پہلا ’’پنجاب دھی رانی پروگرام‘‘ لانچ، 51 اجتماعی شادیاں: اللہ میرے بیٹوں اور بیٹیوں کو آباد رکھے: مریم نواز
اشاعت کی تاریخ: 12th, January 2025 GMT
لاہور (نوائے وقت رپورٹ) دھی رانی سب کی سانجھی، وزیر اعلیٰ پنجاب مریم نواز شریف نے پاکستان کا پہلا’’پنجاب دھی رانی پروگرام‘‘ لانچ کر دیا۔ لاہور کے بہترین میرج ہال میں 51- اجتماعی شادیوں سے آغاز کر دیا گیا۔ نوبیاہتا جوڑوں میں پانچ کرسچن دولہا دلہن اور ایک سپیشل جوڑا بھی شامل تھا۔ وزیر اعلیٰ مریم نواز شریف نے تقریب میں موجود نوبیاہتا جوڑوں کو فرداً فرداً مبارکباد دی۔ انہوں نے دلہنوں کو پیار اور اظہار شفقت کیا اور دعائیں دیں۔ تقریب میں مولانا ڈاکٹر مفتی محمد رمضان سیالوی اور بشپ لاہور ندیم کامران نے باری باری دعائیں کرائیں۔ نو بیاہتا دولہا دلہن کو وزیر اعلیٰ مریم نواز شریف کی طرف سے بیڈ میٹرس، کھانے پکانے کا سامان، ڈنر سیٹ اور دیگر سامان کے تحائف دئیے گئے۔ وزیراعلیٰ مریم نواز شریف نے دھی رانی پروگرام سلامی کارڈ کی لانچنگ بھی کی۔ وزیراعلی مریم نواز شریف نے ہر دلہن سے اظہار شفقت کرتے ہوئے دھی رانی سلامی کارڈ بھی دیا۔ دھی رانی سلامی کارڈ کے ذریعے ہر نوبیاہتا جوڑا ایک لاکھ روپے سلامی حاصل کر سکے گا۔ دولہا دلہن اور تقریب کے شرکاء کو محکمہ سوشل ویلفیئر کی جانب سے پرتکلف ظہرانہ بھی دیا گیا۔ وزیر اعلیٰ مریم نواز شریف نے نوبیاہتا جوڑوں کے ساتھ گروپ فوٹو بھی بنوایا۔ وزیر اعلیٰ مریم نواز شریف نے تحفہ کے طور پر ملنے والے سامان کا بھی معائنہ کیا۔ پنجاب میں رواں سال میں مجموعی طور پر 3000 اجتماعی کرائی جائیں گی، پہلے مرحلے میں 1500 اجتماعی شادیاں کرائی جا رہی ہیں۔ وزیراعلی مریم نوازشریف کی ہدایت پر’’پنجاب دھی رانی پروگرام‘‘ کے لئے ایک ارب روپے کی خطیر رقم مختص کی گئی ہے۔ وزیراعلی پنجاب مریم نواز شریف نے ’’دھی رانی پروگرام‘‘ کی تقریب سے خطاب کرتے ہوئے کہاکہ ’’دھی رانی پروگرام‘‘ کے تحت موجود بیٹیوں اور بیٹوں، والدین اور اہلخانہ کو دل کی گہرائیوں سے شادی کی مبارکباد دیتی ہوں۔ اللہ تعالی آپ کو ہمیشہ خوش رکھے۔ دعا کے ساتھ میں بیٹیوں اور بیٹوں کی خوشیوں میں شامل ہونے کے لئے آئی ہوں۔ مریم نواز شریف نے کہاکہ اللہ تعالی میرے بیٹیوں اور بیٹوں کو آباد و شاد رکھے۔ نئی زندگی کی شروعات میں برکت ڈالے، دکھ سکھ کا ساتھی بنائے۔ بیٹیوں اور بیٹوں کی شادی میں شمولیت ایک جذباتی لمحہ ہے، بے حد خوش ہوں۔ شادی بچوں اور والدین کے لئے ایک جذباتی لمحہ ہوتا ہے۔ دعا گو ہوں۔ وزیراعلی مریم نواز شریف نے کہاکہ جتنے آپ کے والدین خوش ہیں، آپ خوش ہوں، میں بھی آپ کی ماں ہوں، میں بھی خوش ہوں۔ اللہ تعالی میرے بیٹیوں اور بیٹو ں کو سکھ اورچین والی زندگی دے۔ دریں اثناء وزیر اعلیٰ پنجاب مریم نواز شریف نے پھالیہ کے نواح میں آتشبازی کارخانہ میں دھماکے سے 6 قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔ وزیر اعلیٰ مریم نواز شریف نے سوگوار خاندانوں سے دلی ہمدردی و تعزیت کا اظہار کیا اور زخمیوں کو بہترین طبی سہولتیں فراہم کرنے کی ہدایت کی۔ وزیر اعلیٰ مریم نواز شریف نے آتشبازی کے غیر قانونی کاروبار پر پابندی یقینی بنانے کا حکم دیا اور کہاکہ متاثرہ خاندانوں کے دکھ میں برابر کے شریک ہیں۔
.ذریعہ: Nawaiwaqt
کلیدی لفظ: مریم نواز شریف نے دھی رانی پروگرام وزیر اعلی
پڑھیں:
ٹرانس جینڈرز کمیونٹی کیلئے ٹیکنیکل سکلز ٹریننگ پروگرام شروع، مریم نواز ترکیہ پہنچ گئیں
لاہور (نوائے وقت رپورٹ) وزیراعلیٰ مریم نواز شریف کا معاشرے کے ضعیف اور نظرانداز طبقے کا احساس، صوبے کی تاریخ میں پہلی مرتبہ ٹرانس جینڈرز کمیونٹی کے لئے باعزت اور باوقار زندگی گزارنے کے راستے کھل گئے۔ مریم نواز کی ہدایت پر ٹرانس جینڈرز کمیونٹی کے لئے ٹیکنیکل سکلز کی ٹریننگ کا جامع پروگرام شروع کر دیا گیا جس سے ٹرانس جینڈرز بھیک نہیں، باعزت روزگار کمائیں گے۔ وزیراعلیٰ کے ویژن کے تحت ٹیکنیکل سکلز ٹریننگ پروگرام سے 1600 ٹرانس جینڈرز کو پہلے مرحلے میں خصوصی طورپر پنجاب سکلز ڈویلپمنٹ فنڈ پروگرام کے تحت مختلف فنون سکھائے جائیں گے۔ سکلز سے ٹرانس جینڈرز کو آئی ٹی، فری لانسنگ کی ٹریننگ کے ذریعے معاشی طور پر خود مختار بنایا جائے گا۔ پنجاب میں پہلی مرتبہ ٹرانس جینڈرز کے لئے ہیلتھ کیئر اسسٹنٹ سکل ٹریننگ کا اہتمام کیا جائے گا۔ باعزت روزگار کمانے کیلئے ٹرانس جینڈرز کو ٹیلرنگ اور فیشن ڈیزائننگ‘ الیکٹریکل ورک، سولر ٹیکنالوجی، بیوٹی سروسز اور کْلنری آرٹس کی ٹریننگ دی جائے گی۔ وزیراعلیٰ نے کہا کہ ٹرانس جینڈر کے ساتھ بے رحمانہ رویہ افسوسناک ہے۔ ٹرانس جینڈرز سماجی بائیکاٹ اور مناسب روزگار نہ ملنے کی وجہ سے بھیک مانگنے پر مجبور ہیں۔ ٹرانس جینڈرز کو سکل سکھا کر ثابت کریں گے کہ ٹیلنٹ کا کوئی جینڈر نہیں۔ ٹرانس جینڈرز کی ٹریننگ ہی نہیں بلکہ معاشرے میں باوقار مقام دینے کی جدوجہد کررہے ہیں۔ انقلابی ووکیشنل ٹریننگ پروگرام سے ٹرانس جینڈر کی زندگیاں بدلیں گی۔ علاوہ ازیں مریم نواز شریف ترکیہ کے دورے پر اناطولیہ پہنچ گئیں۔ اناطولیہ کے ڈپٹی گورنر پروفیسر ڈاکٹر سعد سید اوغلو نے مریم نواز کا استقبال کیا۔ ترکیہ کی خاتون اول محترمہ ایمنہ اردگان کی دعوت پر وزیراعلیٰ مریم نواز شریف ترکیہ کا دورہ کر رہی ہیں۔ وزیراعلیٰ مریم نواز شریف ڈپلومیسی فورم 2025ء کے تحت بین الاقوامی کانفرنس میں شرکت کریں گی اور آج خصوصی خطاب بھی کریں گی۔ ڈپلومیسی کانفرنس کا عنوان ’’تقسیم دنیا میں مستقبل کی تعمیر، تعلیم تبدیلی لانے کی ایک طاقت‘‘ رکھا گیا ہے۔ پنجاب کی سینئرصوبائی وزیر مریم اورنگزیب بھی وزیر اعلیٰ مریم نواز شریف کے ساتھ ہیں۔
4111 غیر قانونی مقیم تارکین کو ملک سے ڈی پورٹ کردیا گیا