعلقات پر سمجھوتہ کیے بغیر قومی اور بین الاقوامی تحفظ کے لیے پاکستان کے عزم کو واضح کرتا ہے۔
ملزمان کے خلاف انسداد منشیات ایکٹ کے تحت مقدمہ درج کر لیا گیا ہے۔ ملزمان سے نیٹ ورک کے مزید ارکان کی گرفتاری کیلئے تفتیش کا عمل جاری ہے۔ اے این ایف اپنے مشن ایک قوم ایک منزل منشیات سے پاک پاکستان میں پر عزم ہے۔
.ذریعہ: Daily Mumtaz
کلیدی لفظ: اے این ایف
پڑھیں:
والد کے اندھے قتل میں حقیقی بیٹا، بہو اور بیٹے کی خاتون دوست گرفتار
کراچی:ضلع کورنگی پولیس نے والد کے اندھے قتل میں اس کے حقیقی بیٹے، بہو اور بیٹے کی خاتون دوست کو گرفتار کرلیا۔
پولیس حکام کا کہنا ہے کہ گرفتار بیٹے نے کرائے کے قاتلوں کو والد کے قتل کی 3 لاکھ روپے کی سپاری دی تھی اور 50 ہزار روپے کی رقم پیشگی دی تھی۔ گرفتار ملزم والد کے کاروبار میں ہیر پھیر کرتا تھا، جس پر مقتول والد نے بیٹے کو کاروبار سے الگ کرکے گھر سے بھی نکال دیا تھا۔
تفصیلات کے مطابق، زمان ٹاؤن پولیس نے ہیومن انٹیلیجنس اور تکنیکی بنیادوں پر کارروائی کرتے ہوئے محمد متین خان نامی شہری کے قتل میں ملوث اس کے حقیقی بیٹے دانش، بہو طوبیٰ زوجہ دانش، اور بیٹے کی خاتون دوست ایمن دختر جمیل احمد کو گرفتار کرلیا۔ گرفتار ملزمان کے قبضے سے ایک موٹر سائیکل بھی برآمد کی گئی ہے۔
ایس ایچ او زمان ٹاؤن انسپکٹر غلام نبی آفریدی کے مطابق 18 فروری کو زمان ٹاؤن تھانے کے علاقے کورنگی نمبر 6، سیکٹر 51-سی میں نامعلوم مسلح ملزمان نے فائرنگ کرکے 61 سالہ سید محمد متین خان ولد سید محمد رحیم الٰہی کو قتل اور اس کے داماد کامران کو زخمی کردیا تھا۔ مقتول کے قتل کا مقدمہ داماد محمد کامران کی مدعیت میں درج کیا گیا تھا۔
زمان ٹاؤن پولیس نے واقعے کے تقریباً دو ماہ بعد مقتول سید محمد متین خان کے اندھے قتل میں ملوث اس کے حقیقی بیٹے، بہو اور بیٹے کی خاتون دوست کو گرفتار کرلیا۔ ایس ایچ او نے بتایا کہ مقتول سید محمد متین خان علاقے میں کیبل کا کاروبار کرتا تھا، اور مقتول نے کاروبار میں ہیر پھیر کرنے پر اپنے بیٹے دانش کو کاروبار سے الگ کردیا تھا اور اسے گھر سے بھی نکال دیا تھا، تاہم رشتہ داروں کے کہنے پر اُسے دوبارہ گھر میں رکھا گیا لیکن کاروبار میں شامل نہیں کیا۔
ایس ایچ او نے بتایا کہ مقتول کا بیٹا اپنی خاتون دوست کے لیے پیسے چوری کیا کرتا تھا، اور قتل سے تقریباً دو ماہ قبل بھی والد متین نے بیٹے دانش کو ڈانٹا تھا، جس کے بعد گرفتار ملزم دانش نے والد کو قتل کرنے کا منصوبہ بنایا اور کرائے کے قاتلوں سے رابطہ کیا۔ تین لاکھ روپے میں قتل کی سپاری طے ہوئی، جس میں پچاس ہزار روپے کی پیشگی رقم خاتون دوست ایمن سے لے کر ادا کی گئی، جبکہ باقی رقم والد کے قتل کے بعد ادا کرنے کا وعدہ کیا گیا تھا۔
ایس ایچ او نے بتایا کہ واقعے کے دن ملزم نے بیوی سے معلومات حاصل کیں کہ والد گھر سے نکلے یا نہیں، بیوی نے مقتول کے گھر سے نکلنے کی اطلاع دی۔ ملزم کی بیوی اور خاتون دوست کو علم تھا کہ دانش اپنے والد کو قتل کرانے کا ارادہ رکھتا ہے، مگر دونوں نے یہ بات پولیس یا مقتول کے دیگر اہلخانہ سے چھپائی۔
ایس ایچ او نے بتایا کہ کرائے کے قاتل شریف خان اور سیال خان واقعے کے بعد بنوں فرار ہوگئے تھے، اور اب معلوم ہوا ہے کہ ایک ملزم شریف کسی بیماری میں مبتلا ہونے کے بعد اپنی موت مر چکا ہے، جبکہ دوسرا ملزم فرار ہے، جس کی گرفتاری کے لیے کوششیں جاری ہیں۔ گرفتار ملزم 7 بہن بھائیوں میں سے بڑا اور 4 بیٹیوں کا باپ ہے۔ ملزم اپنے مفرور ساتھیوں کے ہمراہ دیگر ڈکیتی کی وارداتوں میں بھی ملوث ہے۔ گرفتار ملزم نے ابتدائی تفتیش میں اپنے والد کو قتل کروانے کا اعتراف جرم کرتے ہوئے اپنے کیے پر پچھتاوے کا اظہار کیا ہے۔
وزیراعظم شہباز شریف کا بیلا روس کے ایوان آزادی آمد پرشاندار خیر مقدم