حقیقی آگ یا امریکی اسٹیبلشمنٹ کا ٹرمپ کو تحفہ!
اشاعت کی تاریخ: 14th, January 2025 GMT
آگ کبھی مقام دیوتائی پر فائز تھی لیکن انسانی شعور نے اُسے اِس آسمانی منصب سے اتار کر زمین پر دے مارا ۔ تاریخ نہ جانے کتنے گمشدہ خدائوں کا پتہ دیتی ہے لیکن یہ انسانی شعور ہی تھا جو حق کی تلاش میں بڑھتا ہوا آج اُس مقام پر پہنچا چکا ہے کہ مستقبل میں ایک خدائے یکتا کی متفقہ حکمرانی زمین پر قائم ہو جائے ۔ آلات ِابلاغ نے جہاں انسانوں کو ایک دوسرے کے قریب کیا ہے وہیں کلچروں کا تبادلہ بھی دیکھنے کو مل رہا ہے گو کہ یہ عمل صدیوں سے جاری ہے لیکن اُس کی رفتار کچھوے جیسی تھی لیکن جدید آلات ابلاغیات نے پرانے کچھوے کو نیا خرگوش بنا دیا ہے ۔ کوئی زمانہ تھاکہ شہروں کے شہر صفحہء ہستی سے مٹ جاتے تھے لیکن کسی کو کانوں کان خبر نہ ہوتی تھی اور پھر صدیوں بعد زمین کی کھدائی کے دوران شہروں کے آثار برآمد ہوتے تو معلوم پڑتا کہ یہاں کوئی آسمانی یا زمینی آفت نازل ہوئی تھی ۔ہماری اپنی دفن شدہ تہذیبیں اس کی زندہ مثال ہیں ۔ لیکن آج کاانسان ایک دوسرے کے حالات سے مکمل باخبر ہے ٗ کہیں زلزلہ آ رہاہو یا سونامی آپ اُسے براہ راست دیکھ سکتے ہیں اور شہروں پرگزرنے والی قیامت کے بھی چشم دید گواہ بن جاتے ہیں ۔ آج انفارمیشن اور ٹیکنالوجی کی دنیا میں ریسرچ کو جو مقام حاصل ہے وہ شاید اِس سے پہلے نہیں تھا ۔ہمیں ہرچیز پر پہلی نظر تحقیقی ہی ڈالنا پڑتی ہے ۔مکالمے کے اِس عہد میں اگر کوئی یہ چاہتا ہے کہ اُس کی بات کو بغیر زیر بحث لائے من و عن تسلیم کر لیا جائے تو وہ زمانے گزرے بھی زمانہ گزر چکا ہے ۔
لاس اینجلس جہاں 1984ء کا اولمپک ہوا تھا امریکہ کے امیر ترین لوگوں کا علاقہ ہے کہ وہاں مال دار امریکیوں کے علاوہ وہاں کے مشہور و معروف لوگ بھی رہتے ہیں جن میں ماضی ٗ حال اور مستقبل کے اداکاروں کے علاوہ اے پلس بزنس مین اور دوسری اہم شخصیت بھی قیام پذیر تھیں ۔ لاکھوں انسانوں کا یہ خوبصورت ترین شہردیکھتے دیکھتے راکھ کے ڈھیر میں تبدیل ہو گیا اور آخری اطلاع آنے تک 11افراد اِس آگ کے حصار میں زندگی کی بازی ہار چکے ہیں ۔ اربوں ڈالر کا نقصان اس کے علاوہ ہے ۔ کل تک دنیا بھر میں خیرات تقسیم کرنے والے ارب پتی آج خود کیمپوں میں پناہ لئے ہوئے ہیں ۔بلاشبہ ! رب کے اپنے فیصلے ہیں جنہیں جاننے کا دعویٰ کوئی نہیں کرسکتا ۔سماج اچھے اوربُرے لوگوں کے مجموعے کا نام ہوتا ہے ۔ دنیا کا ایک بھی معاشرہ سوفیصد نیکو کاروں کا ہے اور نہ ہی گناہگاروں کا ۔یہی سماج ہوتا ہے جس میں ہم سب نے زندگی بسر کرنا ہوتی ہے۔ امریکی اداکار جیمز وڈ کا گھر بھی اس سانحہ میں جل کر راکھ کاڈھیر بن گیا جو 2 مرتبہ آسکر کیلئے نامزد ہوئے اور تین مرتبہ انہوں نے ایمی ایوارڈ اپنے نام کیا ۔ جیمز وڈ کا رویہ فلسطینیوں کے حوالے سے انتہائی احمقانہ تھا اور وہ فلسطینیوں کے قتل عام پر نہ صرف خوش تھے بلکہ اُسے جائز سمجھتے اور جاری رکھنے کے حمایتی بھی تھے ۔ یقینا یہ ایک گھٹیا اور کمتر سوچ ہے اور بالخصوص ایک ایسے شخص سے تو توقع ہی نہیں کی جا سکتی جس کا تعلق فنون ِ لطیفہ کی کسی بھی شاخ سے ہو ۔یہ رویہ انتہائی قابل مذمت تھا اور دنیا بھر کے غیرت مند اور انسان دوست انسانوں نے اس کی مذمت بھی کی لیکن کیا ہمیں یہ نہیں سمجھنا چاہیے کہ جیمز وڈ کا جو رویہ قابل مذمت بلکہ قابل ِ نفرت تھا وہ کسی دوسرے انسان کیلئے جائز کیسے ہو سکتا ہے ؟ جیمز وڈ اپنے گھر کے جلنے کی روداد سناتے ہوئے رو پڑے جس نے اینکر کو بھی افسردہ کردیا ۔میں سمجھتا ہوں کہ جس کا دل دکھا ہو اُس کا دل نہیں دکھانا چاہیے ۔ ہمیں وہ فیصلے نہیں کرنے چاہئیں جو صرف اللہ نے خود کرنے کا فیصلہ کر رکھا ہے ۔ لاس اینجلس کی آگ کے حوالے سے میرا نقطہ نظر بالکل واضح ہے کہ یہ ٹرمپ کو امریکی اسٹیبلشمنٹ کا پہلا تحفہ ہے اور ایسے کئی تحائف اسے اگلے چار سال تک وقتاً فوقتاً ملتے رہیں۔ آج ممکن ہے یہ بات آپ کو حیرت انگیز محسوس ہو لیکن میں کسی صورت یہ تسلیم کرنے کیلئے تیار نہیں کہ جنگل کی معمولی آگ نے جدید ترین امریکہ کا ایک بڑا شہر جلا کر خاکسترکر دیا ۔ جلد یا بدیر یہ بات سامنے آ جائے گی کیونکہ اس آگ نے انسان تو بچا لیے کیونکہ انسانو ں کی اموات حکومتیں جانے کے بعد بھی ریاست کیلئے درد سر ہوتی ہے لیکن سرمایہ نہیں بچایا گیا حالانکہ یہ بھی بچایا جا سکتا تھا اوریہ آگ لمحوں میں نہیں پھیلی ۔
پنجاب میں دھی رانی پروگرام کا آغاز میرے لئے خوشی کا باعث ہے لیکن اِس کے ساتھ میں یہ بھی بتانا چاہتا ہوں کہ پنجاب کی وزیر اعلیٰ نے 51 بیٹیوں کی شادی کی ہے تو خانقاں ڈوگراں کے شاہد محمود عاجز نے ٗ جو واقعی ایک عاجز شخص ہے اور لوگ سے فنڈ اکھٹے کر کے سالہا سال سے یہ فریضہ سرانجام دے رہا ہے اُس نے 13غریب بیٹیو ں کی شادی کی جس میں مجھے بھی جانے کا اتفاق ہوا ۔ خوبصورت بات یہ ہے کہ اس بار ہونے والی شادیوں نے اُس اکیلئے شخص کی جدوجہد کو 575 شادیوں تک پہنچا دیا ہے ۔ میرے لئے یہ فخر کی بات ہے کہ پنجاب میں آج بھی ایسے بیٹے موجود ہیں جو بہنوں کا سر ڈھانپنا جانتے ہیں ۔عبد العلیم خان کے ساتھ ایک طویل سفر کے بعد میں اِس نتیجہ پر پہنچا ہوں کہ اللہ نے اُسے بہترین انتظامی صلاحیتوں سے نواز رکھا رہے ورنہ ایک شخص بہت سے ادارے اتنی مہارت سے نہیں چلا سکتا ۔ وفاقی وزیر مواصلات و نجکاری عبد العلیم خان نے اس ہفتے عبد العلیم خان فائونڈیشن کے زیر انتظام چلنے والے ڈائیلیسز سینٹرز کادورہ کرتے ہوئے میوہسپتال اور سروسز ہسپتال لاہور میں مریضوں سے ملاقات کی اور انہیں ملنے والی سہولتوں بارے خود اُن سے دریافت کیا ۔ عبد العلیم خان نے مریضوں کو مزید سہولتیں فراہم کرنے کیلئے ڈاکٹروں کو ہدایات جاری کرنے کے بعد عبد العلیم خان فائونڈیشن کی فری ڈسپنسریوں کا دورہ کیا جہاں ایم بی بی ایس ڈاکٹر صبح شام مریضوں کی خدمت کیلئے مصروف رہتے ہیں۔ عبد العلیم خان فائونڈیشن فری ڈسپنسریوں میں مریضوں کو عالمی میعارکی ادویات مفت فراہم کی جاتی ہیں اور اِس کے علاوہ صاف پانی کی فراہمی کیلئے جا بجا ڈرنکنگ واٹر فلٹر پلانٹ نصب کر رکھے ہیں جہاں سے لاکھوں لیٹر پینے لائق پانی عام آدمی کو بغیر کسی تکلیف کے روزانہ کی بنیاد پر فراہم ہو رہا ہے ۔ ایسا ملک جہاں عبد العلیم خان جیسا صاحب ِ ثروت اپنی جیب سے ضرورت مندلوگوں پر کروڑوں خرچ کر رہا ہے اوردوسری طرف خانقاں ڈوگراں کا خالد محمود عاجز مفلسی کی حالت میں بھی غریب اور یتیم بچیوں کی شادیوں کیلئے کامیاب کوششیں کرتا رہتا ہے اُس ملک کو قیامت کی صبح تک کچھ نہیں ہونے والا ۔آگ ٗ زلزلہ اور سیلاب حادثات ہیں اور یہ کہیں بھی ہو سکتے ہیں ۔
.ذریعہ: Nai Baat
کلیدی لفظ: عبد العلیم خان جیمز وڈ ہے لیکن لیکن ا رہا ہے ہے اور
پڑھیں:
احتساب کو مئوثر بنانے کے تقاضے
پاکستان میں دانشوروں کاایک طبقہ ایسا پیدا ہوچکا ہے جنہیں ملک میں ہر چیز خراب نظر آتی ہے یہ سچ ہے کہ ہر ادارے میں برائیاں بھی ہوتی ہیں اور اچھائیاں بھی لیکن دیکھنے میں یہی آیا ہے کہ بڑی بڑی اچھائیوں کونظر انداز کیاجاتا ہے جبکہ معمولی برائیوں کو بڑھاچڑھا کر اجاگر کیا جاتا ہے۔ بدقسمتی سے پاکستان کے بیشتر اداروں میں کرپشن ایک ناسور کی طرح پھیلتا رہا چونکہ سبھی اس سے مستفیض ہو رہے تھے اس لیے احتساب کی کوئی روایت نہ پڑسکی۔ رشوت کو کنٹرول کرنے کے لیے اینٹی کرپشن کا محکمہ قائم کیاگیاابتدائی برسوں میں اس محکمے کی کارکردگی بڑی اچھی تھی لیکن وقت گزرنے کے ساتھ ساتھ کچھ کالی بھیڑوں نے اس محکمے کی کارکردگی کو بری طرح سے متاثر کیایوں اس کی افادیت کم ہوتی چلی گئی۔ اور یہ کہاوت مشہور ہوگئی لے کے رشوت پھنس گیا ہے دے کے رشوت چھوٹ جا۔ جب رشوت کی بیماری اعلیٰ حکام تک پھیل گئی تو ایف آئی اے کومیدان میں اتارا گیا۔ جب کرپشن ایوانوں تک جاپہنچی اور زبان خلق بننا شروع ہوئی تو صاحب اقتدار لوگوں کو عوام کومطمئن کرنے کے لیے مجبوراً احتساب کاادارہ قائم کرنا پڑا۔ احتساب کا عمل تو شروع ہوگیا لیکن پہلے ہی دن سے اسے سیاسی دشمنی تک محدود کردیاگیا اس لیے اس پر سارے ملک میں کھل کر تنقید ہوتی رہی جب فوجی حکومت آئی تو انہوں نے قومی احتساب بیوروتشکیل دیا جسے حرف عام میں نیب کہا جاتا ہے نیب کو یہ الزام دیا جاتا رہا ہے کہ وہ بھی ایک حد تک جانبدار ہے اور ان پر بھی تنقید ہوتی رہی کیونکہ کچھ بااثر افراد جن کے خلاف نیب تحقیقات کررہاتھا وہ حکومت کا ساتھ دے کر اپنے خلاف تحقیقات رکوانے میں کامیاب ہوگئے ہیں اصل میں یہ لوگ ضمانتوں پررہا ہوئے ہیں جس طرح سے ماضی میں لوگ جیل میں بند ہونے کے باوجود الیکشن میں حصہ لے کر کامیاب ہوتے رہے ہیں اور بعض حالتوں میں وزیر بھی بنے اس کا مطلب یہ ہے کہ قانون میں سقم ہے اور کمزوری ہے یہ کام تو الیکشن کمیشن کا تھا کہ وہ ایسے لوگوں کو الیکشن کے لیے نااہل قرار دیتا اس حوالے سے نیب پر تنقید بلاجواز ہے۔
یہ بات اپنی جگہ درست ہے کہ نیب نے شروع میں بغیر ہوم ورک کے اندھا دھند گرفتاریاں کیں جس سے ملک میں خوف وہراس کی سی فضا پیدا ہوگئی ،مگر آج نیب صاف وشفاف ادارے میں تبدیل ہوچکاہے۔ رہا سوال نیب کے احتساب کا تو بے شمار ایسے افراد کے خلاف کارروائی کی گئی ہے جو نیب میں ہوتے ہوئے گڑبڑ کی کوشش کررہے تھے۔ نیب نے اپنے اندر کالی بھیڑوں کے خلاف کارروائی کرکے خود احتساب کی مثال قائم کی ہے جو لائق تحسین ہے۔ نیب کے حوالے سے ایک عام تاثر یہ ہے کہ سیاستدانوں نے بڑی کرپشن کی ہے۔ نیب سے جب رابطہ کیا گیاتو انہوں نے کہا یہ تاثر صحیح نہیں ہے جبکہ حقیقت یہ ہے کہ ماسوائے چند سیاست دانوں کے بیشتر کاتعلق بیوروکریسی اور دوسرے لوگوں سے ہے۔ یاد رہے 15کروڑ عوام کا رابطہ بیوروکریسی سے ہی پڑتا ہے۔ سیاستدان تووٹ لے کرگم ہوجاتے ہیں۔ ایک عام آدمی کرپشن سے نجات چاہتا ہے اسے اور کچھ نہیں چاہیے وہ کرپٹ مافیا کے درمیان چکی کی طرح پس کررہ جاتا ہے اوراس کی کوئی داد رسی نہیں ہوتی اس بات میںکوئی شک نہیں کہ اوپر کی سطح پر کرپشن کافی حد تک کنٹرول کی جاچکی ہے اس کاسہرا بھی نیب کوہی جاتا ہے کیونکہ کک بیکس لینے والوں کاحشر عوام اپنی آنکھوں سے دیکھ رہے ہیں کہ کس طرح انہیں کٹہرے میں لاکر کھڑا کیا جاتا ہے لیکن یہ کافی نہیں نیب کو چاہیے کہ وہ اپنا دائر ہ کار وسیع کرکے تحصیل لیول سے شروع کرکے اوپر تک جائیں کیونکہ عام آدمی کا واسطہ اعلیٰ افسران سے کم ہی پڑتا ہے۔ جبکہ بسااوقات چھوٹے سرکاری افسران سے پڑتا ہے۔ اس حوالے سے عوام پر بھی بھاری ذمے داری عائد ہوتی ہے کہ وہ ہر سطح پرجہاں بھی ان کو کرپشن یا کرپٹ افسر نظر آئے اس کی نشاندہی کریں۔ نشاندہی کرتے وقت صرف اتنا کہہ دینا کہ فلاں شخص بڑا کرپٹ ہے اس نے بڑا مال بنایا ہے اس سے کوئی بات نہیں بنتی نشاندہی کامطلب یہ ہوتا ہے کہ کرپشن کی زیادہ سے زیادہ تفصیلات سامنے لائی جائیں ۔ پلاٹ کتنے ہیں‘ مکان کتنے ہیں‘ گاڑیاں کتنی ہیں‘ بے نام کھاتے کتنے ہیں وغیرہ وغیرہ۔ نیب اس طرح کی اطلاعات دینے والوں کو تحفظ فراہم کرتا ہے۔ اب سوال یہ پیدا ہوتاہے کہ احتساب کس کا ہوکیااس زمرے میں صرف وزیراعظم ‘ وزرائے اعلیٰ ‘ وفاقی وصوبائی وزرا‘ اراکین سینیٹ‘ قومی وصوبائی اسمبلی اور اعلیٰ سرکاری ونیم سرکاری عہدیدار ہی آئیں گے یابات اس سے آگے بڑھے گی کیا بدعنوانی صرف یہ ہے کہ مال بنایا جائے ۔ رشتہ داروں اور دوستوں کو نوازا جائے۔ بے شک یہ سب بدعنوانی ہے لیکن ہم یہاں انٹلکچوئل کرپشن کاذکر کرنا چاہتے ہیں جس سے جہاں ایک طرف حقداروں کاحق مارا جارہا ہے دوسری طرف نااہل لوگوں کو نوازا جارہا ہے۔ مثلاً کسی ادارے میں سینئرافسر موجود ہے لیکن کسی جونیئر کو اس پرلگادیا جائے یہ بھی کرپشن کی ہی شکل ہے اس کے علاوہ یہ کہ شخص کو ایسا عہدہ دے دیاجائے جس کاوہ مستحق نہیں۔
آپ نے دیکھا ہوگا ایک نائب قاصد بھرتی کرنا ہوتاہے تو اس کے لیے اخبار میں اشتہار دیا جاتا ہے لیکن جب کسی ریٹائرڈ افسر کوملازم رکھنا ہوتا ہے تو یہ سب کچھ بغیر اشتہار کے ہوتا ہے۔ بعض حالتوں میں ادارے کی ملازمت کا کوئی سابقہ تجربہ یا پس منظر نہ رکھنے کے باوجود باقاعدہ سروس کے بڑے بڑے قابل لوگ پوری عمر بسر کرنے کے باوجود اس منصب تک نہیں پہنچ پاتے ‘ کیا یہ ان افراد کی حق تلفی اوران سے ناانصافی نہیں اور کیا یہ اخلاقی بدیانتی اور بدعنوانی نہیں۔ نیب کو چاہیے کہ ملک کے سبھی اداروں کی چھان بین کرے ان اداروں میں جائے متاثرہ لوگوں سے ملے اور اس طرح کی بددیانتی کے مرتکب اعلیٰ عہدیداروں کے خلاف مقدمات قائم کرے اپنا دائرہ صرف کک بیکس تک محدود نہ رکھیں کک بیکس سے صرف مالی نقصان پہنچتا ہے لیکن کسی کم تر شخص کو جواس عہدے کااہل نہ ہو اس کو اعلیٰ عہدہ دے کر ادارے کو تباہ کرنے کے مترادف ہے اوراس کی اجازت نہیں ہونی چاہیے، یہ قومی نقصان ہے اس طرح کے کاموں سے ملک کوناقابل تلافی نقصان پہنچ سکتاہے۔
آخر میں یہ بتانا ضروری ہے کہ احتساب کو صرف بدعنوانی تک محدود نہیں رہنا چاہیے کرپشن کے خاتمے کے لیے ہر قسم کی بدعنوانی کا خاتمہ کرنا ہوگا جو سامنے نظر آتی ہے اور جو قدرے پوشیدہ ہے جسے عرف عام میں انٹلکچوئل بدعنوانی کہتے ہیں اس کاخاتمہ بھی ضروری ہے۔ ایک تاثر یہ بھی ہے کہ نیب کو اپنا نام تبدیل کرلینا چاہیے اس ضمن میں بعض لوگوں کاکہنا ہے کہ اسے اکائونٹ ایبیلیٹی بیورو آف پاکستان کانام بھی دیاجاسکتا ہے۔
مسلمانوں پر وقف ایکٹ مسلط کیا جارہا ہے، چندر شیکھر آزاد