ٹریفک حادثات: انسانی جانوں کا نہ تھمنے والا ضیاع
اشاعت کی تاریخ: 12th, January 2025 GMT
شہر قائد میں واٹر ٹینکرز کی بے قابو رفتار اور قانون شکنی کی وجہ سے ہونے والے حادثات ایک خوفناک حقیقت بن چکے ہیں۔ تازہ ترین واقعات میں 6 قیمتی جانوں کا ضیاع اور متعدد افراد کے زخمی ہونے کی اطلاع نے عوام کے غم و غصے کو بڑھا دیا ہے۔ شہید ملت روڈ پر پیش آنے والے حادثے میں دو موٹر سائیکل سوار اپنی جان سے ہاتھ دھو بیٹھے، جبکہ ایک شخص زخمی ہوا۔ اسی طرح حب ریور روڈ پر دو مزید افراد واٹر ٹینکر کی زد میں آکر جاں بحق ہوگئے۔ ان المناک واقعات کے بعد ٹینکرز کے ڈرائیورز ہمیشہ کی طرح فرار ہونے میں کامیاب ہوگئے، اور قانون نافذ کرنے والے ادارے حسب معمول بے بسی کا مظاہرہ کرتے رہے۔ یہ حادثات صرف چند مثالیں ہیں جو اس بات کی نشاندہی کرتی ہیں کہ شہر کی سڑکیں غیر محفوظ ہو چکی ہیں۔ ان واٹر ٹینکرز کے ڈرائیورز کی لاپروائی، غیر تربیت یافتہ ہونا اور قوانین کی خلاف ورزی معمول بن چکی ہے۔ ان کے ساتھ ساتھ، قانون نافذ کرنے والے اداروں کی نااہلی اور مجرموں کے خلاف کارروائی میں ناکامی نے ان حادثات کو مزید بڑھاوا دیا ہے۔ گزشتہ سال کے اعداد وشمار کو اگر دیکھا جائے تو کراچی میں ٹریفک حادثات کے نتیجے میں 771 افراد جان کی بازی ہار چکے ہیں اور 8014 زخمی ہوئے ہیں۔ ان میں مرنے والے 601 مرد، 88 خواتین، 61 بچے اور 21 بچیاں شامل ہیں، جبکہ زخمیوں میں 6714 مرد، 1064 خواتین، 290 بچے اور 79 بچیاں شامل ہیں۔ شہریوں کا مشتعل ہوکر احتجاج کرنا اور ٹینکرز کو آگ لگانا ان کے اندر بڑھتے ہوئے مایوسی اور بے بسی کے جذبات کو ظاہر کرتا ہے، لیکن یہ عمل مسئلے کا حل نہیں بلکہ مزید نقصان کا باعث بن سکتا ہے۔ عوام کو قانونی راستہ اختیار کرنا چاہیے، لیکن یہ بھی ضروری ہے کہ حکومت اور متعلقہ ادارے اپنی ذمے داریوں کو نبھائیں۔ واٹر ٹینکرز کے ڈرائیورز کی تربیت کو یقینی بنایا جائے، ان کے روٹ اور اوقات کار کو منظم کیا جائے، اور سخت قوانین کے ساتھ ان پر عمل درآمد کو یقینی بنایا جائے۔ عوامی آگاہی مہم نمائشی نہ ہوں وہ بھی وقت کی اہم ضرورت ہے تاکہ ٹریفک قوانین کی پاسداری کو فروغ دیا جا سکے۔ حکومت کو چاہیے کہ وہ ان حادثات کی روک تھام کے لیے ٹھوس اقدامات کرے، تاکہ شہری اپنی زندگی کو محفوظ محسوس کریں۔
.ذریعہ: Jasarat News
پڑھیں:
انسانی سمگلنگ کرنے والے عناصر کا سخت احتساب کیا جائے،مولانا فضل الرحمان کا تارکین وطن کی کشتی حادثہ پررد عمل
اسلام آباد (اُردو پوائنٹ اخبارتازہ ترین - این این آئی۔ 17 جنوری2025ء)جے یو آئی سربراہ مولانا فضل الرحمان نے اسپین جانے والے تارکین وطن کی کشتی حادثہ پر ردعمل کا اظہار کرتے ہوئے کہاہے کہ انسانی سمگلنگ کرنے والے عناصر کا سخت احتساب کیا جائے۔ اپنے بیان میں مولانا فضل الرحمان نے کہاکہ دعاء ہے کہ اللہ کریم کشتی حادثہ میں جاں بحق ہونے والے پاکستانیوں کی مغفرت فرمائے۔ انہوںنے کہاکہ اس قسم کے حادثات میں مسلسل اضافہ تشویشناک ہے۔(جاری ہے)
انہوںنے کہاکہ جوان اپنے ملک میں مناسب روزگار کے مواقع میسر نہ ہونے پر اتنے بھیانک سفر کا فیصلہ کرتے ہیں۔انہوںنے کہاکہ انسانی سمگلنگ کرنے والے عناصر کا سخت احتساب کیا جائے۔مولانا فضل الرحمان نے کہاکہ لاشوں کی وطن واپسی سمیت متاثرہ خاندانوں کو درست معلومات فراہم کی جائیں۔انہوںنے کہاکہ ریاست کی ذمہ داری ہے کہ وہ عوام کے لئے روزگار کے مواقع فراہم کرے کہ عوام کو ایسے جان لیوا فیصلوں کی ضرورت ہی نہ پڑے۔انہوںنے کہاکہ اللہ کریم لواحقین کو صبر جمیل عطاء فرمائے۔
سیکیورٹی فورسز کا بلوچستان میں کارروائی، متعدد دہشت گردوں کے ٹھکانے تباہ