کراچی؛ نجی یونیورسٹی نے کاسمیٹکس سائنس میں بیچلرز ڈگری متعارف کرادی
اشاعت کی تاریخ: 9th, January 2025 GMT
کراچی:
کاسمیٹکس کے شوقین افراد تعلیم کے ساتھ اپنا شوق بھی پورا کرسکتے ہیں،کورنگی کریک میں قائم نجی یونیورسٹی نے کاسمیٹکس سائنس کے شعبے میں بیچلر پروگرام کا آغاز کردیا۔
کورنگی کریک میں قائم سلیم حبیب یونیورسٹی نے کاسمیٹکس کے شعبے میں 4 سالہ بیچلرز آف سائنسز (بی ایس) پروگرام متعارف کرا دیا ہے جس میں طلبا کو اس شعبے میں تعلیم و تربیت دی جائے گی۔ یہ ڈگری 8 سیمسٹرز پر مشتمل ہے اور اس میں 124 گھنٹے کی تعلیمی مدت شامل ہے۔
اس پروگرام میں طلبا کو کاسمیٹکس، پروڈکٹ ڈویلپمنٹ، فارمولیشن، مارکیٹنگ اور کاروباری انتظام کے بارے میں تعلیم دی جائے گی تاکہ وہ میک اپ اور بیوٹی کی صنعت میں کامیاب کیریئر کے لیے تیار ہو سکیں۔ نئے پروگرام کے تحت طلبا کو کاسمیٹکس سائنس کے بنیادی اصولوں سے لے کر جدید تکنیکوں تک تمام اہم پہلوؤں پر تعلیم دی جائے گی۔
یہ پروگرام نہ صرف میک اپ کی مہارتوں کو نکھارنے کا موقع فراہم کرے گا بلکہ انہیں اس صنعت کی کاروباری، مارکیٹنگ اور سیلز کی تفصیلات سے بھی آگاہ کرےگا۔
فارمیسی کی فیکلٹی کے ڈین ڈاکٹر نور کامل نے ’’ ایکسپریس ‘‘ سے بات کرتے ہوئے کہا یہ 4 سالہ بی ایس پروگرام میک اپ اور بیوٹی کے شوقین افراد کے لیے ایک سنہری موقع ہے تاکہ وہ اپنے شوق کو ایک پیشہ ورانہ کیریئر میں تبدیل کر سکیں۔
پروگرام کوآرڈینیٹر اور چیئرپرسن کاسمیٹک سائنسز ڈاکٹر غزالہ عشرت نے ’’ ایکسپریس ‘‘ سے بات کرتے ہوئے کہا کہ اس پروگرام کی مدد سے، طلبہ اپنے میک اپ آرٹسٹ بننے کے ساتھ ساتھ بیوٹی انڈسٹری میں مختلف شعبوں میں مہارت حاصل کر سکتے ہیں، ہم کوشش کر کے ہربل اجزاء استعمال کریں گے تا کہ کم لاگت اور بنا کسی نقصان کے طلبہ کی تربیت بھی کریں اور کاسمیٹکس بنانے کا نئا طریقہ متعارف کروائیں۔
4 سالہ بی ایس پروگرام کے آغاز سے اس شعبے میں مزید ترقی اور جدت کی توقع کی جا رہی ہے۔ رواں ماہ کے اختتام تک اس شعبے میں داخلے مکمل کر لیے جائیں گے ، اس پروگرام میں میک اپ کے معروف برانڈز سے بھی اشتراک کیا ہے تا کہ طلبہ کو ابھی سے انڈسٹریل آگاہی دے سکیں۔
طلبہ نے کاسمیٹکس سائنس کی ڈیمو کلاسز لیتے ہوئے خوشی کا اظہار کیا اور کہا کہ اب اپنے شوق کو اپنی پہچان بنا سکتے ہیں اس میں ہمیں جو کیمیکلز نقصان دہ ہیں وہ بھی بتایا جائے گا تا کہ ہم اچھے پروڈکٹس بنائیں۔
طلبہ نے کہا کہ ویسے پاکستان میں بیوٹی کے نام سے گورا رنگ سمجھا جاتا ہے جبکہ ایسا نہیں ہے ،بیوٹی کا مطلب اپنے حسن کو نکھارنا ہے، آج کل ہر میک اپ کے خصوصی بلاگرز ہیں، اس کریئر میں لاتعداد مواقع ہیں جس سے بے روزگاری میں کمی آئے گی اور ملکی حیثیت پر ہی کاسمیٹکس تیار کیے جاسکیں گے۔
.ذریعہ: Express News
پڑھیں:
چیف جسٹس سے ترکیہ اور ایران کے سفیر کی ملاقات، عدالتی شعبے میں تعلقات کوفروغ دینے پر اتفاق
اسلام آباد: چیف جسٹس یحییٰ آفریدی سے ترکیہ اور ایران کے سفیروں نےالگ الگ ملاقات کی، ملاقاتوں میں عدالتی شعبے میں دوطرفہ تعلقات کو مزید وسعت دینے پر اتفاق کیا گیا۔
سپریم کورٹ کی جانب سے اعلامیے کے مطابق چیف جسٹس آف پاکستان یحییٰ آفریدی سے ترکیہ کے سفیر عرفان نذیر اوغلو، اور ایران کے سفیر ڈاکٹر رضا امیری مقدم نے الگ الگ ملاقات کی، چیف جسٹس نے دونوں سفیروں کا خیرمقدم کیا اور پاکستان کے ترکی اور ایران کے ساتھ دیرینہ، برادرانہ تعلقات کی تعریف کی، اور تینوں ممالک کے عوام کے درمیان مشترکہ ثقافتی ورثے اور باہمی احترام کو اجاگر کیا۔
ترک سفیر کے ساتھ ملاقات میں چیف جسٹس نے پاکستان اور ترکی کے درمیان مضبوط عدالتی تعلقات کو تسلیم کیا اور شریعہ اکیڈمی کے ساتھ ترکی کے عدالتی تبادلے کے پروگراموں کے ذریعے جاری تعاون کی تعریف کی۔
چیف جسٹس نے زور دیا کہ ضلعی عدلیہ کو بھی عدالتی تعاون کا حصہ بنایا جائے تاکہ عدالتی افسران کو عدالت کے انتظام، ڈیجیٹلائزیشن اور اے آئی ٹیکنالوجی کے استعمال میں ترکی کے طریقوں سے استفادہ کرنے کا موقع مل سکے۔
ترک سفیر نے چیف جسٹس ترکیہ کی جانب سے خیرسگالی کا پیغام پہنچایا اور عدالتی تعاون کو مزید فروغ دینے میں ترکیہ کی دلچسپی کا اعادہ کیا۔
ایرانی سفیر کے ساتھ ملاقات میں چیف جسٹس نے پاکستان اور ایران کے درمیان عدالتی تعاون کی اہمیت کا اعادہ کیا جس کی ایرانی سفیر نے بھی تائید کی۔
ایرانی سفیرنے چیف جسٹس یحییٰ آفریدی کی تقرری پر ایران کے چیف جسٹس کی جانب سے مبارکباد پیش کی اور انہیں ایران کے سرکاری دورے کی دعوت دی، انہوں نے یہ بھی بتایا کہ ایران کے چیف جسٹس مستقبل قریب میں پاکستان کا دورہ کرنے کا ارادہ رکھتے ہیں۔
چیف جسٹس نے کہا کہ اعلیٰ سطح کے وفود کے تبادلے ادارہ جاتی روابط کو مضبوط بناتے ہیں۔
چیف جسٹس نے دونوں سفرا کو یادگاری تحائف پیش کیے، جبکہ ترکیہ اور ایران کے سفرا نے بھی چیف جسٹس کو یادگاری شیلڈز پیش کیں۔
گھر سے بے دخل خاتون ٹک ٹاکر نے نہر میں چھلانگ لگا دی