Jasarat News:

گوادر اور کوئٹہ کے دورے پر لاپتا افراد کے کیسز نے ہلاکر رکھ دیا،چیف جسٹس

اشاعت کی تاریخ: 14th, January 2025 GMT

اسلام آباد (صباح نیوز) چیف جسٹس آف پاکستان یحییٰ آفریدی نے کہا ہے کہ مسنگ پرسنز کے ایشو نے مجھے ہلا کر رکھ دیا۔ چیف جسٹس یحییٰ آفریدی سے سپریم کورٹ پریس ایسوسی ایشن کے ممبران نے ملاقات کی جس میں صحافیوں کو عدالتی کارروائی کے دوران پیش آنے والی مشکلات سمیت مختلف معاملات پر گفتگو کی۔ اس موقع پر چیف جسٹس یحییٰ آفریدی نے کہا کہ عدالت عظمیٰ کا ہر جج آزاد ہے، ججز کو بریکٹ نہیں کیا جانا چاہیے، ججز پر تنقید ہونی چاہیے لیکن تعمیری تنقید ہو۔چیف جسٹس نے کہا کہ عدالت عظمیٰ میں ریفارمز کے حوالے سے بہت سے اقدامات کیے جا چکے ہیں، ہائی کورٹ کی اتھارٹی کا بہت احترام ہے، ڈسٹرکٹ جوڈیشری ہائی کورٹ کے ماتحت ہے، براہ راست ہائی کورٹ کی اتھارٹی یا ماتحت عدلیہ میں مداخلت نہیں ہو گی، عدالت عظمیٰ کی سمت کو تبدیل کر کے انصاف کی فراہمی بہتر کی جا سکتی ہے۔ انہوں نے کہا کہ کوئٹہ گیا تو5 بار ایسوسی ایشنز نے مسنگ پرسنزکے بارے میں شکایات کیں، مسنگ پرسنز کے ایشو نے مجھے ہلا کر رکھ دیا، لاپتا افراد کے کیسز
کو ٹیک اپ کیا جائے گا۔ انہوں نے مزید کہا کہ عدالت عظمیٰ ایک ٹائٹینک ہے اس کو آپ تبدیل نہیں کر سکتے، میرا وژن ہے ، کیس فائل ہو تو سائل کا ای میل ایڈریس اور واٹس ایپ نمبر لیا جائے، سائل کا واٹس ایپ اور ای میل لینے سے کیس کی فائلنگ سے لے کر فیصلے تک تمام آرڈرز ملتے رہیں گے۔انہوں نے کہا کہ ارجنٹ درخواستوں کی سماعت کا میکنزم بھی بنا رہے ہیں، ہمارے ججز نے 8 ہزار کیسز مختصر وقت میں نمٹائے ہیں‘ کیس مینجمنٹ بہترکرنے سے انصاف کی فراہمی میں بہتری لائی جا سکتی ہے۔ چیف جسٹس نے کہا کہ انتخابی عذرداریوں کو سننے کے لیے اسپیشل بینچز بنائے جا چکے ہیں، فوجداری اور ٹیکس کے مقدمات کے لیے بھی اسپیشل بینچز کام کریں گے۔ انہوں نے کہا کہ بلوچی اور سندھی کا بھی خیال رکھنا چاہیے، سندھی اور بلوچی ججز کی اکنالیجنمٹ ہونی چاہیے، مستحق سائلین کو ڈسٹرکٹ جوڈیشری میں مفت وکیل کی سہولت دیں گے، جیلوں کے دوروں میں قیدیوں نے سال ہسال کیسز کے فیصلے نا ہونے کی شکایت کی‘ قیدیوں کی شکایت پر بہت شرمندہ ہوا‘عدالت عظمیٰ میں روزانہ پرانے 2، 3 کیسز کو اسپیشل بینچز میں سنا جائے گا۔ انہوں نے کہا کہ سپریم جوڈیشل کونسل کو متحرک کر دیا ہے، سپریم جوڈیشل کونسل میں ججز کے خلاف شکایات پرکارروائی چل رہی ہے، اے ڈی آر پر جسٹس منصود علی شاہ نے بہت کام کیا ہے، جسٹس منصور علی شاہ کو اے ڈی آر پر کام پر سلام پیش کرتا ہوں، اے ڈی آر کے نظام کے لیے فیڈرل جوڈیشل اکیڈمی میں ریٹائرڈ ججز کو ٹرین کیا جائے گا۔ چیف جسٹس نے کہا کہ ہم سب ججز آپس میں بھائی ہیں، وقت کے ساتھ ساتھ چیزیں ٹھیک ہوں گی، اپنی رائے کسی ساتھی دوست پر مسلط نہیں کرتا، میری رائے ہے مشترکہ ویزڈم کے ساتھ آگے چلنا چاہیے، عدلیہ کے لیے گزشتہ تین، چار سال مقدمات کی وجہ سے بڑے سخت تھے، وہ وقت گزر گیا جب ججز نے ایک دوسرے کے خلاف پوزیشن لی ہوئی تھی، ججز کسی الزام پر جواب نہیں دے سکتے۔

.

ذریعہ: Jasarat News

کلیدی لفظ: انہوں نے کہا کہ عدالت عظمی چیف جسٹس کے لیے

پڑھیں:

اپنی ایک سالہ کارکردگی عوامی عدالت لیکر جائینگے،مولانا ہدایت الرحمن

گوادر: امیر جماعت اسلامی بلوچستان و رکن صوبائی اسمبلی مولانا ہدایت الرحمن پریس کانفرنس کررہے ہیں

گوادر (نمائندہ جسارت) حق دو تحریک کے قائد جماعت اسلامی کے صوبائی امیر ایم پی اے گوادر مولانا ہدایت الرحمن بلوچ نے کہا ہے کہ گوادرمیں لاپتا افراد، غیرقانونی ٹرالرنگ، بارڈر بندش جیسے اہم ترین مسائل ہیں۔ صحت اور تعلیم کے شعبہ زبوں حالی کا شکار ہیں، اسمبلی میں ایم پی اے کے حلف کو ایک سال پورا ہونے جارہا ہے، اپنی 1 سالا کارکردگی عوامی عدالت میں لے کر جائیں گے۔ ان خیالات کا اظہار
انہوں نے پریس کلب گوادر میں پریس کانفرنس سے خطاب کرتے ہوئے کیا۔ انہوں نے کہا کہ سی پیک کا مرکز گوادر ہے، وفاقی حکومت گوادر میں اربوں ڈالرز کے فنڈ سے انٹرنیشنل ائرپورٹ بنایا لیکن گوادر کے شہری زندگی کی تمام بنیادی سہولتوں اور ضرورتوں سے محروم ہیں۔ سی پیک کے فنڈ سے 1500 کلومیٹر جدید سڑکیں بنائیں لیکن گوادر میں ایک کلومیٹر روڈ تعمیر نہیں کی گئی۔ انہوں نے کہا کہ ضلع گوادر اس وقت گوں نا گوں مسائل کا شکار ہے لیکن اہم ترین مسئلہ بلوچستان کے دیگر علاقوں کی طرح یہاں ماورائے قانون نوجوانوں کی گرفتاریاں ہیں اس وقت یہاں سے متعدد نوجوان غائب ہیں اور ان کی مائیں تڑپ رہی ہیں جبکہ ہم متعدد بارذمے داروں سے رابطہ کرکے اس اہم مسئلہ کو گوش گزار کرایا جنہوں نے ہمیں یقین دہانی کرائی ہے، اس مسئلے کو سلجھائیں گے۔ انہوں نے کہا کہ غیر قانونی ٹرالرنگ اور بارڈر بندش پر ہمارا موقف واضح ہے، غیرقانونی ٹرالرنگ ماہی گیروں کے روزگار پر لٹکتی ہوئی تلوار ہے جسے دور کرنے کے لیے ہمیں ابھی تک 100فیصد کامیابی نصیب نہیں ہوئی ہے لیکن ہماری جدوجہد جاری ہے۔ فشریز قوانین کو بہتر اور موثر کرنے کے لیے قانون سازی کا مسودہ بھی پیش کرچکے ہیں۔ انہوں نے کہا کہ بارڈر بندش اور اس پر آئے روز قدغنیں لگانا قطعی طورپر درست نہیں یہ لوگوں کے معاش کا اہم ذریعہ ہے، ہم نے اختیار داروں پر واضح کیا ہے کہ اگر بارڈر بند ہوگیا تو لاقانونیت جنم لے گی جو دہشت گردی کو فروغ دے گا، اس لیے لوگوں کو آزادانہ طورپر کاروبار کی اجازت دی جائے۔ انہوں نے کہا کہ ہم نے اپنی مختصر مدت میں عوامی مسائل حل کرنے کی کوشش کی ہے گوادر شہر میں جاری منصوبوں کی بروقت تکمیل کے لیے کوشش کررہے ہیں، جی ڈی اے گوادر نے 30 اپریل تک اپنے منصوبوں پر مزید پیش رفت کرنے کی تحریری ضمانت دے دی ہے۔ انہوں نے کہا کہ سیلاب سے ضلع گوادر کے جن زمین داروں کے بندات کو نقصان پہنچا تھا، ہم نے بلاتفریق اور کسی وابستگی سے بالاتر ہوکر شفاف طریقے سے بندات تعمیر کرکے دیے ہیں، جس کا کوئی بھی آڈٹ کرسکتا ہے۔ انہوں نے کہا کہ ضلع گوادر میں پانی کی دستیابی ممکن بنانے کے لیے ہماری کوششیں جاری ہیں، جیونی پائپ لائن منصوبے کو مکمل بنانے کے لیے ترجیحی اقدامات بروئے کار لارہے ہیں جبکہ جن علاقوں میں آبنوشی کے ذرائع ختم ہوچکے ہیں، وہاں پر ٹریکٹر کے ذریعے پانی فراہم کیا جارہا ہے۔ انہوں نے کہا کہ ضلع گوادر میں تعلیم، صحت اور بجلی کے مسائل بھی ہیں بجلی کے نظام کو بہتر بنانے کے لیے تجاویز پیش کی ہیں۔ عوام پر بجلی بقایاجات ختم کیے جائیں اور ناجائز بلنگ ٹیکس ختم ہونے چاہئیں، جس کے لیے ہم نے اسمبلی میں اپنا موقف پیش کیا ہے، جس کی حکومتی اور اپوزیشن اسمبلی ممبران نے بھی تائید کی ہے۔ انہوں نے کہا کہ مسائل زیادہ ہیں لیکن ان کا حل ہماری ذمے داری ہے، گوادر شہر میں جی ڈی اے منصوبوں اور اولڈ ٹاؤن کی حالت زار پر پبلک اکاؤنٹس کمیٹی کے اراکین کا بھی دورہ کرایا ہے تاکہ وہ بھی گوادر کی ترقی کا اپنی آنکھوں سے جائزہ لیں۔ انہوں نے کہا کہ اسمبلی فلور پر ہم اپنا بھرپور موقف پیش کررہے ہیں اور سخت موقف اپنا رہے ہیں، عوام کی نمائندگی کے لیے ہر حد تک جائیں گے۔ انہوں نے کہا کہ بحیثیت ایم پی اے کا حلف لیے ہوئے ایک سال پورا ہونے جارہا ہے، اپنی ایک سالا کارکردگی عوام کی عدالت میں لے کر جائیں گے اور خود کو احتساب کے پیش کردیں گے، 8 فروری کو عوامی عدالت لگا کر عوام سے رائے لی جائے گی۔ انہوں نے ایک سوال کے جواب میں آل پارٹیز اتحاد کے دھرنے اور عوامی مسائل پر ان کے تمام مطالبات کو جائز قرار دیا ہے اور اپنی حمایت کا اعلان کیا ہے، انہوں نے کہا کہ ان کا آل پارٹیز اتحاد کے کنوینر غفور ہوت سے مسلسل رابطہ ہے اور عنقریب دھرنا گاہ بھی جائیں گے۔ ایک سوال کے جواب میں گوادر میں بلدیاتی اداروں کی کارکردگی پر عدم اطمینان ظاہر کی ہے اور کہا کہ وہ عنقریب وارڈ کی سطح پر پلاننگ کر کے بلدیاتی اداروں کی کارکردگی پر کام کریں گے۔